Landa Mbandu ya Yezu na Kusamunaka ti Kikesa
Landa Mbandu ya Yezu na Kusamunaka ti Kikesa
“Nzambi pesaka beto kikesa na kuzabisa beno nsangu ya mbote.”—1 TES. 2:2.
1. Sambu na nki nsangu ya mbote ya Kimfumu kepesaka kyese mpenza?
YO KEVANDAKA kyese mingi mpenza na kuwa nsangu ya mbote! Mpi nsangu ya kuluta mbote na bansangu yonso kele nsangu ya mbote ya Kimfumu ya Nzambi. Nsangu yai ya mbote kendimisaka beto nde bampasi, maladi, mawa mpi lufwa tamana. Yo kekangudilaka bantu nzila ya luzingu ya mvula na mvula, kemonisaka lukanu ya Nzambi, mpi kesongaka beto mutindu ya kusala bangwisana ya zola ti yandi. Nge lenda yindula nde bantu yonso tasepela na kuwa nsangu yai ya Yezu kuzabisaka bantu. Kansi, yo kele mawa na kumona nde yo kele mutindu yina ve.
2. Tendula bangogo yai ya Yezu: “Mono kwisaka kukabula.”
2 Yezu kusongaka balongoki na yandi nde: “Beno banza ve nde mono kwisaka sambu na kunata ngemba awa na nsi-ntoto; mono kwisaka kunata ngemba ve, kansi mono kwisaka kunata mbele ya bitumba. Mono kwisaka kukabula mwana-bakala na tata na yandi, mwana-nkento na mama na yandi, mwana-nkento na bukilo na yandi ya nkento. Bambeni ya konso muntu ta vanda bantu yina kele na fami na yandi mosi.” (Mat. 10:34-36) Olie ya kundima nsangu ya mbote, bantu mingi kebuyaka yo. Bantu yankaka kekudikumisaka bambeni ya bantu yina kezabisaka yo, ata nkutu bo kele bantu ya dibuta mosi.
3. Beto kele ti mfunu ya nki na ntangu beto kelungisa kisalu na beto ya kusamuna?
3 Beto kezabisaka bakyeleka ya mutindu mosi ti yina Yezu kuzabisaka, mpi ntangu bantu kewaka yo, bo kepesaka mvutu kaka mutindu bantu mingi kupesaka mvutu na ntangu ya Yezu. Mpi beto fwete vingila nde bantu kusala mutindu yina. Yezu kusongaka balongoki na yandi nde: “‘Ata mpika mosi ve me luta mfumu na yandi.’ Kana bo vandaka kumonisa mono mpasi, bo ta monisaka beno mpasi mpi.” (Yoa. 15:20) Na bansi mingi, bantu kenyokulaka beto ve na mutindu ya pwelele, kansi beto kekutanaka ti bantu yina kevwezaka beto mpi ketulaka ve dikebi na nsangu. Yo yina, beto kele ti mfunu ya lukwikilu mpi kikesa sambu na kukanga ntima na kisalu na beto ya kusamuna nsangu ya mbote ti kikesa.—Tanga 2 Piere 1:5-8.
