Kimvwama Yina Kekatukaka na Nzambi

KANA nge kele ya kwikama na Nzambi, keti yandi tasakumuna nge na kupesaka nge kimvwama? Ziku, kansi mbala yankaka kimvwama ya mutindu yina nge kevingila ve. Beto tadila mbandu ya Maria, mama ya Yezu. Wanzyo Gabriele kumonanaka na yandi mpi kuzabisaka yandi nde Nzambi ‘talaka yandi na disu ya mbote’ mpi nde yandi zolaka kubuta Mwana ya Nzambi. (Luka 1:28, 30-32) Ata mpidina, yandi vandaka ve mvwama. Ntangu Maria kupesaka kimenga na nima ya lubutuku ya Yezu, yandi pesaka “bapizio zole ya fioti, to bana zole ya bapizio ya nene,” kimenga yina bansukami vandaka kupesa na Yehowa.​—Luka 2:24; Levi 12:7, 8.

Keti mutindu Maria kuvandaka nsukami kemonisa nde Nzambi kusakumunaka yandi ve? Ntangu yandi kwendaka kutala mpangi na yandi Elizabeti, “Elizabeti fulukaka na mpeve ya Nzambi, ebuna yandi tubaka na ndinga ya ngolo nde: ‘Nzambi me sakumuna nge [Maria] kuluta bankento ya nkaka; yandi me sakumuna mpi mwana yina ya nge ta buta!’” (Luka 1:41, 42) Maria kuvandaka ti dibaku ya mbote ya kukuma mama ya Mwana ya Nzambi, mwana yina ya Nzambi kezolaka mingi.

Yezu yandi mosi kuvandaka ve mvwama. Yandi butukaka na kisika ya kinsukami, kusansamaka na bibuti yina vandaka bansukami, mpi yandi vandaka nsukami na luzingu na yandi ya mvimba awa na ntoto. Kilumbu mosi, yandi zabisaka bakala mosi yina vandaka kusosa kukuma longoki na yandi nde: “Bamikengi ke na mabulu na bo sambu na kulala, bandeke ke na babuyamba na bo, kansi Mwana-muntu ke na kisika ve ya yandi lenda kwenda kulala.” (Luka 9:57, 58) Ata mpidina, mambu yina Yezu Kristu kusalaka na mutindu yandi kwisaka na ntoto kusadisaka sambu balongoki na yandi kukuma ti kimvwama ya nene. Ntumwa Polo kusonikaka nde: “Yandi kumaka nsukami sambu na beno na mpila nde na kinsukami na yandi, beno kuma bamvwama.” (2 Korinto 8:9) Kimvwama ya nki mutindu Yezu kupesaka balongoki na yandi? Mpi nki beto lenda tuba sambu na beto bubu yai?

Kimvwama ya Nki Mutindu?

Mbala mingi, kimvwama ya kinsuni kekangaka bantu nzila na kuvanda ti lukwikilu, sambu mvwama lenda tula ntima na mbongo na yandi na kisika ya kutula ntima na Nzambi. Yezu kutubaka nde: “Mpasi mingi na bamvwama na kukota na Kimfumu ya Nzambi!” (Marko 10:23) Yo yina, yo ke pwelele nde kimvwama yina Yezu kupesaka balongoki na yandi kuvandaka ve ya kinsuni.

Ya kyeleka, Bakristu mingi ya mvu-nkama ya ntete kuvandaka bansukami. Ntangu muntu mosi yina butukaka na makulu ya kifu kulombaka bantumwa mbongo, Piere kuvutulaka nde: “Mono ke na mbongo ve, kansi mono ke pesa nge kima mosi ya mono ke na yo: na zina ya Yesu Kristo, muntu ya Nazareti, tambula ka nge.”​—Bisalu 3:6.

Bangogo ya longoki Yakobo kemonisa mpi nde bantu mingi ya dibundu ya Bukristu kuvandaka bansukami. Yandi sonikaka nde: “Bampangi na mono ya mono ke zolaka, beno wa mambu yai: Nzambi me solaka bansukami ya nsi-ntoto yai sambu bo vanda bamvwama na mambu ya lukwikilu, mpi nde bo vanda bantu ya Kimfumu na yandi yina ya yandi me silaka na bantu yina ke zolaka yandi.” (Yakobo 2:5) Dyaka, ntumwa Polo kutubaka mpi nde Nzambi bingaka bantu fioti  mpamba “ya mayele” to “ya ngolo” to “ya nene na luzingu ya kimuntu” sambu na kuvanda bantu ya dibundu ya Bukristu.​—1 Korinto 1:26.

