Sambu na Mono, Kupusana Pene-Pene ya Nzambi Kele Mbote
NTANGU mono lungisaka bamvula 9, mono vandaka kuyela diaka ve. Bubu yai mono kele ti bamvula 43, kansi nda na mono kele kaka metre mosi. Ntangu bibuti na mono bakisaka nde mono ta yela diaka ve, bo siamisaka mono na kusala bisalu mingi sambu mono kudiyangisa ve ntangu yonso sambu na nda na mono. Yo yina, mono salaka mutalaka na ntwala ya nzo na beto sambu na kuteka bambuma, mpi ntangu yonso mono vandaka kutula kisika yina bunkete. Yo vandaka kubenda dikebi ya bakiliya.
Ya kieleka, kusala mingi sobaka ve mambu yonso. Mono vandaka kaka nkufi, mpi mambu ya nkaka vandaka kupesa mono mpasi ata mambu ya fioti-fioti, mu mbandu nda ya ba-etagere ya mutalaka na mono. Mono vandaka kumona nde bo me yidikaka mambu yonso ya luzingu sambu na bantu ya nda. Mono vandaka kudiyangisa mingi, kansi mambu sobaka ntangu mono lungisaka bamvula 14.
Kilumbu mosi, Bambangi ya Yehowa zole ya bankento kwisaka kusumba bambuma mpi bo siamisaka mono na kulonguka Biblia. Ntangu fioti na nima, mono bakisaka nde kuzaba Yehowa mpi lukanu na yandi vandaka mfunu mingi kuluta nda na mono. Yo sadisaka mono mingi. Nkunga 73:28 kele verse yina mono kumaka kuzola mingi. Kitini ya ntete ya verse yai ke tuba nde: ‘Sambu na mono, kupusana pene-pene ya Nzambi kele mbote.’
Dibuta na beto katukaka na Côte d’Ivoire mpi beto kwendaka na Burkina Faso, ebuna luzingu na mono sobaka mingi. Na Côte d’Ivoire, bantu vandaka kumona mono na kisika mono vandaka kuteka bambuma. Kansi na Burkina Faso, mono vandaka munzenza mpi bantu mingi vandaka kuyituka na kumona mono. Bantu vandaka kutala mono mingi, yo yina mono bumbanaka na kati ya nzo bamposo mingi. Mono ke yibuka mutindu mono kudiwaka mbote ntangu mono pusanaka pene-pene ya Yehowa. Mono sonikilaka biro ya filiale ya Bambangi ya Yehowa mpi bo tindilaka mono muntu mosi yina fwanaka kibeni, Nani, misionere mosi, yina vandaka kukwisa kutala mono na moto ya fioti.
Na kartie yina beto vandaka, banzila vandaka mvindu mpi butesi, mpi na nsungi ya mvula, yo vandaka poto-poto. Nani, vandaka kubwa mbala mingi na moto na yandi ntangu yandi vandaka kukwisa sambu na kulonguka ti mono; ata mpidina, yandi yambulaka mono ve. Kilumbu mosi, yandi yulaka mono kana yandi lenda nata mono na balukutakanu. Mono bakisaka nde mono fwete kanga ntima ntangu mono ta kwendaka na balukutakanu sambu bantu ta talaka mono. Diaka, kumata na moto ta yika kizitu, sambu kizitu na yandi mosi dezia vandaka kusala nde moto kutambula na mpasi. Ata mpidina, mono ndimaka sambu mono yibukaka kitini ya zole ya verse yina mono ke zolaka mingi: “Mono me kumisa Yehowa Mfumu ya Kuluta Nene kitininu na mono.”
Bantangu ya nkaka, beto vandaka kubwa na poto-poto, kansi yo vandaka kuyangisa beto ve sambu beto vandaka kuzola balukutakanu. Na Nzo ya Kimfumu, bampangi vandaka kutala mono ti zola mpi kutala na bo swaswanaka ti mutindu bantu vandaka kutala mono na bala-bala! Na nima ya bangonda 9, mono bakaka mbotika.
Kitini ya tatu ya verse yina mono ke zolaka mingi ke tuba nde: “Sambu mono tuba yonso ya nge salaka.” Mono zabaka nde kusamuna ta vanda kisalu ya kuluta mpasi sambu na mono. Mono ke yibuka diaka mbala ya ntete yina mono samunaka nzo na nzo. Bana mpi bambuta vandaka kutala mono, kulanda mono, mpi bo vandaka kuseka mutindu na mono ya kutambula. Yo vandaka kupesa mono mpasi kibeni, kansi ntangu mono yibukaka nde bo mpi kele ti mfunu ya Paladisu bonso mono, yo sadisaka mono na kukanga ntima.
Sambu na kusamuna kukonda mpasi, mono sumbaka velo ya bikata, ya bapine tatu. Na bangumba, mpangi yina beto vandaka kusamuna ti yandi vandaka kupusa mono na kumata ngumba, ebuna ntangu beto vandaka kukita ngumba yandi vandaka kumata na nima ya velo. Na luyantiku kisalu ya kusamuna vandaka mpasi, kansi na nima yo kumaka kupesa mono kiese mingi; yo yina, na 1998, mono kumaka mupasudi-nzila ya ntangu yonso.
Mono vandaka kulonguka Biblia ti bantu mingi, mpi iya na kati na bo bakaka mbotika. Mpangi na mono ya nkento mpi ndimaka kieleka! Kuwa mutindu bampangi ya nkaka yelaka na kimpeve vandaka kupesa mono kikesa yina mono vandaka na yo mfunu. Kilumbu mosi, ntangu mono vandaka kubela malaria, mono zwaka mukanda mosi yina katukaka na Côte d’Ivoire. Mono vandaka kulonguka Biblia ti mwana-bakala mosi yina vandaka kutanga na iniversite ya Burkina Faso mpi na nima, mono pesaka yandi na mpangi mosi ya bakala. Ebuna, longoki yango kwendaka na Côte d’Ivoire. Mono sepelaka mingi na kuwa nde yandi me kuma nsamuni ya me bakaka ntete ve mbotika!
Inki mutindu mono ke lungisaka bampusa na mono? Kimvuka mosi yina ke sadisaka bantu yina kele ti bifu na nitu zolaka kulonga mono kutunga bilele. Longi mosi monaka makuki na mono ya kisalu mpi tubaka nde: “Beto fwete longa nge mutindu ya kusala basavo.” Yo yina, bo longaka mono kusala basavo. Bubu yai, mono ke salaka basavo ya kuyobisila bilele mpi bima ya nkaka. Bantu ke sepelaka ti basavo na mono mpi bo ke siamisaka bantu ya nkaka na kusadila yo. Mono ke kwendaka kubikila bakiliya basavo na moto ya bapine tatu.
Diambu ya mawa, na 2004, mono yambulaka kisalu ya kimupasudi-nzila sambu mono kumaka kubela ngolo mukongo. Ata mpidina, mono ke landaka kusamuna mbala na mbala.
Bantu ke tubaka nde mono me zabanaka sambu na kikalulu na mono ya kuseka. Mono kele ti kikuma ya kuwa kiese, sambu kupusana pene-pene ya Nzambi kele mbote sambu na mono.
