Luyalu ya Satana Tanunga Ve ata Fyoti

“Yo tasuka mbote ve sambu na muntu ya mbi.”​—LO. 8:13.

1. Sambu na nki mutindu Nzambi tasambisa bantu ya mbi na bilumbu kekwisa kele nsangu ya kepesa kikesa?

NSUKA-NSUKA Nzambi tasambisa bantu ya mbi. Bo fwete vutula munoko sambu na mambu ya bo mesalaka. (Bing. 5:22; Lo. 8:12, 13) Yai kele nsangu ya kepesa kikesa, mingimingi sambu na bantu yina kezolaka lunungu mpi bayina bantu ya mbi menyokulaka mpi mesadilaka bo mambu kukonda lunungu. Muntu ya mbi ya ntetentete yina Nzambi tasambisa kele tata ya mambu ya mbi, Satana Dyabulu.​—Yoa. 8:44.

2. Sambu na nki yo vandaka kulomba ntangu sambu na kumanisa ntembe yina kubasikaka na Edeni?

² Na Edeni, Satana kupusaka bantu na kubuya luyalu ya Yehowa sambu yandi vandaka ya kufuluka ti mawi ya kudimona mfunu. Na nima, bibuti na beto ya ntete kuvukanaka ti Satana na kutula ntembe na nswa ya Yehowa ya kuyala mpi bo kumaka bansumuki na meso na yandi. (Roma 5:12-14) Ya kyeleka, Yehowa kuzabaka nde kukonda luzitu mpi kukolama na bo tanatila bo malanda ya mbi. Kansi, yo lombaka nde bigangwa yonso ya mayele kumona pwelele malanda yina yo zolaka mpenza kunatila bo. Yo yina, yo vandaka kulomba ntangu sambu na kumanisa ntembe yango mpi kumonisa na pwelele yonso nde bankolami kuvandaka mpenza na kifu.

3. Inki mutindu beto ketadilaka baluyalu ya bantu?

³ Banda bantu kubuyaka lutwadisu ya Yehowa, yo lombaka nde bo sala guvernema na bo mosi. Ntangu yandi vandaka kusonikila bampangi-Bakristu ya Roma, ntumwa Polo kubingaka baluyalu ya bantu ya mutindu yina nde “bamfumu ya leta.” Na bilumbu ya Polo, bamfumu ya leta kuvandaka ntetentete luyalu ya Roma na lutwadisu ya Ntinu Nero, yina kuyalaka na nsungi ya bamvu 54-68 T.B. Polo kutubaka nde bamfumu ya leta ya mutindu yina ketulamaka “na bisika na bo ya kuswaswana na nzila” (NW) ya Nzambi. (Tanga Roma 13:1, 2.) Keti yo ketendula nde Polo vandaka kumonisa nde luyalu ya bantu meluta luyalu ya Nzambi? Ata fyoti ve. Kansi, yandi vandaka kaka kutuba nde sambu Yehowa meyambulaka nde bimfumu ya bantu kuyala, Bakristu fwete zitisa ngidika “ya Nzambi” mpi kundima bamfumu ya mutindu yina.

Nzila Yina Kenata na Bampasi

4. Tendula sambu na nki luyalu ya bantu tanunga ve ata fyoti.

⁴ Luyalu ya bantu, yina kele na nsi ya kiyeka ya Satana, tanunga ve ata fyoti. Sambu na inki? Kikuma mosi kele sambu yo mesimbama ve na mayele ya Nzambi. Yehowa mpamba muntu kele na mayele ya kukuka. Yo yina, yandi mpamba kele ntwadisi ya mefwana na mambu ya metala luyalu yina tanunga. (Yer. 8:9; Roma 16:27) Na kuswaswana ti bantu, yina kelongukaka mambu mbala mingi na nima ya kukutana ti bampasi mpi bifu, Yehowa kezabaka ntangu yonso mutindu ya kuluta mbote ya kusala mambu. Konso luyalu yina kelanda ve lutwadisu na yandi tanunga ve ata fyoti. Sambu na kikuma yina mpamba​—kukonda kutubila bangindu ya mbi yina bo kevandaka na yo​—banda na luyantiku yo monanaka nde luyalu yina Satana kesadilaka na nzila ya luyalu ya bantu tanunga ve ata fyoti.

