Sadila “Mbele ya Mpeve” na Mayele Yonso

“Beno ndima . . . mbele ya mpeve, disongidila ndinga ya Nzambi.”​—EF. 6:17, NW.

1, 2. Inki beto fwete sala sambu mpusa kele ya kuvanda ti bansamuni mingi ya Kimfumu?

NTANGU yandi monaka mpusa ya kimpeve ya bibuka ya bantu, Yezu kusongaka balongoki na yandi nde: “Bambuma mingi kele na bilanga, kansi bantu ya kisalu kele mingi ve sambu na kukatula yo. Beno bondila munkwa-bilanga na kutinda bantu ya nkaka ya kisalu sambu na kukatula bambuma na yandi.” Yezu kubikaka ve mambu mutindu yina. Na nima ya kutuba bangogo yina, “Yesu bingaka balonguki na yandi kumi na zole,” mpi yandi tindaka bo na kwenda kusamuna, to ‘kukatula bambuma.’ (Mat. 9:35-38; 10:1, 5) Na nima, Yezu ‘solaka balonguki ya nkaka makumi nsambwadi mpi yandi tindaka bo zole-zole’ sambu na kusala kisalu ya mutindu mosi.​—Luka 10:1, 2.

² Bubu yai, beto kele mpi ti mfunu ya bansamuni mingi ya Kimfumu. Bantu 18 168 323 kuvandaka na Lusungiminu na nsi-ntoto ya mvimba na mvula ya kisalu 2009. Yo lutaka ntalu ya Bambangi ya Yehowa yonso na bamilio kuluta 10. Bambuma meyela mpenza na bilanga mpi ntangu ya kukatula yo melunga. (Yoa. 4:34, 35) Yo yina, beto fwete samba mpi kulomba bansadi mingi. Kansi, nki mutindu beto lenda sala na kuwakana ti mambu ya beto kelomba na bisambu? Sambu na kusala mutindu yina, beto fwete kuma baministre ya mbote na kusalaka na kikesa yonso kisalu ya kusamuna Kimfumu mpi ya kukumisa bantu balongoki.​—Mat. 28:19, 20; Mar. 13:10.

3. Inki kisalu ya mfunu mpeve ya Nzambi kesalaka sambu na kusadisa beto na kukuma baministre ya mefwana?

³ Disolo yina meluta kutubilaka mutindu kutwadisama na mpeve ya Nzambi kesadisaka beto na “kuzabisa nsangu ya Nzambi na kikesa yonso.” (Bis. 4:31) Mpeve yina lenda sadisa beto mpi na kuvanda baministre ya mefwana. Mutindu mosi ya kutomisa mutindu na beto ya kusala kisalu ya kusamuna kele kusadila mbote kisadilu ya kuluta mbote yina Yehowa Nzambi mepesaka beto​—Ndinga na yandi ya kusonika, Biblia. Yo kele mbutu ya mpeve santu. (2 Tim. 3:16) Nsangu na yo mepemamaka na Nzambi. Yo yina, kutendula kyeleka ya Masonuku na mayele yonso na kisalu na beto ya kusamuna kele kubika nde mpeve santu kutwadisa beto. Na ntwala ya kutadila mutindu beto lenda sala yo, bika beto tadila ntete ngolo yina Ndinga yai kele na yo.

Ndinga ya Nzambi Kele ya Ngolo

4. Inki nsoba nsangu ya Nzambi yina kele na Biblia lenda sala na luzingu ya muntu?

⁴ Ndinga, to nsangu, ya Nzambi kele ya ngolo mpenza! (Baeb. 4:12) Na mutindu ya kifwani, nsangu yina kekatukaka na Biblia kele makasi kuluta konso mbele yina ya bantu mesalaka, sambu yo kekotaka mpi kekabisaka na mutindu ya kifwani mikwa mpi nluka na yo. Kyeleka ya Masonuku kekotaka mpenza na kati ya muntu mpi na mabanza ti mawi na yandi, na kumonisaka mutindu ya muntu yina yandi kele mpenza na kati. Kyeleka yina lenda monisa ngolo na yo ya kusoba muntu mpi kusala nde muntu yina kusoba na masonga yonso. (Tanga Kolosai 3:10.) Ee, Ndinga ya Nzambi lenda soba luzingu ya bantu!

