Baka Kyese na Kisalu ya Kukumisa Bantu Balongoki
Baka Kyese na Kisalu ya Kukumisa Bantu Balongoki
‘Yo yina, beno kwenda kukumisa bantu balonguki.’—MAT. 28:19.
1-3. (a) Inki mutindu bansamuni mingi kekudiwaka na yina metala dibaku ya kulonguka Biblia ti bantu? (b) Inki bangyufula beto tatadila?
MPANGI-NKENTO mosi ya kevukanaka ti kimvuka ya ndinga ya Hindi na États-Unis kusonikaka nde: “Bamposo 11 meluta, mu vandaka kulonguka Biblia ti dibuta mosi yina kukatukaka na Pakistan.” Yandi kelanda na kutuba nde: “Yo kele mfunu ve na kutuba nde beto kumaka banduku. Mansanga kefuluka mono na meso ntangu mu keyindula nde ntama mingi ve dibuta yai kevutuka na Pakistan. Mansanga na mono kebasika kaka ve sambu na mawa yina mu kewa sambu mu tavandaka dyaka ve ti bo, kansi mpi sambu na kyese yina mu waka ntangu mu vandaka kulonga bo mambu ya metala Yehowa.”
2 Bonso mpangi-nkento yai, keti nge mewaka dezia kyese ya kekatukaka na kulonguka Biblia ti muntu? Yezu ti balongoki na yandi ya mvu-nkama ya ntete bakaka kyese mingi na kisalu ya kukumisa bantu balongoki. Ntangu balongoki 70 yina Yezu kulongaka kwisaka kuvutuka ti rapore mosi ya kyese, Yezu “monaka kiese na lusadisu ya Mpeve ya Nzambi.” (Luka 10:17-21) Mutindu mosi, bantu mingi bubu yai kebaka kyese mingi na kukumisa bantu balongoki. Nkutu na 2007, bansamuni ya kesala ngolo mpi ya kele na kyese kulongukaka Biblia ti bantu kiteso ya bamilio sambanu ti ndambu konso ngonda!
3 Kansi, bansamuni yankaka mewaka ntete ve kyese ya kulonguka Biblia ti muntu. Yo lenda vanda nde bankaka melongukaka ve Biblia ti muntu na bamvula ya mekatuka kuluta. Inki bampasi beto lenda kutana na yo na ntangu beto kesala kikesa na kulonguka Biblia ti bantu? Inki mutindu beto lenda nunga bampasi yango? Mpi nki balusakumunu beto kebakaka ntangu beto kesalaka yonso yina beto lenda sala sambu na kulemfuka na ntuma yai ya Yezu: ‘Yo yina, beno kwenda kukumisa bantu balonguki’?—Mat. 28:19.
Bampasi Yina Lenda Katula Beto Kyese
4, 5. (a) Inki mutindu bantu mingi keyambaka nsangu na bisika yankaka ya ntoto? (b) Inki bampasi bansamuni kekutanaka na yo na bisika yankaka?
4 Na bitini yankaka ya ntoto, bantu kendimaka mikanda na beto na kyese yonso mpi kevandaka na mpusa ya ngolo ya kulonguka Biblia ti beto. Bakala mosi ya Australie ti nkento na yandi yina kusalaka sambu na mwa ntangu fyoti na Zambie kusonikaka nde: “Mambu ya bo ketubaka kele ya kyeleka. Zambie kele paladisu na yina metala kisalu ya kusamuna. Kuta kimbangi na balabala kele kitoko kibeni! Bantu kekwisaka na beto, bankaka nkutu kelombaka banimero ya sikisiki ya bazulunalu.” Na mvula mosi na kati ya bamvula ya mekatuka kuluta, bampangi ya babakala mpi ya bankento ya Zambie kulongukaka Biblia ti bantu kuluta 200 000, disongidila konso nsamuni kutwadisaka kiteso ya longoki ya Biblia kuluta mosi.
5 Kansi, na bisika yankaka bansamuni lenda mona mpasi na kukabula mikanda mpi kulonguka Biblia ti bantu mbala na mbala. Sambu na nki? Mbala mingi, bantu kevandaka ve na nzo ntangu bansamuni kebulaka na kyelo na bo, ebuna bankaka yina kevandaka lenda buya kusolula mambu ya metala Nzambi. Mbala yankaka bo sansaka bo na dibuta yina kekwikilaka ve na Nzambi to bo kemengaka luvunu yina kemonana pwelele na mabundu ya luvunu. Bantu mingi melembaka mpi kele ti kikesa ve sambu na bangungudi ya luvunu. (Mat. 9:36) Beto kebakisa sambu na nki bantu yai lenda wa boma na kutubila mambu ya metala Biblia.
