Yo vanda Biblia to mikanda ya ke tubilaka mambu ya ntama, ata mukanda mosi ve ke monisa nde Bakristu vandaka kubaka mbotika sambu na bafwa.

Mutindu bo me balulaka verse yai na bambalula mingi ke pusaka bantu ya nkaka na kuyindula nde na bilumbu ya Polo, bantu vandaka kubaka mbotika sambu na bafwa. Mu mbandu, Bible en Kituba ke balula verse yai nde: “Kana mambu ya bo ke tubaka yo kele ya kieleka, nde bantu yina me fwaka ta telama na lufwa ve, sambu na nki bantu ke bakaka mbotika sambu na bantu yina me fwaka?”

Beto tala mambu yina bantu zole ya mayele tubaka. Dr. Gregory Lockwood tubaka nde, kele ve ata ti nzikisa mosi na Biblia to na mikanda ya ke tubilaka mambu ya ntama ya ke monisa nde bantu vandaka kubaka mbotika sambu na bafwa. Longi mosi, Gordon Fee tubaka mpi mutindu yina. Yandi tubaka mpi nde, “Kuwakana ya Mpa mpi ke tubila yo ve mpi nde kele ve ti nzikisa mosi yina ke monisa nde Bakristu ya mvu-nkama ya ntete vandaka kubaka mbotika sambu na bafwa to nde bo vandaka kusala yo na banzo-nzambi ntangu fioti na nima ya lufwa ya bantumwa.”

Biblia ke tuba nde Yezu songaka balongoki na yandi na ‘kukumisa bantu ya makanda yonso balongoki, kubotika bo mpi kulonga bo na kuzitisa mambu yonso yina yandi songaka bo.’ (Mat. 28:19, 20) Na ntwala nde muntu kubaka mbotika sambu na kukuma longoki, yandi fwete longuka mambu ya me tala Yehowa mpi Mwana na yandi, kukwikila na mambu yango mpi kulemfukila bo. Muntu yina me fwaka mpi yina kele na maziamu lenda sala yo ve mpi Mukristu yina kele na luzingu lenda sala yo mpi ve sambu na muntu yina me fwaka.—Lon. 9:5, 10; Yoa. 4:1; 1 Bak. 1:14-16.

Inki Polo zolaka kutuba?

Bantu ya nkaka ya Korinto vandaka kutuba nde bafwa ta futumuka ve. (1 Bak. 15:12) Polo tubaka nde yo kele ve mutindu yina. Yandi monisaka pwelele nde, ‘konso kilumbu yandi kutanaka ti lufwa’ kansi yandi vandaka kaka na luzingu. Ata yandi vandaka kukutana ti bigonsa ya lufwa, yandi tulaka ntima nde na nima ya lufwa, yandi ta futumuka ti nitu ya ngolo ya kimpeve bonso Yezu.—1 Bak. 15:30-32, 42-44.

Yo lombaka nde Bakristu ya Korinto kubakisa nde Bakristu yina bo me tulaka mafuta ta kutana ti bampasi konso kilumbu mpi bo ta fwa na ntwala ya kufutumuka. Kubaka “mbotika na Kristu Yezu” ke tendula kubaka “mbotika na lufwa na yandi.” (Bar. 6:3) Mbotika yina ya kifwani ke tendula nde bonso Yezu, bo mpi ta kutana ti mambu ya mpasi mpi ta fwa na ntwala ya kufutumuka sambu na kukwenda na zulu.

Bamvula kuluta zole na nima ya mbotika ya Yezu na masa, yandi songaka bantumwa na yandi zole nde: “Bo ta botika beno ti mbotika yina bo ke botika mono.” (Mar. 10:38, 39) Ntangu Yezu vandaka kutuba mambu yai, yandi vandaka ve kubaka mbotika na masa. Yandi zolaka kutuba nde kwikama na yandi na Nzambi ta natila yandi lufwa. Polo sonikaka nde Bakristu yina bo me tulaka mafuta ‘ta mona mpasi kumosi mpi ta baka nkembo kumosi.’ (Bar. 8:16, 17; 2 Bak. 4:17) Yo yina, bo mpi fwete fwa mpi kufutumuka sambu na kuzinga na zulu.

Na kutadila mambu yai, mutindu ya siki-siki ya kubalula mambu yina Polo tubaka na 1 Bakorinto 15:29 kele yai: “Kana ve, bantu yina ke baka mbotika sambu na kukuma bafwa ta sala inki? Kana bafwa ta futumuka ve ata fioti, sambu na nki bo mpi ke baka mbotika sambu na kukuma bafwa?”