4. Sambu na nki Polo kuvandaka ti mfunu nde ‘Nzambi kupesa yandi kikesa’ sambu na kusamuna?
4 Ziku bantangu yankaka nge kemonaka nde yo kele mpasi na kusala kisalu ya kusamuna, to bitini na yo yankaka lenda pesa nge boma. Kana yo kele mpidina, zaba nde nge kele nge mosi ve, Bambangi yankaka mpi kekudiwaka mutindu mosi. Ntumwa Polo vandaka nsamuni mosi ya kikesa mpi ya kukonda boma yina vandaka kubakisa mbote mpenza kyeleka, kansi ata sambu na yandi yo vandaka mpasi na kusamuna bantangu yankaka. Yandi sonikilaka Bakristu ya Tesalonika nde: “Beno zaba nki mutindu bo monisaka beto mpasi ti nki mutindu bo fingaka beto na bwala Filipi; kansi, ntangu beto kumaka kuna na beno na Tesalonika, Nzambi pesaka beto kikesa na kuzabisa beno nsangu ya mbote yina ke katukaka na yandi, ata bantu mingi buyaka yo.” (1 Tes. 2:2) Na Filipi bamfumu kubulaka Polo ti nduku na yandi Silasi fimbu, bo tulaka bo na boloko, mpi bo kangisaka makulu na bo na mabaya. (Bis. 16:16-24) Ata mpidina, ‘Nzambi pesaka Polo ti Silasi kikesa’ sambu na kulanda kusamuna. Inki mutindu beto lenda sala mutindu mosi? Sambu na kubaka mvutu, beto tadila mambu yina kusadisaka bansadi ya Nzambi ya ntangu ya ntama na kutuba ti kikesa kyeleka ya metala Yehowa, mpi beto longuka mutindu beto lenda landa mbandu na bo.
Kikesa Kuvandaka Mfunu Sambu na Kunwana ti Kimbeni
5. Sambu na nki bantu yina kebikalaka ya kwikama na Yehowa kevandaka ntangu yonso ti mfunu ya kikesa?
5 Ya kyeleka, Yezu Kristu kuvandaka mbandu ya kuluta nene ya muntu yina monisaka kikesa. Ata mpidina, banda luyantiku ya disolo ya luzingu ya bantu, bantu yonso yina kebikalaka ya kwikama na Yehowa kevandaka ntangu yonso ti mfunu ya kikesa. Sambu na nki? Na nima ya kukolama yina kusalamaka na Edeni, Yehowa kutubaka nde kimbeni tavanda na kati ya bantu yina kesadilaka Nzambi ti bayina kesadilaka Satana. (Kuy. 3:15) Ntama mingi ve kimbeni yai kumonanaka pwelele ntangu bo fwaka Abele, muntu ya lunungu, na mpangi na yandi. Na nima, bantu yantikaka kumenga Enoki, muntu yankaka ya kwikama yina kuzingaka na ntwala ya Mvula ya Ngolo. Yandi bikulaka nde Nzambi takwisa ti bamile na bamile ya bawanzio na yandi ya santu sambu na kusambisa bantu ya mbi ti ya masumu. (Yude 14, 15) Yo kele kyeleka nde bantu mingi kuzolaka ve nsangu yai. Bantu kumengaka Enoki mpi ntembe kele ve nde bo zolaka kufwa yandi kana Yehowa kusukisaka ve luzingu na yandi. Enoki kumonisaka kikesa mpenza!—Kuy. 5:21-24.
6. Sambu na nki Moize kuvandaka ti mfunu ya kikesa sambu na kutuba na Farao?
6 Yindula mpi kikesa yina Moize kumonisaka ntangu yandi tubaka ti Farao, mfumu yina bantu vandaka kubaka bonso mumonisi ya banzambi kaka ve, kansi bonso nzambi yandi mosi, mwana ya nzambi-ntangu Ra. Bonso Bafarao yankaka, yo lenda vanda nde yandi vandaka kusambila kifwanisu na yandi mosi. Ndinga ya Farao kuvandaka nsiku; yandi vandaka kuyala na nsadisa ya bansiku yina yandi basisaka. Sambu yandi vandaka muntu ya ngolo, ya lulendo, mpi ya ntu-ngolo, Farao kuvandaka ve ti kikalulu ya kubika nde bantu yankaka kuzabisa yandi mambu yina yandi fwete sala. Yo lombaka nde Moize, ngungudi ya kudikulumusa, kutelama mbala na mbala na ntwala ya muntu yai na ntangu ya bo vandaka kuvingila yandi ve mpi ya bo vandaka kuzola ve nde yandi kwisa. Ebuna inki mambu Moize kuzabisaka na ntwala? Bandola yina kunataka bampasi mingi. Inki yandi lombaka? Nswa sambu bamilio ya bampika ya Farao kukatuka na insi ya Ezipte! Keti Moize kuvandaka ti mfunu ya kikesa? Ee, yandi vandaka ti mfunu ya kikesa mpenza!—Kut. 12:3; Baeb. 11:27.
