Beno Longa Bana na Beno

 Yeremia Kuyambulaka Ve

KETI nge melembaka dezia nitu mpi mekudiwaka bonso nde nge kezo yambula?— * Yo mekuminaka bantu mingi. Yo kuminaka leke Yeremia. Kansi, yandi bikaka ve nde mambu ya bantu yankaka kutubaka to kusalaka kupusa yandi na kuyambula. Bika beto tubila mutindu Yeremia kuvandaka muntu mosi ya sipesiali sambu na Nzambi, ata nkutu yandi kudiwaka bonso nde yandi kezo yambula.

Na ntwala nde Yeremia kubutuka, Nzambi ya kyeleka, Yehowa, kuponaka yandi na kuvanda profete sambu na kukebisa bantu nde bo vandaka ve kusepedisa Nzambi. Keti nge mezaba mambu Yeremia kusongaka Yehowa bamvula mingi na nima?​— “Mono zaba kutuba ve, mono kele ka mono mwana.”

Nge kebanza nde Yehowa kupesaka Yeremia inki mvutu?​— Na malembe yonso, kansi na mutindu ya ngolo, yandi tubaka nde: “Kutuba ve nde nge kele mwana, kansi kwenda na bantu yina ya mono ke tinda nge; tuba na bo mambu yonso ya mono ke songa nge. Kutina bo boma ve.” Sambu na nki ve? Yehowa kutubaka nde: “Mono ta vanda na nge, mono ta keba nge.”​—Yeremia 1:4-8.

Ata mpidina, mutindu beto monaka yo na ntwala, Yeremia kulembaka nitu na nima sambu bo vandaka kuseka yandi sambu yandi vandaka kusadila Nzambi. Yandi tubaka nde: “Bantu yonso ke seka mono, bo ke tula mono milolo ntangu yonso.” Yo yina, yandi bakaka lukanu ya kuyambula. Yandi tubaka nde: “Mono ke yindula diaka Mfumu Nzambi ve, mono ta tuba diaka na zina na yandi ve.” Kansi, keti yandi yambulaka mpenza?

Yeremia kutubaka nde: “Mambu [ya Yehowa] ke pela na ntima na mono bonso tiya, yo me kota mono tii na mikwa. Mono me lemba na kubumba yo na ntima.” (Yeremia 20:7-9) Ata bantangu yankaka Yeremia kuwaka boma, zola na yandi sambu na Yehowa kupusaka yandi na kuyambula ve. Beto tadila mutindu Yehowa kutaninaka Yeremia sambu yandi yambulaka ve.

Yehowa kusongaka Yeremia na kukebisa bantu nde Yeruzalemi zolaka kufwa kana bo soba ve mambu na bo ya mbi. Ntangu Yeremia kupesaka lukebisu yina, bantu kuwaka makasi mpi kutubaka nde: “Muntu yai me lunga kufwa.” Kansi, Yeremia kubondilaka bo na ‘kulanda mambu ya Mfumu Nzambi.’ Na nima yandi tubaka nde: ‘Beno fweti zaba nde, kana beno kufwa mono, beno me fwa muntu  yina me sala mbi ve, sambu Mfumu Nzambi muntu me tinda mono na kutubila beno.’ Keti nge kezaba mambu ya kusalamaka na nima?​—

Biblia ketuba nde: “Bambuta ti bantu ya nkaka tubaka na banganga-Nzambi ti baprofete nde: ‘Muntu yai lunga kufwa ve sambu yandi me tuba na beto na zina ya Mfumu Nzambi, Nzambi na beto.’” Yo yina, sambu Yeremia kubikaka ve nde boma kupusa yandi na kuyambula, Yehowa kutaninaka yandi. Beto tala ntangu yai mambu yina kukuminaka Uria, profete yankaka ya Yehowa yina kusalaka mambu na mutindu yankaka.

Biblia ketuba nde: ‘Uria vandaka kutuba sambu na Yeruzalemi kaka mutindu Yeremia vandaka kutuba.’ Kansi, ntangu Ntotila Yoyakimi kuwilaka Uria makasi, keti nge mezaba mambu yina Uria kusalaka?​— Yandi waka boma, kuyambulaka kusala luzolo ya Nzambi, mpi kutinaka na Ezipte. Ebuna, ntotila kutindaka bantu na kukanga yandi kuna mpi kuvutula yandi. Ntangu bo salaka yo, keti nge kezaba nki mambu ntotila yina ya mbi kusalaka?​— Yandi fwaka Uria ti mbele!​—Yeremia 26:8-24.

Sambu na nki nge lenda tuba nde Yehowa kutaninaka Yeremia kansi Uria ve?​— Yo lenda vanda nde Yeremia kuwaka mpi boma bonso Uria, kansi Yeremia kuyambulaka ve na kusadila Yehowa mpi kutinaka ve. Yandi yambulaka ve. Inki dilongi nge kemona nde beto lenda baka na mbandu ya Yeremia?​— Dilongi kele nde bantangu yankaka beto lenda mona nde yo kele mpasi na kusala mambu yina Nzambi ketubaka, kansi beto fwete tudila yandi ntima ntangu yonso mpi kulemfukila yandi.

[Noti na nsi ya lutiti]

Bangyufula:

○ Inki kisalu Nzambi kuponaka sambu na Yeremia?

○ Sambu na nki Yeremia kudiwaka bonso nde yandi kezo yambula?

○ Sambu na nki Yehowa kutaninaka Yeremia, kansi Uria ve?

○ Inki dilongi nge mebaka na mbandu ya Yeremia?