“Kwisa Kulanda Mono”

“Kana muntu zola kwisa kulanda mono, yandi lenda yindula diaka ve luzingu na yandi mosi; kansi yandi kubaka [nti na yandi ya mpasi, NW] konso kilumbu, yandi kwisa kulanda mono.”​—LUKA 9:23.

1, 2. (a) Inki emvitasio ya kitoko Yezu kupesaka? (b) Inki mvutu nge mepesaka na emvitasio ya Yezu?

 NA KITINI ya nsuka ya kisalu na yandi ya kusamuna, Yezu vandaka kuta kimbangi na Perea, bwala mosi ya vandaka na simu ya nzadi ya Yordani, na nordi-esti ya Yudea. Toko mosi ya bakala pusanaka penepene na yandi mpi kuyulaka yandi nki yandi fwete sala sambu na kubaka luzingu ya mvula na mvula. Na nima ya kubakisa nde toko yango vandaka kuzitisa na kwikama yonso Bansiku ya Moize, Yezu kupesaka yandi emvitasio mosi ya kitoko mpenza. Yandi tubaka nde: “Kwenda kuteka bima na nge yonso, nge pesa mbongo na bansukami, ebuna nge ta vanda na kimvwama na zulu. Na nima, kwisa kulanda mono.” (Mar. 10:21) Yindula fyoti​—emvitasio ya kulanda Yezu, Mwana mosi kaka ya kubutukaka ya Nzambi ya Kuluta Kuzanguka!

² Toko yina ya bakala kubuyaka emvitasio yina, kansi bankaka kundimaka yo. Mwa ntangu fyoti na ntwala, Yezu tubilaka Filipo nde: “Kwisa landa mono!” (Yoa. 1:43) Filipo kundimaka mpi na nima yandi kumaka ntumwa. Yezu kupesaka dyaka emvitasio yina na Matayo, ebuna yandi mpi kundimaka yo. (Mat. 9:9; 10:2-4) Na kutuba ya mbote, Yezu kupesaka emvitasio ya mutindu mosi na bantu yonso yina kezolaka lunungu ntangu yandi tubaka nde: “Kana muntu zola kwisa kulanda mono, yandi lenda yindula diaka ve luzingu na yandi mosi; kansi yandi kubaka [nti na yandi ya mpasi, NW] konso kilumbu, yandi kwisa kulanda mono.” (Luka 9:23) Ya kyeleka, konso muntu lenda landa Yezu kana yandi mezola mpenza. Keti nge kele ti mpusa yina? Bamingi na kati na beto mendimaka dezia emvitasio yai ya kitoko ya Yezu, mpi beto kepesaka bantu yankaka emvitasio yango na kisalu ya bilanga.

3. Inki beto lenda sala sambu na kuvila ve nzila ya kulanda Yezu?

³ Yo kele mawa na kumona nde bantu yankaka yina vandaka kusepela na kyeleka ya Biblia kezolaka yo dyaka ve. Kansi, bo melembaka mpi nsukansuka bo ‘mevilaka nzila’ mpi kelandaka dyaka ve Yezu. (Baeb. 2:1) Inki beto lenda sala sambu na kubwa ve na mutambu yina? Kudiyula bangyufula yai tasadisa beto: ‘Inki kikuma ya ntetentete kupusaka munu na kupona na kulanda Yezu? Kulanda yandi ketendula inki?’ Kuyindulula mbotembote bamvutu na bangyufula yai zole takumisa ngolo lukanu na beto ya kubikala na nzila ya mbote yina beto meponaka. Yo tasadisa beto mpi na kupesa bankaka kikesa ya kulanda Yezu.

Sambu na Nki Kulanda Yezu?

4, 5. Sambu na nki Yezu mefwana na kuvanda Ntwadisi?