5. Na nki mitindu Biblia lenda twadisa beto, mpi nki mambote beto lenda baka?

⁵ Dyaka, Biblia kele mukanda ya mayele mingi mpenza. Yo kele ti bansangu ya mfunu yina lenda songa bantu mutindu ya kuzinga na nsi-ntoto yai ya mpasi. Ndinga ya Nzambi ketemunaka kaka ve bitambi na beto bubu yai, kansi mpi nzila na beto na bilumbu kekwisa. (Nk. 119:105) Yo kele lusadisu ya nene mpenza ntangu beto keyidikaka makambu to kebakaka badesizio na yina metala kupona banduku, bansaka ya kulutisila ntangu, kisalu, bilele, mpi buna na buna. (Nk. 37:25; Bing. 13:20; Yoa. 15:14; 1 Tim. 2:9) Kusadila minsiku yina kele na Ndinga ya Nzambi kesadisaka beto na kuvanda ti bangwisana ya  mbote ti bankaka. (Mat. 7:12; Filp. 2:3, 4) Sambu nzila yina kele na ntwala na beto kele ya kutemuna mbote, beto takuka kutadila malanda ya badesizio na beto. (1 Tim. 6:9) Masonuku mpi ketubaka na ntwala lukanu ya Nzambi sambu na bilumbu kekwisa sambu na kusadisa beto na kuzinga na mutindu yina kewakana ti lukanu yina. (Mat. 6:33; 1 Yoa. 2:17, 18) Muntu lenda vanda ti luzingu ya mbote mpenza kana yandi bika nde minsiku ya Nzambi kutwadisa luzingu na yandi!

6. Biblia kele kinwaninu mosi ya kele ti ngolo ya nki kiteso na mvita na beto ya kimpeve?

⁶ Biblia kele mpi kinwaninu mosi ya ngolo na mvita na beto ya kimpeve. Polo kubingaka ndinga ya Nzambi nde mbele ya mpeve. (Tanga Efezo 6:12, 17.) Ntangu beto kezabisaka yo mbote, nsangu ya Biblia lenda katula bantu na kimpika ya kimpeve ya Satana. Yo kele mbele yina kele na kugulusa luzingu ya bantu na kisika ya kufwa bo. Keti beto fwete sala ve kikesa sambu na kusadila yo na mayele yonso?

Sadila Yo Mbote

7. Sambu na nki yo kele mfunu na kulonguka kusadila “mbele ya mpeve” mbote?

⁷ Soda lenda sadila binwaninu na yandi mbote-mbote na mvita kaka kana yandi memekaka yo mbala mingi mpi melongukaka na kusadila yo mbote. Yo kele mutindu mosi ti kusadila “mbele ya mpeve” na mvita na beto ya kimpeve. Polo kusonikaka nde: “Nge fweti tula ngolo na kumonika muntu ya mbote na meso ya Nzambi, bonso muntu ya kisalu yina ya bo lenda baka mbi ve sambu na kisalu na yandi, sambu yandi ke zabisaka nsangu ya kieleka mbote-mbote.”​—2 Tim. 2:15.

8, 9. Inki tasadisa beto na kubakisa mambu yina Biblia ketubaka? Pesa mbandu.

⁸ Inki tasadisa beto na ‘kuzabisa nsangu ya kieleka mbote-mbote’ na kisalu na beto ya kusamuna? Sambu na kuzabisa bankaka pwelele mambu yina Biblia ketubaka, beto fwete bakisa yo pwelele beto mosi. Yo kelombaka nde beto tula dikebi na bangogo to bansa yina kevandaka na ntwala ti na nima ya verse mosi.

