Landa Mbandu ya Misionere ya Kuluta Nene
Landa Mbandu ya Misionere ya Kuluta Nene
“Beno baka mbandu na mono, mutindu mono mpi ke bakaka mbandu na Kristo.”—1 KOR. 11:1.
1. Sambu na nki beto fwete landa mbandu ya Yezu Kristu?
NTUMWA POLO kulandaka mbandu ya Yezu Kristu, Misionere ya kuluta nene. Yandi longisilaka mpi bampangi na yandi Bakristu nde: “Beno baka mbandu na mono, mutindu mono mpi ke bakaka mbandu na Kristo.” (1 Kor. 11:1) Na nima ya kuyobisa makulu ya bantumwa na yandi sambu na kupesa bo dilongi ya metala kudikulumusa, Yezu kusongaka bo nde: “Mono me songa beno mbandu, sambu beno kusala mutindu mono me sala beno.” (Yoa. 13:12-15) Beto Bakristu ya bubu yai, beto kele ti mukumba ya kulanda mbandu ya Yezu Kristu yo vanda na kutuba, na bisalu, mpi na bikalulu na beto.—1 Pie. 2:21.
2. Ata kana Nto-Kimvuka meponaka nge ve bonso misionere, nki nkadilu nge lenda vanda na yo?
2 Na disolo yina meluta, beto monaka nde misionere kele muntu yina bo ketindaka bonso evanzelizatere, disongidila, muntu yina kekwendaka kuzabisa bantu nsangu ya mbote. Yo yina, Polo kuyulaka mwa bangyufula ya kebenda dikebi. (Tanga Roma 10:11-15.) Yandi yulaka: “Nki mutindu bo lenda wa nsangu yina, kana muntu me longaka bo yo ntete ve?” Na nima, yandi vutukilaka bangogo yai ya mbikudulu ya Yezaya: “Kiese mingi na kumona muntu kuna na bangumba ke kwisa ti nsangu ya mbote.” (Yez. 52:7) Ata kana Nto-Kimvuka meponaka nge ve mpi metindaka nge ve bonso misionere na nsi ya nzenza, nge lenda yedisa nkadilu ya kuzabisa nsangu ti kikesa mingi mpi kulanda mbandu ya Yezu yina kuvandaka nsamuni ya kikesa ya nsangu ya mbote. Na mvula meluta, bansamuni ya Kimfumu 6 957 852 ‘salaka kisalu’ ya kievanzelizatere na bansi 236.—2 Tim. 4:5.
“Beto Me Bikisaka Bima na Beto Yonso Sambu na Kwisa Kulanda Nge”
3, 4. Inki Yezu kuyambulaka na zulu, mpi nki beto fwete sala sambu na kuvanda balongoki na yandi?
3 Sambu na kulungisa kisalu yina Nzambi kutindilaka yandi na ntoto, Yezu “buyaka mambu . . . yonso na luzolo na yandi mosi, ebuna yandi ndimaka na kukuma mpika,” mpi yandi yambulaka luzingu ti lukumu na yandi na zulu. (Filp. 2:7) Konso kima yina beto lenda sala sambu na kulanda mbandu ya Kristu, beto lenda fwanisa yo ve ti mambu yina yandi salaka sambu na kukwisa na ntoto. Kansi, sambu beto kele balongoki na yandi, beto lenda bikala ya kwikama, kukonda kutala ti mpusa ya ngolo bima yina beto vandaka na yo na nsi-ntoto ya Satana.—1 Yoa. 5:19.