7, 8. (a) Inki bampasi kubwilaka bantu ya kwikama yina kuzingaka na ntangu ya ntama? (b) Inki kusadisaka bantu ya kwikama ya ntwala ya ntangu ya Bakristu na kumonisa kikesa ya kunwanina lusambu ya bunkete mpi kusala nde yo kwenda na ntwala?
7 Na nsungi ya bamvu-nkama yina kulandaka, baprofete mpi bansadi yankaka ya kwikama ya Nzambi kulandaka na kunwanina na kikesa yonso lusambu ya bunkete. Nsi-ntoto ya Satana vandaka kuzola bo ve. Polo ketuba nde: “Bankaka, bo fwaka bo na matadi; bankaka, bo zengaka bo na bitini zole na si; bankaka, bo fwaka bo na mbele. Bo vandaka kulwata mpusu ya dimeme to ya nkombo ntangu bo vandaka kwenda kutambula. Bo vandaka bansukami, bo vandaka kumonisa bo mpasi.” (Baeb. 11:37) Inki kusadisaka bansadi yina ya kwikama ya Nzambi na kuvanda kaka ngolo? Na baverse yina kele na ntwala ya verse yai, ntumwa kumonisaka dyambu yina kupesaka Abele, Abrahami, Sara, mpi bankaka ngolo ya kukanga ntima. Yandi tubaka nde: “Bo bakaka ve mambote yina ya Nzambi silaka bo, kansi [na lukwikilu] bo monaka yo, bo mpi ndimaka yo ntangu bo vandaka ntama na yo.” (Baeb. 11:13) Ntembe kele ve nde kutula meso na balusilu ya Yehowa kusadisaka baprofete bonso Eliya, Yeremia, mpi bantu yankaka ya kwikama ya ntwala ya ntangu ya Bakristu, yina kunwaninaka ti kikesa yonso lusambu ya kyeleka, na kukanga ntima.—Tito 1:2.
8 Bantu yai ya kwikama ya ntwala ya ntangu ya Bakristu vandaka kuvingila makwisa ya mbote mpi ya kitoko. Nsukansuka ntangu bo tafutumuka, bo takuma bantu ya kukuka mpi Nzambi ‘takatula bo na kimpika yina kenataka lufwa’ na nzila ya bisalu ya kinganga-Nzambi yina Yezu Kristu mpi bilandi na yandi ya banganga-Nzambi 144000 tasala. (Roma 8:21) Dyaka, Yeremia mpi bansadi yankaka ya kikesa ya Nzambi ya ntangu ya ntama kubakaka kikesa sambu na kivuvu ya Yehowa, yina kemonana na lusilu yina yandi pesaka na Yeremia: “Bo ta nwanisa nge kansi bo ta kuka ve kubedisa nge, sambu mono muntu ta vandaka na nge na kusadisa nge. Mono Mfumu Nzambi muntu me tuba.” (Yer. 1:19) Bubu yai, ntangu beto keyindululaka balusilu ya Nzambi sambu na makwisa na beto mpi kivuvu yina yandi mepesaka ya kutanina beto na kimpeve, beto mpi kebakaka ngolo.—Bing. 2:7; tanga 2 Korinto 4:17, 18.
Zola Kupusaka Yezu na Kusamuna ti Kikesa
9, 10. Na nki mitindu Yezu kumonisaka kikesa na ntwala ya (a) bamfumu ya mabundu, (b) kimvuka ya bapolisi, (c) nganga-Nzambi ya nene, (d) Pilate?
