1, 2. (a) Inki mambu nge ke vingila kumona na Paladisu? (Tala kifwanisu yina kele na luyantiku ya disolo.) (b) Inki ta pesa beto kiese mingi kuluta na nsi-ntoto ya mpa?

YA KIELEKA, beto ke vingila “luzingu ya mvula na mvula.” Ntumwa Polo bingaka yo “luzingu ya kieleka.” (Tanga 1 Timoteo 6:12, 19.) Bantu mingi ta zinga mvula na mvula na Paladisu awa na ntoto. Nge lenda yituka na kuzaba nde konso kilumbu bantu ta telamaka ti mavimpi ya mbote, na kiese, mpi na ngemba. (Yezaya 35:5, 6) Yindula kiese yina nge ta vanda na yo ntangu nge ta lutisaka ntangu ti bantu ya dibuta na nge, banduku na nge, mpi bantu ya nkaka yina ta futumuka! (Yoane 5:28, 29; Bisalu 24:15) Nge ta longuka mitindu ya mpa ya kusala mambu mpi nge ta kuma kusala mbote bima yina nge ke zolaka. Mu mbandu, nge lenda longuka mambu mingi ya siansi, mutindu ya kubula miziki to mutindu ya kusala nge mosi pula ya nzo na nge.

² Bima yai yonso ya kitoko ta pesa beto kiese mingi, kansi kima ta pesa beto kiese kuluta kele kusambila Yehowa. Yindula mutindu luzingu ta vanda ntangu bantu yonso ta santisaka zina ya Yehowa  mpi ta ndima nde yandi vanda Mfumu na bo. (Matayo 6:9, 10) Beto ta vanda na kiese ya kumona mutindu ntoto ta fuluka ti bantu ya kukuka kaka mutindu Nzambi yidikaka na luyantiku. Diaka, yindula mutindu beto ta kumisa bangwisana na beto ti Yehowa ngolo, ntangu beto ta kuma malembe-malembe bantu ya kukuka!—Nkunga 73:28; Yakobo 4:8.

3. Bubu yai beto fwete kudibongisa sambu na kuzinga na wapi?

³ Beto ke ndima nde Yehowa ta sala mambu yai yonso ya kitoko sambu “Nzambi lenda sala mambu yonso.” (Matayo 19:25, 26) Kana beto ke zola kuzinga mvula na mvula na nsi-ntoto ya mpa, yai kele ntangu ya ‘kusimba ngolo’ luzingu ya mvula na mvula. Beto me zaba nde kilumbu ya Yehowa me kuma pene, yo yina, beto fwete zinga na mutindu mosi ya ke monisa nde beto ke vingila yo, na konso ntangu yina yo ta kwisa. Beto fwete sala yonso yina beto lenda sala bubu yai sambu na kudibongisa na kuzinga na nsi-ntoto ya mpa. Bika beto tala mutindu beto lenda sala yo.

4. Inki mutindu beto lenda kudibongisa bubu yai sambu na kuzinga na nsi-ntoto ya mpa? Pesa mbandu.

⁴ Inki mutindu beto lenda kudibongisa bubu yai sambu na kuzinga na nsi-ntoto ya mpa? Kana beto ke kudibongisa sambu na kukwenda kuzinga na insi ya nkaka, beto fwete sala mambu yina ke monisa nde beto ke kudibongisa sambu na kuzinga na insi yina. Mu mbandu, beto lenda yantika kulonguka ndinga ya bantu ya insi yina mpi mutindu na bo ya kuzinga. Beto lenda meka mpi madia na bo. Mutindu mosi mpi, beto lenda kudibongisa sambu na kuzinga na nsi-ntoto ya mpa, kana beto ke sala mambu bonso nde beto ke zinga dezia kuna. Bika beto tadila mutindu beto lenda sala yo.

5, 6. Inki mutindu kulemfuka na lutwadisu ya organizasio ya Yehowa ta sadisa beto na kudibongisa na kuzinga na nsi-ntoto ya mpa?

⁵ Satana ke zolaka nde bantu kuyindula nde bo lenda sala mambu yonso yina bo me zola. Bantu mingi ke yindulaka nde bo fwete vanda na kimpwanza mpi nde kulemfukila Nzambi kele mfunu ve. Inki mbuma yo me butaka? Bantu mingi ke niokwama mpi ke zinga ve na kiese. (Yeremia 10:23) Kansi, Yehowa kele Mfumu mosi ya zola. Na nsi-ntoto ya mpa ntangu bantu yonso ta lemfukilaka yandi, bo ta zingaka mbote kibeni!