6. Inki bampasi bansamuni yankaka lenda kutana na yo?
6 Bansamuni yankaka ya kwikama kekutana ti bampasi ya mutindu yankaka yina lenda katula bo kyese. Ata na ntangu mosi buna bo vandaka kusala mingi na kisalu ya kukumisa bantu balongoki, ntangu yai maladi to bampasi ya kimununu melembisaka bo. Beto tadila mpi bandilu yankaka yina beto lenda kuditudila beto mosi. Mu mbandu, keti nge kemonaka nde nge mefwana ve na kulonguka Biblia ti muntu? Nge lenda kudiwa bonso Moize ntangu Yehowa pesaka yandi mukumba ya kutubila Farao. Moize kutubaka nde: “Pardo Mfumu, mono zaba kutuba mbote ve na meso ya bantu mingi; mono mpi me tubaka ntete ve na bantu.” (Kub. 4:10) Mawi ya kuyindula nde beto takuka ve ke na kuwakana ya ngolo ti boma ya kuyindula nde beto tanunga ve. Beto lenda kudiyangisa nde muntu takuma ve longoki sambu beto kele ve longi ya mbote mpenza. Sambu beto kemona nde beto takuka ve, beto lenda lutisa dibaku ya kulonguka Biblia ti muntu. Inki mutindu beto lenda nunga bampasi yai ya beto mekatuka kutubila?
Yidika Ntima na Nge
7. Inki kima vandaka kupusa Yezu na kisalu na yandi ya kusamuna?
7 Kuyidika ntima na beto kele kima ya ntete ya kusala. Yezu kutubaka nde: “Muntu ke tubaka mambu yina me fulukaka na ntima na yandi.” (Luka 6:45) Kima vandaka kupusa Yezu na kisalu na yandi ya kusamuna kele kudibanza na masonga yonso sambu na mambote ya bankaka. Mu mbandu, ntangu yandi monaka kinsukami ya kimpeve ya Bayuda, “yandi wilaka bo mawa.” Yandi tubilaka balongoki na yandi nde: “Bambuma mingi kele na bilanga. . . . Beno bondila munkwa-bilanga na kutinda bantu ya nkaka ya kisalu sambu na kukatula bambuma na yandi.”—Mat. 9:36-38.
8. (a) Yo kele mbote nde beto yindula nki dyambu? (b) Inki dilongi beto lenda baka na mambu yina longoki mosi ya Biblia kutubaka?
8 Ntangu beto kesalaka kisalu ya kukumisa bantu balongoki, yo kele mbote nde beto yindula mpenza mambote yina beto mebakaka sambu muntu mosi kubakaka ntangu ya kulonguka Biblia ti beto. Beto yindula mpi bantu yina beto takutana ti bo na kisalu ya kusamuna mpi mambote yina bo tabaka kana bo wa nsangu yina beto kenataka. Nkento mosi kusonikilaka biro ya filiale ya insi yina yandi kezingaka nde: “Mono kezola kuzabisa beno nde mono kesepelaka mingi ti Bambangi yina kelongaka mono Biblia na nzo. Mono kezaba nde bantangu yankaka bo kewilaka mono kiseku na ntima sambu mu kevandaka ti bangyufula mingi mpi ntangu yonso mu kebakaka bo ntangu mingi kuluta. Kansi bo kekangaka ntima mpi kevandaka na mpusa ya ngolo ya kulonga mono mambu yina bo melongukaka. Mono ketonda Yehowa ti Yezu na mutindu bantu yai mekotaka na luzingu na mono.”
