1, 2. Inki mutindu Yehowa longaka beto na kuzola yandi?

MUTINDU ya kuluta mbote yina tata lenda longa bana na yandi kele kupesa mbandu ya mbote yina bana fwete landa. Ntangu tata ke monisilaka bana na yandi zola, yandi ke longaka bo mutindu bo mpi lenda monisa zola. Kele ti muntu ve me zolaka beto kuluta Yehowa, Tata na beto. Yo yina, beto ke zolaka yandi “sambu yandi zolaka beto ntete.”​—1 Yoane 4:19.

² Na nki mutindu Yehowa “zolaka beto ntete”? Biblia ke tuba nde, “Ntangu beto vandaka ntete bansumuki, Kristu fwaka sambu na beto.” (Baroma 5:8) Yehowa, Tata na beto ya zola, pesaka Mwana na yandi bonso nkudulu sambu na kugulusa beto na disumu mpi na lufwa. Dikabu yai ya mbalu me pesaka beto dibaku ya kukangama na Yehowa mpi kumonisila yandi zola. Yehowa pesaka beto mbandu ya zola, ntangu yandi salaka kibansa yai ya nene. Yandi zolaka kulonga beto nde kumonisa zola ke tendula kuvanda ve muntu ya bwimi kansi kuvanda ti kikalulu ya kukaba.​—1 Yoane 4:10.

3, 4. Inki mutindu beto lenda monisa nde beto ke zolaka Nzambi?

³ Zola kele kikalulu ya kuluta nene ya Yehowa. Yo yina, beto ke bakisa kikuma yina Yezu tubaka nde nsiku ya kuluta nene kele:  “Nge fwete zola Yehowa Nzambi na nge na ntima na nge ya mvimba, na moyo na nge ya mvimba, na mabanza na nge yonso, mpi na ngolo na nge yonso.” (Marko 12:30) Yehowa ke zolaka nde beto zola yandi na ‘ntima na beto ya mvimba.’ Yehowa ta sepela ve ata fioti kana beto ke zola muntu ya nkaka mingi kuluta yandi. Kansi zola na beto sambu na Yehowa fwete suka ve kaka na mawi. Yehowa ke zolaka nde beto zola yandi na ‘mabanza na beto yonso, mpi na ngolo na beto yonso.’ Yo ke tendula nde mutindu na beto ya kuyindula mpi mambu yina beto ke sala fwete monisa nde beto ke zolaka Yehowa.​—Tanga Mika 6:8.

⁴ Beto fwete zola Yehowa na kimuntu na beto yonso mpi ti bima yonso ya beto kele na yo. Kana beto ke tula Yehowa na kisika ya ntete na luzingu na beto, beto ta monisa yandi nde beto ke zolaka yandi kibeni. Na disolo yina me luta, beto tubilaka mitindu iya yina Yehowa ke monisilaka bana na yandi zola ya mingi. Ntangu yai, bika beto tadila mutindu beto lenda yedisa zola na beto sambu na Yehowa mpi kumonisa nde beto ke zolaka yandi.

5. Kuyindula mambu yonso yina Yehowa me sadilaka beto ta pusa beto na kusala nki?

⁵ Kana muntu me kabila nge kima, yo kele kieleka nde nge ta monisila yandi ntonda. Diaka, nge ta sadila kima yango sambu na kumonisa nde nge ke baka yo na mbalu. Yakobo sonikaka nde: “Konso dikabu ya mbote mpi konso kado ya kukuka ke katukaka na zulu; yo ke katukaka na Tata ya bansemo ya zulu; yandi ke balukaka ve mpi ke sobaka ve bonso bizuzi yina ke balukaka.” (Yakobo 1:17) Beto kele na ntonda sambu Yehowa ke pesaka beto bima yonso yina beto ke vandaka na yo mfunu sambu na kuzinga na kiese. Beto ke bakisaka nde yandi ke zolaka beto mingi, mpi beto ke zolaka kumonisa yandi nde beto mpi ke zolaka yandi. Keti mambu yai ke pusa nge ve na kumonisila yandi mpi zola?