9 Mbandu na beto, Yezu, kumonisaka kikesa na yandi na mitindu mingi. Mu mbandu, ata bantu yina kuvandaka ti kiyeka mpi bupusi kumengaka yandi, yandi katulaka ve mambu yankaka yina Nzambi zolaka nde bantu kuzaba sambu na kusonga bo kaka mambu yina zolaka kusepidisa bo. Yandi tungululaka kukonda boma bantwadisi ya ngolo ya mabundu yina vandaka kuyindula nde bo kele bantu ya lunungu mpi malongi na bo ya luvunu. Yezu kubedisaka bantu yina mpi kusongaka bo yo na mutindu ya sikisiki mpi ya pwelele. Na dibaku mosi, yandi tubaka nde: “Mawa na beno, balongi ya Bansiku ti Bafarize! Beno kele bantu ya luvunu! Beno me fwanana na maziamu yina ya bo me pakulaka lupemba; na nganda yo ke monikaka ya kitoko, kansi na kati yo me fulukaka na mikwa ya bantu yina me fwaka ti na bima mingi ya kupola. Beno mpi mutindu mosi: na nganda beno ke monikaka bantu ya mbote na meso ya bantu, kansi na kati beno me fulukaka na luvunu ti na masumu.”—Mat. 23:27, 28.
10 Ntangu Yezu kukutanaka ti kimvuka ya bapolisi na kilanga ya Getsemane, yandi songaka bo na kikesa yonso nde yandi vandaka muntu yina bo vandaka kusosa. (Yoa. 18:3-8) Na nima, bo nataka yandi na ntwala ya Sanedreni mpi nganga-Nzambi ya nene yulaka yandi bangyufula. Ata yandi zabaka nde nganga-Nzambi ya nene vandaka kusosa kikuma ya luvunu sambu na kufwa yandi, Yezu kutubaka kukonda boma nde yandi vandaka Kristu mpi Mwana ya Nzambi. Yandi yikaka nde bo tamona yandi ‘me vanda na diboko ya kibakala ya Nzambi, mpi yandi ke kwisa na matuti ya zulu.’ (Mar. 14:53, 57-65) Ntangu fyoti na nima, Yezu kutelamaka ya kukangisa na minyololo na ntwala ya Pilate, yina lendaka kugulusa yandi. Kansi Yezu kubikalaka pima na ntwala ya mambu ya luvunu yina bo vandaka kukusila yandi. (Mar. 15:1-5) Mambu yai yonso kulombaka kikesa mingi.
11. Inki kuwakana kele na kati ya kikesa ti zola?
11 Na Pilate, Yezu kutubaka nde: “Kisalu ya mono butukilaka ti ya mono kwisilaka awa na nsi-ntoto, yo kele sambu na kutuba kitemwe na mambu yina kele ya kieleka.” (Yoa. 18:37) Yehowa kupesaka Yezu mukumba ya kusamuna nsangu ya mbote, mpi Yezu kusepelaka na kusala yo sambu yandi vandaka kuzola Tata na yandi ya zulu. (Luka 4:18, 19) Yezu vandaka mpi kuzola bantu. Yandi zabaka nde bo vandaka kuzinga na mpasi. Mutindu mosi, kimbangi na beto ya kikesa mpi ya kukonda boma mesimbama ngolo mpenza na zola sambu na Nzambi mpi sambu na nkweno.—Mat. 22:36-40.
Mpeve Santu Kepesaka Beto Ngolo ya Kusamuna ti Kikesa
12. Inki kupesaka kyese na balongoki ya ntete?
12 Na bamposo yina kulandaka lufwa ya Yezu, balongoki kukumaka ti kikuma ya kusepela na kumona mutindu Yehowa vandaka kuyika bo bantu yankaka yina ya yandi vandaka kugulusa. Na kilumbu mosi mpamba, Bayuda ti baprozelite kiteso ya 3 000 yina kukatukaka na bansi mingi mpi kwisaka na Yeruzalemi sambu na kuta nkinsi ya Pantekoti kubakaka mbotika! Yo fwete vanda nde bantu yonso na Yeruzalemi vandaka kutubila dyambu yai! Biblia ketuba nde: “Bo yonso vandaka na boma sambu bantumwa vandaka kusala mambu mingi ya kuyituka.”—Bis. 2:41, 43.
