Keti nge tangaka na dikebi yonso masolo ya Banzozulu ya Nkengi ya mvula yai? Tala kana nge lenda pesa bamvutu na bangiufula yai:

Inki mutindu beto fwete tadila Bakristu yina bo me tulaka mafuta?

Beto ke sepelaka ti lukwikilu na bo kansi beto ke tudilaka bo ve dikebi na mutindu ya kuluta ndilu. Beto ‘ke lebaka bo ve,’ disongidila kupesa bo lukumu mingi. (Yude 16) Beto ke yulaka bo ve bangiufula na yina me tala kivuvu na bo.—w20.01, lut. 29.

Inki fwete ndimisa nge nde Yehowa ke tudilaka nge dikebi?

Biblia ke tuba nde Yehowa monaka nge na ntwala nde nge butuka. Yandi ke waka bisambu na nge. Yandi ke zabaka bangindu na nge mpi mambu yina kele na ntima na nge. Mambu yina nge ke salaka lenda sepedisa Yehowa to kupesa yandi mpasi. (1 Bans. 28:9; Bing. 27:11) Yehowa me bendaka nge na yandi.—w20.02, lut. 12.

Inki bambandu ya ke monisa ntangu ya kutuba mpi ntangu ya kuvanda pima?

Beto ke vandaka na kiese ya kutuba mambu ya Yehowa. Beto ke tubaka kana beto me zaba nde mpangi mosi ke zola kusala diambu ya mbi. Bankuluntu ke tubaka ntangu yo ke lomba nde bo pesa mpangi mosi ndongisila. Beto ke tubaka ve kana yo ke lomba nde beto songa bantu mambu ya me tala kisalu na beto na bansi yina bo me buyisaka yo. Beto ke tubaka ve mambu yina yo ke lomba ve nde bantu yonso kuzaba.—w20.03, balut. 20-21.

Inki luswaswanu kele na kati ya bampasu yina Yoele kapu 2 ke tubila ti yina Kusonga kapu 9 ke tubila?

Mukanda ya Yoele 2:20-29 ke tuba nde Nzambi ta kula bampasu mpi yandi ke sila na kufuta bima yina bo bebisaka. Na nima, Nzambi ta tiamuna mpeve na yandi. Mambu yai lunganaka ntangu bantu ya Babilone nwanisaka Izraele. Kusonga 9:1-11 ke tubila bampasu ya ke monisa bansadi ya Yehowa yina bo me tulaka mafuta na bilumbu na beto. Bo ke samuna nde Nzambi ta fwa nsi-ntoto yai ya mbi mpi nsangu na bo ke pesa bantu ya nsi-ntoto yai mpasi.—w20.04, balut. 3-6.

Nani kele ntotila ya nordi bubu yai?

Russie ti bansi yina ke pesaka yandi maboko. Bo kele ti bupusi ya ngolo na bansadi ya Nzambi, bo me buyisaka kisalu ya kusamuna mpi ke mengaka Bambangi ya Yehowa. Ntotila ya nordi ti ntotila ya sudi ke nwanina kimfumu.—w20.05, lut. 13.

Keti bikalulu ya “mbuma ya mpeve” kele kaka bikalulu yina kele na Bagalatia 5:22, 23?

Ve. Mpeve santu ke sadisaka beto na kuyedisa bikalulu ya nkaka ya mbote, mu mbandu lunungu. (Baef. 5:8, 9)—w20.06, lut. 17.

Inki lenda vanda kigonsa ya kutula bima na Internet?

Bima yina nge ke tula na Internet lenda sala nde bantu kumona nde nge kele muntu ya lulendo kansi ve muntu ya kudikulumusa.—w20.07, balut. 6-7.

Inki malongi bansamuni lenda baka na balobi-mbisi ya mbote?

Bo ke lobaka na ntangu mpi na kisika yina bo lenda kanga bambisi mingi. Bo ke zabaka kusadila mbote bisadilu na bo. Bo ke landaka kuloba na kikesa ata ntangu ke ngolo, mupepe ke bula to mvula ke noka. Beto lenda sala mpi mutindu mosi na kisalu ya kusamuna.—w20.09, lut. 5.

Inki mutindu beto lenda sadisa balongoki ya Biblia na kuzola Yehowa mingi?

Beto lenda siamisa bo na kutanga Biblia konso kilumbu mpi na kuyindulula mambu yina bo ke tanga. Diaka, beto lenda longa bo mutindu ya kusamba.—w20.11, lut. 4.

Bangogo yai: “Na Kristu bantu yonso ta baka luzingu” ke tadila banani?—1 Bak. 15:22.

Ntumwa Polo vandaka kutuba ve nde bantu yonso ta futumuka. Yandi vandaka kutubila Bakristu yina bo me tulaka mafuta, disongidila bayina “Nzambi me santisaka na bumosi ti Kristu Yezu.” (1 Bak. 1:2; 15:18)—w20.12, balut. 5-6.

Bakristu yina bo me tulaka mafuta ta sala nki ntangu bo ‘ta soba na kubweta ya disu, na mpungi ya nsuka’?—1 Bak. 15:51-53.

Bo ta vukana ti Kristu sambu na kugungula bantu ti nti ya kibende. (Kus. 2:26, 27)—w20.12, balut. 12-13.