Lubutuku ya Mpa​—Inki Mutindu Yo Kesalamaka?

YEZU kutubilaka kaka ve mfunu, kisina, mpi lukanu ya lubutuku ya mpa ti Nikodemo, kansi yandi tubilaka mpi kima yina kesalaka nde lubutuku ya mpa kusalama. Yezu kutubaka nde: “Ata muntu mosi ve lenda kota na Kimfumu ya Nzambi kana yandi me butukaka ve na masa ti na mpeve-santu.” (Yoane 3:5) Yo yina, muntu kebutukaka dyaka na nsadisa ya masa ti mpeve. Kansi, bangogo ‘masa ti mpeve’ ketubila inki?

‘Masa ti Mpeve’ Kele Inki?

Sambu yandi vandaka muntu ya mayele ya dibundu ya bayuda, ntembe kele ve nde Nikodemo kuzabaka mutindu yina Masonuku ya Kiebreo kesadilaka bangogo “mpeve ya Nzambi,” disongidila ngolo ya kisalu ya Nzambi, yina lenda pusa bantu na kusala mambu ya nene mpenza. (Kuyantika 41:38; Kubasika 31:3; 1 Samuele 10:6) Yo yina, ntangu Yezu kusadilaka bangogo “mpeve-santu,” ntembe kele ve nde Nikodemo kubakisaka nde yandi vandaka kutubila ngolo ya kisalu ya Nzambi.

Yezu zolaka kutuba inki ntangu yandi sadilaka ngogo masa? Beto tadila mambu yina kele na baverse yina kele ntama mingi ve na ntwala mpi na nima ya disolo ti Nikodemo. Baverse yai kemonisa nde Yoane Mbotiki ti balongoki ya Yezu vandaka kubotika bantu na masa. (Yoane 1:19, 31; 3:22; 4:1-3) Kikalulu yai kuzabanaka mbote na Yeruzalemi. Yo yina, ntangu Yezu kutubaka na yina metala masa, Nikodemo kubakisaka nde Yezu vandaka kutubila ve masa yonso, kansi masa ya mbotika. *

Mbotika “na Mpeve ya Nzambi”

Kana ‘kubutuka na masa’ kele mutindu mosi ti kubaka mbotika na masa, ‘kubutuka na mpeve’ ketendula nki? Na ntwala nde Nikodemo kusolula ti Yezu, Yoane Mbotiki kuzabisaka nde bantu zolaka kubaka mbotika na masa kaka ve, kansi mpi na mpeve. Yandi tubaka nde: “Mono me botika beno na masa, kansi yandi [Yezu] ta botika beno na mpeve ya Nzambi.” (Marko 1:7, 8) Marko, nsoniki ya Evanzile, ketendula mbala ya ntete yina mbotika ya mutindu yina kusalamaka. Yandi kesonika nde: “Na bilumbu yina, Yesu katukaka na bwala Nazareti na ntoto ya Galilea. Yoane botikaka yandi na nzadi ya Yordani. Ntangu Yesu vandaka ke basika na masa, yandi monaka zulu ke kanguka mpi mpeve ya Nzambi ke kwisa kukulumuka bonso pizio na zulu ya ntu na yandi.”  (Marko 1:9, 10) Ntangu bo dindisaka Yezu na nzadi ya Yordani, yandi bakaka mbotika na masa. Na ntangu yandi bakaka mpeve yina katukaka na zulu, yandi bakaka mbotika na mpeve santu.

Kiteso ya bamvula tatu na nima ya mbotika na yandi, Yezu kundimisaka balongoki na yandi nde: “Na nima ya bilumbu fioti, bo ta botika beno na mpeve ya Nzambi.” (Bisalu 1:5) Inki ntangu yo salamaka?

Na kilumbu ya Pantekoti ya mvu 33 T.B., kiteso ya balongoki 120 ya Yezu kuvukanaka na nzo mosi na Yeruzalemi. “Na mbala mosi, makelele bonso mupepe ya ngolo katukaka na zulu, yo kwisa kufuluka na nzo yina yonso ya bo vandaka. Baludimi kwisa kumonika na bo bonso baludimi ya tiya. . . . Bo yonso fulukaka na mpeve ya Nzambi.” (Bisalu 2:1-4) Kilumbu yina kaka, bo syamisaka bantu yankaka na Yeruzalemi na kubaka mbotika na masa. Ntumwa Piere kusongaka kibuka mosi ya bantu nde: “Mbote konso muntu na kati na beno kubalula ntima, yandi kubaka mbotika na zina ya Yesu Kristo sambu Nzambi kulolula beno. Ebuna Nzambi ta pesa beno mpeve-santu makabu.” Bo salaka inki? “Bantu yina ndimaka malongi ya Piere, bo bakaka mbotika. Kilumbu yina, kiteso ya bantu mile tatu kumaka bakristo.”​—Bisalu 2:38, 41.

Dyambu Mosi ya Bitini Zole

Bambotika yai kemonisa inki na yina metala lubutuku ya mpa? Yo kemonisa nde lubutuku ya mpa kesalamaka na nsadisa ya dyambu mosi ya bitini zole. Kuvila ve nde Yezu kubakaka ntete mbotika na masa. Na nima, yandi bakaka mpeve santu. Mutindu mosi, balongoki ya ntete kubakaka ntete mbotika na masa (bankaka Yoane Mbotiki muntu kubotikaka bo), mpi na nima bo bakaka mpeve santu. (Yoane 1:26-36) Kiteso mosi, balongoki ya mpa 3 000 kubakaka ntete mbotika na masa, mpi na nima bo bakaka mpeve santu.

Kana beto vila ve bambotika yai ya kusalamaka na Pantekoti ya mvu 33 T.B., inki mutindu beto fwete vingila nde lubutuku ya mpa kusalama bubu yai? Kaka mutindu yo salamaka sambu na bantumwa ya Yezu mpi balongoki ya ntete. Ya ntete, muntu kebalulaka ntima, keyambulaka luzingu ya mbi, kekudipesaka na Yehowa sambu na kusambila mpi kusadila yandi, mpi kemonisaka kudipesa na yandi na meso ya bantu na nzila ya mbotika ya masa. Ya zole, kana Nzambi kupona yandi na kuvanda mfumu na Kimfumu na Yandi, Nzambi kepakulaka yandi ti mpeve santu. Kele muntu yandi mosi keyantikaka kitini ya ntete ya dyambu yai ya bitini zole (mbotika na masa); Nzambi muntu keyantikaka kitini ya zole (mbotika na mpeve). Kana muntu kubaka bambotika yai yonso zole, yo ketendula nde yandi mebaka lubutuku ya mpa.

Ebuna, sambu na nki na disolo na yandi ti Nikodemo, Yezu kusadilaka bangogo ‘kubutuka na masa ti na mpeve’? Sambu na kumonisa nde nsoba ya nene zolaka kusalama na luzingu ya bantu yina kebaka mbotika na masa ti na mpeve. Disolo yina kelanda ketadila kitini yai ya lubutuku ya mpa.

[Noti na nsi ya lutiti]

[Kifwanisu ya kele na lutiti 9]

Yoane kubotikaka na masa bantu ya Izraele yina kubalulaka ntima