5, 6. Mbala yankaka nki kunataka Satana na kutelamina Yehowa?

⁵ Mbala mingi muntu ya mbote kebuyaka kusala kisalu yina yandi mezaba nde yo tanunga ve. Kana yandi tula ntu ngolo mpi kulanda kusala kisalu yango, yandi tasuka na kundima kifu na yandi. Disolo ya luzingu ya bantu memonisaka mbala mingi nde yo kele ve mfunu na kutelamina Ngangi nkwa-ngolo yonso. (Tanga Bingana 21:30.) Kansi, mawi ya kudimona mfunu mpi lulendo  kukangaka Satana meso mpi yandi pesaka Yehowa mukongo. Na mutindu yina Dyabulu kuponaka na luzolo yonso nzila yina lendaka kusuka kaka na bampasi.

⁶ Na nima, kikalulu ya lulendo ya Satana kumonanaka na mfumu mosi ya Babilonia yina Biblia ketuba nde yandi vandaka kudimonisa na bangogo yai: “Mono ta tombuka na zulu, mono ta tula kiti na mono ya kimfumu kuna na zulu ya bambwetete ya Nzambi. Mono ta yala na ngumba yina ya banzambi ke kutanaka, kuna na ndambu ya norde mpenza. Mono ta mata na zulu ya matuti, mono ta vanda kiteso mosi bonso” Muntu ya Kuluta Kuzanguka. (Yez. 14:13-15) Kisalu ya kukonda mayele ya mfumu yina, mpi luyalu ya Babilonia kusukaka na mutindu ya kukonda lukumu. Mutindu mosi, ntama mingi ve Satana mpi nsi-ntoto na yandi tabela mpenza.

Sambu na Nki Nzambi Mepesaka Nzila?

7, 8. Mutindu Yehowa mepesaka nzila na mambi sambu na mwa ntangu fyoti menataka nki mambote?

⁷ Bantu yankaka lenda kudiyula sambu na nki Yehowa kukangaka ve bantu nzila na kulanda Satana mpi na kusala ngidika yankaka ya kuyala yina zolaka ve kununga ata fyoti. Sambu yandi kele Nzambi Nkwa-Ngolo Yonso, yandi lendaka mpenza kusala mutindu yina. (Kub. 6:3) Kansi, yandi salaka yo ve. Mayele na yandi kumonisaka nde kubuya kukota na kukolama ya bantu sambu na mwa ntangu fyoti zolaka nsukansuka kubasisa malanda ya mbote mpenza. Nsukansuka, yo zolaka kumonana nde Yehowa kele Mfumu ya lunungu mpi ya zola, mpi desizio ya Nzambi zolaka kunatila bantu ya kwikama mambote.

⁸ Dibuta ya bantu zolaka kutina bampasi mingi mpenza kana bo buyaka bandongisila ya Satana mpi kana bo buyaka kusosa dipanda na luyalu ya Nzambi! Ata mpidina, desizio ya Yehowa ya kupesa bantu nzila na kudiyala sambu na mwa ntangu fyoti menataka mambote. Yo mesadisaka bantu ya ntima ya mbote na kubakisa nde yo kele mayele mpenza na kuwidikila Nzambi mpi kutudila yandi ntima. Banda bamvu-nkama mingi, bantu memekaka mitindu ya kuswaswana ya baguvernema, kansi ata mosi ve na kati na yo memonanaka nde yo kele ya mbote kuluta. Dyambu yai mesadisaka bansambidi ya Nzambi na kukuma kundima mpenza nde luyalu ya Yehowa kele mpenza ya mbote kuluta. Ya kyeleka, mutindu Yehowa mepesaka nzila na luyalu ya mbi ya Satana menataka bampasi na bantu, tanga mpi bayina kesambilaka Nzambi na kwikama yonso. Kansi, mutindu Nzambi mepesaka nzila na mambi sambu na mwa ntangu fyoti menatilaka mpi bansambidi yai ya kwikama mambote.

