Dibundu ya Mbote Kesyamisaka Zola ya Kimpangi

BIBLIA ketuba nde: “Muntu yina ke zolaka bantu ya nkaka ve, yandi zaba Nzambi ve, sambu Nzambi ke zolaka bantu.” (1 Yoane 4:8) Yo yina, dibundu ya mbote fwete syamisa zola ya kimpangi.

Mabundu mingi kesalaka kisalu ya mbote ya kukeba bambefo, minunu, mpi bansukami. Yo kesyamisaka bantu na yo na kusadila ndongisila yai ya ntumwa Yoane: “Kana muntu kele mvwama, ebuna yandi me mona nde mpangi na yandi ke na kima ve kansi yandi me buya na kusadisa yandi, nki mutindu yandi lenda tuba nde yandi ke zolaka Nzambi? Bana na mono, beto kuzolana na munoko kaka ve, kansi beto fweti kuzolana na kuzolana ya kieleka yina ke monikaka na bisalu na beto.”​—1 Yoane 3:17, 18.

 Kansi, inki kesalamaka ntangu makanda kekwendaka na bitumba? Keti bantu fwete sadila nsiku ya Nzambi ya ‘kuzola bampangi na bo bonso bo mosi’ kaka na ntangu ya ngemba kansi ve ntangu muntu mosi ya politiki to ntotila mosi mepona na kunwanisa dikanda mosi ya kele na nzyunga na yandi?​—Matayo 22:39, Kuwakana ya Mpa.

Yezu kutubaka nde: “Kana beno ke zolana beno na beno, bantu yonso ta zaba nde beno kele balonguki na mono.” (Yoane 13:35) Ntangu nge kepesa bamvutu na bangyufula yai ya melanda, kudiyula nde, ‘Keti bantu ya dibundu yai kemonisilaka bantu yonso zola na ntangu yonso, na bangogo mpamba ve kansi mpi na mambu ya bo kesalaka?’

NTU-DYAMBU: Bitumba.

MAMBU YINA BIBLIA KELONGAKA: Yezu kupesaka balongoki na yandi ntuma yai: “Beno zola bambeni na beno, [beno] samba Nzambi sambu na bantu yina ke monisaka beno mpasi.”​—Matayo 5:44, Kuwakana ya Mpa.

Ntangu basoda kwisaka kukanga Yezu, ntumwa Piere kubasisaka kinwaninu sambu na kunwanina yandi. Kansi, Yezu kutubaka nde: “Vutula mbele na nge na kisika na yo, sambu bantu yina yonso ke sadilaka mbele bo ta fwa mpi na mbele.”​—Matayo 26:52.

Ntumwa Yoane kusonikaka nde: “Tala mutindu ya diswaswanu ke monikaka na kati ya bana ya Nzambi ti bana ya Satana: konso muntu yina ke salaka ve mambu ya Nzambi ke zolaka to ke zolaka mpangi na yandi ve, yandi kele mwana ya Nzambi ve. Yai kele mambu yina ya beno me waka katuka na luyantiku: Beto fweti zolana. Beto kusala ve mutindu Kaini salaka. Yandi vandaka muntu ya muntu ya mbi; yandi fwaka mpangi na yandi.”​—1 Yoane 3:10-12.

NGYUFULA: Keti dibundu yai kesyamisaka bantu na yo na kuvukana na bitumba?

NTU-DYAMBU: Mambu ya politiki.

MAMBU YINA BIBLIA KELONGAKA: Na nima ya kumona ngolo ya Yezu ya kusala bimangu, bantu yankaka kuzolaka nde yandi kota na mambu ya politiki ya bwala na bo. Yandi salaka inki? “Yesu zabaka nde bo zolaka kwisa kubaka yandi na ngolo sambu na kutula yandi ntotila. Yo yina yandi katukaka pana, yandi kwendaka yandi mosi na ndambu ya bangumba.”​—Yoane 6:15.

Ntangu bo kangaka Yezu mpi bo kusilaka yandi makambu nde yandi vandaka kupusa bantu na kukolama na bamfumu, yandi vutulaka nde: “Kimfumu na mono kele ya nsi-ntoto yai ve; kana kimfumu na mono vandaka ya nsi-ntoto yai, bantu na mono zolaka kwisa kunwana sambu bantu ya nkaka kupesa mono na maboko ya Bayuda ve. Kimfumu na mono kele ya nsi-ntoto yai ve.”​—Yoane 18:36.

Ntangu Yezu kusambaka Nzambi sambu na balongoki na yandi, yandi tubaka nde: “Mono me pesaka bo malongi na nge, ebuna bantu ya nsi-ntoto yai mengaka bo, sambu bo kele bantu ya nsi-ntoto yai ve, mutindu mono mpi kele muntu ya nsi-ntoto yai ve.”​—Yoane 17:14.

 NGYUFULA: Keti dibundu yai kelandaka mbandu ya Yezu mpi kebuyaka kukota na mambu ya politiki, ata yo ketendula nde bantu yankaka ya politiki tamenga bantu ya dibundu yango?

NTU-DYAMBU: Kumenga bantu yankaka.

MAMBU YINA BIBLIA KELONGAKA: Ntangu Mimpani ya ntete ya kukonda kuyotisa kukumaka Bakristu, ntumwa Piere kutubaka na nima nde: “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.”​—Bisalu 10:34, 35.

Ntangu yandi sonikilaka Bakristu ya mvu-nkama ya ntete, Yakobo kutubaka nde: “Bampangi na mono, mutindu beno ke tulaka ntima na Mfumu na beto ya lukumu Yesu Kristo, beno fweti baka bantu yonso kiteso mosi. Mumbandu: Kana mvwama mosi me lwata lupeto ya wolo ti bilele ya kitoko mpenza, yandi kwisa kota ntangu beno ke samba, ebuna nsukami mosi ti bilele ya kufwa kwisa kota mpi; kana beno luta zitisa muntu yina me Iwata bilele ya kitoko, ebuna muntu mosi na kati na beno kutubila yandi nde: ‘Kwisa kuvanda awa na kisika yai ya lukumu’, kansi yandi tuba na nsukami nde: ‘Nge, telama awa to vanda awa na ntoto na nsi ya makulu na mono’, na ntangu yina, keti beno ke baka bantu yonso kiteso mosi? Ve, mabanza ya mbi kima ke pusa beno na kusola bantu.”​—Yakobo 2:1-4.

NGYUFULA: Keti dibundu yai kelongaka nde bantu yonso kele kiteso mosi na meso ya Nzambi mpi bantu na yo fwete menga ve konso muntu yina sambu na mpusu ya nitu to sambu yandi kele nsukami to mvwama?

[Bangogo sambu na kubenda dikebi ya kele na lutiti 7]

Inki dibundu kelongaka bantu na yo na kununga mambu ya kekabulaka bantu na yina metala politiki, mpusu ya nitu, to mbongo?