⁴ Profete Yeremia kutubaka nde: “Mfumu Nzambi, mono zaba nde ke na muntu ve lenda sola nzila na yandi mosi, ke na muntu ve lenda songa nzila na makulu na yandi ntangu yandi ke tambula.” (Yer. 10:23) Disolo ya luzingu ya bantu memonisaka nde mambu yina Yeremia kutubaka kele ya kyeleka. Mbala mingi yo kemonanaka pwelele nde bantu ya kukonda kukuka lenda nunga ve na kuditwadisa. Beto mendimaka emvitasio ya kulanda Yezu sambu beto longukaka nde yandi mefwana na kuvanda Ntwadisi na beto na mutindu yina ata muntu mosi ve lenda kuka na kuvanda. Beto tadila mwa mambu yina kemonisa nde Yezu mefwana na kuvanda Ntwadisi na beto.

⁵ Ya ntete, Yehowa yandi mosi muntu kuponaka Yezu bonso Mesia Ntwadisi. Katula Ngangi na beto, nani lenda pona mbote mpenza muntu yina mefwana na kuvanda Ntwadisi na beto? Ya zole, Yezu kele ti bikalulu yina beto lenda sepela na yo mpi kulanda yo. (Tanga Yezaya 11:2, 3.) Yandi kele mbandu mosi ya kukuka. (1 Pie. 2:21) Ya tatu, Yezu kekudibanzaka mpenza sambu na bantu yina kelandaka yandi, mpi yo monanaka na mutindu yandi pesaka luzingu na yandi sambu na bo. (Tanga Yoane 10:14, 15.) Mpi, yandi monisaka nde yandi kele ngungudi ya dikebi na mutindu yandi ketwadisaka beto na luzingu mosi ya kepesa kyese bubu yai mpi ya kenata na luzingu ya nkembo ya kimakulu na bilumbu kekwisa. (Yoa. 10:10, 11; Kus. 7:16, 17) Sambu na bikuma yai mpi yankaka, beto bakaka desizio ya  mayele ntangu beto ponaka na kulanda yandi. Kansi, luzingu ya mutindu yai kelombaka inki?

6. Kulanda Yezu ketendula inki?

⁶ Kuvanda balongoki ya Kristu ketendula kaka ve kudibinga nde Bakristu. Bubu yai, bantu kiteso ya bamiliare zole ketubaka nde bo kele Bakristu, kansi mambu ya bo kesalaka kemonisaka mpenza nde bo kele ‘bantu ya kesalaka mambu ya mbi.’ (Tanga Matayo 7:21-23.) Ntangu bantu kemonisaka mpusa ya kundima emvitasio ya kulanda Yezu, beto ketendudilaka bo nde Bakristu ya kyeleka kewakanisaka luzingu na bo ya mvimba ti malongi mpi mbandu na yandi, ebuna bo kesalaka mutindu yina konso kilumbu na luzingu na bo. Sambu na kumonisa nki yo ketendula, beto tadila mwa mambu ya beto mezaba na yina metala Yezu.

Landa Mbandu ya Mayele ya Yezu

7, 8. (a) Mayele kele inki, mpi sambu na nki Yezu kuvandaka na mayele mingi mpenza? (b) Inki mutindu Yezu kumonisaka mayele, mpi nki mutindu beto lenda landa mbandu na yandi?

⁷ Yezu kumonisaka bikalulu mingi ya kuyituka, kansi beto tatubila kaka iya: mayele, kudikulumusa, kikesa, mpi zola na yandi. Ntetentete, beto tadila mayele na yandi, disongidila kukuka kusadila nzayilu ti ngangu na mutindu ya mbote. Ntumwa Polo kusonikaka nde: “Mayele yonso ya Nzambi ti mambu yonso yina ya Nzambi kuzaba, yo me bumbanaka na Kristo; yo kele kimvwama mosi ya nene.” (Kol. 2:3) Na wapi Yezu kubakaka mayele ya mutindu yai? Yandi mosi kutubaka nde: “Mono ke tubaka kaka mambu yina ya Tata longaka mono.” (Yoa. 8:28) Mayele na yandi katukaka na Yehowa, yo yina beto keyituka ve na kumona nde Yezu kuvandaka na luswasukusu ya mbote.