4 Kilumbu mosi, ntumwa Piere kusongaka Yezu nde: “Beto me bikisaka bima na beto yonso sambu na kwisa kulanda nge.” (Mat. 19:27) Piere, Andre, Yakobo, ti Yoane kuyambulaka na mbala mosi babukondi na bo ntangu Yezu kubingaka bo na kulanda yandi. Bo bikaka kisalu na bo ya kuloba bambisi mpi bo ndimaka kisalu ya mfunu ya kusamuna. Na kuwakana ti Evanzile ya Luka, Piere kutubaka nde: “Tala, beto me bikisaka [bima, NW] na beto sambu na kwisa kulanda nge.” (Luka 18:28) Sambu na bantu mingi na kati na beto, yo lombaka ve nde beto yambula “bima na beto” yonso sambu na kulanda Yezu. Kansi, yo lombaka nde beto ‘kudibuya’ sambu na kukuma balongoki ya Kristu mpi kusadila Yehowa na ntima ya mvimba. (Mat. 16:24) Luzingu ya mutindu yai kenataka balusakumunu mingi. (Tanga Matayo 19:29.) Kulanda mbandu ya Kristu mpi kuvanda ti nkadilu ya kuzabisa nsangu ti kikesa yonso kenatilaka beto kyese, mingimingi kana beto lenda pesa ata lusadisu ya fyoti sambu na kusadisa muntu na kukwenda penepene na Nzambi mpi na Mwana na yandi yina yandi kezolaka.
5. Ta eksperiansi mosi ya kemonisa desizio yina muntu ya ke na nsi ya nzenza lenda baka na nima ya kulonguka kyeleka ya Biblia.
5 Valmir, bakala mosi ya Brésil yina vandaka kuzinga na bwala mosi ya insi ya Suriname, vandaka kusala kisalu ya kutimuna wolo. Yandi vandaka kunwa malafu mingi mpi yandi vandaka kuzinga luzingu ya mansoni. Ntangu yandi kwendaka na mbanza, Bambangi ya Yehowa yantikaka kulonguka Biblia ti yandi. Yandi vandaka kulonguka konso kilumbu, yandi salaka bansoba mingi, mpi yandi sukininaka ve na kubaka mbotika. Ntangu yandi monaka nde kisalu na yandi vandaka kupesa yandi ve nzila ya kuzinga na kuwakana ti mambu ya yandi vandaka kulonguka, yandi tekaka bima na yandi ya kisalu mpi kuvutukaka na Brésil sambu na kusadisa bantu ya dibuta na yandi na kuzaba kyeleka. Na nima ya kulonguka kyeleka ya Biblia, banzenza mingi kendimaka na kuyambula bisalu na bo na bansi ya nzenza, mpi kevutukaka na bansi na bo ti lukanu ya kusadisa bantu ya mabuta na bo ti bantu yankaka na kuzaba kyeleka. Bansamuni ya Kimfumu ya mutindu yai kemonisaka mpenza nkadilu ya baevanzelizatere ya kuzabisa nsangu ti kikesa.
6. Inki beto lenda sala kana beto lenda kwenda ve na kisika yina mpusa ya bansamuni ya Kimfumu kele mingi?
6 Bambangi mingi mekwendaka na bisika yina mpusa ya bansumuni ya Kimfumu kele mingi. Bankaka nkutu mekwendaka na bansi yankaka sambu na kusamuna. Mbala yankaka beto lenda kwenda ve na bansi yankaka bonso bo, kansi beto lenda landa mbandu ya Yezu mpi kusala yonso yina beto lenda sala sambu na kusamuna.
