Mambu ya Beto Kelonguka na Yezu

Na Yina Metala “Nsuka”

Inki tasuka?

Balongoki ya Yezu kuyulaka yandi nde: “Nki tavanda kidimbu ya kuvanda na nge mpi ya kemonisa nde ngidika ya bima kekwenda na nsuka?” (Matayo 24:3, NW) Ntangu yandi pesaka mvutu na ngyufula yina, Yezu kutubaka ve nde ntoto yai tafwa. Ntete, yandi tubilaka “ngidika ya bima” mpi yandi sadilaka bangogo yai sambu na kutubila ngidika ya politiki, ya mumbongo, mpi ya lusambu yina Satana keyalaka. (Matayo 13:22, 40, 49) Yo yina ngidika yina yandi vandaka kuyindula ntangu yandi tubaka nde: “Nsuka . . . ta kwisa.”​—Matayo 24:14.

Inki mutindu Yezu kutendulaka nsuka?

Nsuka ya ngidika yai ya mbi kele ‘nsangu ya mbote.’ Yezu kutubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka . . . ta kwisa.” Yezu kutendulaka nsuka ya ngidika ya bima ya bubu na bangogo yai: “Sambu na bilumbu yina, mpasi mingi ta vanda. Yo ta vanda mpasi mosi ya ngolo yina me bwaka ntete ve katuka kuna ya Nzambi salaka bima yonso tii bubu yai. Ata mpasi ya nkaka ya mutindu yina ta vanda diaka ve. Kana Nzambi kulumusaka ve ntalu ya bilumbu yina, ata muntu mosi ve zolaka kuguluka.”​—Matayo 24:14, 21, 22.

Banani Tafwa?

Bantu yina kezolaka ve mpi kesadilaka ve Yehowa ti Yezu, bantu tafwa. Bantu ya mutindu yai kelemfukaka ve na Nzambi. Yezu kutubaka nde: “Mambu yina bwaka na ntangu ya Noa, yo ta bwa mpi mutindu mosi ntangu Mwana-muntu ta kwisa. Na bilumbu yina, ntangu masa vandaka me fuluka mingi ntete ve na ntoto. . . . Bo [tulaka ve dikebi, NW] tii kuna masa fulukaka mingi na ntoto yonso; masa yina nataka bo yonso na lufwa.” (Matayo 24:36-39) Yezu kutubaka  nde bantu mingi kele na nzila yina kenataka na lufwa. Kansi, yandi pesaka kivuvu nde kele ti “nzila ya fyoti [yina] kenataka na luzingu.”​—Matayo 7:13, 14.

Ngidika yai ya bima tasuka nki ntangu?

Ntangu bo lombaka yandi kidimbu ya kuvanda na yandi “mpi ya kemonisa nde ngidika ya bima kekwenda na nsuka,” Yezu kuvutulaka nde: “Bantu ya nsi ya nkaka ta kwisa kunwanisa bantu ya nsi ya nkaka, bantu ya kimfumu ya nkaka ta kwisa kunwanisa bantu ya kimfumu ya nkaka. Nzala ta vanda mingi mpenza, ntoto mpi ta nikana. . . . Mambu ya mbi ta kwisa mingi; yo yina, kuzolana na kati ya bantu mingi ta yantika kumana.” (Matayo 24:3-12) Yo yina, bansangu yonso ya mbi ya bubu yai kele ti ntendula ya kepesa kikesa​—ntama mingi ve luyalu ya Kimfumu ya Nzambi tanatila bantu ya bulemfu ngemba. Yezu kutubaka nde: “Kana beno mona nde mambu yina ke bwa, beno fweti zaba nde Kimfumu ya Nzambi me kuma penepene.”​—Luka 21:31.

Inki nge fwete sala?

Yezu kutubaka nde Nzambi pesaka “mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Sambu na kumonisa lukwikilu na Nzambi mpi na Mwana, nge fwete zaba bo mbote-mbote. Yo yina, Yezu kutubaka nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.”​—Yoane 17:3.

Keba sambu basusi mpi bampasi kukanga nge ve nzila sambu na kulonguka mutindu ya kumonisa zola na nge sambu na Nzambi. Yezu kutubaka nde: “Beno keba! . . . Beno lenda yindula bampasi ya luzingu yai ve; kana ve, kilumbu yina ta kwisila beno na kintulumukina. Sambu yo ta kwisila bantu yonso yina kele na nsi-ntoto ya mvimba bonso mutambu.” Kana nge zitisa lukebisu ya Yezu, nge “ta baka ngolo ya kutina mambu yonso yina ta bwa.”​—Luka 21:34-36.

Sambu na kuzaba mambu mingi, tala kapu ya 9, “Keti Beto Kezinga na ‘Bilumbu ya Nsuka’?,” ya mukanda Inki Biblia Kelongaka Mpenza? a

[Noti na nsi ya lutiti]