⁸ Mu mbandu, Yezu kusadilaka luswasukusu ya mbote sambu na kupona mutindu ya kutwadisa luzingu na yandi. Yandi ponaka na kuvanda ti luzingu ya pete. Yandi tulaka dikebi na lukanu mosi mpamba: kusala luzolo ya Nzambi. Yandi sadilaka ntangu ti ngolo na yandi na mayele yonso sambu na mambote ya Kimfumu. Beto kelandaka mbandu ya Yezu na ntangu beto kesalaka ngolo sambu na kuvanda ti disu ya pete, yo yina beto kebuyaka kuditudila kizitu na mambu ya kukonda mfunu yina kelembisaka mpi kekatulaka dikebi na beto. (Mat. 6:22) Bakristu mingi mesalaka bansoba sambu na kukumisa luzingu na bo pete na mpila nde bo lutisa ntangu mingi na kisalu ya kusamuna. Bankaka mekukaka kusala kisalu ya kimupasudi-nzila. Kana nge kele mosi na kati ya bantu yina, yo kele dyambu mosi ya mbote mpenza. “Kusosa [ntete, NW] Kimfumu” kenataka mambote mpi kyese mingi.​—Mat. 6:33.

Vanda Muntu ya Kudikulumusa Bonso Yezu

9, 10. Inki mutindu Yezu kumonisaka kudikulumusa na yandi?

⁹ Kudikulumusa kele dyambu ya zole ya kimuntu ya Yezu yina beto tatadila. Ntangu bo kepesaka bantu ya kukonda kukuka kiyeka, mbala mingi bo kekudipesaka mfunu mingi. Yo vandaka ve mutindu yina sambu na Yezu! Ata yandi kele na mukumba ya kuluta nene na kulungana ya lukanu ya Yehowa, Yezu kuvandaka ve lulendo ata fyoti. Mpi Biblia kesyamisa beto na kulanda mbandu na yandi. Ntumwa Polo kusonikaka nde: “Beno vanda na mabanza yina Yesu Kristo vandaka ti yo. Yandi vandaka kaka na lukumu ya Nzambi ntangu yonso, kansi yandi vandaka na mabanza ve nde yandi fweti vanda kaka kiteso mosi na Nzambi na kingolo-ngolo. Yandi buyaka mambu yina yonso na luzolo na yandi mosi, Ebuna yandi ndimaka na kukuma mpika. Yandi kumaka bonso bantu ya nkaka, yandi kwisaka kumonika na kimuntu.” (Filp. 2:5-7) Mambu yango kutendulaka inki?

¹⁰ Yezu kuvandaka ti dibaku ya nene ya kuzinga ti Tata na yandi na zulu, kansi yandi “buyaka mambu yina yonso” na luzolo na yandi mosi. Nzambi kukotisaka luzingu na yandi na divumu ya mwense mosi ya Muyuda, ebuna yandi butukaka na nima ya bangonda uvwa bonso mwana ya kukonda lutaninu na dibuta ya Yozefi, sharpantie mosi ya nsukami. Na nzo ya Yozefi, Yezu kulongukaka na kutambula, yandi kumaka leke, mpi toko. Yandi vandaka ve ti masumu. Kansi na kileke na yandi, yandi vandaka kulemfukila bibuti na yandi yina kuvandaka bantu ya masumu. (Luka 2:51, 52) Yai kudikulumusa ya kuyituka kibeni!

