Beto Buya Bima Yina Kekatulaka Dikebi na Kilumbu Yai ya “Nsangu ya Mbote”

BANTU iya ya maladi ya lepre kusobaka mabanza na bo. Ata muntu mosi ve kupesaka bo madia na kielo ya bwala. Bantu ya Siria yina kuzyungaka Samaria kusalaka na mpila nde madia kukota ve sambu bantu kufwa na nzala. Yo vandaka ve mfunu na kukota na kati ya bwala; bima ya kudia kukumaka ntalu mingi kibeni. Bo diaka dezia muntu mosi.​—2 Bant. 6:24-29.

Bantu ya maladi ya lepre kuyindulaka mutindu yai: ‘Sambu na nki ve kukwenda na camp ya basoda ya Siria? Yo vanda beto kota na bwala, beto bikala awa, to beto kwenda na camp ya bantu ya Siria, yonso kele kiteso mosi.’ Ntangu mpimpa kubwaka, bo yantikaka kukwenda. Ntangu bo kumaka na camp, mazu kuvandaka ve. Bankengidi kuvandaka ve. Bampunda vandaka ya kukanga, kansi ata soda mosi ve kuvandaka. Bo yonso iya kutalaka na kati ya nzo ya ntenta mosi. Ata muntu mosi ve kuvandaka kuna, kansi madia mpi malafu vandaka mingi. Bo diaka mpi bo nwaka. Bantu ya maladi ya lepre kumonaka mpi wolo, arza, bilele, mpi bima yankaka ya mfunu. Bo bakaka yo, kubumbaka yo, mpi kuvutukaka sambu na kubaka diaka bima mingi yankaka. Camp ya mvimba kubikalaka ya mpamba. Na mutindu ya kuyituka, Yehowa kuwisaka bantu ya Siria makelele bonso makelele ya basoda mingi. Sambu bo yindulaka nde bambeni ke na kunwanisa bo, basoda ya Siria kutinaka na makulu. Bima yonso kubikalaka pana!

Bantu ya maladi ya lepre vandaka kubaka bima ya mfunu mpi kukwenda kubumba yo. Kansi, bo yindulaka bantu ya Samaria yina kuvandaka na nzala mpi yo yantikaka na kuyangisa kansansa na bo. Bo tubanaka bo na bo nde: “Beto me sala mbote ve. [Kilumbu yai kele kilumbu mosi ya, NW] nsangu ya mbote!” Bantu ya maladi ya lepre kuvutukaka nswalu na Samaria mpi kuzabisaka nsangu ya mbote ya bima yina ya bo zwaka.​—2 Bant. 7:1-11.

Beto kezinga mpi na nsungi yina beto lenda binga “kilumbu mosi ya nsangu ya mbote.” Ntangu yandi vandaka kutubila kitini mosi ya mfunu ya “kidimbu . . . ya kemonisa nde ngidika ya bima kekwenda na nsuka,” (NW) Yezu kutubaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.” (Mat. 24:3, 14) Inki bupusi dyambu yai fwete vanda na yo na beto?

Basusi na Beto Mosi Lenda Lembisa Beto

Sambu bo vandaka na kyese mingi na bima yina bo zwaka, bantu ya maladi ya lepre kuvilaka bantu ya Samaria sambu na mwa ntangu fyoti. Bo tulaka dikebi kaka na bima yina bo lendaka kuzwa. Keti kima ya mutindu mosi lenda kumina beto? “Nzala mingi mpenza” kele na kati ya kidimbu ya kele ti mambu mingi ya kemonisa nde ngidika ya bima kekwenda na nsuka. (Luka 21:7, 11) Yezu kukebisaka balongoki na yandi nde: “Beno keba! Beno lenda yindula ve na kusala bafete konso ntangu to na kulauka malafu, beno lenda yindula bampasi ya luzingu yai ve.” (Luka 21:34) Mutindu beto kele Bakristu, beto fwete keba na mpila nde beto bika ve nde basusi ya luzingu ya konso kilumbu kupusa beto na kuvila nde beto kezinga na “kilumbu mosi ya nsangu ya mbote.”

Mukristu mosi na zina ya Blessing kupesaka ve nzila nde mambu na yandi mosi kulembisa yandi. Yandi salaka bonso mupasudi-nzila, kumanisaka nzo-nkanda, nsuka-nsuka yandi kwelaka mpangi mosi ya Betele, mpi bo ndimaka nde yandi sala na Betele ya Benin. Yandi ketuba nde: “Mu kesalaka kisalu ya kutula bunkete na basuku ya Betele mpi mu  kesepelaka mpenza ti kisalu na mono.” Ntangu yai Blessing lenda yindula bamvula 12 ya yandi melutisaka na kisalu ya ntangu yonso mpi kusepela sambu yandi ketulaka dikebi kaka na ‘kilumbu ya nsangu ya mbote’ yina beto ke na kuzinga ntangu yai.