13. Sambu na nki bampangi kusambaka sambu na kulomba kikesa, mpi inki kusalamaka na nima?
13 Bamfumu ya mabundu kuwaka makasi mpenza ebuna bo kangaka Piere ti Yoane, bo tulaka bo na boloko kisika bo lutisaka mpimpa ya mvimba, mpi bo pesaka bo nsiku ya kutuba ve mambu ya metala Yezu. Ntangu bo yambulaka bo, bantumwa yai zole kuzabisaka bampangi mambu yina kusalamaka mpi bo yonso kusambaka sambu na kimbeni yina bo vandaka kukutana ti yo mpi bo tubaka nde: “Mfumu, . . . pesa beto bantu yina ke sadilaka nge kikesa yonso ya kuzabisa bantu nsangu na nge.” Inki kusalamaka na nima? “Bo yonso fulukaka na mpeve ya Nzambi, ebuna bo yantikaka kuzabisa nsangu ya Nzambi na kikesa yonso.”—Bis. 4:24-31.
14. Inki mutindu mpeve santu kesadisaka beto na kisalu na beto ya kusamuna?
14 Simba nde kima kusadisaka balongoki na kutuba ndinga ya Nzambi na kikesa yonso kuvandaka mpeve santu ya ngolo ya Yehowa. Kikesa ya kuzabisa kyeleka na bankaka, ata na bantu yina kemengaka nsangu na beto, kekatukaka ve na beto. Yehowa lenda mpi tapesa beto mpeve santu na yandi kana beto lomba yandi na kupesa beto yo. Ti lusadisu ya Yehowa, beto mpi lenda monisa kikesa yina beto kele na yo mfunu sambu na kununga konso kimbeni yina beto kekutana na yo.—Tanga Nkunga 138:3.
Bubu Yai Bakristu Kesamunaka ti Kikesa
15. Inki mutindu kyeleka kekabulaka bantu bubu yai?
15 Na bilumbu na beto, bonso na ntangu ya ntama, kyeleka kelanda na kukabula bantu. Bantu yankaka kendimaka, kansi bankaka kebakisaka ve mpi kesepelaka ve ti lusambu na beto. Bankaka ketongaka beto, kesekaka beto, to nkutu kemengaka beto, kaka mutindu Yezu kutubaka yo. (Mat. 10:22) Bantangu yankaka, bantu kekusilaka beto makambu mpi bo kepanzaka bansangu ya luvunu sambu na beto na nzila ya bimwangi-nsangu. (Nk. 109:1-3) Ata mpidina, bantu ya Yehowa kezabisaka nsangu ya mbote na kikesa yonso na ntoto ya mvimba.
16. Inki eksperiansi kemonisa nde kikesa lenda soba mabanza ya bantu yina beto kelongaka nsangu?
16 Kikesa na beto lenda pusa bantu na kusoba mutindu na bo ya kutadila nsangu ya Kimfumu. Mpangi-nkento mosi ya Kirghizistan ketuba nde: “Ntangu mu vandaka na kisalu ya kusamuna, muwi mosi kuzabisaka mono nde: ‘Mu kekwikilaka na Nzambi kansi na Nzambi ya Bakristu ve. Kana nge kwisa dyaka na kyelo yai, mu tatindila nge mbwa na mono!’ Na nima na yandi kuvandaka na mbwa mosi ya nene ya bo kangaka na shene. Kansi na nsungi ya kampanie ya kukabula Bansangu ya Kimfumu No. 37, ‘Nsuka ya Dibundu ya Luvunu Mefinama!,’ mu bakaka lukanu ya kuvutuka na nzo yina ti kivuvu ya kukutana ti muntu yankaka ya dibuta ya bakala yina. Kansi, kaka bakala yina muntu kukangulaka kyelo. Na mbala mosi mu sambaka Yehowa, mpi mu tubaka na nima nde: ‘Mbote, mu keyibuka masolo ya beto solulaka bilumbu tatu meluta, mu keyibuka mpi mbwa na nge. Kansi mu lendaka ve kuluta, sambu bonso nge, mu kekwikilaka na Nzambi mosi kaka ya kyeleka. Kubika fyoti Nzambi tafwa mabundu yonso yina kepesaka yandi nsoni. Nge lenda longuka mambu mingi ya metala dyambu yai kana nge tanga trakiti yai.’ Mu yitukaka na kumona nde bakala yango kundimaka Bansangu ya Kimfumu. Ebuna, mu kwendaka na nzo yankaka. Minuta fyoti na nima, bakala yango kwisaka kulanda mono ntinu ti Bansangu ya Kimfumu na diboko. Yandi tubaka nde: ‘Mu me tanga yo. Inki mu fwete sala sambu nde makasi ya Nzambi kubwila mono ve?’” Mpangi-nkento yantikaka kulonguka ti bakala yina, mpi bakala yango yantikaka kukwenda na balukutakanu ya Bukristu.