⁶ Na nsi-ntoto ya mpa beto ta landa lutwadisu ya organizasio ya Yehowa yina ta sadisa beto na kukumisa ntoto Paladisu ya kitoko. Yo ta sadisa beto mpi na kulonga bantu yina ta futumuka. Yehowa ta pesa beto bisalu mingi ya kusala. Kansi nki kikalulu beto ta monisa kana bampangi yina ta vanda ti mukumba ya kutwadisa kulomba beto na kusala diambu mosi yina beto ke zolaka ve? Keti beto ta lemfuka? Keti beto ta sala kikesa sambu na kusala yo mpi kusepela ti kisalu yango? Sambu na kudibongisa na kuzinga mvula na mvula na nsi-ntoto ya mpa, beto fwete lemfuka banda bubu yai, na organizasio ya Yehowa.

7, 8. (a) Sambu na nki beto fwete sala na kuwakana ti bampangi yina ke twadisa? (b) Inki bansoba Bakristu ya nkaka me salaka? (c) Na ntoto ya mpa, inki kivuvu beto fwete vanda ti yo?

⁷ Kana beto ke zola kuyilama sambu na kuzinga na nsi-ntoto ya mpa, beto fwete sepela na luzingu yina beto kele na yo, kusala na kuwakana ti organizasio ya Yehowa mpi bampangi ya nkaka. Mu mbandu, kana bo me pesa beto kisalu, beto fwete sala ti bampangi ya nkaka na luzolo yonso, na kuwakana mpi na kiese. Kana bubu yai beto ke sala na kuwakana  ti bampangi yina ke twadisa, na nsi-ntoto ya mpa, beto ta vanda ya kuyilama na kusala na kuwakana ti bampangi yina ta twadisa. (Tanga Baebreo 13:17.) Ntangu bantu ya Izraele kotaka na Ntoto ya Lusilu, bo pesaka bo bisika ya kuzinga. (Kutanga 26:52-56; Yozue 14:1, 2) Na nsi-ntoto ya mpa beto me zaba ve kisika yina bo ta pesa beto sambu na kuzinga. Kansi kana bubu yai beto ke sala bikesa ya kuwakana ti bampangi ya nkaka, na nsi-ntoto ya mpa beto ta vanda na kiese ya kusala luzolo ya Nzambi na konso kisika yina beto ta zinga.

⁸ Yindula dibaku ya nene yina nge ta vanda na yo ya kusala na nsi-ntoto ya mpa na nsi ya Kimfumu ya Nzambi! Yo yina bubu yai, beto kele na kiese ya kusala na bumosi ti organizasio ya Yehowa mpi kusala mambu yonso yina organizasio ke lomba beto. Kansi, bantangu ya nkaka mukumba na beto lenda soba. Mu mbandu, na Betele ya États-Unis, bo katulaka bampangi ya nkaka ya dibuta ya Betele, mpi bo tindaka bo na bateritware. Diaka, bampangi ya nkaka yina vandaka na kisalu ya nziunga me kumaka bapasudi-nzila ya nene sambu bo me kuma bambuta to sambu na bikuma ya nkaka. Bo kele na kiese na kisalu na bo yina ya mpa, mpi Yehowa ke sakumuna bo. Kana beto ke samba sambu Yehowa kusadisa beto, kana beto ke sala bikesa sambu na kusadila yandi mpi kana beto ke sepela ti konso kisalu yina yandi ke pesa beto, beto ta vanda na kiese mpi Yehowa ta sakumuna beto. (Tanga Bingana 10:22.) Inki beto ta sala kana na nsi-ntoto ya mpa beto ke zola kuzinga kisika mosi buna kansi organizasio ya Yehowa ke lomba beto na kuzinga na kisika ya nkaka? Na konso kisika yina beto ta zinga, mpi konso kisalu yina beto ta sala, beto ta vanda na ntonda na luzingu yina beto ta vanda na yo na nsi-ntoto ya mpa.—Nehemia 8:10.

9, 10. (a) Sambu na nki kumonisa ntima-nda na ntoto ya mpa ta vanda mfunu? (b) Bubu yai, inki mutindu beto lenda monisa nde beto kele ti kikalulu ya ntima-nda?