Yehowa Kepesaka Formasio ya Mefwana
7. Inki banzo-nkanda mesalamaka sambu na kulonga bantu yina kezola kutomisa mayele na bo na kisalu ya kusamuna Kimfumu?
7 Kaka mutindu Yezu kubakaka formasio na Tata na yandi, beto mpi lenda baka mambote na malongi yina Yehowa kepesa beto ntangu yai. Yezu kutubaka nde: “Baprofete sonikaka mambu yai nde: ‘Nzambi ta longa bantu yonso.’” (Yoa. 6:45; Yez. 54:13) Bubu yai, kele ti banzo-nkanda ya mesalamaka mingimingi sambu na kusadisa beto na kuvanda bansamuni ya mbote ya Kimfumu. Ntembe kele ve nde beto yonso kebakaka mambote na Nzo-Nkanda ya Kisalu ya Teokrasi na mabundu na beto. Bapasudi-Nzila kevandaka ti dibaku ya kukwenda na Nzo-Nkanda ya Kisalu ya Kimupasudi-Nzila. Bapasudi-Nzila yankaka ya mesalaka mingi, kuvandaka na kyese na kukota mbala ya zole nzo-nkanda yina. Bankuluntu ti bansadi na kisalu kekotaka Nzo-Nkanda ya Kisalu ya Kimfumu sambu na kutomisa mayele na bo ya kulongila mpi mutindu ya kusadila bampangi na bo Bakristu. Bankuluntu ti bansadi ya kisalu mingi yina mekwelaka ntete ve kekwendaka na Nzo-Nkanda Yina Kelongaka Mutindu ya Kusala Kisalu, yina kelongaka bo na kusadisa bankaka na kisalu ya kusamuna. Mpi bampangi mingi ya babakala ti ya bankento yina bo metindaka bonso bamisionere na bansi ya nzenza kebakaka formasio na Gileade, Nzo-Nkanda ya Kelongaka Bamisionere ya Bambangi ya Yehowa.
8. Bampangi mingi mesalaka nki na luzolo yonso sambu na kumonisa nde bo kebaka na valere malongi yina Yehowa kepesaka?
8 Bambangi ya Yehowa mingi mesalaka bansoba sambu na kukota banzo-nkanda yai. Mu mbandu, sambu na kukwenda na Nzo-Nkanda Yina Kelongaka Mutindu ya Kusala Kisalu yina kusalamaka na Canada, Yugu kukatukaka na kisalu na yandi ya kinsuni sambu mfumu na yandi ya kisalu kubuyaka kupesa yandi nzila. Yugu kutubaka nde: “Yo kesala munu mpasi ve. Kana bo ndimaka na kupesa munu nswa ya kukwenda, bo zolaka kuvingila nde mu bikala kimakulu na kompani yina kaka sambu na kumonisa kwikama na munu. Kansi, ntangu yai mu ke ya kuyilama na kundima konso mukumba yina Yehowa lenda pesa munu.” Sambu na kubaka mambote na malongi yina Nzambi kepesaka, Bakristu mingi metambikaka na luzolo yonso bima yina bo vandaka kubaka ntete na valere mingi.—Luka 5:28.
9. Pesa mbandu mosi ya kemonisa mbuma ya mbote ya kekatukaka na malongi ya Masonuku mpi bikesa ya masonga.
9 Malongi ya Masonuku mpi bikesa ya masonga lenda sadisa bantu na kulonguka mambu na mutindu ya kuyituka. (2 Tim. 3:16, 17) Beto baka mbandu ya mambu yina kukuminaka Saulo yina kezingaka na Guatemala. Yandi butukaka ti kifu, ntu na yandi kesalaka mbote ve, mpi longi na yandi mosi kusongaka mama na yandi nde bo lenda pusa yandi ve na ngolo na kulonguka kutanga sambu yo tapesaka yandi kaka kiseku. Saulo kukatukaka na nzo-nkanda kukonda kuzaba kutanga. Kansi, Mbangi mosi ya Yehowa kusadilaka kamukanda Longuka Kutanga mpi Kusonika sambu na kulonga yandi mutindu ya kutanga. Nsukansuka, Saulo kumaka kutanga mbote na mpila nde yandi lendaka kusala badevware na Nzo-Nkanda ya Kisalu ya Teokrasi. Na nima, mama ya Saulo kukutanaka ti longi yina na kisalu ya kusamuna nzo na nzo. Ntangu longi yina kuwaka nde Saulo mezabaka kutanga, yandi lombaka mama na yandi na kunata Saulo na mposo yina talanda. Ntangu Saulo kukwendaka na nzo ya longi yina na mposo yina kulandaka, longi kuyulaka yandi nde: “Inki nge talonga munu?” Saulo yantikaka kutanga paragrafe mosi ya mukanda Inki Biblia Kelongaka Mpenza? Longi kutubaka nde: “Mu kendima ve nde nge kelonga munu ntangu yai.” Yandi yantikaka kudila sambu yandi vandaka na kyese mingi kibeni, ebuna yandi yambaka Saulo.
