Lubutuku ya Mpa​—Inki Yo Kelungisaka?

SAMBU na nki Yezu kusadilaka bangogo ‘kubutuka na mpeve’ ntangu yandi vandaka kutubila kubaka mbotika na mpeve santu? (Yoane 3:5) Ntangu bo kesadilaka ngogo ‘lubutuku’ na kifwani, yo ketendulaka “luyantiku,” bonso na bangogo “lubutuku ya dikanda mosi.” Yo yina, bangogo ‘lubutuku ya mpa’ ketubila “luyantiku ya mpa.” Ebuna, kutuba ya kifwani ‘kubutuka’ mpi ‘lubutuku ya mpa’ kemonisa nde luyantiku ya mpa tavanda na bangwisana ya Nzambi ti bantu yina kebaka mbotika na mpeve santu. Inki mutindu kesalamaka nsoba ya nene yina yo kenataka na bangwisana?

Ntangu yandi tendulaka mutindu Nzambi kebongisaka bantu sambu na kuyala na zulu, ntumwa Polo kusadilaka kingana mosi ya yandi bakaka na luzingu ya dibuta. Yandi sonikilaka Bakristu ya bilumbu na yandi nde Nzambi zolaka ‘kukumisa bo bana na yandi’ mpi nde yandi lendaka kusadila bo mambu “bonso bana.” (Galatia 4:5; Baebreo 12:7) Sambu na kumona mutindu mbandu yai ya kukumisa muntu mwana kesadisa muntu na kubakisa nsoba ya nki mutindu kesalamaka ntangu muntu mebaka mbotika na mpeve santu, beto tadila dyaka mbandu ya mwana-bakala yina kezola kusonikisa zina na ekole yina kele sambu na bana ya nzo-nkanda ya besi-nsi.

Nsoba Yina Kukumisa Muntu Mwana Kenataka

Na mbandu ya beto ketadila, mwana-bakala lenda sonikisa ve zina na ekole sambu yandi kele ve mwisi-nsi. Ntangu yai, yindula nde kilumbu mosi, nsoba mosi ya nene kusalama. Nsiku mepesa Tata mosi ya dibuta ya besi-nsi nswa ya kukumisa mwana-bakala yina mwana na yandi. Inki bupusi dyambu yai tavanda na yo na luzingu ya mwana-bakala yina? Sambu bo mendima yandi bonso mwana, ntangu yai yandi lenda vanda ti banswa ya mutindu mosi ti bana yankaka ya besi-nsi, disongidila nswa ya kusonikisa zina na ekole yina. Kukumisa yandi mwana mesoba mpenza bivuvu na yandi.

Dyambu yai kemonisa mambu yina kesalama na kiteso ya kuluta nene na bayina tabaka lubutuku ya mpa. Beto tadila mwa mambu ya mefwanana. Bo tandima mwana-bakala yina na ekole kaka kana yandi lungisa mambu ya bo kelombaka sambu na kukota na ekole yina, disongidila kuvanda mosi na kati ya besi-nsi. Kansi, yandi lenda lungisa ve dyambu yai yandi mosi. Mutindu mosi, Nzambi tapesa bantu yankaka kisika na Kimfumu, to luyalu na yandi ya zulu, kansi kaka kana bo lungisa mambu ya bo kelombaka sambu na kukota na kimfumu, disongidila ‘kubutuka dyaka.’ Kansi, bo lenda lungisa ve dyambu yai bo mosi sambu desizio ya kubutuka dyaka kele na maboko ya Nzambi.

Inki kusobaka luzingu ya mwana-bakala yina? Kima kusobaka luzingu na yandi kele nsiku yina leta kupesaka tata mosi nswa ya kukumisa mwana-bakala  yina mwana na yandi. Ya kyeleka, dyambu yina kusobaka ve kimuntu ya mwana-bakala yina. Ntangu tata yina kukumisaka mwana-bakala yina mwana na yandi, mwana-bakala yina kubikalaka kaka mutindu yandi vandaka ntete. Ata mpidina, na nima ya kulungisa mambu yina nsiku vandaka kulomba sambu na kukumisa muntu mwana, mwana-bakala yina bakaka pozisio ya mpa. Ya kyeleka, yandi kumaka ti luyantiku ya mpa, yo kele bonso lubutuku ya mpa. Yandi kumaka mwana, ebuna pozisio yina kupesaka yandi nswa ya kukota na ekole mpi ya kuvanda mwana ya dibuta ya tata na yandi ya lundi.

Mutindu mosi, Yehowa kusobaka luzingu ya kibuka mosi ya bantu ya kukonda kukuka na kuyantikisaka dyambu mosi ya kewakana ti nsiku sambu na kukumisa bo bana na yandi. Ntumwa Polo, yina kuvandaka mpi mosi na kati ya bantu ya kibuka yina, kusonikilaka bampangi na yandi Bakristu nde: “Mpeve ke kumisaka beno bana ya Nzambi, ti ke pesaka beto nzila na kubinga Nzambi nde: ‘Tata na mono!’ Mpeve ya Nzambi ke tubaka yo mosi na ntima na beto nde beto kele bana ya Nzambi.” (Roma 8:15, 16) Ee, na nzila ya dyambu yina Nzambi kusalaka sambu na kukumisa bo bana na yandi, Bakristu yina kukotaka na dibuta ya Nzambi, to kukumaka “bana na yandi.”​—1 Yoane 3:1; 2 Korinto 6:18.

Ya kyeleka, mutindu Nzambi kukumisaka bo bana na yandi kusobaka ve kimuntu na bo, sambu bo kele kaka bantu ya kukonda kukuka. (1 Yoane 1:8) Kansi, mutindu Polo kutendulaka yo dyaka, na nima ya kulungisa mambu yina nsiku kelombaka sambu na kukumisa bo bana ya Nzambi, bo bakaka pozisio ya mpa. Kaka na ntangu yina, mpeve ya Nzambi kupesaka bana yina ya Nzambi kukumisaka bana na yandi lukwikilu ya ngolo nde bo tazinga ti Kristu na zulu. (1 Yoane 3:2) Lukwikilu ya ngolo yina mpeve santu kubutaka na kati na bo kupesaka bo mutindu ya mpa ya kutadila luzingu. (2 Korinto 1:21, 22) Ya kyeleka, bo kebakaka luyantiku ya mpa, beto lenda binga yo nde lubutuku ya mpa.

Ntangu yo ketubaka na yina metala bantu yina Nzambi kekumisaka bana na yandi, Biblia ketuba nde: “Bo ta vanda banganga-Nzambi sambu na kusadila Nzambi ti Kristo, bo ta yalaka na kimvuka ti Kristo bamvula mile mosi.” (Kusonga 20:6) Ti Kristu, bantu yina Nzambi kekumisaka bana na yandi tabaka kisika bonso bantotila na Kimfumu ya Nzambi, to luyalu ya zulu. Ntumwa Piere kuzabisaka bampangi na yandi Bakristu nde bo tabaka luyalu yina “ke bebaka ve, yo mpi ke kumaka mvindu ve, yo mpi ke vilaka ve,” yina “Nzambi me bumbaka yo kuna na zulu” sambu na bo. (1 Piere 1:3, 4) Yo kele difwa mosi ya kitoko mpenza!

Kansi, dyambu yai ya metala luyalu kebasisa mpi ngyufula mosi. Kana bantu yina kebutuka dyaka tayala bonso bantotila na zulu, bo tayala na zulu ya banani? Beto tadila ngyufula yai na disolo ya kelanda.

[Kifwanisu ya kele na lutiti 10]

Polo kutubaka inki na yina metala kukumisa muntu mwana?