Ndinga ya Yehowa Kele ya Moyo

Bangindu ya Mfunu ya Mukanda ya Kusonga​—II

INKI takumina bantu yina kesambilaka Yehowa Nzambi mpi bayina kesambilaka yandi ve? Inki takumina Satana ti bademo na yandi na bilumbu kekwisa? Inki balusakumunu bantu ya bulemfu tabaka na nsungi ya Luyalu ya Bamvula Funda ya Kristu? Kusonga 13:1–22:21 kepesa bamvutu na bangyufula yai ti yankaka ya mfunu. a Bakapu yai kele ti bambonameso 9 ya nsuka na kati ya bambonameso 16 yina ntumwa Yoane kumonaka penepene ya nsuka ya mvu-nkama ya ntete T.B.

Yoane kusonikaka nde: “Kiese na muntu yina ke tanga mukanda yai na bantu yonso; kiese mpi na bantu yina ke wa nsangu yai ya Nzambi ntangu bo ke tanga yo, ti ke landaka mambu ya bo sonikaka na mukanda yai.” (Kus. 1:3; 22:7) Kutanga mpi kusadila mambu ya beto kelonguka na mukanda ya Kusonga lenda vanda ti bupusi na ntima na beto, kukumisa ngolo lukwikilu na beto na Nzambi ti na Mwana na yandi Yezu Kristu, mpi kupesa beto kivuvu mosi ya kitoko sambu na bilumbu kekwisa. b​—Baeb. 4:12.

BABOLO NSAMBWADI YA MAKASI YA NZAMBI MELOSAMA

(Kus. 13:1–16:21)

Kusonga 11:18 ketuba nde: ‘Bantu ya bansi waka makasi, kansi ntangu me lunga sambu Nzambi kusonga makasi na yandi mpi kufwa bantu yina ke bebisaka nsi-ntoto!’ Sambu na kumonisa kikuma yina Nzambi tasonga makasi na yandi, mbonameso ya nana kemonisa kisalu ya “mbisi mosi . . . [ya] vandaka na bibongo kumi ti ba-ntu nsambwadi.”​—Kus. 13:1.

Na mbonameso ya uvwa, Yoane kumonaka “Mwana-Dimeme me telama na ngumba ya Sioni” mpi “bantu mile nkama mosi makumi iya na iya (144 000) vandaka ti yandi.” Bo sumbaka bo “na kati ya bantu.” (Kus. 14:1, 4) Na nima kelanda bansangu ya bawanzyo. Na mbonameso ya kelanda, Yoane kumonaka “bawanzio nsambwadi me simba bampasi nsambwadi.” Yo kemonana nde, Yehowa yandi mosi kepesa bawanzyo yai ntuma ya kulosa “makasi ya Nzambi yina kele na babolo nsambwadi” na bitini ya kuswaswana ya nsi-ntoto ya Satana. Babolo yina kele ti mambu mpi balukebisu ya bandola yina Nzambi tapesa. (Kus. 15:1; 16:1) Bambonameso yai zole ketubila mambu mingi yankaka ya bandola ya Kimfumu yina kewakana ti mpasi ya tatu mpi kubula ya mpungi ya nsambwadi.​—Kus. 11:14, 15.

Bangyufula ya Masonuku Mezwa Bamvutu:

13:8​—“Mukanda ya moyo ya Mwana-Dimeme” kele inki? Yo kele mukanda ya kifwani yina kele kaka ti bazina ya bantu yina tayala ti Yezu Kristu na Kimfumu na yandi ya zulu. Na kati na yo kele mpi bazina ya Bakristu ya kupakulama yina kele ntete na ntoto, bayina kele ti kivuvu ya kuzinga na zulu.

13:11-13​—Inki mutindu mbisi ya makasi yina kele ti bibongo zole kesala bonso dragoni mpi kesala na mpila nde tiya kukulumuka katuka zulu tii na ntoto? Mutindu mbisi ya makasi yina kele ti bibongo zole, disongidila Ngolo ya Ntoto ya Anglo-Amerika, ketuba bonso dragoni kemonisa nde yo kesadilaka bangogo ya kutitisa, bupusi, mpi nku sambu na kupusa bantu na ngolo na kundima mutindu na yo ya kuyala.Yo kesala na mpila nde tiya kukulumuka katuka zulu tii na ntoto na mutindu yo kekudimonisaka nde yo kesalaka bonso profete, na kutubaka nde yo menungaka bangolo ya mbi na bamvita zole ya nsi-ntoto ya mvimba ya mvu-nkama ya 20 mpi menungaka Kominizme.

 16:17​—“Mupepe” yina bo melosila bolo ya nsambwadi kele inki? “Mupepe” kele mutindu ya kuyindula ya Satana, “mpeve [yina] ke yalaka ntangu yai bantu yina ke lemfukaka na Nzambi ve.” Ngidika yonso ya mbi ya Satana kepema mupepe yai ya ndikila.​—Ef. 2:2.