Keba na Bima Yina Kedyaka Ntangu

Ntangu Yezu kutindaka balongoki na yandi 70, yandi tubaka nde: “Bambuma mingi kele na bilanga, kansi bantu ya kisalu kele mingi ve sambu na kukatula yo. Beno bondila mfumu ya bilanga na kutinda bantu ya nkaka ya kisalu sambu na kukatula bambuma na yandi.” (Luka 10:2) Kaka mutindu kusukinina na kukatula bambuma lenda sala nde bambuma kubeba, kana beto kelungisa ve kisalu na beto ya kusamuna ti dikebi yonso, yo lenda sala nde bantu kuvidisa luzingu. Yezu kuyikaka nde: “Beno kutelama-telama ve na nzila sambu na kupesa bantu ya nkaka mbote.” (Luka 10:4) Na ndinga ya kisina, ngogo ya bo kesadilaka sambu na “kupesa mbote” lenda tendula mambu mingi kuluta “ebwe” to “kilumbu ya mbote.” Yo lenda tadila mpi kuyambana mpi masolo ya nda yina beto lenda ta kana beto mekutana ti nduku mosi. Yezu kulongisilaka balongoki na yandi na kubuya mambu ya kukonda mfunu yina lenda katula dikebi na bo mpi na kusadila ntangu na bo na mayele yonso. Yo lombaka nde bo samuna nsangu yango kukonda kusukinina.

Yindula kiteso ya ntangu yina mambu ya kekatulaka dikebi lenda baka. Banda bamvula mingi, bantu vandaka kulutisa ntangu na bo mingi ya kupema na kutalaka televizio. Ebuna, inki beto lenda tuba sambu na telefone mpi baordinatere ya maboko (PC)? Na bangyufula ya bo yulaka bambuta 1 000 ya Grande-Bretagne, yo monaka nde “na mwayene, bantu ya Grande-Bretagne kelutisaka minuta 88 konso kilumbu na kusolula na telefone ya nzo to ya biro, minuta 62 na kusolula na telefone ya maboko, minuta 53 na kutinda bansangu na Internet mpi minuta 22 na kutinda bansangu na telefone (SMS).” Na kimvuka ntalu ya bangunga ya bo kelutisaka meluta mbala zole ntalu ya bangunga yina mupasudi-nzila nsadisi mosi kelutisaka na kisalu ya kusamuna konso kilumbu! Bantangu ikwa nge kelutisaka na mambu yai?

Mpangi Ernst Seliger ti nkento na yandi Hildegard vandaka kusadila ntangu na bo na mayele yonso. Bo zole kulutisaka bamvula kuluta 40 na camp ya konsatrasio ya Nazi mpi na baboloko ya Bakoministe. Na nima ya kubasika na boloko, bo salaka bonso bapasudi-nzila tii na nsuka ya luzingu na bo awa na ntoto.

Bantu mingi vandaka kusonikila mpangi Seliger ti nkento na yandi mikanda. Katula kulala, bankwelani yina lendaka kusadila ntangu na bo mingi mpenza na kutanga mpi kusonika mikanda. Kansi, mambu ya kimpeve vandaka kubaka kisika ya ntete na luzingu na bo.

Ya kyeleka, beto yonso kesepelaka kusonikila bantu ya beto kezolaka to kusolula ti bo na telefone, mpi yo kele mbi ve na kusala mutindu yina. Kusoba na mutindu ya mefwana mambu ya beto kesalaka konso kilumbu kevandaka mbote. Ata mpidina, yo kele mbote nde beto yala bima yina kedyaka ntangu na kilumbu yai ya kusamuna nsangu ya mbote.

Beto Longa Mbote-Mbote Nsangu ya Mbote

Yo kele lusakumunu na kuzinga na “kilumbu mosi ya nsangu ya mbote.” Bika nde beto vila ve mambu ya beto fwete sala mutindu bantu iya ya maladi ya lepre kuvilaka na luyantiku. Kuvila ve nde bo sukisaka nde: “Beto me sala mbote ve.” Mutindu mosi, yo kele mbote ve nde beto bika nde bisalu na beto mosi to bima ya kedyaka ntangu kukanga beto nzila na kuvukana mingi na kisalu ya kusamuna.

Sambu na dyambu yai, beto kele na mbandu mosi ya mbote ya kulanda. Ntangu yandi vandaka kuyindula bamvula 20 ya kisalu na yandi, ntumwa Polo kusonikaka nde: “Mono vandaka kulonga [mbote-mbote, NW] nsangu ya mbote ya Kristo.” (Roma 15:19) Polo kupesaka ve nzila ata na kima mosi na kukulumusa kikesa na yandi. Bika beto vanda kikesa bonso yandi na ntangu beto kesamuna nsangu ya Kimfumu na kilumbu yai ya “nsangu ya mbote.”

[Kifwanisu ya kele na lutiti 31]

Blessing kubikaka ve nde mambu na yandi mosi kukanga yandi nzila ya kusala kisalu ya ntangu yonso

[Kifwanisu ya kele na lutiti 32]

Mpangi Seliger ti nkento na yandi vandaka kusadila ntangu na bo na mayele yonso