Lusambu ya Dibuta Kele Mfunu Sambu na Luguluku!

“BITUMBA ya kilumbu ya nene ya Nzambi” tapesa boma mingi mpenza! (Kus. 16:14) Na kutuba ya kifwani ya kebenda dikebi, profete Mika kusonikaka nde: “Bangumba, yo ta kuma bonso masa . . . , mabengi ta kuma diaka nene bonso ntangu masa ya mvula ke kulumuka na ngumba.” (Mis. 1:4) Inki mpasi tabwila bantu yina kesadilaka ve Yehowa? Ndinga ya Nzambi ketuba nde: “Bamvumbi ya bantu yina ya Mfumu Nzambi ta fwa, bo ta panzana-panzana na bisika yonso na nsi-ntoto.”​—Yer. 25:33.

Na kutadilaka balukebisu ya mutindu yai, bamfumu ya mabuta​—yina mingi na kati na bo kesansaka bana bo mosi—​fwete kudiyula sambu na bana na bo yina kele ti makuki ya kuyindula nde, ‘Keti bo taguluka na dyambu yai ya mpasi?’ Biblia kendimisa nde bo taguluka kana bo kele ya kusikama mpi ngolo na kimpeve na kiteso yina mefwana na mvula na bo.​—Mat. 24:21.

Mfunu ya Kuvanda ti Ntangu Sambu na Lusambu ya Dibuta

Bonso kibuti, nge fwete zikisa nde nge kesalaka yonso yina nge lenda sala sambu na kusansa bana na nge “na malongi mpi balukebisu ya Yehowa.” (Ef. 6:4, NW) Yo kele mfunu mingi na kulonguka Biblia ti bana na nge. Beto kezola nde baleke na beto kuvanda bonso Bakristu ya Filipi, yina Polo kusikisaka sambu bo lemfukilaka Yehowa na luzolo yonso. Yandi sonikaka nde: “Beno banduku na mono, ntangu mono vandaka kuna na beno, beno vandaka kuwila mono konso ntangu. Kansi kuluta mfunu beno na kuwila mono mpi ntangu yai ya mono kele kuna na beno ve. Kana beno zola kuguluka, beno fweti landa kaka na kusala kisalu ya Nzambi na boma ti na matekita.”​—Filp. 2:12.

Keti bana na nge kelemfukilaka bansiku ya Yehowa na ntangu nge kevandaka ve kumosi ti bo? Inki mutindu bo kesalaka mambu na nzo-nkanda? Inki mutindu nge lenda sadisa bana na nge na kubasisa mayele ya bansiku ya Yehowa na mpila nde yo twadisa bo ata nge kele ve kumosi ti bo?

Lusambu ya dibuta lenda sadisa mingi mpenza na kutunga lukwikilu ya mwana na nge na dyambu yai. Yo yina, bika beto tadila mambu tatu ya mfunu yina lenda sala nde kulonguka ya Biblia ya dibuta na nge kununga.

Beno Sala Yo Mbala na Mbala

Biblia kemonisa nde bana ya Nzambi yina kele bawanzyo kekwendaka kumonika na meso na yandi na ntangu mosi ya sikisiki. (Yobi 1:6) Sala mutindu mosi ti bana na nge. Tula kilumbu mpi ntangu mosi ya sikisiki sambu na nkokila ya Lusambu ya Dibuta, mpi zitisa yo. Dyaka, tula ntangu yankaka ya sikisiki yina beno lenda sadila kana mambu ya kukonda kukana kubasika.

Mutindu bangonda keluta, beno kotisa ve kikalulu ya kukonda kusala kulonguka na beno ya dibuta. Beno vila ve nde bana na beno kele balongoki na beno ya Biblia ya kuluta mfunu. Kansi, Satana tazola kudya bo. (1 Pie. 5:8) Kana beno sala ve Lusambu ya Dibuta yai ya mfunu sambu na kutala televizio to sambu na kusala kisalu yankaka ya kukonda mfunu, yo tamonana bonso nde Satana menunga.​—Ef. 5:15, 16; 6:12; Filp. 1:10.