Malongi Yina Kesimbaka Ntima
10. Inki kisadilu ya mbote beto kele na yo sambu na kulonga kyeleka ya Biblia?
10 Malongi ya Yezu kusimbamaka na mambu yina Yehowa kulongaka yandi mpi na malongi yina kele na Ndinga ya kusonama ya Nzambi. (Luka 4:16-21; Yoa. 8:28) Beto kelandaka mbandu ya Yezu na ntangu beto kesadilaka bandongisila na yandi mpi ntangu beto kebakaka malongi na beto na Masonuku. Beto yonso ketubaka mpi keyindulaka na mutindu yina kenataka bumosi na kati na beto. (1 Kor. 1:10) Beto kevutula ntonda mingi mpenza na mutindu “mpika ya kwikama mpi ya mayele” kepesaka beto mikanda yina ketendulaka Biblia sambu na kusadisa beto na kuvanda ntangu yonso ti bumosi na malongi na beto mpi na kulungisa kisalu na beto ya baevanzelizatere. (Mat. 24:45, NW; 28:19, 20) Mosi na kati ya mikanda yango kele Biblia Kelongaka, yina kebasika ntangu yai na bandinga 179.
11. Inki mutindu mpangi-nkento mosi ya Etiopia kunungaka kimbeni na kusadilaka mukanda Biblia Kelongaka?
11 Kusadila mukanda Biblia Kelongaka sambu na kulonguka Masonuku lenda pusa ata bambeni na kubalula ntima. Kilumbu mosi, Lula, mpangi-nkento mosi ya mupasudi-nzila na Etiopia, vandaka kutwadisa kulonguka ya Biblia ntangu mpangi ya longoki yina kukotaka na kintulumukina na nzo mpi kutubaka na makasi yonso nde bo fwete longuka dyaka ve. Lula kuyindulaka ti yandi na malembe yonso, yandi sadilaka mbandu ya mbongo ya luvunu yina bo ketubila na kapu ya 15 ya mukanda Biblia Kelongaka. Nkento yina kulembikaka ntima mpi kupesaka bo nswa ya kulanda kulonguka na bo. Yandi vandaka na kulonguka yina kulandaka mpi yandi lombaka na kulonguka Biblia. Nkutu, yandi tubaka nde yandi tafutaka mbongo! Ntama mingi ve yandi yantikaka kulonguka mbala tatu na mposo mpi kuyelaka mbote na kimpeve.
12. Pesa mbandu ya kemonisa mutindu baleke lenda nunga na kulonga kyeleka ya Biblia.
12 Baleke mpi lenda sadisa bantu yankaka na kusadilaka mukanda Biblia Kelongaka. Keanu kele leke mosi ya bamvula 11 yina kezingaka na Hawaii. Kilumbu mosi ya yandi vandaka kutanga mukanda yai na nzo-nkanda, nduku na yandi mosi kuyulaka yandi nde: “Sambu na nki nge ketaka ve bankinsi?” Keanu kutangaka mvutu mbala mosi na appendice “Keti Beto Fwete Ta Bankinsi?” Na nima, yandi kangulaka mukanda na tansi ya malongi mpi kuyulaka nduku na yandi kana nki disolo kesepedisa yandi mingi kuluta. Bo yantikaka kulonguka Biblia. Na mvula ya kisalu meluta, Bambangi ya Yehowa kulongukaka Biblia ti bantu 6 561 426 mpi mingi kusadilaka mbote mukanda Biblia Kelongaka. Keti nge kesadila mukanda yai sambu na kulonguka Biblia ti bantu?
