DISOLO YA LUZINGU
Mono Me Kumaka na Ngemba ti Nzambi mpi ti Mama na Mono
MAMA na mono yulaka mono nde: “Sambu na nki nge ke zola ve kusambila ba-nkaka na nge? Keti nge ke zaba ve nde kana bubu yai nge kele na luzingu, yo kele sambu na bo? Keti nge ke buya kutonda bo? Sambu na nki nge ke buya kulanda mambu yina bambuta me bikilaka beto? Kana nge ke zitisa ve ba-nkaka, nge ke monisa nde lusambu na beto kele ya mpamba.” Na nima, mama yantikaka kudila.
Bangonda fioti na ntwala, Bambangi ya Yehowa lombaka mama na kulonguka Biblia. Ata yandi buyaka kulonguka, yandi zabisaka bo na kulonguka ti mono sambu na kupesa bo ve mpasi. Kansi na nima, yandi wilaka mono makasi; yo yitukisaka mono sambu mono ke zitisaka yandi ntangu yonso. Kansi, sambu mono vandaka kusosa kusepedisa Yehowa, mono landaka ve mambu yina mama tubaka. Yo vandaka ve pete, kansi Yehowa pesaka mono ngolo.
MUTINDU MONO ZABAKA YEHOWA
Bantu ya dibuta na mono, mpi bantu mingi ya Japon, ke sambilaka nzambi mosi ya bo ke bingaka Buda. Kansi na nima ya kulonguka Biblia bangonda zole ti Bambangi ya Yehowa, mono bakisaka nde Biblia ke tubaka kieleka. Ntangu mono zabaka nde mono ke vandaka ti Tata mosi na zulu, mono kumaka kibeni ti mpusa ya kuzaba yandi mbote. Na luyantiku, mono ti mama, beto vandaka na kiese ya kutubila mambu yina mono vandaka kulonguka. Mono yantikaka kukwenda na balukutakanu ya Lumingu na Nzo ya Kimfumu. Ntangu mono zabaka mambu mingi, mono zabisaka mama nde mono ta sambilaka diaka ve Buda. Na mbala mosi, yandi sobaka. Yandi tubaka nde, “Yo kele nsoni kana muntu mosi ya dibuta ke zola ve ba-nkaka na beto.” Yandi tubaka nde mono fwete yambula kulonguka Biblia mpi kukwenda diaka ve na balukutakanu. Mono ndimaka ve ata fioti nde mama lenda tuba mpidina! Yo vandaka ve kikalulu na yandi.
Papa ndimaka mpi mambu yina mama tubaka. Baefezo kapu 6 longaka mono nde Yehowa ke zola nde mono lemfukila bibuti. Mono vandaka kuzola nde dibuta na beto kuzinga diaka na ngemba, mpi mono yindulaka nde kana mono widikila bibuti, bo mpi lenda widikila mono. Na ntangu yina, mono vandaka kudibongisa sambu na baekzame ya nzo-nkanda; yo yina mono tubaka nde mono ta zitisa bibuti na mono na nsungi ya bangonda tatu. Kansi mono silaka Yehowa nde na nima, mono ta vutukila balukutakanu.
Mambu zole ke monisa nde lukanu na mono vandaka ya mbi. Ya ntete, mono yindulaka nde na nima ya bangonda tatu, mono ta vanda kaka ti mpusa ya ngolo ya kusadila Yehowa. Kansi bangwisana na mono ti Yehowa lembaka nswalu. Ya zole, Papa ti Mama salaka diaka bikesa mingi sambu na kubuyisa mono na kusambila Yehowa.
LUSADISU MPI MBANGIKA
Na Nzo ya Kimfumu, mono kutanaka ti bampangi mingi yina kutanaka mpi ti mbangika na mabuta na bo. Bo ndimisaka mono nde Yehowa ta pesa mono ngolo. (Matayo 10:34-37) Bo tendudilaka mono nde kwikama na mono lenda sadisa bantu ya dibuta na mono na kuzaba Yehowa. Yo lombaka nde mono tudila Yehowa ntima; yo yina mono kumaka kusamba mingi.