⁹ Sambu na kubakisa mbote-mbote verse mosi ya Masonuku, yo kelombaka nde beto tadila mambu yina kele na ntwala to na nima ya verse yina. Bangogo ya Polo yina kele na Galatia 5:13 kemonisa mfunu ya kusala mutindu yina. Yandi sonikaka nde: “Bampangi, Nzambi solaka beno na kuvanda bampika ve [to, “na kimpwanza,” NW]. Kansi kana beno kele bampika ve, yo ke songa ve nde nzala na beno ya nitu yo fweti yala beno. Kansi beno sadisana na ntima ya kuzolana.” Inki kimpwanza Polo vandaka kutubila awa? Keti yandi vandaka kutubila kimpwanza ya kimpika ya masumu mpi lufwa, ya kimpika ya malongi ya luvunu, to ya kima yankaka? Baverse yina kele na ntwala kemonisa nde Polo vandaka kutubila kimpwanza yina beto kebakaka kana beto katuka “na kimpika ya kusinga yina ya Bansiku ke singaka beto bantu.” (Gal. 3:13, 19-24; 4:1-5) Yandi vandaka kutubila kimpwanza ya Bukristu. Bantu yina vandaka kuzola kimpwanza yina, bo vandaka kusadila bankaka na zola yonso bonso bampika. Bayina kukondaka zola kudikotisaka na songi-songi mpi na kuswana.​—Gal. 5:15.

10. Sambu na kubakisa mbote-mbote ntendula ya Masonuku, inki mutindu ya bansangu beto fwete tadila, mpi nki beto lenda sala sambu na kuzwa yo?

¹⁰ Sambu na kubakisa ntendula ya verse mosi  mbote-mbote, beto fwete tadila bansangu ya kesadisa na kubakisa verse yina mbote, mu mbandu nani kusonikaka mukanda yina ya Biblia, inki ntangu, mpi nki mambu kusalamaka ntangu bo sonikaka yo. Yo kele mpi mfunu na kuzaba lukanu yina bo sonikilaka mukanda yango, mpi kana mpila kele, mambu ya ketadila luzingu, bikalulu, mpi lusambu ya bantu na ntangu yina. *

11. Na ntangu beto ketendula baverse, na nki dyambu beto fwete keba?

¹¹ ‘Kuzabisa nsangu ya kieleka mbote-mbote’ kelombaka kaka ve kutendula bakyeleka ya Biblia na sikisiki. Beto fwete keba na kusadila ve Biblia sambu na kupesa bantu boma. Ata beto lenda sadila Masonuku sambu na kunwanina kyeleka, bonso Yezu kusalaka ntangu Dyabulu kupukumunaka yandi, Biblia kele ve fimbu yina beto fwete sadila sambu na kundimisa bawi na beto na ngolo. (Kul. 6:16; 8:3; 10:20; Mat. 4:4, 7, 10) Beto fwete landa ndongisila yai ya ntumwa Piere: “Beno fweti zitisa Kristo na ntima na beno, bonso Mfumu na beno. Konso ntangu beno fweti vanda ya kuyilama na kupesa mvutu na bantu yina ke yulaka beno sambu na kuzaba nki mutindu beno ke tulaka ntima na Nzambi. Kansi beno sala yo na malembe ti na luzitu.”​—1 Pie. 3:15, 16.

12, 13. Inki bima yina mekangamaka ngolo kyeleka ya Ndinga ya Nzambi lenda bwisa? Pesa mbandu.

¹² Kana beto sadila yo mbote-mbote, inki mambu kyeleka ya Ndinga ya Nzambi lenda sala? (Tanga 2 Korinto 10:4, 5.) Kyeleka ya Masonuku lenda bwisa bima yina mekangamaka ngolo, disongidila, kumonisa pwelele malongi ya luvunu, bikalulu ya mbi, mpi bafilozofi yina kemonisaka mayele ya bantu ya kukonda kukuka. Beto lenda sadila Biblia sambu na kukatula bangindu yonso yina “ke kangaka bantu nzila na kuzaba Nzambi.” Beto lenda sadila malongi ya Biblia sambu na kusadisa bantu yankaka na kuwakanisa mabanza na bo ti kyeleka.