11. Na nki mambu beto lenda landa mbandu ya kudikulumusa ya Yezu?

¹¹ Beto kelandaka mbandu ya kudikulumusa ya Yezu ntangu beto kendimaka na luzolo yonso bisalu yina lenda monana ya kukonda mfunu. Mu mbandu, beto tadila kisalu ya kusamuna nsangu ya mbote. Kisalu yai lenda monana bonso ya kukonda mfunu, mingimingi kana bantu kendima ve nsangu, keseka to kenyokula beto. Kansi, kana beto kekwamina na kisalu ya kusamuna, beto tasadisa bankaka na kundima emvitasio ya kulanda Yezu. Na mutindu yina, beto kesadisaka na kugulusa luzingu ya bantu. (Tanga 2 Timoteo 4:1-5.) Mbandu yankaka  kele kusala kisalu ya kutanina Nzo ya Kimfumu na beto sambu yo vanda kaka mbote. Yo lenda lomba kusala bisalu bonso kulosa bamvindu yina kele na ba pubele, kuyobisa sima, kikoso ti wc: bisalu yonso ya kelombaka kudikulumusa! Ata mpidina, beto kendimaka nde kutanina Nzo ya Kimfumu na beto, kisika ya lusambu ya kyeleka na bwala na beto, kele kitini ya kisalu na beto ya santu. Ntangu beto kesalaka na luzolo yonso bisalu yina bantu lenda mona ya kukonda mfunu, beto kemonisaka kudikulumusa, mpi beto kelandaka bitambi ya Kristu.

Bonso Yezu, Vanda Kikesa

12, 13. (a) Inki mutindu Yezu kumonisaka kikesa, mpi nki kupusaka yandi? (b) Inki tapusa beto na kuvanda kikesa na kisalu ya kusamuna?

¹² Beto tadila kikesa ya Yezu na kisalu ya kusamuna. Yezu kusalaka mambu mingi ntangu yandi vandaka na ntoto. Na luyantiku ya luzingu na yandi, yo fwete vanda nde yandi salaka kisalu ya kisharpantie ti Yozefi, tata na yandi ya lundi. Na nsungi ya kisalu na yandi, Yezu kusalaka bidimbu ya nkumbwa, mpi nkutu kubelulaka bantu ya maladi mpi kufutumunaka bafwa. Kansi kisalu na yandi ya ntetentete kuvandaka ya kuzabisa nsangu ya mbote mpi kulonga bantu yina kuvandaka na luzolo ya kuwa. (Mat. 4:23) Sambu beto kelandaka Yezu, beto mpi fwete sala kisalu yina. Inki mutindu beto lenda landa mbandu na yandi? Ntetentete, beto lenda sala yonso sambu na kuvanda ti bikuma bonso ya Yezu.

¹³ Kuluta yonso, zola sambu na Nzambi vandaka kupusa Yezu na kusamuna mpi kulonga bantu. Kansi, Yezu kuzolaka mpi bakyeleka yina yandi vandaka kulonga. Sambu na yandi, bakyeleka yina kuvandaka bimvwama ya mfunu mingi, mpi yandi vandaka na mpusa ya ngolo ya kukabula yo na bantu yankaka. Beto yonso ya kele balongi, beto kevandaka ti mabanza ya mutindu mosi. Yindula mwa bakyeleka ya mfunu ya nge melongukaka na Ndinga ya Nzambi! Beto mezaba ntembe ya metala luyalu ya luyalanganu ya mvimba mpi mutindu Nzambi tamanisa yo. Beto kebakisaka mbote mambu yina Biblia kelongaka sambu na nkadilu ya bafwa mpi balusakumunu yina bantu tabaka na ntoto ya mpa ya Nzambi. Yo vanda beto longukaka bakyeleka yai ntama mingi ve to bamvula mingi meluta, valere na yo kemanaka ve, yo kele kaka bimvwama ya mfunu mingi. (Tanga Matayo 13:52.) Kana beto kesamuna ti kikesa ya masonga, beto tapesa bankaka zola yina beto kele na yo sambu na mambu yina Yehowa melongaka beto.

