Kisika ya Maria na Lukanu ya Nzambi

NA NSUNGI ya kisalu ya Yezu, nkento mosi ya kuvandaka na kati ya kibuka ya bantu yina vandaka kutula makelele kutubaka na ndinga ya ngolo nde: “Kiese na nkento yina vandaka kunata nge na kati ya divumu na yandi ti kunwisa nge mabele!” Kana Yezu zolaka nde bo sambila mama na yandi, yai kuvandaka dibaku mosi ya mbote mpenza ya kusyamisa lusambu ya mutindu yina. Kansi yandi vutulaka nde: “Ve, kiese na bantu yina ke waka nsangu ya Nzambi ti ke landaka yo!”​—Luka 11:27, 28.

Ata mbala mosi ve Yezu kupesaka mama na yandi lukumu mosi ya sipesiali, mpi yandi zabisaka ata fyoti ve balongoki na yandi na kusala mutindu yina. Inki kuwakana kele na kati ya dyambu yai ti lusambu yina bantu mingi ya masonga ya kekwikilaka na Nzambi kepesaka na Maria? Bika beto tadila mambu yina Masonuku ya Santu ketuba na yina metala mwa malongi yina mepanzanaka mingi ya ketadila mama ya Yezu.

“Mefuluka na Dienga,” ‘Mesampulama . . . Kuluta Bankento Yonso’

Wanzyo Gabriele kuzabisaka Maria mukumba yina yandi talungisa na lukanu ya Nzambi. Na dibaku yina, yandi pesaka Maria mbote nde: “Mbote na nge! Mfumu Nzambi me tala nge na disu ya mbote; yandi kele ti nge.” (Luka 1:28) Mbalula yankaka ya kupesa mbote yai kele: “Mbote Maria, nge mefuluka na dienga, Mfumu kele na nge.” Ntangu fyoti na nima, Elizabeti kupesaka Maria mbote na bangogo yai: “Nzambi me sakumuna nge kuluta bankento ya nkaka; yandi me sakumuna mpi mwana yina ya nge ta buta!” (Luka 1:42) Keti bansa yai kemonisa ve nde bantu fwete pesa Maria lukumu mosi ya sipesiali?

Na kutuba ya masonga, ve. Ata bangogo yai kele na kati ya kisambu yina bantu ya Katolika kesadilaka Maria, Biblia yo mosi kepesa ve kikuma ya kusambila yandi. Gabriele ti Elizabeti kubakisaka lukumu ya nene ya Maria sambu yandi muntu zolaka kubuta Mesia, kansi ngindu ya kusambila yandi kele ve na kati ya Masonuku. Ntangu balongoki na yandi kulombaka yandi na kulonga bo mutindu ya kusamba, Yezu kumonisaka nde bo fwete sambila kaka Tata na yandi, na kisika ya kusyamisa bo na kusambila Maria. Nkutu, kisambu ya mbandu yina Yezu kulongaka ya mezabanaka mingi keyantika ti bangogo yai: “Tata na beto kele na zulu.”​—Matayo 6:9.

Mosi na Kati ya Bantu Yina Tayala

Dilongi yankaka ya mezabanaka ya metala Maria kele nde yandi kele ntangu yai “Ntotila-Nkento ya zulu.” Biblia kepesa yandi ata mbala mosi ve titre ya mutindu yai. Kansi, yo kemonisa nde yandi kele ti kisika mosi ya sipesiali na ngidika ya Nzambi mesalaka na zulu. Inki kele kisika yango?

Yezu kumonisaka nde balongoki na yandi yankaka ya kwikama tayala ti yandi na Kimfumu na yandi. (Luka 22:28-30) Yezu tapesa bantu yina meponamaka kiyeka ya kuvanda “banganga-Nzambi sambu na kusadilaka Nzambi na beto, Ebuna bo ta yalaka awa na nsi-ntoto.” (Kusonga 5:10) Na pwelele yonso, Biblia kenata beto na kusukisa nde Maria kele na kati ya bantu yina tabaka lukumu yai ya nene. Sambu na nki beto lenda tuba mpidina?

Nge lenda yibuka nde na nima ya lufwa ya Yezu, Maria vandaka “kusamba Nzambi bilumbu yonso” ti balongoki ya Yezu mpi bampangi na yandi. Kiteso ya bantu 120 kuvukanaka sambu na kusamba, mpi “bankento ya nkaka” kuvandaka na kati na bo. (Bisalu 1:12-15) Biblia ketuba nde “ntangu kilumbu ya Nkinsi ya Pantekoti lungaka, bakristo yonso vandaka kisika mosi na kimvuka,” ebuna mpeve santu ya Nzambi kukulumukaka na zulu na bo, mpi kupesaka bo makuki ya kulonga na bandinga ya nzenza.​—Bisalu 2:1-4.

Sambu Maria vandaka na kati ya bantu yina kubakaka lusakumunu yai, yo kemonisa nde yandi ti bankento yankaka yina kubakaka mpeve santu kuponamaka sambu na kuyala ti Yezu na Kimfumu na yandi ya zulu. Yo yina, beto kele ti bikuma ya kundima nde ntangu yai Maria kele ti Yezu na lukumu ya zulu. (Roma 8:14-17) Bika beto tadila mwa mikumba yina Maria ti bantu  yankaka yina tayala ti Yezu tavanda ti yo na kulungana ya balukanu ya Nzambi.

Bo Tapesa Balusakumunu ya Kitoko

Mukanda ya Kusonga ketuba nde bantu 144 000 tafutumuka sambu na lukumu ya zulu mpi kusala kumosi ti Yezu bonso banganga-Nzambi, bazuzi, mpi bantotila. (Kusonga 14:1, 4; 20:4, 6) Bonso banganga-Nzambi, bo mpi tapesa mambote ya kimenga ya Yezu na bantu yonso ya bulemfu, mpi bo takuma ya kukuka na bangwisana na bo ti Yehowa, na bikalulu, mpi na nitu. (Kusonga 21:1-4) Yo tavanda dibaku mosi ya sipesiali sambu na bansambidi yonso ya Yehowa na kumona ntangu yina ya kitoko! a

Maria kulungisaka mpi kelanda na kulungisa mukumba mosi na kulungana ya balukanu ya Yehowa. Sambu na kudikulumusa ya Maria, lukwikilu, bulemfu, mpi kudipesa na yandi bonso mama, kukonda kutubila nkutu kukanga ntima na yandi na bampasi, yo mefwana nde beto landa mbandu na yandi. Sambu yandi vandaka ti mukumba ya kubuta Mesia mpi kele na kati ya bantu yina tapesa balusakumunu ya mvula na mvula na bantu, yo mefwana nde beto zitisa yandi mingi mpenza.

Kansi, dilongi ya kuluta mfunu ya beto kebaka na Maria kele nde, yandi ti bansadi yankaka yonso ya kwikama ya Nzambi, kesambilaka Yehowa kansi nzambi yankaka ve. Maria kumosi ti bantu yankaka yina tayala ti Kristu na zulu, ketuba na ndinga ya ngolo nde: “Lukumu, luzitu ti ngolo kuvanda mvula na mvula na muntu yina me vanda na kiti ya kimfumu [Yehowa Nzambi], ti na Mwana-dimeme [Yezu Kristu]!”​—Kusonga 5:13; 19:10.

[Noti na nsi ya lutiti]

[Bangogo sambu na kubenda dikebi ya kele na lutiti 4]

Yo mefwana nde beto landa mbandu ya kudikulumusa, lukwikilu, mpi bulemfu ya Maria