9. Yezu kutulaka dikebi na nki, mpi nki mutindu beto lenda landa mbandu na yandi?
9 Ya kyeleka, bantu yonso ve kundimaka bikesa yina Yezu kusalaka sambu na kusadisa bo. (Mat. 23:37) Bankaka kulandaka yandi sambu na mwa ntangu, kansi na nima bo buyaka malongi na yandi mpi “kwendaka diaka ve ti yandi nzila mosi.” (Yoa. 6:66) Kansi, Yezu kumonaka ve nde malongi na yandi mekonda mfunu sambu bantu yankaka kubuyaka yo. Ata bankeni mingi yina yandi kunaka kubutaka ve mbuma, Yezu kutulaka dikebi kaka na mambu ya mbote ya yandi vandaka kusala. Yandi monaka nde bambuma meyela na bilanga, mpi yandi bakaka kyese mingi na kupesa lusadisu na kisalu yina ya kukatula bambuma. (Tanga Yoane 4:35, 36.) Na kisika ya kumona kaka ntoto yina kebuta ve bambuma, keti beto lenda sala ve bonso yandi mpi kutula dikebi kaka na bambuma yina beto lenda katula na teritware yina bo mepesaka beto? Bika beto tadila mutindu beto lenda landa na kuvanda ti mabanza ya mbote.
Kuna ti Lukanu ya Kukatula Bambuma
10, 11. Inki nge lenda sala sambu na kutanina kyese na nge?
10 Muntu ya kesalaka bilanga kekunaka bankeni ti lukanu ya kukatula bambuma. Mutindu mosi, beto fwete samuna ti lukanu ya kuyantika kulonguka Biblia ti bantu. Ebuna, nki nge lenda sala kana nge kelutisa ntangu mbala na mbala na kisalu ya bilanga, kansi nge kekuta ve bantu mingi na banzo to nge kekuka ve kukutana ti bantu yina nge kevutukilaka? Dyambu yai lenda pesa mpasi na ntima. Keti nge fwete yambula kisalu ya kusamuna nzo na nzo? Ata fyoti ve! Beto kelanda na kukutana, sambu na mbala ya ntete, ti bantu mingi na nzila ya metode yai ya kusamuna ya beto kesadilaka banda bamvula mingi.
11 Kansi, sambu na kutanina kyese na nge, keti nge lenda sadila bametode mingi, ziku kusadila mitindu yankaka ya kukutana ti bantu? Mu mbandu, keti nge memekaka kuta kimbangi na balabala to na bisika ya kisalu? Keti nge lenda solula ti bantu na telefone to kubaka banimero ya telefone ya bantu yina nge mepesaka dezia nsangu ya Kimfumu na mpila nde nge landa na kusolula ti bo? Kana nge kekwamina mpi kesosa kuwakanisa kisalu na nge ya kusamuna ti luzingu ya bantu, nge tabaka kyese ya kuzwa bantu yina tandima nsangu ya Kimfumu.
Kana Bantu Ketula Ve Dikebi
12. Inki beto lenda sala kana bantu mingi na teritware na beto kemonana bonso nde bo ketulaka ve dikebi na mambu ya Nzambi?
12 Inki nge lenda sala kana bantu mingi ya teritware na beno ketulaka ve dikebi na mambu ya Nzambi? Keti nge lenda soba bametode na nge sambu yo benda dikebi na bo? Ntumwa Polo kusonikilaka bampangi-Bakristu ya Korinto nde: “Ntangu mono ke sala ti Bayuda mono ke vandaka bonso Muyuda . . . Ntangu mono ke sala ti bantu yina kuzaba Bansiku ya Moize ve, mono ke zingaka bonso bo . . . Mpidina ke songa ve nde mono ke landaka ve Bansiku ya Nzambi.” Inki vandaka kupusa Polo na kusala mutindu yina? Yandi tubaka nde: “Mono ke vandaka mpi bonso bo, na mpila nde mono kugulusa bantu ya nkaka na kati na bo na banzila ya mutindu na mutindu.” (1 Kor. 9:20-22) Keti beto mpi lenda sosa masolo yina tasala nde beto wakana mbote ti bantu ya teritware na beto? Bantu mingi yina kesambilaka ve kezolaka kutomisa bangwisana na bo ya dibuta. Yo lenda vanda mpi nde bo kesosa lukanu mosi na luzingu. Keti beto lenda zabisa nsangu ya Kimfumu na bantu yai na mutindu yina tabenda dikebi na bo?
13, 14. Inki mutindu beto lenda baka kyese mingi kuluta yina beto vandaka kubaka na kisalu ya kukumisa bantu balongoki?