¹³ Mu mbandu, beto tadila dyambu yina kukuminaka nkento mosi ya bamvula 93 ya kezingaka na Inde. Banda bumwana, bo longaka yandi na kukwikila na dilongi ya ketubaka nde muntu kebutukaka dyaka na nitu yankaka. Ntangu yandi yantikaka kulonguka Biblia na nzila ya mikanda ti mwana na yandi ya bakala yina vandaka kuzinga na nsi ya nzenza, yandi ndimaka kukonda mpasi mambu yina yandi vandaka kulonguka na yina metala Yehowa mpi balukanu na yandi. Kansi, dilongi ya ketubaka nde muntu kebutukaka dyaka na nitu yankaka kukotaka ngolo na mabanza na yandi na mpila nde yandi buyaka ntangu mwana na yandi kusonikilaka yandi na yina metala nkadilu ya bafwa. Yandi tubaka nde: “Mu kebakisa ve kyeleka ya Masonuku na beno. Mabundu yonso kelongaka nde kele ti kima mosi na kati na beto ya kefwaka ve. Mu kekwikilaka banda ntama nde nitu kefwaka mpi nde kele ti kitini mosi ya kemonanaka ve ya kebutukaka dyaka bambala mingi na banitu yankaka kiteso ya bambala 8 400 000. Inki mutindu dyambu yai lenda vanda ve ya kyeleka? Keti mambu yina mabundu mingi kelongaka kele ya luvunu?” Keti “mbele ya mpeve” lendaka kubwisa dilongi ya mutindu yai ya mekangamaka ngolo? Na nima  ya kutubila dyaka dyambu yai bambala mingi na nsadisa ya Masonuku, yandi sonikaka mwa bamposo na nima nde: “Nsuka-nsuka, mu meyantika kubakisa kyeleka na yina metala lufwa. Yo kepesa mono kyese mingi na kuzaba nde ntangu lufutumuku tasalama, beto takutana ti bantu ya beto kezolaka yina mefwaka. Mu ketula kivuvu nde Kimfumu ya Nzambi kukwisa nswalu.”

Sadila Yo ti Kundimisa

14. Kundimisa bawi na beto ketendula inki?

¹⁴ Kusadila Biblia mbote-mbote na kisalu ya kusamuna kelombaka kaka ve kutuba na ntu mambu yina kele na baverse. Polo kutubaka ti kundimisa, mpi beto fwete sala mutindu mosi. (Tanga Bisalu 19:8, 9; 28:23.) Kundimisa ketendula “kununga muntu.” Muntu yina bo mendimisa “kendimaka mpenza na mpila nde yandi ketulaka ntima na dyambu mosi.” Ntangu beto kendimisaka muntu na kundima dilongi mosi ya Biblia, beto kenungaka yandi na kutula ntima na dilongi yina. Sambu na kusala yo, beto fwete ndimisa muwi na beto nde mambu ya beto ketuba kele ya kyeleka. Beto lenda sala yo na mitindu yai kelanda.

15. Inki mutindu nge lenda benda dikebi na Biblia na mutindu yina kepusa muntu na kuzitisa yo?

¹⁵Benda dikebi na Ndinga ya Nzambi na mutindu yina kepusa muntu na kuzitisa yo. Na mambu ya nge ketuba na ntwala ya kutanga verse mosi, benda dikebi na mfunu ya kuzaba dibanza ya Nzambi na dyambu yina. Na nima ya kuyula ngyufula mpi ya kuzwa mvutu ya muwi, nge lenda sepela na kutuba dyambu mosi bonso yai, ‘Bika beto tala mutindu beto lenda zaba dibanza ya Nzambi na dyambu yai.’ To nge lenda yula yandi nde, ‘Inki kele dibanza ya Nzambi na dyambu yai?’ Kutuba bangogo ya mutindu yai na ntwala ya kutanga verse kemonisaka nde Biblia mekatuka na Nzambi mpi kesadisaka muwi na kuvanda ti luzitu mingi mpenza sambu na yo. Kusala mutindu yai kele mpenza mfunu ntangu beto ketaka kimbangi na muntu mosi ya kekwikilaka na Nzambi kansi yina meyikanaka ve ti mambu yina Biblia kelongaka.​—Nk. 19:8-11.

16. Inki tasadisa nge na kutendula baverse mbote-mbote?

¹⁶Kusuka kaka ve na kutanga baverse; tendula yo. Polo kuvandaka ti kikalulu ya ‘kutendula mpi kusonga na nsadisa ya Mukanda ya Nzambi’ mambu yina yandi vandaka kulonga. (Bis. 17:3) Mbala mingi verse mosi ya Masonuku kevandaka ti bangindu mingi, mpi nge lenda monisa pwelele bangogo ya mfunu yina kewakana ti mambu yina beno ketubila. Nge lenda sala yo kana nge kevutukila bangogo yina kele ti bangindu ya mfunu to kana nge yula bangyufula yina tasadisa bawi na kuzaba yo. Na nima, pesa ntendula ya kitini yina ya verse. Kana nge sala yo imene, sadisa muwi na nge na kubakisa mutindu verse yina ketadila yandi.

