Keti Beno Metulaka Ntangu Sambu na Kulonguka ya Biblia?

NA MVULA meluta, Nto-Kimvuka kuzabisaka nsoba mosi ya bo salaka na manaka ya balukutakanu ya dibundu yina kebika ntangu mingi sambu na kulonguka ya Biblia mpi masolo na kati ya dibuta. Kana nge kele mfumu ya dibuta, sala yonso na kulonguka mbala na mbala Biblia na dibuta ti nkento mpi bana na nge mpi twadisa yo na mutindu ya mefwana. Bankwelani yina kele na bana ve tasadila ntangu yina sambu na kulonguka Biblia kumosi. Bampangi ya babakala ti ya bankento ya mekwelaka ve mpi ya kele ve ti mikumba ya dibuta takuka kusadila ntangu yai mbote sambu na kulonguka na bo mosi ya Biblia.

Bantu mingi kumonisaka ntonda sambu na ngidika ya kuvanda ti nkokila ya Lusambu ya Dibuta. Mu mbandu, nkuluntu mosi na zina ya Kevin kusonikaka nde: “Ngogo ‘mersi’ kele ve ti ngolo ya kufwana sambu na kumonisa mutindu beto kekudiwa na dibundu. Bonso bankuluntu, beto tadilaka mutindu ya kusadila nkokila yina beto kele ve ti lukutakanu sambu na kusala mambu kaka mutindu Nto-Kimvuka kulombaka, disongidila kulonguka ti mabuta na beto.”

Jodi, nkento ya nkuluntu mosi, kusonikaka nde: “Beto kele ti bana tatu ya bankento, ya kele ti bamvula 15, 11, mpi 2. Beto mekatuka kukwenda ntama mingi ve na dibundu ya ndinga ya bidimbu. Yo kelombaka ntangu mpi bikesa mingi sambu na kuyidika balukutakanu yonso. Ntangu yai, ti nsoba yai, beto kele ti nkokila ya ngika yina kesadisa beto na kutula dikebi na lusambu ya dibuta!”

John ti JoAnn, bankwelani yina kesalaka bonso bapasudi-nzila ya ntangu yonso, kusonikaka nde: “Mbala mingi, kulonguka na beto ya Biblia vandaka kusalama ve mbala na mbala sambu yo vandaka kulomba nde beto sala yo na kati ya bisalu mingi ya dibundu. Ngidika yai ya mpa kele dikabu ya mekatuka na Yehowa yina kepesa beto ngolo na kimpeve, kaka kana beto sadila ntangu na mutindu yo kelomba nde beto sadila yo.”

Tony, mpangi-bakala ya bamvula 25 ya mekwelaka ve, metulaka na lweka nkokila ya Kizole sambu na kulonguka na yandi ya nkokila. Yandi kesadilaka bantangu yankaka ya mposo sambu na kuyidika balukutakanu ya dibundu. Kansi, Tony ketuba nde: “Mu kevingilaka mingimingi Kizole.” Sambu na nki? Tony ketendula nde: “Nkokila yina kele ntangu na mono ya sipesiali ti Yehowa. Kiteso ya bangunga zole, mono kelongukaka masolo yina kekumisaka ngolo bangwisana na mono ti Yehowa. Kuvanda ti ntangu mingi sambu na kulonguka kesadisaka mono na kuyindulula baverse ya Biblia yina mu ketanga.” Inki mbumba yo kebutaka? “Bandongisila ya Yehowa kekota ngolo mpenza na ntima na mono kuluta na ntwala.” Keti yandi lenda pesa mbandu mosi? “Na mukanda Étude perspicace, mu tangaka mambu ya metala kinduku ya Davidi ti Yonatani. Mu longukaka mambu mingi na kikalulu ya kuditambika ya Yonatani. Mbandu na yandi kusadisaka mono na kubakisa pwelele nki yo ketendula kuvanda nduku ya masonga. Mu kevingilaka mpenza na kusengumuna matadi ya ntalu ya mutindu yai na bankokila ya Kizole!”

Ntembe kele ve nde, bansadi yonso ya Yehowa tabaka mambote mingi kana bo kesadila mbote ntangu ya ngika yina bo mebikila beto ntangu yai sambu na kulonguka ya Biblia mpi lusambu ya dibuta ya mefwana.