Dibuta na mono bangikaka mono na mitindu mingi. Mama bondilaka mono mpi sosaka kundimisa mono na kuyambula kulonguka Biblia. Mbala mingi mono vandaka kutuba ve. Kana mono tuba, beto vandaka kuswana sambu konso muntu vandaka kusosa kudinungisa. Mono me bakisaka na nima nde, kana mono zitisaka mpenza mawi mpi balukwikilu ya mama, beto zolaka kuwakana mbote. Bibuti na mono kumaka kupesa mono bisalu mingi na nzo sambu mono basika ve. Bantangu ya nkaka, bo vandaka kukanga nzo sambu mono kota ve to nkutu kubikila mono ve madia.
Mama songaka bantu na kusolula ti mono sambu na kusadisa mono na kusoba mabanza. Yandi songaka mpi longi na mono; kansi mono sobaka ve. Mama nataka mono na mfumu na yandi ya kisalu sambu na kundimisa mono nde mabundu yonso kele kaka mpamba. Yandi bingaka mpi bampangi ya nkaka ya dibuta na telefone mpi dilaka sambu na kulomba bo na kusadisa mono. Yo pesaka mono makasi mingi. Kansi na balukutakanu, bankuluntu yibusaka mono nde Mama ke na kuta kimbangi ntangu yandi ke zabisa bantu ya nkaka diambu yango.
Bibuti zolaka nde mono sala banzo-nkanda ya nda sambu na kuzwa kisalu ya mbote. Sambu beto vandaka kuwakana ve, beto kukaka ve kusolula mbote diambu yango; yo yina mono sonikilaka bo mikanda mingi ya ke tendula balukanu na mono. Tata waka makasi mingi mpi tubaka
nde: “Kana nge ke yindula nde nge lenda zwa kisalu, banda dezia kusosa yo mbasi sambu na kukatuka na nzo yai.” Mono sambaka Yehowa mpi lombaka yandi na kusadisa mono. Kilumbu yina landaka, ntangu mono vandaka kusamuna, bampangi-bankento zole zabisaka mono na kulonga bana na bo. Papa sepelaka na yo ve; yo yina yandi vandaka kutubisa mono diaka ve mpi kutudila mono ve dikebi. Mama tubaka nde mbote nkutu mono kuma ata bandi na kisika ya kukuma Mbangi ya Yehowa.Yehowa sadisaka mono na kusoba mabanza mpi na kuzaba mambu yina mono fwete sala
Bantangu ya nkaka, mono vandaka ve kuzaba kana Yehowa vandaka kuzola nde mono telamina bibuti to ve. Mono sambaka mpi yindululaka mambu yina Biblia ke tubaka sambu na zola ya Yehowa. Mono bakisaka nde bibuti na mono vandaka kubangika mono sambu bo vandaka kudiyangisa sambu na mono. Yehowa sadisaka mono na kusoba mabanza mpi na kuzaba mambu yina mono fwete sala. Diaka, kusamuna mbala na mbala sadisaka mono na kuzola mingi kisalu ya kusamuna. Yo yina, mono bakaka lukanu ya kukuma mupasudi-nzila.
KISALU YA KIMUPASUDI-NZILA
Ntangu bampangi-bankento ya nkaka waka nde mono ke zola kukuma mupasudi-nzila, bo zabisaka mono na kuvingila tii ntangu makasi ya bibuti na mono ta mana. Mono lombaka Yehowa mayele, mono salaka bansosa, mono tadilaka bikuma yina vandaka kupusa mono na kukuma mupasudi-nzila, mpi mono solulaka ti bampangi ya kuyela na kimpeve. Na nima, mono bakaka lukanu ya kusepedisa Yehowa. Mono bakisaka mpi nde kana mono lutisa ntangu mingi na ntwala ya kukuma mupasudi-nzila, bibuti na mono lenda landa kubangika mono.
Mono yantikaka kisalu ya kimupasudi-nzila na mvula ya nsuka ya nzo-nkanda. Ntangu fioti na nima, mono waka nzala ya kukwenda na kisika yina mpusa ya bansamuni vandaka mingi. Kansi Papa ti Mama buyaka nde mono kwenda. Yo yina, mono vingilaka tii ntangu mono lungisaka bamvula 20. Na nima, mono lombaka biro ya filiale na kutinda mono na sudi ya Japon, pene-pene ti bampangi na mono sambu mama kudiyangisa ve mingi.
