Yezu: Mambu Yina Bantu Ketubaka Sambu na Yandi

“Yezu ya Nazareti . . . kele mpenza muntu ya kele na bupusi mingi na disolo ya luzingu ya bantu.”​—H. G. Wells, muntu ya Angleterre ya kelongukaka mambu ya ntama.

“Kristu kele . . . muntu ya kuluta nene na kati ya bantu yonso ya nene yina mezingaka na ntoto.”​—Philip Schaff, muntu ya Suisse ya kelongukaka teolozi mpi istware.

NANI mefwana na kubingama muntu ya kuluta nene ya ntangu yonso? Inki mutindu beto fwete tesa bunene ya muntu? Na mayele na yandi ya bamvita? Na ngolo na yandi ya kinsuni? Na ngangu na yandi? To na kiteso yina bangogo mpi bisalu na yandi kele na bupusi na luzingu ya bantu, mpi na mbandu yina yandi kebikila bo?

Tala mambu yina bantu ya kelongukaka mambu ya ntama, bantu ya siansi, ya mayele, bansoniki, bamfumu ya politiki, mpi bantu yankaka, ya ntangu ya ntama mpi ya ntangu yai, metubaka sambu na muntu ya Nazareti, Yezu Kristu:

“Yo kelomba kuvanda zoba mpenza sambu na kubuya kundima nde Yezu ya Nazareti kele muntu ya kele ti bupusi ya kuluta mingi na bamvula funda zole yai ya meluta kaka ve, kansi mpi na disolo yonso ya luzingu ya bantu.”​—Reynolds Price, nsoniki ya bwala ya Amerika mpi muntu ya mayele yina kelongukaka Biblia.

“Muntu mosi ya kusalaka mbi ve ata fyoti kuditambikaka sambu na mambote ya bantu yankaka, ti ya bambeni na yandi, mpi kukumaka nkudulu ya bantu ya nsi-ntoto. Yo vandaka dyambu mosi ya mbote mpenza.”​—Mohandas K. Gandhi, mfumu ya politiki ya Inde mpi ntwadisi ya kimpeve.

“Ntangu mu vandaka mwana-fyoti, bo longaka munu malongi ya Biblia mpi ya Talmud. Mono kele Muyuda, kansi mu kesepelaka mingi na muntu ya nene ya Nazareti.”​—Albert Einstein, muntu ya Allemagne ya kelongukaka mambu ya siansi.

“Sambu na mono, Yezu Kristu kele muntu ya kuluta nene ya ntangu yonso na luzingu ya bantu, na yina metala mukumba na yandi bonso Mwana ya Nzambi mpi Mwana ya Muntu. Mambu yonso yina yandi tubaka to salaka kele na valere sambu na beto bubu yai, mpi yai kele mambu yina beto lenda tuba ve sambu na muntu yankaka, yo vanda yandi kele na luzingu to mefwaka.”​—Bangogo ya Sholem Asch, nsoniki ya bwala Pologne, mutindu zulunalu Christian Herald kuvutukilaka yo (bo bantu metengimisa bisono).

“Na nsungi ya bamvula makumi tatu na tanu ya luzingu na munu, mu vandaka kukwikila ata na kima mosi ve. Banda bamvula tanu meluta, mu kumaka kukwikila na Yezu. Mu tulaka lukwikilu na malongi ya Yezu Kristu mpi luzingu na munu ya mvimba kusobaka mpenza.”​—Count Leo Tolstoy, nsoniki mpi muntu ya Russie ya kelongukaka mambu ya filozofi.

“Luzingu [ya Yezu] kele luzingu ya kele ti bupusi mingi na luzingu ya bantu kuluta luzingu ya konso muntu yankaka na ntoto, mpi bupusi yango kelanda na kukuma mingi.”​—Kenneth Scott Latourette, nsoniki mpi muntu ya Amerika ya kelongukaka mambu ya ntama.

“Keti beto fwete yindula nde disolo ya luzingu ya Yezu kele kaka disapu? Ya kyeleka, nduku na munu, yo kemonana nde yo kele disapu ve. Nkutu, disolo ya Socrates yina ata muntu mosi ve ketudilaka ntembe kele ve ti banzikisa ya kyeleka ya ketubilaka yo bonso banzikisa yina ketubilaka disolo ya Yezu Kristu.”​—Jean-Jacques Rousseau, muntu ya France ya kelongukaka mambu ya filozofi.

Ya kyeleka, kana yo kele ti muntu yina mefwana nde beto landa mbandu ya luzingu na yandi, yo kele Yezu Kristu. Polo, muntu mosi ya mvu-nkama ya ntete ya kulongukaka mingi mpi yina Yezu kuponaka na kuvanda longoki na yandi ti kutuba nsangu na yandi na bantu ya makanda, kelongisila beto na ‘kutula meso na beto kaka’ na Yezu. (Baebreo 12:2; Bisalu 9:3) Inki Yezu lenda longa beto na yina metala mutindu ya kuzinga? Inki mutindu luzingu na yandi lenda natila nge mambote?