6. Yo lombaka nde Bantu ya Izraele kusala nki sambu Yehowa kulanda na kusakumuna bo?

⁶ Yehowa sadilaka bantu ya Izraele mambu mingi ya mbote. Na nsungi ya bamvula mingi, yandi twadisaka bo na nsadisa ya bansiku mpi pesaka bo bima yonso yina bo vandaka na yo mfunu sambu na kuzinga. (Kulonga 4:7, 8) Sambu na bantu ya Izraele, kulemfuka na bansiku ya Yehowa vandaka mutindu ya kumonisila yandi ntonda. Mu mbandu, ntangu bo vandaka kupesa Yehowa makabu, yo lombaka nde bo pesa yandi ‘bima ya ntete ya bo ke katula na bilanga na bo.’ (Kubasika 23:19) Bantu ya Izraele zabaka nde Yehowa ta landa na kusakumuna bo kana bo ke lemfukila yandi mpi ke pesa yandi bima ya kuluta mbote.​—Tanga Kulonga 8:7-11.

7. Inki mutindu beto lenda sadila “bima na [beto] ya ntalu” sambu na kumonisa Yehowa nde beto ke zolaka yandi?

⁷ Beto mpi lenda monisa Yehowa nde beto ke zolaka yandi kana beto ke pesa yandi “bima na [beto] ya ntalu.” (Bingana 3:9) Beto ke salaka yo ntangu beto ke sadilaka bima yina beto kele na yo sambu na kukumisa yandi. Mu mbandu, beto lenda pesa makabu sambu na kupesa maboko na kisalu ya Kimfumu yina ke salama na dibundu na beto to na nsi-ntoto ya mvimba. Ata beto kele na bima mingi to fioti, konso muntu na kati na beto lenda sadila bima yina yandi kele na yo sambu na kumonisila Yehowa zola. (2 Bakorinto 8:12) Kansi, beto kele ti mitindu ya nkaka yina beto lenda monisa Yehowa nde beto ke zolaka yandi.

8, 9. Inki kele mutindu ya nkaka yina beto ke monisaka Yehowa nde beto ke zolaka yandi? Mike ti dibuta na yandi salaka nki?

⁸ Yezu longaka beto na kulanda kusosa ntete Kimfumu mpi na kudiyangisa ve sambu na madia mpi bilele. Tata na beto ke sila na kupesa  beto bima yina beto kele na yo mfunu. (Matayo 6:31-33) Beto ke tudilaka Yehowa ntima mpi ke ndimaka nde yandi ta lungisa lusilu yai. Nkutu, kana nge ke zolaka kibeni muntu, nge fwete tudila yandi ntima. Ya kieleka, kana beto ke tudila Yehowa ntima, beto ta monisa yandi nde beto ke zolaka yandi. (Nkunga 143:8) Yo yina, beto lenda kudiyula nde: ‘Keti balukanu na mono mpi mutindu mono ke sadilaka ntangu mpi ngolo na mono ke monisaka nde mono ke zolaka kibeni Yehowa? Keti mono ke tudilaka Yehowa ntima konso kilumbu nde yandi ta lungisa bampusa na mono?’

⁹ Mike ti dibuta na yandi vandaka kutudila Yehowa ntima. Ntangu Mike vandaka leke, mbala mingi yandi vandaka kuzola kusamuna na insi ya nkaka. Ata na nima ya kukwela mpi ya kubuta bana zole, yandi vandaka kaka ti mpusa yina. Ntangu Mike ti dibuta na yandi tangaka disolo ya bampangi yina kwendaka kusala na bisika yina mpusa vandaka mingi, bo bakaka lukanu ya kukumisa luzingu na bo pete. Bo tekaka nzo na bo mpi bo kumaka kuzinga na nzo mosi ya fioti. Mike, yina vandaka kusala kisalu ya kutudila bantu bunkete na nzo, fiotunaka ntalu ya bantu yina yandi fwete sadila kisalu mpi na nsadisa ya Internet yandi bakisaka mutindu yandi lenda sala kisalu na yandi na insi ya nkaka. Mike ti dibuta na yandi kwendaka na insi ya nkaka mpi kisalu na bo ya kusamuna na insi yina vandaka kupesa bo kiese mingi. Mike ke tuba nde: “Beto monaka kieleka ya bangogo ya Yezu yina kele na Matayo 6:33.”