 Kukolama Yina Mesadisaka na Kupesa Yehowa Lukumu

9, 10. Tendula mutindu luyalu ya Satana mesadisaka na kukumisa Yehowa.

⁹ Mutindu Yehowa mepesaka bantu nzila ya kuvanda na nsi ya kiyeka ya Satana mpi na kuditwadisa mebebisaka ve ata fyoti luyalu na yandi. Nkutu, disolo ya luzingu ya bantu kemonisa nde mambu ya Yeremia kutubaka, na nsadisa ya mpeve ya Nzambi, ya kemonisa nde bantu lenda kuditwadisa ve, kele ya kyeleka. (Tanga Yeremia 10:23.) Dyaka, kukolama ya Satana mepesaka Yehowa dibaku ya kumonisa bikalulu na yandi ya kitoko na mutindu ya mbote kibeni. Inki mutindu?

¹⁰ Sambu beto lenda mona malanda ya mbi ya luyalu ya Satana, bikalulu ya kukuka ya Yehowa kemonana pwelele mpenza kuluta mutindu yina yo zolaka kumonana. Na mutindu yina, yandi mebakaka lukumu mingi na meso ya bantu yina kezolaka yandi. Ee, na kuswaswana ti mutindu yina yo lendaka kumonana, luyalu ya Satana mesadisaka mpenza na kukumisa Nzambi. Yo memonisaka pwelele mutindu ya kuluta mbote yina Yehowa metadilaka dyambu yai ya metulaka ntembe na luyalu na yandi. Sambu na kumonisa kyeleka yai, bika beto tadila na bunkufi mwa bikalulu ya Yehowa mpi beto tala mutindu luyalu ya mbi ya Satana mepusaka Yehowa na kumonisa bikalulu yai na mitindu yankaka.

11. Inki mutindu zola ya Yehowa memonanaka?

¹¹Zola. Masonuku kezabisa beto nde “Nzambi kele zola.” (1 Yoa. 4:8, NW) Lugangu ya muntu kuvandaka, ntetentete, dyambu ya kemonisa zola ya Nzambi. Dyaka, mutindu ya kepesa boma mpi ya kuyituka yina Nzambi mesalaka beto kemonisaka zola na yandi. Na zola yonso, Yehowa mepesaka mpi bantu kisika mosi ya kitoko yina kele ti bima yonso ya bo kele na yo mfunu sambu na kuvanda na kyese. (Kuy. 1:29-31; 2:8, 9; Nk. 139:14-16) Kansi ntangu mambi kukotaka na dibuta ya bantu, Yehowa kumonisaka zola na yandi na mitindu ya mpa. Inki mutindu? Ntumwa Yoane kuvutukilaka bangogo yai ya Yezu: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoa. 3:16) Keti Nzambi lendaka kusonga zola na yandi sambu na bantu na mutindu ya mbote mingi kuluta mutindu yandi tindaka na ntoto, Mwana na yandi mosi kaka ya kubutuka sambu na kugulusa bantu ya masumu? (Yoa. 15:13) Mutindu yai ya nene ya kumonisa zola kele mpi mbandu sambu na bantu, sambu yo kepesaka bo dibaku ya kumonisa zola ya kuditambika ya Nzambi na luzingu ya konso kilumbu, kaka mutindu Yezu kusalaka.​—Yoa. 17:25, 26.