Kana kimvwama yina Yezu kupesaka balongoki na yandi kuvandaka ve ya kinsuni, yandi pesaka bo kimvwama ya nki mutindu? Na mukanda yina Yezu kutindilaka dibundu ya Simirne, yandi tubaka nde: “Mono zaba mpasi na nge; mono zaba kinsukami na nge, kansi ya kieleka nge kele mvwama.” (Kusonga 2:8, 9) Ata Bakristu ya Simirne kuvandaka bansukami, bo vandaka ti kimvwama ya mfunu mingi kuluta arza to wolo. Bo vandaka bamvwama sambu na lukwikilu mpi kwikama na bo na Nzambi. Lukwikilu kele mfunu mingi sambu “bantu yonso ve” kevandaka na yo. (2 Tesalonika 3:2) Bantu yina kele ve na lukwikilu kele mpenza bansukami na meso ya Nzambi.​—Kusonga 3:17, 18.

Kimvwama Yina Kekatukaka na Lukwikilu

Kansi, na nki mitindu lukwikilu kele mfunu mingi? Bantu yina kekwikilaka na Nzambi kebakaka mambote na ‘mawa na yandi, na mambote na yandi, mpi na kukanga ntima na yandi.’ (Roma 2:4) “Nzambi me lolulaka” mpi bifu na bo sambu bo kekwikilaka na kimenga ya nkudulu ya Yezu. (Efezo 1:7) Dyaka, bo kele ti mayele yina “nsangu ya Kristo” kenatilaka bantu yina kevandaka ti lukwikilu. (Kolosai 3:16) Ntangu bo kesambaka Nzambi na lukwikilu, “ngemba ya Nzambi, ngemba yina me luta mambu yonso ya bantu ke yindulaka” kekebaka ntima mpi mabanza na bo, mpi kenatilaka bo kyese mpenza.​—Filipi 4:7.

Katula mambote yai yonso, bantu yina kekwikilaka na Nzambi na nzila ya Mwana na yandi, Yezu Kristu, kele ti kivuvu ya kitoko ya luzingu ya mvula na mvula. Bangogo yai ya  Yezu mezabanaka mingi: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Kivuvu yina ya kitoko kekumaka ngolo ntangu muntu kebakaka nzayilu ya sikisiki ya Tata mpi ya Mwana, sambu Yezu kutubaka mpi nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.”​—Yoane 17:3.

Ata balusakumunu ya Nzambi kevandaka mbala mingi ya kimpeve, yo kenataka mpi mambote ya mawi mpi ya kinsuni. Beto tadila mbandu ya Dalídio, ya kezingaka na Brésil. Na ntwala ya kubaka nzayilu ya sikisiki ya lukanu ya Nzambi, yandi vandaka kulutisa ndilu na kunwa malafu. Yo vandaka na bupusi ya mbi na bangwisana ya dibuta na yandi. Dyaka, yandi vandaka kusadila ve mbongo na yandi mbote. Na nima yandi yantikaka kulonguka Biblia ti Bambangi ya Yehowa mpi kusalaka bansoba ya nene mpenza.

Mambu yina Dalídio kulongukaka na Biblia kusadisaka yandi na kuyambula bikalulu na yandi ya mbi. Yandi yelaka mingi mpenza na kimpeve, yo yina yandi tubaka nde, “Mu vandaka kukwenda bar na bar; ntangu yai mu kekwendaka nzo na nzo.” Yandi mekumaka ministre ya ntangu yonso ya Ndinga ya Nzambi. Bansoba yina kutomisaka mavimpi na yandi mpi mutindu na yandi ya kusadila mbongo. Dalídio kutubaka nde, “Ntangu yai, mu kesadilaka mbongo yina mu vandaka kuyonika na kunwa malafu sambu na kusadisa bantu yina kele na mpasi to sambu na kusumba bima yina mu ke na yo mfunu.” Kuvukana na yandi ti bantu yina kele ti mabanza ya kimpeve ya mutindu mosi ti ya yandi, mesadisaka yandi na kukuma ti banduku mingi ya kyeleka. Dalídio kele ntangu yai ti ngemba ya mabanza mpi kyese yina meluta konso kima yina yandi lendaka kuyindula na ntwala ya kuzaba Nzambi.

