Meve Santu: Ngolo Yina Nge Kele na Yo Mfunu na Luzingu na Nge

“KULA mono ve na luse ya nge, ye katula ve mpeve ya nge ya nlongo tuka mono.” (Nkunga 51:11, Luwawanu Yampa) Yai kuvandaka kisambu ya masonga yina Ntotila Davidi kusalaka na nima ya kusala kifu mosi ya nene.

Davidi kumonaka banda ntama ngolo ya mpeve santu. Ntangu yandi vandaka kaka toko, yo sadisaka yandi na kununga Goliati, soda mosi ya vandaka kupesa boma. (1 Samuele 17:45-50) Yo pesaka yandi mpi ngolo ya kusonika mwa bankunga ya kuluta kitoko na kati ya bankunga yonso yina bo mesonikaka. Davidi kutendulaka nde: “Mpeve ya Mfumu Nzambi ke tubaka na munoko na mono, mambu na yandi kele na ludimi na mono.”​—2 Samuele 23:2.

Yezu Kristu yandi mosi kundimisaka mukumba yina mpeve santu kuvandaka na yo na luzingu ya Davidi. Kilumbu mosi, Yezu zabisaka bawi na yandi nde: “Sambu Davidi yandi mosi tubaka na ngolo ya mpeve ya Nzambi nde: ‘Mfumu Nzambi tubilaka Mfumu na mono nde: Vanda awa na diboko na mono ya kibakala tii kuna ya mono ta tula bambeni na nge na nsi ya makulu na nge.’” (Marko 12:36; Nkunga 110:1) Yezu kuzabaka nde mpeve santu kutwadisaka Davidi ntangu yandi sonikaka bankunga na yandi. Keti mpeve santu yina mosi lenda sadisa beto mpi?

‘Beno Landa Kaka na Kulomba, Ebuna Nzambi Ta Pesa Beno Yo’

Mbala yankaka nge tabika kusonika ve nkunga ata mosi. Kansi nge lenda kutana mpi ti mambu yina lenda lembisa nge nitu bonso muntu ya nda Goliati. Beto tadila mbandu ya Isabel. a Bakala na yandi kuyambulaka yandi sambu yandi bakaka nkento yankaka ya leke. Yandi bikisaka yandi ti kizitu ya bamfuka mpi  kupesaka yandi ve mbongo sambu yo sadisa yandi na kulungisa bampusa ya bana na bo zole ya bankento. Isabel ketuba nde: “Mu vandaka kudiwa bonso muntu ya bo meyekula mpi ya bo kebaka bonso kima ya mpamba. Kansi, banda yandi mebikaka mono, mono kemonaka nde mpeve santu ya Nzambi kesadisaka mono.”

Keti Isabel kuvingilaka na kubaka mpeve santu kukonda kusala kikesa? Ve, yandi vandaka kubondila Nzambi konso kilumbu sambu Nzambi kupesa yandi mpeve na yandi. Yandi zabaka nde yandi vandaka ti mfunu ya ngolo ya Nzambi sambu yo sadisa yandi na kununga ti kikesa mambu yina lendaka kubasika na ntwala, na kusansa mbote bana na yandi, mpi na kubaka dyaka lukumu na yandi yina bo bebisaka. Yandi zitisaka bangogo yai ya Yezu: “Beno landa kaka na kulomba mambu yina ya beno ke na yo mfunu, ebuna Nzambi ta pesa beno yo; beno landa kaka na kusosa mambu yina ya beno ke na yo mfunu, ebuna beno ta mona yo; beno landa kaka na kubula na kielo, ebuna Nzambi ta kangudila beno yo.”​—Matayo 7:7.

Roberto mpi kumonaka nde yandi vandaka ti mfunu ya mpeve ya Nzambi kansi sambu na bikuma yankaka. Yandi vandaka mpika ya makaya mpi dyamba, yina yandi vandaka kunwa mbala na mbala. Yandi nwanaka ti kimpika yina bamvula zole ya mvimba, mpi yandi bwaka dyaka mbala mingi. Roberto ketendula nde: “Yo kepesaka mpasi mingi kana nge yambula na kusadila bima yina kelausaka. Nitu kelandaka na kulomba kukonda kulemba bima ya kelausaka konso kilumbu.”

Roberto kelanda na kutuba nde: “Mu bakaka lukanu ya kusoba luzingu na mono na mpila nde mu sadila Nzambi na mutindu yandi kendimaka. Mu salaka ngolo na kufulusa mabanza na mono ti bangindu ya mbote ya kekatuka na Biblia. Konso kilumbu, mu vandaka kusamba na masonga yonso, mu vandaka kulomba Nzambi na kupesa mono ngolo ya kutula bunkete na luzingu na mono. Mu zabaka nde mu lendaka ve kununga na ngolo na mono mosi. Mpi mu monaka mutindu Yehowa kupesaka mvutu na bisambu na mono, mingimingi ntangu mu vandaka kulemba nitu na nima ya kubwa dyaka. Mu kendima nde mpeve santu ya Nzambi kupesaka mono dyaka ngolo; kukonda mpeve na yandi mu zolaka kununga ve ata fyoti kimpika yina.”​—Filipi 4:6-8.