⁹ Na nsi-ntoto ya mpa, bantangu ya nkaka yo ta lomba nde beto monisa ntima-nda. Mu mbandu, beto lenda wa bantu ya nkaka ke sepela sambu bantu ya mabuta na bo me futumuka. Kansi, ziku yo ta lomba nde beto vingila tii ntangu bantu yina beto vandaka kuzola ta futumuka. Kana mambu kusalama mutindu yina, keti beto ta sepela kumosi ti bantu yina ke sepela mpi ta monisa ntima-nda? (Baroma 12:15) Kana bubu yai beto ke sala bikesa ya kumonisa ntima-nda ntangu beto ke vingila kulungana ya balusilu ya Yehowa, yo ta sadisa beto mpi na kumonisa ntima-nda na ntangu yina.—Longi 7:8.

¹⁰ Kumonisa ntima-nda ntangu bansoba ke salama na mutindu na beto ya kubakisa bakieleka ya Biblia kele mpi mutindu mosi ya kudibongisa sambu na kuzinga na nsi-ntoto ya mpa. Keti beto ke longukaka bantendula yai ya mpa mpi ke monisaka ntima-nda kana beto ke bakisa yo ve mbote-mbote? Kana beto ke monisa ntima-nda bubu yai, na nsi-ntoto ya mpa, beto ta monisaka mpi ntima-nda konso ntangu yina Yehowa ta zabisaka  beto mambu ya mpa.—Bingana 4:18; Yoane 16:12.

11. Sambu na nki bubu yai beto fwete sala bikesa ya kulolula bantu ya nkaka?

¹¹ Kulolula kele mpi mutindu ya nkaka ya kudibongisa sambu na kuzinga na nsi-ntoto ya mpa. Na Luyalu ya Kristu ya Bamvula Funda, mwa ntangu ta luta sambu bantu yonso kukuma ya kukuka. (Bisalu 24:15) Keti beto ta monisila bantu ya nkaka zola mpi ta lolula bo? Kana bubu yai beto ke sala bikesa ya kulolula bantu ya nkaka mpi ke sala bangwisana ya mbote ti bo, na nsi-ntoto ya mpa yo ta vanda ve mpasi na kuzola bantu mpi kulolula bo.—Tanga Bakolosai 3:12-14.

12. Sambu na nki beto fwete kudibongisa bubu yai sambu na kuzinga na nsi-ntoto ya mpa?

¹² Na nsi-ntoto ya mpa, ziku beto ta zwaka ve bima yonso yina beto ta vandaka na yo mfunu kaka na ntangu yina beto kele na yo mfunu, ziku bantangu ya nkaka yo ta lomba nde beto vingila mwa fioti. Kansi, yo ta lombaka nde beto monisa ntonda mpi kusepela na luzingu yina beto ta vanda na yo. Ya kieleka, beto ta vanda na mfunu ya kumonisa bikalulu yina Yehowa ke lombaka beto na kumonisa bubu yai. Yo yina kana beto ke monisa bikalulu yina bubu yai, beto ta monisa nde beto ke kwikilaka kibeni nde Yehowa ta pesa beto nsi-ntoto ya mpa mpi nde beto ke kudibongisa sambu na kuzinga mvula na mvula. (Baebreo 2:5; 11:1) Diaka, beto ta monisa nde beto kele kibeni na mfunu ya nsi-ntoto yina bantu yonso ta lemfukilaka Yehowa.

13. Inki beto ta tula na kisika ya ntete na nsi-ntoto ya mpa?

¹³ Na nsi-ntoto ya mpa, beto ta vanda ti bima yonso yina kele mfunu sambu na kuzinga mbote. Kansi bangwisana na beto ti Yehowa kele kima yina ta pesaka beto kiese mingi kuluta. (Matayo 5:3) Beto ta vanda ti mambu mingi ya kusala na kisalu ya Yehowa, mpi beto ta sepelaka na kusadila yandi. (Nkunga 37:4) Yo yina, kana bubu yai beto ke tula mambu ya kimpeve na kisika ya ntete, beto ke kudibongisa sambu na kuzinga na nsi-ntoto ya mpa.—Tanga Matayo 6:19-21.

14. Inki balukanu batoko lenda kuditudila na kisalu ya Yehowa?

 ¹⁴ Inki mutindu beto lenda kuma diaka na kiese ya mingi ya kusadila Yehowa? Mutindu mosi ya kukuma na kiese kele kuditudila balukanu. Kana nge kele toko, yindula na mutindu nge lenda sadila luzingu na nge na kisalu ya Yehowa. Nge lenda sala bansosa na mikanda na beto sambu na kuzaba mitindu ya kisalu ya ntangu yonso. Ebuna nge lenda kuditudila lukanu ya kusala mosi na kati ya bisalu yina. * Solula ti bampangi yina me sala bamvula mingi na kisalu ya ntangu yonso. Kana nge sadila Yehowa na luzingu na nge, nge ta baka formasio ya mbote yina ta sadisa nge na kusadila yandi na nsi-ntoto ya mpa.