Malongi Sambu na Beto:

13:​1-4, 18. “Mbisi” ya makasi yina kemonisa baluyalu ya bantu kebasika “na masa,” disongidila na kimvuka ya bantu ya kidikidi ya nsi-ntoto. (Yez. 17:12, 13; Dan. 7:2-8, 17) Mbisi yai, ya Satana megangaka mpi mepesaka ngolo, kele ti ntalu 666 ya kemonisa kukonda kukuka ya ngolo mpenza. Kubakisa ntendula ya mbisi yango kele mfunu, sambu yo kesadisa beto na kusepela ve na kulanda yo. Yo kesadisa beto mpi na kusambila yo ve bonso bantu yonso kesala.​—Yoa. 12:31; 15:19.

13:16, 17. Ata beto lenda kutana ti bampasi na ntangu beto kesala bisalu ya konso kilumbu bonso ‘kusumba to kuteka,’ beto fwete pesa ve nzila nde mbisi yina ya makasi kuyala luzingu na beto. Kundima ‘kidimbu ya mbisi ya makasi na diboko ti na ilungi na beto’ tavanda kiteso mosi ti kupesa yo nzila ya kutwadisa bisalu na beto to ya kuvanda ti bupusi na mabanza na beto.

14:6, 7. Nsangu yina wanzyo kezabisa kelonga beto nde beto fwete zabisa kukonda kusukinina nsangu ya mbote ya Kimfumu ya Nzambi yina metulamaka. Beto fwete sadisa balongoki na beto ya Biblia na kuyedisa boma sambu na Yehowa mpi kupesa yandi lukumu.

14:14-20. Kana ‘ntangu ya kukatula bambuma ya ntoto,’ disongidila kuvukisama ya bantu yina taguluka, melunga, wanzyo talosa ‘bambuma ya banti ya vinu ya ntoto’ na ‘kima ya nene ya bo ke kamunaka bambuma ya vinu; kima yina ke songa makasi ya Nzambi.’ Na nima, vinu yina, disongidila luyalu ya mbi ya Satana ya kemonanaka na zulu ya bantu ti “banti” na yo ya kebutaka bambuma ya mbi, tafwa kimakulu. Beto fwete vanda ti lukanu ya kundima ve bupusi ya vinu ya ntoto.

16:13-16. Bangogo ya kupemama ya mvindu kele mambu ya kekatukaka na bademo yina kevandaka ti lukanu ya kusala mambu na mpila nde bamfumu ya ntoto kutelamina Nzambi. Satana kesalaka yonso sambu kulosama ya babolo nsambwadi ya makasi ya Nzambi kuvanda ve na bupusi na luzingu na bo.​—Mat. 24:42, 44.

16:21. Sambu nsuka ya ntoto yai mefinama, kuzabisa bandola yina Yehowa tapesa ngidika ya mbi ya Satana tatendula mbala yankaka nde beto zabisa bandola ya Nzambi na mutindu mosi ya ngolo ya mesalamaka ntete ve, yina bo kefwanisa ti masa ya matadi. Ata mpidina, bantu mingi talanda na kuvwenza Nzambi.

NTOTILA YA MENUNGA KEYALA

(Kus. 17:1–22:21)

‘Babilone ya Nene,’ kintinu ya nsi-ntoto ya mvimba ya mabundu ya luvunu, kele kitini ya nzanzi ya nsi-ntoto ya mbi ya Satana. Mbonameso ya 11 kemonisa Babilone bonso ‘nkento ya ndumba’ yina “me vanda na zulu ya mbisi mosi ya mbwaki.” “Bibongo kumi” ya mbisi ya nene yina kenata yandi tafwa yandi mpenza. (Kus. 17:1, 3, 5, 16)Mbonameso yina kelanda kefwanisa nkento yina ya ndumba ti “bwala ya nene,” mpi yo ketubila kubwa na yandi. Mbonameso yango kelomba bantu ya Nzambi na kubasika na kati na yo kukonda kusukinina. Bantu mingi kedila sambu na kubwa ya bwala yina ya nene. Kansi, kyese kele na zulu sambu na “fete ya makwela ya Mwana-Dimeme.” (Kus. 18:4, 9, 10, 15-19; 19:7)Na mbonameso ya 13, muntu ya mevanda na zulu ya “mpunda . . . ya mpembe” kekwenda kunwana mvita ti makanda. Yandi mefwa nsi-ntoto ya mbi ya Satana.​—Kus. 19:11-16.

Inki beto lenda tuba sambu na “nioka yina ya ntama, disongidila nde Satana”? Inki ntangu bo ta ‘losa yandi na dizanga ya tiya’? Yai kele mosi na kati ya mambu yina mbonameso ya 14 ketubila. (Kus. 20:2, 10)Bambonameso zole ya nsuka kemonisa mutindu luzingu tavanda na nsungi ya Difunda. Ntangu “kusonga” mekuma na nsuka, Yoane memona ‘nzadi yina ke na masa ya moyo, yina vandaka kukulumuka na kati ya balabala ya bwala yina,’ mpi emvitasio mosi ya kitoko ya mepesama na “konso muntu yina ke na nzala ya masa.”​—Kus. 1:1; 22:1, 2, 17.