14. Inki mutindu beto lenda landa mutindu ya kulonga ya Yezu?

¹⁴ Beto tadila mpi mutindu Yezu vandaka kulonga. Yandi vandaka ntangu yonso kubenda dikebi ya bawi na yandi na Masonuku. Mbala mingi yandi vandaka kuyantika ngindu mosi ya mfunu na kutubaka nde: “Bo sonikaka na Mukanda ya Nzambi nde.” (Mat. 4:4; 21:13) Na bangogo na yandi yina kele na Biblia, yandi vutukilaka mbala mosi to na bangogo yankaka mambu yina kele na mikanda kuluta katikati ya Masonuku ya Kiebreo. Bonso Yezu, beto kelongaka kaka mambu ya Biblia na kisalu na beto ya kusamuna mpi kesalaka yonso sambu na kusadila yo konso ntangu yina dibaku kemonanaka. Na mutindu yina, beto kesadisaka bantu ya ntima masonga na kumona bo mosi nde beto kelongaka mabanza ya Nzambi, kansi ya beto mosi ve. Yo kepesaka beto kyese mpenza ntangu muntu kendimaka nde beto tanga na Biblia mpi beto tubila valere ti ntendula ya Ndinga ya Nzambi! Ebuna ntangu bantu yai kendimaka emvitasio ya kulanda Yezu, kyese na beto kekumaka mingi kibeni.

Kulanda Yezu Ketendula Kuzola Bankaka

15. Inki kuvandaka kikalulu ya kuluta nene ya Yezu, mpi nki mutindu kuyindulula yo lenda vanda ti bupusi na luzingu na beto?

¹⁵ Dyambu ya nsuka ya kimuntu ya Yezu ya beto tatadila kele yina meluta yonso na kitoko​—zola na yandi sambu na bantu. Ntumwa Polo kusonikaka nde: “Kuzola yina ya Kristo ke zolaka beto yo ke yalaka beto.” (2 Kor. 5:14) Kana beto keyindulula zola yina Yezu kele na yo sambu na bantu na kimvuka, mpi sambu na konso muntu na kati na beto, yo tasimba mpenza ntima na beto mpi tapusa beto na kulanda mbandu na yandi.

16, 17. Na nki mitindu Yezu kumonisaka zola na yandi sambu na bankaka?

 ¹⁶ Inki mutindu Yezu kumonisaka zola sambu na bankaka? Yandi monisaka zola na mutindu ya kuluta nene ntangu yandi ndimaka na kupesa moyo na yandi sambu na mambote ya bantu. (Yoa. 15:13) Kansi, na nsungi ya kisalu na yandi, Yezu kumonisaka mpi zola na mitindu yankaka. Mu mbandu, yandi vandaka kuditula na kisika ya bantu yina vandaka kunyokwama. Ntangu Yezu kumonaka Maria ti bantu yina vandaka ti yandi kedila Lazare ntangu yandi fwaka, mawa na bo kupesaka yandi mpasi mingi. Ata yandi vandaka ya kuyilama sambu na kufutumuna Lazare, mawa kusimbaka mpenza ntima na yandi, ebuna yandi “yantikaka kudila.”​—Yoa. 11:32-35.

¹⁷ Na luyantiku ya kisalu na yandi ya kusamuna, muntu mosi ya vandaka na maladi ya lepre kwisaka na Yesu mpi kutubaka nde: “Kana nge zola, nge lenda belula mono.” Yezu kusalaka inki? Disolo ketuba nde Yezu “wilaka bakala yango mawa.” Na nima Yezu salaka dyambu mosi ya kuyituka. ‘Yandi tandulaka diboko na yandi, yandi simbaka yandi, ebuna yandi tubaka nde: “Mono me zola; beluka ka nge.” Kaka na mbala mosi, maladi kumanaka yandi, ebuna yandi kubelukaka.’ Na kutadila Nsiku ya Moize, bantu ya maladi ya lepre kuvandaka mvindu, mpi ntembe kele ve nde Yezu lendaka kubelula bakala yango kukonda kusimba yandi. Kansi, ntangu Yezu kubelulaka muntu yango ya lepre, yandi pesaka yandi nzila ya kuwa nde muntu yankaka mesimba yandi, ziku sambu na mbala ya ntete na nima ya bamvula mingi. Yezu kumonisaka mawa ya ngolo kibeni!​—Mar. 1:40-42.

