Bangyufula ya Batangi

Inki dilongi Bingana 24:27 kepesa?

Ntangu yandi pesaka ndongisila na leke mosi ya bakala, nsoniki ya Bingana kutubaka nde: “Yidika ntete mbote-mbote kisalu na nge, bongisa bilanga na nge, ebuna nge ta tunga nzo na nge.” Kingana yai ya kupemama kezola kutuba inki? Nde bakala fwete kudibongisa mbotembote na ntwala nde yandi kwela mpi kusala dibuta na yandi, mpi yandi fwete zaba mikumba yina lusilu ya mutindu yai kenataka.

Ntetentete, sambu na kutendula verse yai, beto vandaka kutuba bantangu yankaka nde bakala mpi tata fwete sala kisalu na yandi ya kinsuni kaka ve, kansi yandi fwete sala mpi sambu na kutunga, to kusyamisa, dibuta na yandi, mu mbandu na kulongaka dibuta na yandi malongi ya kimpeve. Ata ngindu yina kele mpenza ya kyeleka mpi mesimbama na Masonuku, yo kemonana bonso nde yo kele ve ngindu ya ntetentete ya verse yai. Sambu na inki ve? Beto tadila bikuma zole.

Ya ntete, verse yai ketubila ve kutunga ti dibanza ya kusyamisa, to kupesa kikesa, na dibuta mosi ya bo mesalaka dezia. Kansi, ngindu na yo kele ya kutunga nzo ya kyeleka. Bo lenda sadila mpi ngogo ya bo mebalula ‘kutunga’ na mutindu ya kifwani, ti dibanza ya kutunga, to kusala nzo, disongidila kukwela mpi kubuta bana.

Ya zole, verse kebenda dikebi na kusala mambu na ndonga ya mbote, bonso sambu na kutuba, “Ntete sala dyambu yai; na nima nge tasala dyambu yai yankaka.” Keti yo lenda vanda nde kingana yai kepesa ngindu nde beto fwete lungisa mikumba na beto ya kinsuni na ntwala ya mikumba ya kimpeve? Mpidina ve!

Na ntangu ya ntama, kana muntu kezola ‘kutunga nzo na yandi,’ to kukwela sambu na kusala dibuta, yo vandaka kulomba nde yandi kudiyula, ‘Keti mu ke ya kuyilama na kukeba mpi kulungisa bampusa ya nkento ti bana yina beto lenda buta na nima?’ Na ntwala ya kusala dibuta, yandi vandaka ti kisalu ya kusala, kukeba bilanga na yandi to bimenina. Yo yina, mbalula mosi (Today’s English Version) kebalulaka verse yai pwelele nde: “Kutunga ve nzo na nge mpi kusala ve dibuta tii kuna nge takuma penepene ya kukatula bambuma na bilanga na nge, mpi nge tamona nde nge lenda zwa bima ya kuzingila.” Keti munsiku yai ketadila beto mpi bubu yai?

Ee. Bakala yina kezola kukwela fwete kudibongisa mbotembote sambu na mukumba yina. Kana nitu na yandi kepesa yandi nzila, yo talomba nde yandi sala kisalu. Ya kyeleka, kisalu ya ngolo yina bakala kesala sambu na kukeba dibuta na yandi fwete suka kaka ve na mambu ya kinsuni. Ndinga ya Nzambi kemonisa nde bakala yina kelungisa ve bampusa ya kinsuni, ya mawi, mpi ya kimpeve ya dibuta na yandi meluta nkutu mumpani na mbi! (1 Tim. 5:8) Yo yina, ntangu yandi keyilama sambu na kukwela mpi sambu na luzingu ya dibuta, leke ya bakala fwete kudiyula bangyufula ya mutindu yai: ‘Keti mu ke ya kuyilama mbote sambu na kulungisa bampusa ya kinsuni ya dibuta? Keti mu ke ya kuyilama sambu na kuvanda mfumu ya kimpeve ya nzo na mono? Keti mu talungisa mukumba ya kutwadisa mbala na mbala kulonguka ya Biblia ti nkento mpi bana na mono?’ Ndinga ya Nzambi kebenda mpenza dikebi na mikumba yina ya mfunu.​—Kul. 6:6-8; Ef. 6:4.

Yo yina, leke ya bakala yina kesosa nkento fwete yindula mbotembote na yina metala munsiku yina kele na Bingana 24:27. Mutindu mosi, leke ya nkento fwete kudiyula kana yandi kele ya kuyilama sambu na mikumba ya kuvanda nkento ya makwela mpi mama. Bantu ya mekwelana ntama mingi ve lenda kudiyula bangyufula ya mutindu mosi kana bo kezola kubuta bana. (Luka 14:28) Kuzinga na kuwakana ti lutwadisu ya kupemama ya mutindu yai lenda sadisa bantu ya Nzambi na kubuya bampasi mpi kuvanda ti luzingu ya dibuta ya kyese.

[Bangogo sambu na kubenda dikebi ya kele na lutiti 10]

Inki bangyufula leke ya bakala fwete kudiyula na yina metala makwela?