13 Bansamuni mingi mebaka kyese mingi kuluta yina bo vandaka kubaka na kisalu ya kukumisa bantu balongoki, ata na kisika yina bantu mingi kemonanaka bonso nde bo ketulaka ve dikebi na mambu ya Nzambi. Inki mutindu? Bo kelongukaka ndinga mosi ya nzenza. Bakala mosi ti nkento na yandi ya kele ti bamvula kuluta 60 kumonaka nde, bana-nzo-nkanda mingi ya Chine yina vandaka kulonguka na iniversite vandaka kuzinga ti mabuta na bo na teritware ya dibundu na bo. Bakala ketuba nde: “Yo yina, bo syamisaka beto na kulonguka Kishinwa.” Yandi kelanda nde: “Ata yo vandaka kulomba kulutisa ntangu konso kilumbu sambu na kulonguka ndinga yina, beto yantikaka kulonguka Biblia ti bashinwa mingi na teritware na beto.”
14 Ata nge takuka ve kulonguka ndinga ya nzenza, nge lenda sadila mbote kamukanda Une bonne nouvelle pour des gens de toutes nations ntangu nge kekutana ti bantu yina ketuba ndinga yankaka. Nge lenda baka mpi mbala na mbala mikanda na ndinga ya bantu yina nge kekutana ti bo. Ya kyeleka, yo kelombaka ntangu mpi kikesa mingi sambu na kusolula ti bantu ya ketubaka ndinga yankaka mpi ya kele ti mutindu yankaka ya kuzinga. Kansi, kuvila ve munsiku yai ya kele na Ndinga ya Nzambi: “Muntu yina ke kunaka bambuma mingi, yandi ke katulaka mpi bambuma mingi.”—2 Kor. 9:6.
Yo Ketadila Dibundu ya Mvimba
15, 16. (a) Sambu na nki kisalu ya kukumisa bantu balongoki kelombaka kikesa ya dibundu ya mvimba? (b) Inki kisalu bampangi ya minunu kesalaka?
15 Kansi, kukumisa bantu balongoki kelombaka kaka ve kikesa ya muntu mosi mpamba. Yo kelombaka kikesa ya dibundu ya mvimba. Sambu na nki? Yezu kutubaka nde: “Kana beno ke zolana beno na beno, bantu yonso ta zaba nde beno kele balonguki na mono.” (Yoa. 13:35) Nkutu, ntangu balongoki ya Biblia kekwisaka na balukutakanu, bo keyitukaka mbala mingi na kumona zola yina kevandaka na kati na beto. Longoki mosi ya Biblia kusonikaka nde: “Kukwenda na balukutakanu kesepedisaka mono mingi. Bantu keyambaka mono mbote mpenza!” Yezu kutubaka nde bo lenda menga bantu yina takuma balongoki na yandi na mabuta na bo ya kinsuni. (Tanga Matayo 10:35-37.) Kansi, yandi silaka nde bo tazwa “bampangi ya babakala ti ya bankento, bamama, [ti] bana” mingi ya kimpeve na kati ya dibundu.—Mar. 10:30.
16 Bampangi na beto ya babakala ti ya bankento ya minunu kesalaka kisalu ya mfunu mingi na kusadisa balongoki ya Biblia na kuyela. Na nki mutindu? Ata kana bankaka na kati ya bampangi ya minunu kekukaka ve kulonguka bo mosi Biblia ti muntu, bakomantere ya ketungaka yina bo kepesaka na balukutakanu ya dibundu kekumisaka ngolo lukwikilu ya bantu yonso yina kewidikilaka yo. Bamvula ya bo mesalaka na nzila ya lunungu ketomisaka dyaka dibundu mpi kebendaka bantu ya ntima-masonga na organizasio ya Nzambi.—Bing. 16:31.
Kununga Boma na Beto
17. Inki beto lenda sala sambu na kununga mawi ya kuyindula nde beto takuka ve?
17 Ebuna kana nge kenwana ti mawi ya kuyindula nde nge takuka ve? Yibuka nde Yehowa kusadisaka Moize na kupesaka yandi mpeve santu mpi muntu ya kusadisa yandi, Aroni, mpangi na yandi. (Kub. 4:10-17) Yezu kusilaka nde mpeve ya Nzambi tasadisa beto na kisalu na beto ya kuta kimbangi. (Bis. 1:8) Dyaka, Yezu kutindaka bantu ya kisalu na kukwenda kusamuna zole-zole. (Luka 10:1) Yo yina, kana nge kemona mpasi na kulonguka Biblia ti muntu, lomba mpeve ya Nzambi na kisambu sambu yo pesa nge mayele mpi, na nima sala kumosi ti nsamuni yankaka yina lenda sadisa nge na kuditudila ntima mpi yina eksperiansi na yandi tavanda mfunu sambu nge. Yo kekumisa lukwikilu ngolo na kuyibuka nde Yehowa solaka na kusadila bantu ya mpamba, disongidila bayina bantu ya nsi-ntoto ‘ke monaka nde bo kele ngolo ve,’ sambu na kulungisa kisalu yai ya kuyituka.—1 Kor. 1:26-29.