17. Inki mutindu kikesa ya mpangi-nkento mosi kupesaka kikesa na longoki mosi ya Biblia yina vandaka kuwa boma?
17 Kikesa na beto lenda syamisa mpi bankaka na kuvanda kikesa. Na Russie, mpangi-nkento mosi yina vandaka kusala nzyetelo na bisi kupesaka zulunalu na muntu mosi ya bo vandaka ti yandi na bisi. Kaka na ntangu yina, bakala mosi kutelamaka na kiti na yandi, kubotulaka zulunalu na maboko ya mpangi-nkento, kukonika-konikaka yo, mpi kulosaka yo na ntoto. Yandi fingaka mpangi-nkento na ndinga ya ngolo, kulombaka adresi na yandi mpi kukebisaka yandi na kusamuna ve na bwala yina. Mpangi-nkento kulombaka lusadisu ya Yehowa na kisambu mpi kuyibukaka bangogo yai ya Yezu: “Beno kuwa boma ve sambu na bantu yina ke fwaka nitu.” (Mat. 10:28) Na malembe yonso, yandi telamaka mpi kusongaka bakala yina nde, “Mu tapesa nge ve adresi na mono, mpi mu tayambula ve kusamuna na bwala.” Na nima yandi kitaka na bisi. Mpangi-nkento yina kuzabaka ve nde longoki na yandi mosi ya Biblia kuvandaka na bisi yina. Longoki yina kubikaka nde boma ya bantu kukanga yandi nzila ya kukwenda na balukutakanu ya Bukristu. Kansi, na nima ya kumona kikesa ya mpangi na beto ya nkento, longoki ya Biblia kubakaka lukanu nde yandi zolaka kuyantika na kukwenda na balukutakanu.
18. Inki tasadisa nge na kusamuna ti kikesa mutindu Yezu kusamunaka?
18 Na nsi-ntoto yai ya kukabwana ti Nzambi, yo kelombaka kikesa sambu na kusamuna mutindu Yezu kusamunaka. Inki tasadisa nge na kusala buna? Tula ntima na bilumbu yina kekwisa. Sala na mpila nde zola na nge sambu na Nzambi mpi sambu na nkweno kubikala kaka ngolo. Samba sambu Yehowa kupesa nge kikesa. Yibukaka ntangu yonso nde nge kele ve nge mosi, sambu Yezu kele ti nge. (Mat. 28:20) Mpeve santu tapesa nge ngolo. Mpi Yehowa tasakumuna mpi tasadisa nge. Yo yina, bika beto vanda ti kikesa mpi kutuba nde: “Mfumu Nzambi muntu ke sadisaka mono, yo yina mono ta wa boma ve. Nki mambu ya mbi muntu lenda sala mono?”—Baeb. 13:6.
Inki Mvutu Nge Tapesa?
• Sambu na nki bansadi ya Nzambi kele ti mfunu ya kikesa?
• Sambu na yina metala kuvanda kikesa, inki malongi beto kebaka na . . .
bantu ya kwikama yina kuzingaka na ntwala ya Kristu?
Yezu Kristu?
Bakristu ya ntete?
bampangi na beto Bakristu bubu yai?
[Bangyufula ya disolo ya kulonguka]
[Kifwanisu ya kele na lutiti 23]
Yezu kutungululaka kukonda boma bamfumu ya mabundu
[Kifwanisu ya kele na lutiti 25]
Yehowa kepesaka beto kikesa ya kusamuna