10. Bonso Davidi, sambu na nki yo me fwana na kuyindulula mambu ya Yehowa yina beto ke longukaka?

¹⁰ Ntotila Davidi sonikaka nde: “Zulu ke zabisaka nkembo ya Nzambi; zulu ke samunaka kisalu ya maboko na yandi.” Yandi yikaka nde: “Nsiku ya Yehowa kele ya kukuka, yo ke vutulaka ngolo. Bangibusa ya Yehowa me fwana na kutudila ntima, yo ke kumisaka mayele muntu yina me konda mayele.” Ntangu Davidi yindululaka bansiku ya mbote ya Yehowa mpi bima ya kitoko yina Yehowa me gangaka, yandi kwendaka kibeni pene-pene na Yehowa mpi yandi monisilaka Yehowa zola. Davidi tubaka nde: “Bika bangogo ya munoko na mono mpi kuyindulula ya ntima na mono kupesa nge kiese, O Yehowa, Ditadi na mono mpi Muntu yina ke sumba mono diaka.”​—Nkunga 19:1, 7, 14, NW.

11. Inki mutindu beto lenda sadila nzayilu yina Yehowa ke pesaka beto sambu na kumonisila yandi zola? (Tala kifwanisu yina kele na luyantiku ya disolo.)

¹¹ Bubu yai, Yehowa ke longaka beto mambu mingi ya me tala yandi, lukanu na yandi, bima yina yandi me gangaka mpi Ndinga na yandi. Nsi-ntoto yai ke siamisaka bantu na kulonguka mingi, kansi mbala mingi banzo-nkanda ya nda ke pusaka bantu na kuzola diaka ve Nzambi. Kansi Yehowa ke zolaka kaka ve nde beto vanda ti nzayilu, yandi ke sadisaka beto mpi na kukuma mayele. Yandi ke zolaka nde beto sadila mambu yina beto ke longuka sambu na mambote na beto mpi sambu beto sadisa bantu ya nkaka. (Bingana 4:5-7) Mu mbandu, yandi ke zolaka nde beto sadisa bantu ya nkaka na kubaka “nzayilu ya sikisiki ya kieleka” sambu bo guluka. (1 Timoteo 2:4) Beto ke  monisilaka Yehowa mpi bantu zola ntangu beto ke longaka nsangu ya mbote ya Kimfumu mpi mambu yina Kimfumu ta sala sambu na bantu yonso.​—Tanga Nkunga 66:16, 17.

12. Inki mpangi-nkento mosi ya toko tubaka sambu na dikabu yina Yehowa pesaka yandi?

¹² Baleke mpi lenda yindulula mambu yonso yina Yehowa me salaka sambu na bo mpi yina yandi me longaka bo. Shannon ke yibukaka kiese yina yandi waka na lukutakanu ya nene yina yandi kwendaka ti leke na yandi ya nkento, ntangu yandi vandaka ti bamvula 11 mpi leke na yandi vandaka ti bamvula 10. Ntu-diambu ya lukutakanu yango vandaka “Kukangama na Nzambi.” Na kitini mosi ya lukutakanu yai, bo zabisaka baleke yonso na kuvanda na kisika mosi yina bo yidikaka sambu na bo, Shannon ti leke na yandi ya nkento mpi vandaka na kati ya baleke yina. Ntete, yo yangisaka yandi. Kansi na nima, yandi yitukaka ntangu bo pesaka baleke yonso mukanda Les jeunes s’interrogent—Réponses pratiques. Ntangu yandi bakaka dikabu yai ya kitoko, inki vandaka mawi na yandi sambu na Yehowa? Yandi ke tuba nde: “Nsuka-nsuka mono bakisaka nde Yehowa kele mpi nde yandi ke zolaka mono mingi kibeni. Beto kele na kiese kibeni mutindu Yehowa, Nzambi na beto ya nene, me pesa beto dikabu yai ya kitoko ya ofele!”

