BANDA 1992, bampangi ya Nto-Kimvuka me ponaka bankuluntu ya nkaka yina kele ti eksperiansi mingi sambu na kusadisa bo na kulungisa mikumba yina bo kele na yo. * Bampangi yai ya kele na kati ya “mameme ya nkaka” ke sadisaka bampangi ya Nto-Kimvuka na mambu mingi. (Yoane 10:16) Konso nsadisi ke vukanaka na lukutakanu ya konso mposo yina ke salamaka na komite yina yandi ke salaka. Mukumba ya bansadisi yai kele ya kusadisa mabundu mpi kupesa bo bangindu na mambu yina bo kele na yo mfunu. Bampangi ya Nto-Kimvuka ke bakaka balukanu ya nsuka; mpi na nima, bampangi yina ke sadisaka bo ke zikisaka kana bampangi ke sadila balukanu yina Nto-Kimvuka ke bakaka. Bampangi yango ke vandaka na kiese ya kusala konso kisalu yina bo ke pesaka bo. Bo ke kwendaka na balukutakanu ya bansi mingi ti bampangi ya Nto-Kimvuka. Bantangu ya nkaka, bo ke tindaka bo bonso mimonisi ya Nto-Kimvuka na kukwenda kutala bafiliale.

Mpangi mosi yina kele nsadisi ya Nto-Kimvuka banda 1992, ke tuba nde, “Kana mono ke lungisa mbote mukumba na mono, bampangi ya Nto-Kimvuka lenda kudipesa mingi na mambu ya kimpeve.” Nsadisi ya nkaka ya Nto-Kimvuka, yina me sala bamvula 20 ke tuba nde, “Yo kele dibaku mosi ya nene, mpi yo me luta mabaku yonso yina mono me zwaka na luzingu.”

Bampangi ya Nto-Kimvuka me pesaka bampangi yai mikumba mingi, mpi bo ke sepelaka na kisalu ya ngolo yina bampangi yai ya kwikama ke salaka. Bika beto yonso ‘kulanda kupesa bantu ya mutindu yai lukumu.’—Bafilipi 2:29.