Beno Tubilaka Mambu ya Mfunu

Nkokila ya Lusambu ya Dibuta fwete vanda ve kaka ntangu sambu na kulonguka mambu. Beno sala ngolo na kutubila mambu ya mfunu. Inki mutindu? Bantangu yankaka, beno pona bantu-dyambu yina ketubila mambu yina mwana na beno takutana na yo na bilumbu to na bamposo ya kekwisa. Mu mbandu, sambu na nki ve kusala bansonga ya kemonisa mutindu ya kusala kisalu ya kusamuna? Baleke kesepelaka kusala mambu yina bo kesalaka mbote. Kuvutukila bansonga mpi kuyindula mitindu ya kununga bantembe tasadisa bo na kuyedisa kikalulu ya kutula ntima na ntangu bo kesala mitindu ya  kuswaswana ya kisalu ya kusamuna Kimfumu.​—2 Tim. 2:15.

Beno lenda sala mpi bansonga yina tasadisa bana na beno na kunwana ti bupusi ya banduku. Beno lenda sadila kapu 15 ya mukanda Les jeunes s’interrogent ​— Réponses pratiques, Buku 2, na ntangu ya kulonguka na beno ya dibuta. Ntu-dyambu “Contre la pression du groupe” yina kele na balutiti 132 mpi 133 kepesa bangindu mpi kepesa dyaka mwana na beno mabaku ya kuyidika bamvutu yina yandi lenda pesa. Nsa mosi ya kele na nsuka ya lutiti 133 kesyamisa baleke nde: “Entraînez-vous avec votre père, votre mère ou un(e) ami(e) mûr(e).” Sambu na nki ve kuvutukila bamvutu yai mbala na mbala na nkokila ya Lusambu ya Dibuta na beno?

Lusambu ya dibuta kepesaka bibuti dibaku ya kumonisa mfunu ya kuvanda na balukanu ya kimpeve. Sambu na dyambu yai, mukanda Les jeunes s’interrogent, Buku 2, kele ti malongi ya mfunu na kapu 38, ya kele na ntu-dyambu “Que vais-je faire de ma vie ?” Na ntangu beno ketubila kapu yai, beno sadisa mwana na beno na kubakisa nde kutula lusambu ya Yehowa na kisika ya ntete na luzingu kele dyambu ya kuluta mfunu. Beno yedisa na ntima ya mwana na beno mpusa ya kuvanda mupasudi-nzila, ya kusala na Betele, ya kukota Nzo-Nkanda Yina Kelongaka Mutindu ya Kusala Kisalu, to ya kusala mutindu yankaka ya kisalu ya ntangu yonso.

Kansi beno keba: Bibuti yankaka ya kevandaka ti bangindu ya mbote ketulaka dikebi mingi na mambu yina bo kezolaka nde mwana na bo kusala mpi bo kevilaka kundima mambu yina yandi kesalaka dezia. Ya kyeleka, yo kele mbote na kusyamisa bana na beno na kuditudila balukanu bonso kusala na Betele mpi kisalu ya kimisionere. Kansi, na kusalaka mutindu yina, beno sala keba na kusimbisa ve mwana na beno makasi ti mambu yina beno kevingila nde yandi sala mpi kusala nde yandi vanda na kikesa diaka ve. (Kol. 3:21) Beno yibukaka ntangu yonso nde mwana na beno ya bakala to ya nkento fwete zola Yehowa ti ntima na yandi mosi, kansi ti ntima na beno ve. (Mat. 22:37) Yo yina, beno sosa mitindu ya kusikisa mwana na beno sambu na mambu yina yandi kesala mbote, mpi beno nwana ti mpusa ya kutula kaka dikebi na mambu yina yandi kesala ve. Beno yedisa ntonda sambu na mambu yonso yina Yehowa mesalaka. Ebuna, beno bika nde ntima ya mwana na beno kumonisa ntonda sambu na mambote ya Yehowa.

Beno Sala nde Yo Vanda ya Kyese

Dyambu ya tatu ya mfunu sambu nkokila ya Lusambu ya Dibuta kuvanda ya mbote kele kusala na mpila nde yo vanda ya kyese. Inki mutindu beno lenda sala yo? Ziku bantangu yankaka beno lenda widikila drame mosi to kutala mpi kutubila mosi ya bavideo yina Bambangi ya Yehowa mebasisaka. To beno lenda tanga kitini mosi ya Biblia kumosi, mpi kupesa konso muntu ya dibuta kitini mosi.

Nzozulu ya Nkengi mpi Réveillez-vous ! kevandaka ti masolo yina beno lenda sadila sambu na kulonguka ya dibuta. Mu mbandu, beno lenda sadila disolo yina kebasikaka na lutiti 31 ya konso Réveillez-vous ! ya kevandaka ti ntu-dyambu “Que répondriez-vous ?” Na nima ya nimero mosi, nimero ya bantu yonso ya Nzozulu ya Nkengi kevandaka ti disolo sambu na kulonguka ya kele ti ntu-dyambu “Pour nos jeunes lecteurs.” Masolo yai kesobanaka ti masolo ya kelandanaka ya ketadilaka  baleke ya babakala ti ya bankento ya kele ti ntu-dyambu “Beno Longa Bana na Beno.”