13. Na nki mutindu kulonguka Biblia lenda vanda na bupusi ya ngolo na bantu?
13 Kusadila mukanda Biblia Kelongaka sambu na kulonguka Masonuku lenda vanda na bupusi ya ngolo na bantu yina kezola kusala luzolo ya Nzambi. Bakala mosi ti nkento na yandi yina kuvandaka bapasudi-nzila ya nene na Norvège yantikaka kulonguka Biblia ti dibuta mosi ya kukatukaka na Zambie. Bankwelani yina ya Zambie kuvandaka ti bana-bankento tatu mpi bo zolaka dyaka ve kubuta mwana yankaka. Yo yina, ntangu nkento kubakaka divumu, bo bakaka lukanu ya kubasisa yo. Bilumbu fyoti na ntwala ya kukwenda kumona munganga, bo longukaka kapu yina ke na ntu-dyambu “Vanda ti Dibanza ya Nzambi Sambu na Luzingu.” Kifwanisu ya mwana yina ke na kati ya divumu ya kele na kapu yina kusimbaka mpenza ntima ya bankwelani yai na mpila nde bo bakaka lukanu ya kubasisa dyaka ve divumu. Bo landaka na kuyela mbote na kimpeve mpi ntangu mwana kubutukaka bo pesaka yandi zina ya mpangi-bakala yina vandaka kulonguka ti bo.
14. Pesa mbandu ya kemonisa nde kuzinga na kuwakana ti mambu yina beto kelongaka lenda buta bambuma ya mbote.
14 Kima yankaka ya mbote kele nde Yezu vandaka kuzinga na kuwakana ti mambu yina yandi vandaka kulonga. Bantu mingi kesepelaka ti bikalulu ya mbote ya Bambangi ya Yehowa, yina kelandaka mbandu ya Yezu. Mu mbandu, bamiyibi kukangulaka na ngolo vwatire ya komersa mosi ya Nouvelle-Zélande mpi kuyibaka sakoshe na yandi. Komersa yango kusongaka dyambu yina na muntu mosi ya polise, ebuna muntu ya polise kutubilaka yandi nde: “Nge lenda zwa bima na nge kaka kana Bambangi ya Yehowa kulokuta yo.” Yo salamaka mpi nde Mbangi mosi ya Yehowa yina vandaka kukabula bazulunalu kulokutaka sakoshe yina. Ntangu komersa yango kuwaka nde mpangi-nkento mosi kulokutaka yo, yandi kwendaka na nzo ya mpangi yina. Yandi vandaka na kyese mingi na kumona nde mukanda na yandi mosi ya mfunu mingi kuvilaka ve. Mpangi-nkento kusongaka yandi nde: “Yo lombaka mpenza nde mu vutula bima na nge, sambu mu kele Mbangi ya Yehowa.” Komersa yina kuyitukaka sambu yandi yibukaka mambu yina muntu ya polise kusongaka yandi na suka. Yo ke pwelele nde Bakristu ya kyeleka kezingaka na kuwakana ti malongi yina kele na Biblia mpi sambu bo kelandaka mbandu ya Yezu.—Baeb. 13:18.
Landa Mbandu ya Mutindu Yezu Vandaka Kutadila Bantu
15, 16. Inki mutindu beto lenda benda bantu na kuwa nsangu ya beto kesamunaka?
15 Mutindu Yezu vandaka kutadila bantu kubendaka bo na kuwa nsangu na yandi. Mu mbandu, zola ti kudikulumusa na yandi kubendaka bansukami na kukwenda penepene na yandi. Yandi wilaka bantu yina kukwendaka na yandi mawa, yandi sadilaka bangogo ya mbote sambu na kupesa bo kikesa, mpi yandi belulaka bantu mingi. (Tanga Marko 2:1-5.) Beto lenda sala ve bidimbu ya nkumbwa, kansi beto lenda monisa zola, kudikulumusa, mpi mawa. Yai kele bikalulu ya kesadisaka bantu na kundima kyeleka.