Mbandu yankaka ya muntu yina luzingu na yandi kutomaka sambu yandi yedisaka lukwikilu na Yehowa Nzambi kele Renato. Kana nge tala luse na yandi ya kyese-kyese bubu yai, yo kele mpasi na kundima nde yandi vandaka ti bikuma mingi ya kuyindula nde bo sadilaka yandi mambu kukonda lunungu na luzingu na yandi. Ntangu yandi vandaka bebe, mama na yandi kulosaka yandi. Bo bikaka yandi na kati ya saki mosi na nsi ya ban, yandi lwala-lwalaka mpi mutolo na yandi kuvandaka ve ya kuzenga. Bankento zole kulutaka pana mpi kumonaka saki yango kenikana na nsi ya ban. Na luyantiku bo yindulaka nde muntu mosi kuyambulaka kamwana pusu na kati. Ntangu bo monaka nde yo vandaka mwana yina katukaka kubutuka, bo nataka yandi mbala mosi na lupitalu mosi ya mfinama sambu yandi baka lusansu.

Nkento mosi na kati ya bankento yina kuvandaka Mbangi ya Yehowa, mpi yandi telaka Rita, yina vandaka mpi Mbangi, disolo ya bebe yina. Rita kubutaka bana mingi ya kufwa, mpi yandi vandaka kaka ti mwana mosi ya nkento. Yandi vandaka na mpusa mingi ya mwana-bakala, yo yina yandi bakaka lukanu ya kukumisa Renato mwana na yandi.

Ntangu Renato vandaka mwana ya fyoti, Rita kuzabisaka yandi nde yandi vandaka ve mama na yandi ya kyeleka. Kansi yandi vandaka kukeba Renato ti zola mpenza mpi kusalaka ngolo sambu na kulonga yandi minsiku ya kimpeve. Ntangu yandi vandaka kuyela, yandi yantikaka kusepela na Biblia. Ntonda na yandi sambu na mutindu ya kuyituka  yina bo megulusaka yandi kukumaka mpi mingi. Meso na yandi kefulukaka ti mansanga konso ntangu ya yandi ketangaka bangogo yai ya muyimbi-bankunga Davidi: “Tata na mono ti mama na mono bo lenda buya mono, kansi nge Mfumu Nzambi, nge ta baka mono.”​—Nkunga 27:10.

Sambu na kumonisa ntonda na yandi na mambu yonso yina Yehowa mesalaka sambu na yandi, Renato kubakaka mbotika na mvu 2002 mpi kukumaka ministre ya Mukristu ya ntangu yonso na mvula yina kulandaka. Tii bubu yai yandi kezabaka ve tata ti mama na yandi ya kyeleka, mpi mbala yankaka yandi tazabaka bo ve. Kansi, Renato keyindula nde mosi na kati ya makabu ya kuluta mfunu yina yandi mebakaka kele kuzaba mpi kukwikila na Yehowa bonso Tata na yandi ya zola mpi ya kekebaka.

Ziku nge kezolaka kuvanda ti bangwisana ya ngolo mpi ya zola ti Nzambi, dyambu yina lenda tomisa mpenza luzingu na nge. Bantu yonso, yo vanda bamvwama to bansukami, kele ti dibaku ya kuvanda na bangwisana ya mutindu yina ti Yehowa Nzambi mpi Mwana na yandi, Yezu Kristu. Ziku yo tanatila nge ve kimvwama ya kinsuni kansi yo tapesa nge ngemba ya ntima mpi kyese yina mbongo yonso ya nsi-ntoto lenda sumba ve. Bangogo yai ya kele na Bingana 10:22 kele ya kyeleka mpenza: “Lusakumunu ya Yehowa kele kima ya kekumisaka muntu mvwama, yandi keyikaka ve ata mpasi mosi ti yo.”​—NW.

Yehowa Nzambi ketulaka dikebi mingi na bantu yina kekwendaka na yandi: “Kana nge landaka bansiku na mono mbote-mbote, nge zolaka kuvanda na ngemba kimakulu, nge zolaka kununga mpenza; yo zolaka kuvanda bonso masa ke luta mingi, yo ke yuma ve.” (Yezaya 48:18) Mpi yandi kesila nde bantu yina kekwendaka na yandi ti bikuma mpi mabanza ya mbote tabaka balusakumunu mingi: “Zitisa Mfumu Nzambi, kudikulumusa, ebuna nge ta kuma mvwama, nge ta baka lukumu, nge ta vanda mpi na luzingu ya nda.”​—Bingana 22:4.

[Bangogo sambu na kubenda dikebi ya kele na lutiti 6]

Lukwikilu na Nzambi kenataka ngemba mpi kyese

[Kifwanisu ya kele na lutiti 5]

Ata dibuta ya Yezu ya kinsuni kuvandaka bansukami, Nzambi kusakumunaka bo mingi