13, 14. Inki beto fwete sala kana Yehowa me pesa beto disipline, mpi sambu na nki?

¹³ Biblia ke yibusa beto nde: “Mfumu Nzambi ke pesaka ndola na bantu yina ya yandi ke zolaka, bonso tata ke pesaka ndola na mwana yina ke pesaka yandi kiese.” (Bingana 3:12)  Kana beto ke ndima disipline ya Yehowa mpi ke ndima nde yandi longa beto, beto ta kuma kusala mambu ya mbote mpi beto ta zinga na ngemba. Ya kieleka, “ntangu bo ke pesaka bantu ndola, yo ke monanaka ve diambu ya kiese na ntangu yina, kansi yo ke vandaka mpasi.” (Baebreo 12:11) Kansi, nki beto fwete sala kana Yehowa me pesa beto disipline? Beto fwete vila ve ata fioti bandongisila ya Yehowa to kubumba makasi ntangu yandi me longisila beto. Beto ke zolaka Yehowa yo yina beto ke widikilaka yandi mpi ke salaka bansoba yina beto fwete sala.

¹⁴ Na bilumbu ya Malaki, Bayuda mingi vandaka ve kuwidikila Yehowa. Bo vandaka ve kudiyangisa na mutindu Yehowa vandaka ve kundima bimenga na bo. Yo yina, Yehowa nganinaka bo sambu na mambu yina bo vandaka kusala. (Tanga Malashi 1:12, 13.) Ya kieleka, Yehowa longisilaka bo mbala na mbala kansi bo wilaka yandi ve. Yo yina, yandi zabisaka bo nde: “Mono ta singa beno, mono ta singa mpi kisalu na beno ya kinganga-nzambi.” (Malaki 2:1, 2) Yo kele pwelele nde, kana beto ke buya kulemfuka na bandongisila ya Yehowa, to beto ke mona nde yo kele mfunu ve, bangwisana na beto ti yandi ta beba.

15. Mabanza ya nki mutindu beto fwete buya?

¹⁵ Nsi-ntoto ya Satana ke pusaka bantu na kukuma lulendo mpi bwimi. Bantu mingi ke zolaka ve nde bo sungika bo to bo zabisa bo mambu yina bo fwete sala. Bantu ya nkaka ke ndimaka bandongisila kaka kana bantu me pusa bo na ngolo. Beto fwete vanda ve bantu ya mutindu yina. Biblia ke lomba beto na ‘kuyambula kulanda ngidika yai ya bima.’ Kansi, beto fwete sosa kubakisa mambu yina Yehowa ke zolaka nde beto sala mpi kusala mambu yango sambu na kusepedisa yandi. (Baroma 12:2) Na nzila ya organizasio, Yehowa ke pesaka beto bandongisila na ntangu ya me fwana. Mu mbandu, organizasio ke zabisaka beto bikalulu yina beto fwete monisa na bantu yina kele ve bankwelani na beto, mutindu ya kupona banduku, mpi bangidika yina beto lenda baka sambu na bansaka ya kulutisila ntangu. Kana beto ke ndima disipline ya Yehowa na luzolo yonso mpi ke sala bansoba sambu na  kusepedisa yandi, beto ta monisa nde beto ke monisa ntonda sambu na lutwadisu na yandi mpi nde beto ke zolaka yandi kibeni.​—Yoane 14:31; Baroma 6:17.