18. Inki mutindu beto lenda monisa nde beto ‘kekuditulaka na kisika ya bankaka’?

¹⁸ Sambu beto kelandaka Kristu, Biblia kelomba beto na “kuditula na kisika ya bankaka.” (1 Pie. 3:8, NW) Yo lenda vanda ve pete na kubakisa mawi ya mpangi Mukristu yina kebela maladi mosi ya kemanaka ve to ya melemba nitu, mingimingi kana beto mewaka ntete ve mpasi yango beto mosi. Kansi, Yezu kuditulaka na kisika ya bambefo ata yandi mosi kubelaka ve ata mbala mosi. Inki mutindu beto lenda kuna kikalulu ya mutindu mosi ya kuditula na kisika ya bankaka? Kana beto kewa na dikebi yonso ntangu bantu ya kebela kekangudila beto ntima na bo. Beto lenda kudiyula nde, ‘Kana mu vandaka na kisika na bo, inki mutindu mu zolaka kudiwa?’ Kana beto kekuna kikalulu ya kuditula na kisika ya bankaka, beto takuka mpenza ‘kutubila myoyo ya kenyokwama na mabanza na mutindu mosi ya kesyamisa.’ (1 Tes. 5:14, NW) Kana beto kesala mutindu yina, beto talanda Yezu.

19. Mbandu ya Yezu kele ti nki bupusi na luzingu na beto?

¹⁹ Bangogo ya Yezu Kristu mpi mambu ya yandi salaka kelonga beto mambu mingi ya kitoko! Kana beto kelonguka mambu mingi ya ketala yandi, beto tazola mingi kuvanda bonso yandi mpi kusadisa bankaka na kusala mutindu mosi. Yo yina, bika beto baka kyese na kulanda Ntotila ya Mesia, ntangu yai mpi kimakulu.

Keti Nge Lenda Tendula?

• Inki mutindu beto lenda monisa mayele, bonso Yezu?

• Na nki mambu beto lenda monisa kudikulumusa?

• Inki mutindu beto lenda kuna kikalulu ya kikesa na kisalu ya kusamuna?

• Na nki mambu beto lenda landa mbandu ya Yezu na yina metala kumonisa zola na bankaka?

[Bangyufula ya Disolo ya Kulonguka]

[Lupangu/​Kifwanisu ya kele na lutiti 11]

MUKANDA MOSI YA KESADISA BETO NA KULANDA MBANDU YA KRISTU

Na lukutakanu ya distrike ya mvu 2007, bo basisaka mukanda mosi ya balutiti 192 ya kele ti ntu-dyambu, “ Viens, suis-moi. ” Bo basisaka mukanda yai sambu na kusadisa Bakristu na kutula dikebi na Yezu, mingimingi na bikalulu mpi na mambu yina yandi salaka. Kitini ya ntete yina kele na nima ya bakapu zole ya luyantiku, ketubila na bunkufi bikalulu ya nene ya Yezu, disongidila kudikulumusa, kikesa, mayele, bulemfu, mpi kukanga ntima na yandi.

Na nima kelanda bitini yina ketubila kisalu ya Yezu bonso longi mpi nsamuni ya nsangu ya mbote mpi mutindu zola na yandi ya nene kumonanaka. Na mukanda yai ya mvimba, bo kepesa bansangu sambu na kusadisa Mukristu na kulanda mbandu ya Yezu.

Beto ketula ntima nde mukanda yai tapusa beto yonso na kuditadila mpi kudiyula nde: ‘Keti mu kelandaka mpenza Yezu? Inki mutindu mu lenda landa yandi mbote-mbote?’ Yo tasadisa mpi bantu yonso yina kele ya kuyilama “sambu na kuvanda na moyo ya mvula na mvula” na kukuma balongoki ya Kristu.​—Bis. 13:48.