Yai Ntangu ya Kupona

“Nzambi salaka bantu, bantu yango vandaka bonso yandi Nzambi, bo fwananaka na yandi. Yandi salaka bakala ti nkento.”​—Kuyantika 1:27.

BANGOGO yai ya bantu mezaba mbote ya kele na balutiti ya luyantiku ya Biblia kele mosi na kati ya bima ya nene yina Nzambi “mesalaka yo kitoko na ntangu na yo,” (NW) disongidila na kugangaka bankwelani ya kukuka, Adami ti Eva. (Longi 3:11) Sambu yandi vandaka Ngangi na bo, Yehowa Nzambi kusongaka bo nde: “Beno buta bana mingi, mpidina bana na beno ta zingaka na bisika yonso na nsi-ntoto ti kuyala yo. Beno yala bambisi ya masa, bandeke ti bambisi yonso ya nsi-ntoto.”​—Kuyantika 1:28.

Mutindu Nzambi kutubilaka bankwelani ya ntete bangogo yai, yandi zabisaka bo lukanu na yandi. Yo lombaka nde bo kuma mingi mpi bo tanina ntoto ti kukumisa yo paladisu na ntoto ya mvimba sambu na bo mosi mpi bana na bo. Nzambi kuyidikaka ve na ntwala ntangu yina bo fwete zinga mpi kufwa. Kansi, Nzambi silaka bo kima mosi ya kitoko mpenza. Na kusalaka nsola ya mbote mpi na kulandaka na kuzinga na kuwakana ti Nzambi, bo lendaka kuzinga kimakulu na ngemba mpi na kyese ya kukuka.

Bo salaka nsola mosi ya mbi, ebuna yo natilaka bantu yonso kimununu ti lufwa. Nkutu, tata  ya mabuta Yobi kundimaka nde: “Muntu yonso me butuka na ntoto yai ke na luzingu mosi ya nkufi ti ya mpasi.” (Yobi 14:1) Inki dyambu ya mbi kusalamaka?

Biblia ketendula nde: “Masumu me kotaka na nsi-ntoto sambu na mbi ya muntu mosi yai Adami, ebuna masumu me kwisaka kunata lufwa. Yo yina, bantu yonso ke fwaka sambu bo yonso ke salaka masumu.” (Roma 5:12) Ya kyeleka, “muntu mosi” ya bo ketubila kuvandaka Adami yina kukolamaka na luzolo yonso na nsiku ya kukonda mindondo kansi ya pwelele ya Nzambi. (Kuyantika 2:17) Na nsola yina yandi salaka, Adami kuvidisaka dibaku na yandi ya kuzinga mvula na mvula na paladisu ya ntoto. Yandi vidisaka mpi dikabu ya kitoko sambu na bana na yandi mpi kupesaka bo ndola ya masumu mpi ya lufwa. Yo monanaka nde bo vidisaka bima yonso. Keti yo vandaka mpenza mutindu yina?

Ntangu ya Mpa

Bamvula mingi na nima, muyimbi-bankunga kusonikaka na ngolo ya mpeve nde: “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.” (Nkunga 37:29) Sambu na kundimisa nde lusilu yina yandi silaka na Edeni talungana, Ndinga ya Nzambi ketendula mbotembote mambu yina yandi tasala ntama mingi ve. Biblia ketuba nde: “Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” Na nima, Nzambi yandi mosi ketuba nde: “Ntangu yai mono ke sala bima yonso ya mpa!”​—Kusonga 21:4, 5.

Sambu konso kima kele ti ntangu na yo, ngyufula ya kebasika kele: Ntangu yina ya mpa talungana nki ntangu, sambu balusilu ya kitoko ya Nzambi kulungana? Bambasisi ya zulunalu yai, Bambangi ya Yehowa, kesala ngolo sambu na kubenda dikebi ya bantu nde beto kezinga na ntangu yina Biblia kebinga “bilumbu ya nsuka” mpi nde ntangu mefinama sambu Nzambi ‘kusala bima yonso ya mpa.’ (2 Timoteo 3:1) Beto kelongisila nge na kutadila Biblia mpi kulonguka mambu ya metala bivuvu ya kitoko yina lenda kuma ya nge. Beto kelongisila nge mpi na kundima emvitasio yai: “Beno sosa Mfumu Nzambi, awa ya beno lenda mona yandi; beno samba yandi, awa ya yandi kele penepene.” (Yezaya 55:6) Na kisika ya kundima dilongi ya ketubaka nde luzingu na nge mekanamaka na ntwala, zaba nde luzingu na nge mpi bivuvu ya kuzinga mvula na mvula kele kaka na maboko na nge mosi!

[Bangogo sambu na kubenda dikebi ya kele na lutiti 8]

“Ntangu yai mono ke sala bima yonso ya mpa”