Dilongi ya Luvunu 1: Moyo Kefwaka Ve

Inki kele kisina ya dilongi ya luvunu? “Bafilozofe ya dibundu ya Bukristu ya ntete kundimaka dilongi ya Bagreki ya ketubaka nde moyo kefwaka ve mpi bo vandaka kuyindula nde ntangu Nzambi gangaka muntu, yandi gangaka mpi moyo ye kukotisaka yo na nitu ya muntu.”​—The New Encyclopædia Britannica (1988), Volime 11, lutiti 25.

Biblia ketuba inki? “Moyo . . . yina ke salaka masumu [yo] ta fwa.”​—Ezekiele 18:4.

Na yina metala lugangu ya moyo ya ntete, Biblia ketuba nde: “Yehowa Nzambi salaka muntu na putulu ya ntoto, mpi yandi fulaka na mbombo na yandi mupepe ya luzingu, ebuna muntu kumaka moyo [Kiebreo, neʹphesh] ya kezinga.”​—Kuyantika 2:7, NW.

Ngogo ya Kiebreo neʹphesh, ya bo mebalulaka nde “moyo,” ketendula ‘kigangwa mosi ya kepema.’ Ntangu Nzambi kugangaka muntu ya ntete Adami, Yandi kotisaka ve na kati na yandi moyo mosi ya kefwaka ve kansi yandi kotisaka ngolo ya luzingu yina ketaninamaka na kupema. Yo yina, na Biblia “moyo” ketendula kigangwa ya mvimba ya kezinga. Kana bo kabula yo ti ngolo ya luzingu yina Nzambi kupesaka na luyantiku, moyo tafwa.​—Kuyantika 3:19; Ezekiele 18:20, King James Version.

Dilongi ya ketubaka nde moyo kefwaka ve kubasisaka bangyufula yai: Myoyo kekwendaka na wapi na nima ya lufwa? Inki kekuminaka myoyo ya bantu ya mbi? Ntangu Bakristu ya zina kundimaka dilongi ya luvunu ya ketubaka nde moyo kefwaka ve, yo nataka bo na kundima dilongi yankaka ya luvunu​—dilongi ya bilungi ya tiya.

Fwanisa baverse yai ya Biblia: Longi 3:19; Matayo 10:28; Bisalu 3:23

DYAMBU YA KYELEKA:

Na lufwa muntu kezingaka dyaka ve

[Kifwanisu ya kele na lutiti 4]