Masolo ya kelandana na Réveillez-vous ! ya kele ti ntu-dyambu “Les jeunes s’interrogent” mpi mukanda Les jeunes s’interrogent, Buku 2, tasepedisa mingimingi bibuti yina kele ti bana ya baleke. Na ntangu beno kesadila mukanda yina, beno vila ve lupangu “Qu’en pensez-vous ?” yina kevandaka na nsuka ya konso kapu. Lupangu yina kele kaka ve sambu na mvutukila. Beno lenda sadila bangyufula yina kele na lupangu yina bonso bantu-dyambu ya kulonguka na dibuta.

Kansi, beno keba na kuyula ve bangyufula kuluta mingi na ntangu ya kulonguka ya dibuta. Mu mbandu, beno pusa ve mwana na beno na kutanga na ndinga ya ngolo mambu yina yandi sonikaka na balutiti “Mon journal” to na bitini yankaka yina mwana kesolula yandi mosi ti mukanda. Na “Note aux parents,” mukanda ketuba na lutiti 3 nde: “Sambu na kusyamisa bana na beno ya batoko na kusonika na kati ya mikanda na bo na masonga yonso, beno pesa bo nzila ya kuvanda ti mwa kinsweki na luzingu na bo. Na nima, bo lenda kuka kukangudila beno ntima na yina metala mambu ya bo sonikaka.”

Kana beno landa na kusala lusambu ya dibuta mbala na mbala, kana beno ketubila mambu ya mfunu, mpi kana beno kesala nde yo vanda ya kyese, Yehowa tasakumuna mingi mpenza bikesa na beno. Ntangu yai ya beno metulaka sambu na dibuta tasadisa beno na kutanina bantu yina beno kezolaka na kuvanda ya kusikama mpi ngolo na kimpeve.

[Lupangu ya kele na lutiti 31]

Beno Sosaka Mambu ya Mpa

“Ntangu beto vandaka kulonguka ti bana na beto ya bankento, bakala na mono ti mono beto vandaka kutubila masolo sambu na kuyidika lukutakanu mosi ya dibundu mpi na nima beto vandaka kulomba bana na beto na kusala kifwanisu mosi yina vandaka kumonisa dilongi yango na bunkufi. Bantangu yankaka beto vandaka kuvutukila bansonga ya mambu yina Biblia ketubilaka to kusala bansonga ya kemonisa mutindu ya kuyantika masolo na kisalu ya bilanga. Beto vandaka kusala na mpila nde kulonguka kuwakana ti bamvula na bo, yo benda dikebi, yo vanda ti bangindu ya mbote, mpi yo sepedisa bo.”​—J.M., États-Unis.

“Sambu na kusadisa mwana ya longoki na mono ya Biblia na kubakisa nki yo vandaka kulomba sambu na kusadila rulo ya Biblia na ntangu ya ntama, beto nyemaka mukanda ya Yezaya na nima ya kukatula bantalu ya bakapu mpi ya baverse. Beto vukisaka balutiti mpi kukangisaka konso nsuka na tiyo mosi. Na nima, mwana kumekaka kusala mambu yina Yezu kusalaka na sinagoga ya Nazareti. Disolo yina kele na Luka 4:16-21 ketuba nde Yezu ‘kangulaka [rulo ya Yezaya], ebuna yandi monaka’ kitini yina yandi vandaka kusosa. (Yez. 61:1, 2) Kansi, ntangu mwana-bakala kumekaka na kusala mutindu mosi, yandi monaka mpasi na kuzwa Yezaya 61 na kusadilaka rulo yina ya nda ya kukonda kapu mpi verse. Mwana-bakala yina kuyitukaka na mutindu Yezu kusadilaka barulo yina, mpi yandi tubaka nde: ‘Yezu vandaka muntu ya kuyituka mpenza!’”​—Y.T., Japon.

[Kifwanisu ya kele na lutiti 30]

Bansonga lenda sadisa bana na beno na kunwana ti bupusi ya banduku

[Kifwanisu ya kele na lutiti 31]

Beno sala ngolo na mpila nde nkokila ya Lusambu ya Dibuta kuvanda ya kyese