15. Inki kele balukanu ya nkaka yina beto lenda kuditudila na kisalu ya Yehowa?

¹⁵ Beto kele na balukanu mingi yina beto lenda kuditudila na kisalu ya Yehowa. Mu mbandu, beto lenda kuditudila lukanu ya kulonguka mutindu ya mpa ya kusamuna. Beto lenda sala bikesa ya kubakisa minsiku ya Biblia mbote-mbote mpi mutindu ya kusadila yo na luzingu na beto. Beto lenda mpi kutomisa mutindu na beto ya kutanga, ya kutuba na ntwala ya bantu mpi ya kupesa bakomantere na balukutakanu. Diambu ya mfunu kele nde, kana nge ke kuditudila balukanu na kisalu ya Yehowa, yo ta sadisa nge na kukuma kikesa mpi na kudibongisa sambu na kuzinga na nsi-ntoto ya mpa.

16. Sambu na nki kusadila Yehowa kele mutindu mosi ya kuluta mbote ya kuzinga?

¹⁶ Keti mutindu beto ke kudibongisa na kuzinga na nsi-ntoto ya mpa ya Nzambi ke tendula nde bubu yai beto ke zinga ve mbote? Ve! Kusadila Yehowa kele mutindu mosi ya kuluta mbote ya kuzinga. Beto ke sadilaka yandi ve sambu bantu ya nkaka ke pusa beto na ngolo to sambu kaka na kuguluka na mpasi ya nene. Kana beto kele ti bangwisana ya mbote ti Yehowa, beto ta vanda ti luzingu ya mbote mpi ya kiese. Yandi gangaka beto sambu beto zinga mutindu yina. Kuzola  Nzambi mpi kundima lutwadisu na yandi kele mambu ya mbote kuluta mambu yonso ya nkaka. (Tanga Nkunga 63:2-4.) Kana beto yonso ke sambila Yehowa na ntima ya mvimba, beto ta vanda na kiese. Bampangi ya nkaka yina me sadilaka Yehowa bamvula mingi, lenda tuba na masonga yonso nde, yo kele mutindu mosi ya kuluta mbote ya kuzinga.—Nkunga 1:1-3; Yezaya 58:13, 14.

17. Kusala mambu yina beto ke zolaka mpi kulutisa ntangu ti bampangi ta baka nki kisika na Paladisu?

¹⁷ Na Paladisu, beto ta sepelaka ntangu beto ta salaka mambu yina beto ke zolaka mpi beto ta sepelaka kulutisa ntangu ti bampangi ya nkaka. Nkutu, Yehowa me gangaka beto ti nzala ya kusepela mpi yandi ke sila nde yandi ta ‘pesaka beto bima mingi mutindu kele nzala na beto.’ (Nkunga 145:16; Longi 2:24) Beto ke vandaka na mfunu ya kupema mpi ya kulutisa ntangu ti bantu ya nkaka; kansi, bantangu ya mutindu yai ke pesaka diaka kiese mingi ntangu beto ke tulaka bangwisana na beto ti Yehowa na kisika ya ntete. Yo ta vanda mpi mutindu mosi na nsi-ntoto ya mpa. Yo yina, yo kele mbote na kulanda na “kusosa ntete Kimfumu” mpi kutula dikebi na balusakumunu yina beto ke bakaka na kisalu ya Yehowa.—Matayo 6:33.

18. Inki mutindu beto lenda monisa nde beto ke kudibongisa na kuzinga mvula na mvula na Paladisu?

¹⁸ Na nsi-ntoto ya mpa, luzingu ta vanda kitoko kibeni. Bika beto kudibongisa bubu yai sambu na kuzinga “luzingu ya kieleka.” Bika beto yedisa bikalulu yina Yehowa ke lombaka beto mpi kusamuna nsangu ya mbote na kikesa yonso. Bika beto wa mpi kiese yina bampangi ke waka ntangu bo ke tulaka lusambu ya Yehowa na kisika ya ntete na luzingu na bo. Beto kele ti kivuvu ya ngolo nde, na nsi-ntoto ya mpa Yehowa ta lungisa balusilu na yandi yonso. Yo yina, bika beto zinga bonso nde beto kele dezia na nsi-ntoto ya mpa!