17. Inki mutindu nge lenda yindula na nsadisa ya Masonuku na mutindu yina kendimisa?

¹⁷Yindula na nsadisa ya Masonuku na mutindu yina kendimisa. Na kubondilaka bantu na masonga yonso mpi na nsadisa ya bangindu ya kele na ndonga, Polo kuyindulaka ti bankaka na nsadisa ya Masonuku sambu na kundimisa bo. (Bis. 17:2, 4) Bonso yandi, sala ngolo na kusimba ntima ya muwi na nge. “Basisa” mambu yina kele na kati ya ntima na yandi na kuyulaka bangyufula ya mbote yina kemonisa nde nge ketudila yandi dikebi. (Bing. 20:5) Sala na mpila nde nge konda ve luzitu. Monisa bangindu na mutindu ya pwelele mpi na ndonga. Yo fwete simbama na banzikisa ya kendimisa. Mambu ya nge ketuba fwete katuka mpenza na Ndinga ya Nzambi. Yo kele mbote na kusadila mbote verse mosi yina nge tatendula mpi tamonisa pwelele ngindu na yo na kisika ya kutanga nswalu-nswalu baverse zole to tatu. Kusadila banzikisa yankaka lenda sadisa mpi ‘bantu na kuwa mbote.’ (Bing. 16:23) Bantangu yankaka, yo lenda vanda mbote na kusala bansosa mpi kupesa bansangu yankaka.  Nkento ya bamvula 93 yina beto tubilaka na ntwala kuvandaka ti mfunu ya kuzaba sambu na nki dilongi ya ketubaka nde moyo (to mpeve) kefwaka ve mepanzanaka mingi. Kubakisa kisika dilongi yina kukatukaka mpi mutindu yo kotaka na mabundu mingi ya nsi-ntoto kuvandaka mfunu sambu na kunata yandi na kundima mambu yina Biblia kelongaka sambu na dyambu yina. *

Landa na Kusadila Yo na Mayele Yonso

18, 19. Sambu na nki beto fwete landa na kusadila “mbele ya mpeve” na mayele yonso?

¹⁸ Biblia ketuba nde: “Nsonga ya nsi-ntoto yai ke na kusoba.” Bantu ya mbi kekuma kusala mbi mingi. (1 Kor. 7:31, NW; 2 Tim. 3:13) Yo yina, yo kele mfunu nde beto landa na kubwisa bima yina mekangamaka ngolo na kusadilaka “mbele ya mpeve, disongidila ndinga ya Nzambi.”

¹⁹ Beto kele na kyese mingi mpenza na kuvanda ti Ndinga ya Nzambi, Biblia, mpi na kusadila nsangu na yo ya ngolo sambu na kutumuna malongi ya luvunu mpi kusimba ntima ya bantu ya masonga! Ata kima mosi ve ya mekangamaka ngolo meluta nsangu yina na ngolo. Yo yina, bika beto sala ngolo mpenza sambu na kusadila “mbele ya mpeve” na mayele yonso na kisalu ya kuzabisa Kimfumu yina Nzambi mepesaka beto.

[Banoti na nsi ya lutiti]

Inki Mambu Nge Melonguka?

• Ndinga ya Nzambi kele ngolo na nki kiteso?

• Inki mutindu beto lenda ‘zabisa nsangu ya kieleka mbote-mbote’?

• Inki mambu nsangu ya Biblia lenda sala bima yina mekangamaka ngolo?

• Inki mutindu nge lenda tomisa mutindu na nge ya kundimisa na kisalu ya kusamuna?

[Bangyufula ya Disolo ya Kulonguka]

[Lupangu/Kifwanisu ya kele na lutiti 21]

Mutindu ya Kusadila Ndinga ya Nzambi ti Kundimisa

▪ Pusa bantu na kuzitisa Biblia

▪ Tendula Masonuku

▪ Yindula na mutindu ya kendimisa sambu na kusimba ntima

[Kifwanisu ya kele na lutiti 20]

Nge fwete longuka na kusadila mbote-mbote “mbele ya mpeve”