 Bangyufula ya Masonuku Mezwa Bamvutu:

17:16; 18:9, 10​—Sambu na nki ‘bamfumu ya nsi-ntoto’ kewa mawa sambu na kimvuka yina bo mosi mefwa? Kikuma ya mawa na bo kele kaka bwimi. Na nima ya lufwa ya Babilone ya Nene, yo kemonana nde bamfumu ya nsi-ntoto tabakisa nde yandi vandaka mfunu mingi sambu na bo. Yandi monisaka mambu na bo ya nku bonso nde yo vandaka ya mbote. Babilone ya Nene kusadisaka bo mpi na kubinga baleke sambu na kukwenda na bitumba. Dyaka, yandi salaka kisalu ya nene na yina metala kusyamisa bantu na kulemfuka.

19:12​—Na nki mutindu ata muntu mosi ve mezaba zina ya Yezu yina bo metanga ve kansi yandi mosi mpamba? Yo kemonana nde zina yai ketendula kiyeka mpi mikumba, bonso yina Yezaya 9:5 ketubila, yina Yezu kele na yo na nsungi ya kilumbu ya Mfumu. Ata muntu mosi ve mezaba zina yai kansi yandi mosi mpamba na mutindu mikumba na yandi kele ya sipesiali mpi kaka yandi mosi mpamba lenda bakisa nki yo ketendula kuvanda ti kiyeka ya nene ya mutindu yina. Kansi, Yezu kekabula ndambu ya mikumba yai ti bamambre ya kimvuka ya nkento na yandi, nkutu yandi ‘kesonika na zulu ya ntu na bo zina na yandi yina ya mpa.’​—Kus. 3:12.

19:14​—Banani tatambula na zulu ya bampunda ti Yezu na Armagedoni? Na kati ya “basoda ya zulu” yina tanwana na lweka ya Yezu na mvita ya Nzambi tavanda bawanzyo mpi bapakulami yina tanunga mpi tavanda mebaka dezia matabisi na bo na zulu.​—Mat. 25:31, 32; Kus. 2:26, 27.

20:11-15​—Bazina ya banani kele ya kusonika na “mukanda [to, rulo] ya moyo”? Rulo yai kele ti bazina ya bantu yonso yina tabaka luzingu ya mvula na mvula, disongidila Bakristu ya kupakulama, bamambre ya kibuka ya nene, mpi bansadi ya kwikama ya Nzambi bayina tavanda na kati ya bantu ya lunungu yina “ta telama na lufwa.” (Bis. 24:15; Kus. 2:10; 7:9) Bayina tavanda na kati ya bantu ya kukonda lunungu yina “ta telama na lufwa,” bo tasonika bazina na bo na “mukanda ya moyo” kaka kana bo sala mambu ya kewakana ti yina “bo sonikaka na mikanda” ya malongi yina takanguka na nsungi ya Difunda. Kansi, bazina yango kele ve ya kusonika ti tinta yina lenda fwanzama ve. Bazina ya bapakulami tasonama kimakulu kana bo bikala ya kwikama tii na lufwa. (Kus. 3:5) Bazina ya bayina tabaka luzingu na ntoto tasonama kimakulu ntangu bo taluta mumekamu ya nsuka na nsuka ya bamvula funda.​—Kus. 20:7, 8.

Malongi Sambu na Beto:

17:3, 5, 7, 16. “Mayele yina ke katukaka na zulu” kesadisa beto na kubakisa diswekamu ya “nkento yina ti mbisi [ya mbwaki] yina ke nata yandi.” (Yak. 3:17) Mbisi ya makasi yai ya kifwani kuvandaka ntete Société des Nations mpi na nima yo basikaka dyaka bonso Nations unies. Kubakisa diswekamu yai fwete pusa beto na kuvanda kikesa na kisalu ya kusamuna nsangu ya mbote ya Kimfumu ya Nzambi mpi kuzabisa bantu kilumbu ya ndola ya Yehowa.

21:1-6. Beto lenda tula mpenza ntima nde balusakumunu na nsi ya luyalu ya Kimfumu yina bo tubilaka na ntwala talungana. Sambu na nki? Sambu Biblia ketuba na yina metala balusakumunu yango nde: “Imene!”

22:1, 17. ‘Nzadi ya masa ya moyo’ kemonisa bangidika yina Yehowa kebaka sambu bantu ya bulemfu kukatuka na masumu mpi lufwa. Bantu lenda baka masa yai ntangu yai. Bika nde beto suka kaka ve na kundima na ntonda yonso emvitasio yai ya kukwisa mpi ‘kubaka masa ya moyo ya mpamba,’ kansi beto pesa yo mpi na kyese yonso na bantu yankaka!

[Banoti na nsi ya lutiti]

[Kifwanisu ya kele na lutiti 25]

Bantu ya bulemfu tabaka balusakumunu ya kitoko mpenza na nsi ya luyalu ya Kimfumu!