12. Na nki mutindu ngolo ya Yehowa memonanaka?

¹²Ngolo. Kaka “Nzambi, Nkwa-Ngolo Yonso,” muntu kele ti ngolo ya kuganga luzingu. (Kus. 11:17, NW; Nk. 36:10) Na lubutuku, na mutindu mosi buna, muntu keyantikaka bonso papie ya mpembe ya bo mesonikaka ve ata kima mosi. Na lufwa, papie yina ya mpembe kevandaka ya kufuluka ti badesizio, bisalu, mpi baeksperiansi ya luzingu na yandi yina kusalaka kimuntu na yandi. Yehowa lenda bumba bansangu yina na mabanza na yandi. Na ntangu ya mefwana, Yehowa lenda vutula dyaka muntu yango na luzingu, ti mambu yonso ya metala luzingu na yandi mosi. (Yoa. 5:28, 29) Yo yina, ata lufwa kuvandaka  ve na lukanu ya kisina ya Nzambi sambu na bantu, yo mepesaka Yehowa dibaku ya kumonisa nde yandi kele na ngolo ya kuvutula bafwa na luzingu. Ya kyeleka, Yehowa kele “Nzambi, Nkwa-Ngolo Yonso.”

13. Inki mutindu kimenga ya Yezu kele mutindu mosi ya kumonisa lunungu ya kukuka ya Yehowa?

¹³Lunungu. Yehowa kekusaka ve; yandi kesalaka mpi ve mambu ya kukonda lunungu. (Kul. 32:4; Tito 1:2) Yandi kekangamaka ntangu yonso na minsiku ya kuzanguka ya kyeleka mpi ya lunungu, ata ntangu kusala mutindu yai kemonanaka nde yo kele ve sambu na mambote na yandi. (Roma 8:32) Yo fwete vanda nde Yehowa kuwaka mpasi mingi na kumona Mwana na yandi ya zola kefwa na zulu ya nti ya mpasi bonso nde Yezu vandaka muvwenzi ya kukonda kwikama! Kansi, zola na yandi sambu na bantu ya kukonda kukuka kupusaka Yehowa na kundima na kupesa nzila nde dyambu yai ya mpasi kusalama sambu na kukotila munsiku na yandi mosi ya kukuka ya lunungu. (Tanga Roma 5:18-21.) Nsi-ntoto ya mefuluka ti mambu ya kukonda lunungu kepesaka Yehowa dibaku ya kumonisa nde yandi kele mbandu ya kukuka ya lunungu.

14, 15. Tanga mwa mitindu yina mayele mpi kukanga-ntima ya kuzanguka ya Yehowa memonanaka.

¹⁴Mayele. Ntangu Adami ti Eva kusalaka masumu, kukonda kusukinina Yehowa kumonisaka mutindu yandi zolaka kumanisa malanda yonso ya mbi yina kukolama na bo menataka. (Kuy. 3:15) Dyambu yai ya yandi salaka kukonda kusukinina, mpi mutindu yandi vandaka kumonisa na bansadi na yandi malembe-malembe mambu ya metala lukanu yai, kusadisaka sambu mayele ya Yehowa kumonana mbote-mbote. (Roma 11:33) Ata kima mosi ve lenda kanga makuki ya Nzambi ya kununga na kuyidika mambu. Na nsi-ntoto ya mefuluka ti mansoni, bitumba, kukonda bukatikati, kukonda bulemfu, kukonda mawa, kupona-pona, mpi luvunu, Yehowa mezwaka mabaku mingi ya kumonisa na bigangwa na yandi mayele na yandi ya kyeleka. Longoki Yakobo kutubaka nde: “Muntu yina ke na mayele yina ke katukaka na zulu, ntete yandi ke na kinzambi; ebuna yandi kele mpi muntu mosi ya ngemba, ya pima, yandi kele muntu mosi ke lemfukaka na Nzambi; yandi kele muntu ya mbote; ke salaka mambu ya mbote; yandi ke zengaka mambu mutindu yo kele; yandi ke tubaka mambu na masonga.”​—Yak. 3:17.