16 Mawa kupusaka Tariua, mupasudi-nzila mosi ya nene, na kusala mambu ya mbote ntangu yandi kwendaka na nzo ya mununu mosi na zina ya Beere yina kezingaka ntama kibeni na kisanga mosi ya Kiribati na Sudi ya Pacifique. Ata bakala yina kumonisaka nde yandi zolaka ve kuwidikila nsangu, Tariua kumonaka nde lweka mosi ya bakala yina vandaka kusala ve mpi yandi wilaka bakala yango mawa. Tariua kuyulaka yandi nde: “Keti nge mewaka dezia mambu yina Nzambi kesila na bantu yina kebela ti bayina kele minunu?” Ebuna, Tariua kutangilaka yandi verse ya mbikudulu ya Yezaya. (Tanga Yezaya 35:5, 6.) Bakala yina kuyitukaka mpi kutubaka nde: “Banda bamvula mingi, mu ketangaka Biblia mpi bamisionere ya dibundu na munu kekwisaka kutala munu, kansi mu memonaka ntete ve verse yai na Biblia.” Tariua yantikaka kulonguka Biblia ti Beere, mpi yandi yeleka mbote na kimpeve. Ya kyeleka, ata lweka na yandi mosi vandaka kusala ve, ntangu yai yandi mebakaka mbotika, ketwadisaka kimvuka mosi ya teritware izole, mpi kekukaka kukwenda na kisanga ya mvimba sambu na kusamuna nsangu ya mbote.
Fula na Kulanda Mbandu ya Kristu
17, 18. (a) Inki mutindu nge lenda kuma evanzelizatere ya mbote? (b) Inki balusakumunu kevingila bantu yina kebakaka kisalu na bo ya kusamuna na valere?
17 Mutindu baeksperiansi mingi ya mbote kemonisa yo mbala na mbala, beto lenda vanda baevanzelizatere ya mbote kana beto keyedisa mpi kemonisa bikalulu yina Yezu vandaka kumonisa. Yo yina, yo mefwana mpenza nde beto landa mbandu ya Kristu mpi kuvanda baevanzelizatere ya kikesa!
18 Ntangu bantu yankaka kukumaka balongoki ya Yezu na mvu-nkama ya ntete, Piere kuyulaka nde: “Nki beto ta baka?” Yezu kuvutulaka nde: “Konso muntu yina me bikisa nzo na yandi, bampangi na yandi ya bakala to ya bankento, tata na yandi, mama na yandi, bana na yandi, to bilanga na yandi sambu na mono, yandi ta baka yina me luta yina ya yandi vandaka na yo ntete mbala nkama, yandi ta baka mpi moyo ya mvula na mvula.” (Mat. 19:27-29) Beto mpi lenda mona bukyeleka ya bangogo yai kana beto fula na kulanda mbandu ya Yezu Kristu, Misionere ya kuluta nene.
Inki Mvutu Nge Tapesa?
• Inki mutindu Yehowa kelonga beto sambu na kuvanda baevanzelizatere?
• Sambu na nki mukanda Biblia Kelongaka kele mbote sambu na kisalu na beto ya kusamuna?
• Inki mutindu beto lenda landa mbandu ya Yezu na mutindu na beto ya kutadila bantu?
[Bangyufula ya disolo ya kulonguka]
[Kifwanisu ya kele na lutiti 21]
Ntangu Yezu kubingaka Piere, Andre, Yakobo, ti Yoane na kulanda yandi, bo landaka yandi kukonda kusukinina
[Kifwanisu ya kele na lutiti 23]
Mikanda bonso “Biblia Kelongaka” kesadisaka beto na kuvanda ntangu yonso ti bumosi na malongi na beto