Kuna, mono vandaka na kiese ya kumona nde balongoki na mono mingi ya Biblia vandaka kubaka mbotika. Mono yantikaka kulonguka Kingelesi sambu na kuzabisa bantu mingi nsangu ya mbote. Kumona bikesa yina bapasudi-nzila ya nene zole ya babakala vandaka kusala na dibundu mpi mutindu bo vandaka kusadisa bampangi, pusaka mono na kukuma mpi mupasudi-nzila ya nene. Na nsungi yina, Mama belaka ngolo mbala zole, mono vutukaka mpi na nzo mbala zole sambu na kusadisa yandi. Yo yitukisaka yandi mpi yandi yantikaka diaka kuzola mono.
YEHOWA ME SAKUMUNAKA MONO MINGI
Bamvula nsambwadi na nima, mpangi Atsushi, mosi na kati ya bapasudi-nzila ya nene yina mono tubilaka, tindilaka mono mukanda. Yandi sepelaka kukwela mono mpi yandi yulaka dibanza na mono. Mono vandaka ve ata fioti ti mawi ya zola sambu na mpangi Atsushi mpi mono yindulaka ve nde yandi vandaka ti mawi ya mutindu yina. Ngonda mosi na nima, mono songaka yandi nde mono ke zola ntete kuzaba yandi mbote-mbote. Beto monaka nde beto zole vandaka ti balukanu ya mutindu mosi. Beto vandaka na mfunu ya kulanda kusala kisalu ya ntangu yonso mpi beto vandaka ya kuyilama na kusala konso kisalu yina bo ta pesa beto. Nsuka-nsuka, beto kwelanaka. Mono waka kiese mingi ya kumona Papa, Mama, mpi bampangi na mono na fete ya makwela na mono.
Népal
Ntangu fioti na nima, ntangu beto vandaka bapasudi-nzila ya ntangu yonso, Atsushi vandaka kuyinga nkengi ya nziunga. Na nima, beto kumaka bapasudi-nzila ya nene, mpi nsuka-nsuka beto kumaka na kisalu ya nziunga. Ntangu beto manisaka kutala mabundu yonso ya nziunga yina na mbala ya ntete, Betele bingaka beto na telefone. Bo yulaka beto kana beto
lenda kwenda kusala kisalu ya nziunga na insi Népal.Kusala na bansi mingi me sadisaka mono na kuzaba mambu mingi ya Yehowa
Mono vandaka kudiyangisa mutindu bibuti na mono ta kudiwa kana bo zaba nde mono ke kwenda kisika ya ntama. Ntangu mono zabisaka bo na telefone, Papa tubaka nde: “Nge ke kwenda na kisika mosi ya kitoko.” Mposo mosi na ntwala, nduku ya Papa pesaka yandi mukanda mosi yina vandaka kutubila Népal; Papa tubaka nde Népal kele kisika mosi ya kitoko yina bantu fwete kwenda kutala.
Beto vandaka na kiese ya kuzinga ti bantu ya Népal. Bo kele bantu ya mawete! Na nima, insi Bangladesh, yina kele pene ya Népal, kumaka mpi na nziunga na beto. Kansi yo me swaswana ti Népal. Beto kutanaka ti mambu mingi na kisalu na beto. Bamvula tanu na nima, bo vutulaka beto na Japon; tii bubu yai, beto ke sala kaka kisalu ya nziunga.
Kusala na Japon, na Népal mpi na Bangladesh me sadisaka mono na kuzaba mambu mingi ya Yehowa. Luzingu mpi bikalulu ya bantu na bansi yai me swaswana. Diaka, konso muntu me swaswana ti bantu ya nkaka. Mono monaka mutindu Yehowa ke tudilaka konso muntu dikebi, ke ndimaka bantu, ke sadisaka bo mpi ke sakumunaka bo.
Mambu mingi ke pusa mono na kutonda Yehowa. Yandi me sadisaka mono na kuzaba yandi, na kusala kisalu na yandi, mpi yandi me pesaka mono bakala mosi ya mbote. Nzambi me sadisaka mono na kubaka balukanu ya mbote; bubu yai mono kele ti bangwisana ya mbote ti Yehowa mpi ti bantu ya dibuta na mono. Yehowa me sadisaka mono na kusala diaka kinduku ya ngolo ti Mama. Mono kele na ntonda mingi mutindu mono me kumaka na ngemba ti Nzambi mpi ti Mama.
Kisalu ya nziunga ke pesaka beto kiese mingi