¹⁵Kukanga-Ntima mpi Ntima-Nda. Kukanga-ntima mpi ntima-nda ya Yehowa zolaka kumonana mpenza ve kana kukonda kukuka, masumu, mpi bifu ya bantu kuvandaka ve. Luzolo ya Yehowa ya kusala mutindu yina na nsungi ya mafunda ya bamvula kemonisa nde yandi kele ti bikalulu yai ya kitoko na kiteso ya kukuka, mpi beto fwete monisa ntonda sambu na yo. Ntumwa Piere kutubaka mbote nde beto fwete “baka kukanga ntima [ya Mfumu na beto] bonso nde nzila ya kuguluka.”​—2 Pie. 3:9, 15.

16. Sambu na nki luzolo ya Yehowa ya kulolula kele kikuma ya kuvanda na kyese mingi?

¹⁶Luzolo ya Kulolula. Beto yonso kele bantu ya  masumu, mpi beto yonso kesalaka bifu mbala mingi. (Yak. 3:2; 1 Yoa. 1:8, 9) Beto fwete monisa ntonda ya mingi sambu Yehowa kele na luzolo ya kulolula mpenza! (Yez. 55:7) Beto tadila mpi dyambu yai: Sambu beto kebutukaka bansumuki ya kukonda kukuka, beto kele na dibaku ya kumona kyese ya mingi ntangu Nzambi kelolulaka bifu na beto. (Nk. 51:7, 11, 19) Kumona na luzingu na beto mosi kikalulu yai ya kitoko ya Yehowa kekumisaka ngolo zola na beto sambu na yandi mpi kesyamisaka beto na kulanda mbandu na yandi na bangwisana na beto ti bantu yankaka.​—Tanga Kolosai 3:13.

Sambu na Nki Nsi-Ntoto Kebela

17, 18. Na nki mitindu luyalu ya Satana menungaka ve?

¹⁷ Ngidika ya mvimba ya Satana​—kima yina luyalu na yandi mesalaka​—menungaka ve mbala mingi mpenza na nsungi ya bamvu-nkama. Na mvu 1991, zulunalu mosi (The European) kutubaka nde: “Keti nsi-ntoto kebela? Yo kebela mpenza, kansi maladi yango mekatuka ve na Nzambi​—maladi ya nsi-ntoto mekatuka na bantu na yo.” Yo kele mpenza kyeleka! Na bupusi ya Satana, bibuti na beto ya ntete kubuyaka luyalu ya Yehowa mpi kuponaka luyalu ya bantu. Na mutindu yina bo salaka luyalu yina zolaka kununga ve ata fyoti. Bampasi mpi mawa yina bantu ya nsi-ntoto ya mvimba kemona kele bidimbu ya kemonisa nde maladi ya ngolo mpenza mesimba luyalu ya bantu.

¹⁸ Luyalu ya Satana kesepedisaka bwimi. Kansi, bwimi lenda nunga ve ata fyoti zola, yina kele kisina ya luyalu ya Yehowa. Luyalu ya Satana menungaka ve na kutula kyese to lutaninu. Luyalu ya Yehowa tanunga kaka! Keti beto kele ti banzikisa ya bilumbu yai ya kendimisa yo? Ee, mutindu beto tamona yo na disolo yina kelanda.

Inki Beto Melonguka na Yina Metala Luyalu na Kutangaka . . .

• Roma 13:1, 2?

• Bingana 21:30?

• Yeremia 10:23?

• Kolosai 3:13?

[Bangyufula ya Disolo ya Kulonguka]

[Bifwanisu ya kele na lutiti 25]

Luyalu ya Satana menatilaka ve bantu mambote ata fyoti

Bangogo ya kemonisa kisina ya bafoto

U.S. Army photo

WHO photo by P. Almasy

[Kifwanisu ya kele na lutiti 26]

Yehowa kele na ngolo ya kuvutula bafwa na luzingu

[Kifwanisu ya kele na lutiti 27]

Zola mpi lunungu ya Yehowa kumonanaka na kimenga ya Mwana na yandi