“Bo Ke Pumbukaka Bonso Bakumbi-Kumbi”

Bonso Isabel mpi Roberto, bamilio ya Bambangi ya Yehowa memonaka ngolo ya mpeve santu na luzingu na bo. Kana nge zola, Yehowa lenda pesa nge ngolo na yandi ya kisalu, disongidila ngolo yina yandi sadilaka sambu na kuganga luyalanganu. Nzambi kezolaka mpi yandi kele ti mpusa ya ngolo ya kupesa nge mpeve na yandi kana nge lomba yo na masonga yonso. Kansi sambu na kubaka mpeve yina, nge fwete longuka kyeleka na yina metala yandi mpi kusosa kusala luzolo na yandi na masonga yonso.​—Yezaya 55:6; Baebreo 11:6.

Na nzila ya ngolo yina mpeve santu kepesaka, nge lenda baka ngolo ya kusadila Nzambi mbote-mbote mpi ya kunwana ti bampasi yonso yina lenda basika na luzingu na nge. Biblia kendimisa beto mambu yai: “[Yehowa] ke pesaka ngolo na muntu yina me lemba, yandi ke yikaka ngolo na muntu yina me konda ngolo. . . . Bayina ke tulaka ntima na Mfumu Nzambi, bo ke yikaka diaka ngolo na bo. Bo ke pumbukaka bonso bakumbi-kumbi. Bo ke bakaka ntinu, kikesa na bo ke manaka ve; bo ke tambulaka mingi, kulemba ve.”​—Yezaya 40:28-31.

[Noti na nsi ya lutiti]

[Bangogo sambu na kubenda dikebi ya kele na lutiti 8]

‘Konso kilumbu, mu vandaka kusamba na masonga yonso, mu vandaka kulomba Nzambi na kupesa mono ngolo. Mu zabaka nde mu lendaka ve kununga na ngolo na mono mosi. Mpi mu monaka mutindu yandi pesaka mvutu na bisambu na mono’

 [Lupangu/​Bifwanisu ya kele na lutiti 7]

BISALU YA MPEVE SANTU

Nzambi kusadilaka mpeve santu sambu na kuganga ntoto mpi bima yankaka ya luyalanganu. Muyimbi-bankunga kutubaka nde: “Mfumu, nge me salaka bima mingi mpenza! Bima yonso nge me salaka yo na mayele! Ntoto me fulukaka na bima yonso ya nge salaka. Kansi kana nge pesa bo [mpeve, NW] na nge, bo fweti zinga.”​—Nkunga 104:24, 30; Kuyantika 1:2; Yobi 33:4.

Mpeve santu kupesaka babakala yina kuvandaka ya kukangama na Nzambi ngolo ya kusonika Biblia. Ntumwa Polo kusonikaka nde: “Masonuku yonso kele ya kupemama na Nzambi mpi yo kele mfunu.” (2 Timoteo 3:16, NW) Ngogo ya Kigreki ya bo mebalula “kupemama na Nzambi” ketendula ntetentete “Nzambi kufulaka mpema.” Mpema ya Nzambi, to mpeve, kutwadisaka mabanza ya bansoniki ya Biblia na mpila nde bo sonika “nsangu ya Nzambi.”​—1 Tesalonika 2:13.

Mpeve santu kupesaka bansadi ya Nzambi ngolo ya kuzabisa ti sikisiki mambu ya kekwisa na ntwala. Ntumwa Piere kutendulaka nde: “Ata muntu mosi ve lenda tendula na ngolo na yandi mosi mambu yina ya baprofete tubaka na Mukanda ya Nzambi. Sambu ata profete mosi ve me tubaka ntete na luzolo ya kimuntu, kansi bo vandaka kutuba na zina ya Nzambi sambu mpeve-santu vandaka kusonga bo mambu yonso ya bo vandaka kutuba.”​—2 Piere 1:20, 21; Yoele 3:1.

Mpeve santu kusadisaka Yezu ti bantu yankaka ya lukwikilu na kusamuna nsangu ya mbote ya Kimfumu ya Nzambi mpi na kusala bimangu. Yezu kutubaka nde: “Mpeve ya Mfumu Nzambi kele na mono. Yandi solaka mono sambu na kuzabisa nsangu ya mbote na bansukami, yandi tindaka mono na kuzabisa bantu yina ya bo kangaka na bitumba nde bo ta bikisa bo, mpi na kuzabisa bantu ya kufwa-meso nde bo ta mona diaka.”​—Luka 4:18; Matayo 12:28.

 [Lupangu/​Bifwanisu ya kele na lutiti 9]

MITINDU YINA MPEVE SANTU LENDA SADISA BETO

Mpeve santu lenda pesa nge ngolo ya kunwana ti mpukumuna mpi kununga bikalulu ya mbi. Ntumwa Polo kutubaka nde: “Nzambi ke salaka kaka mambu yina ya yandi me tubaka, sambu yandi ta bika beno ve nde Satana kumeka beno na kumeka yina me luta ngolo na beno. Kansi, kana mpukumunu me kwisila beno, kaka na ntangu yo yina Nzambi ta pesa beno ngolo; mpidina mpukumunu lenda bwisa beno ve.”​—1 Korinto 10:13.

Mpeve santu lenda sadisa nge na kuyedisa bikalulu ya kepesaka Nzambi kyese. Mbuma ya mpeve ‘kele zola, kiese ti ngemba, kukanga ntima, mambote, ntima ya mbote, kutula ntima, pima, kudiyala.’​—Galatia 5:22, 23.

Mpeve santu lenda pesa nge ngolo ya kukanga-ntima na bampasi. “Mono me lunga kusala mambu yonso na ngolo yina ya Kristo ke pesaka mono.”​—Filipi 4:13.