18. Inki mutindu beto lenda nunga boma ya kuyindula nde beto tanunga ve?
18 Inki mutindu beto lenda nunga boma ya kuyindula nde beto tanunga ve? Yo tavanda mbote na kuyibuka nde kukumisa muntu longoki kele ve bonso kulamba madya, sambu kutoma to kubeba na yo ketadila ntetentete muntu mosi mpamba yina kelambaka. Kansi, kukumisa muntu longoki kele kisalu ya ketadila bantu tatu. Yehowa kesalaka kitini ya kuluta mfunu, na mutindu yandi kebendaka muntu. (Yoa. 6:44) Beto ti bampangi yankaka na dibundu kesalaka yonso na kusadila mayele ya kulonga sambu na kusadisa longoki na kuyela. (Tanga 2 Timoteo 2:15.) Mpi longoki fwete sadila mambu yina yandi kelonguka. (Mat. 7:24-27) Kana muntu meyambula kulonguka Biblia, yo lenda pesa beto mpasi. Beto ketula kivuvu nde balongoki ya Biblia tasala nsola ya mbote, kansi konso muntu “ta samba na meso ya Nzambi sambu na mambu na yandi mosi.”—Roma 14:12.
Inki Balusakumunu Beto Tabaka?
19-21. (a) Inki balusakumunu beto kebakaka ntangu beto kelongukaka Biblia ti bantu? (b) Inki mutindu Yehowa ketadilaka bantu yonso yina kesalaka kisalu ya kusamuna?
19 Kulonguka Biblia ti bantu kesadisaka beto na kulanda kutula dikebi na kusosa ntete Kimfumu. Dyaka, yo kekotisaka bakyeleka ya Ndinga ya Nzambi na mabanza mpi na ntima na beto. Sambu na nki? Mupasudi-nzila mosi na zina ya Barak ketendula nde: “Kulonguka Biblia ti bantu kepusaka na kuvanda longoki ya mbote ya Ndinga ya Nzambi. Mu kemonaka nde mu fwete kumisa ntete balukwikilu na mono ngolo na ntwala ya kulonga mbote-mbote muntu yankaka.”
20 Kana nge kelonguka ve Biblia ti muntu, keti yo ketendula nde kisalu na nge kele ve na mfunu na meso ya Nzambi? Ata fyoti ve! Yehowa kesepelaka mpenza na bikesa yina beto kesalaka sambu na kukumisa yandi. Bantu yonso yina kesalaka kisalu ya kusamuna “ke sadilaka Nzambi na kimvuka.” Kansi, kulonguka Biblia ti muntu kepesaka kyese mingi ntangu beto kemona nki mutindu Nzambi keyedisa nkeni yina beto kunaka. (1 Kor. 3:6, 9) Mupasudi-nzila mosi na zina ya Amy ketuba nde: “Ntangu nge kemona longoki ya Biblia keyela, nge kefuluka ti ntonda sambu na Yehowa mutindu yandi ndimaka na kusadila nge sambu na kupesa muntu yina dikabu mosi ya kitoko, disongidila dibaku ya kuzaba Yehowa mpi ya kubaka luzingu ya mvula na mvula.”
21 Kusala yonso yina beto lenda sala sambu na kuyantika mpi kulanda na kulonguka Biblia ti bantu tasadisa beto na kulanda kusadila Nzambi ntangu yai mpi takumisa ngolo kivuvu na beto ya kuguluka sambu na kukota na nsi-ntoto ya mpa. Ti lusadisu ya Yehowa, beto lenda sadisa mpi na kugulusa bayina kewa beto. (Tanga 1 Timoteo 4:16.) Yo tavanda dyambu ya kyese mpenza!
Keti Nge Keyibuka?
• Inki bampasi lenda kanga bampangi yankaka nzila ya kulonguka Biblia ti bantu?
• Inki beto lenda sala kana bantu mingi na teritware na beto kemonana bonso nde bo ketula ve dikebi na mambu ya Nzambi?
• Inki balusakumunu beto kebakaka ntangu beto kelongukaka Biblia ti muntu?
[Bangyufula ya disolo ya kulonguka]