16, 17. (a) Sambu na nki beto fwete sosa kubakisa dibanza ya Yehowa na ntwala ya kubaka balukanu? (b) Na kisika ya kutudila Yehowa ntima, bantu ya Izraele salaka nki?

¹⁶ Bana ya fioti ke tulaka ntima nde bibuti ta sadisa bo mpi ta tanina bo. Bambuta mpi ke lombaka lusadisu na bibuti na bo. Bo ke bakisaka nde ata bo kele ti makuki ya kubaka balukanu, bibuti na bo lenda pesa bo bandongisila ya mbote. Yehowa, Tata na beto ke bikaka nde beto mosi kubaka balukanu. Kansi, sambu beto ke tudilaka yandi kibeni ntima mpi ke zolaka yandi, ntangu yonso beto ke lombaka yandi lusadisu mpi beto ke salaka bikesa sambu na kubakisa mabanza na yandi na ntwala ya kubaka lukanu. Kana beto ke tudila Yehowa ntima, yandi ta pesa beto mpeve santu na yandi sambu yo sadisa beto na kusala mambu ya mbote.​—Bafilipi 2:13.

¹⁷ Na bilumbu ya Samuele, bantu ya Izraele nungaka ve mvita yina bo nwanaka ti bantu ya Filistia. Na kisika ya kuyula Yehowa mambu yina bo fwete sala, bo tubaka nde: “Bika beto baka sanduku ya kuwakana ya Yehowa na Shilo, sambu yo vanda ti beto mpi yo gulusa beto na maboko ya bambeni na beto.” Inki kuminaka bo? Bantu ya Filistia “fwaka bantu mingi kibeni; basoda 30 000 ya Izraele yina ke tambulaka na makulu fwaka. Diaka, bo botulaka Sanduku ya Nzambi.” (1 Samuele 4:2-4, 10, 11) Bantu ya Izraele yindulaka nde kana bo me nata Sanduku, Yehowa ta sadisa bo mpi ta tanina bo. Yo yina bo lombaka ve Yehowa na kusadisa bo to kusosa kuzaba dibanza na yandi. Kansi, bo salaka mambu yina bo yindulaka nde yo kele mbote; yo yina, yo natilaka bo bampasi mingi.​—Tanga Bingana 14:12.

18. Inki Biblia me longa nge na yina me tala kutudila Yehowa ntima?

¹⁸ Muyimbi-bankunga mosi yina vandaka kuzola Yehowa mingi mpi kudipesaka na yandi sonikaka nde: “Mono fweti tula ntima na Nzambi, mono ta kumisa yandi diaka; yandi kele Ngulusi na mono, yandi kele Nzambi na mono. Ntima na mono ke pasuka, yo yina mono fweti yindula Nzambi.” (Nkunga 42: 6, 7) Keti nge mpi ke vandaka na mawi ya mutindu yina sambu na Yehowa? Keti nge ke kudiwaka pene-nene na Yehowa mpi ke tudilaka yandi ntima? Nge lenda sala diaka bikesa sambu na kukuma kutudila Yehowa ntima mingi. Biblia ke zabisa beto nde: “Tula ntima na nge ya mvimba na Yehowa, mpi kutula ve ntima na mayele na nge mosi ya kubakisa mambu. Na banzila na nge yonso, yindula yandi, ebuna yandi ta katula basakuba na banzila na nge.”​—Bingana 3:5, 6.

19. Inki mutindu nge lenda monisa Yehowa nde nge ke zolaka yandi?

¹⁹ Yehowa me pesaka beto mbandu ya zola na mutindu yandi zolaka beto ntete. Bika beto yibuka ntangu yonso mambu yonso yina Yehowa me salaka sambu na beto mpi zola ya mingi yina yandi ke monisilaka beto. Bika beto monisa yandi nde beto ke zolaka yandi na ntima na beto ya mvimba, na moyo na beto ya mvimba, na mabanza na beto yonso mpi na ngolo na beto yonso.​—Marko 12:30.