Keti Bantu Yonso ya Mbote Kekwendaka na Zulu?

NA NIMA ya madya ya nsuka yina Yezu kudyaka ti bantumwa na yandi na nkokila yina kuyitaka lufwa na yandi, Yezu kusilaka na kupesa bo kisika mosi na zulu bonso matabisi. Yandi tubaka nde: “Bisika ya kulala kele mingi na nzo ya Tata; mono ke kwenda kuyidikila beno kisika. Kana mambu yina vandaka ya kieleka ve, mono zolaka kutubila beno yo ve.” (Yoane 14:2) Sambu na nki Yezu zolaka kupesa bo kisika mosi na zulu? Bo takwenda kusala inki kuna?

Yezu vandaka kutubila mukumba mosi ya sipesiali sambu na balongoki na yandi. Kaka na nkokila yina, yandi tubaka nde: “Na bampasi yonso ya mono vandaka kumona, beno vandaka kutina mono ve. Mono ke pesa beno kiyeka ya kuyala na Kimfumu ya Tata na mono mutindu yandi pesaka mono mpi yo.” (Luka 22:28, 29) Nzambi kusilaka Yezu nde yandi zolaka kuvanda Ntotila yina zolaka kulungisa mosi na kati ya bampusa ya kuluta nene ya bantu, disongidila guvernema ya mbote. Yezu tagulusa bantu na bampasi mpi yandi tafwa bantu yina kekusaka bo. Ata bantu yina Yezu tayala tavanda “tii na nsuka ya ntoto,” kiti ya kimfumu na yandi tavanda na zulu.​—Nkunga 72:4, 8; Daniele 7:13, 14.

Kansi, Yezu tayala ve yandi mosi. Yo yina, yandi silaka bantumwa na yandi kisika mosi na zulu. Bo vandaka bantu ya ntete yina yandi ponaka na ‘kuyala nsi-ntoto’ bonso bantotila.​—Kusonga 5:10.

Bantu ikwa takwenda na zulu? Bonso na konso guvernema, bantu yina tayala na Kimfumu ya zulu ya Nzambi kele fyoti na kufwanisa ti bantu yonso yina tazinga na nsi ya kiyeka na yo. Na bantu yina tayala ti yandi, Yezu kutubaka nde: “Beno kuwa boma ve, [kibuka ya fyoti, NW] sambu Tata na beno ke mona kiese na kupesa beno Kimfumu.” (Luka 12:32) Nsukansuka, ntalu ya ‘kibuka yina ya fyoti’ tavanda 144 000. (Kusonga 14:1) Ntalu yina kele fyoti na kufwanisa ti bamilio ya bantu yina tazinga kukonda nsuka na ntoto bonso bantu ya kwikama yina Kimfumu tayala.​—Kusonga 21:4.

Yo yina, bantu yonso ve ya mbote takwenda na zulu. Sambu na yina metala Ntotila ya mbote Davidi, ntumwa Piere kutubaka pwelele nde: “Davidi yandi mosi tombukaka na zulu ve.” (Bisalu 2:34) Yoane Mbotiki kuvandaka muntu ya mbote. Kansi, Yezu kumonisaka nde bo zolaka kutombula yandi ve na zulu sambu na kuyala bonso ntotila. Yandi tubaka nde: “Na kati ya bantu yonso me butukaka awa na nsi-ntoto, ata muntu mosi ve me luta Yoane-Batiste. Kansi muntu yina ke na mfunu mingi ve na kati ya bantu yonso na Kimfumu ya Nzambi yandi me luta Yoane-Batiste na mfunu.”​—Matayo 11:11.

Keti Nge Tabaka Matabisi ya Bantu ya Mbote?

Sambu na kubaka matabisi ya kuzinga mvula na mvula na ntoto, muntu fwete sala inki? Yezu kutubaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Simba nde zola ya Nzambi sambu na bantu mepusaka yandi na kusala na mpila nde bantu yonso kukuka kubaka luzingu ya mvula na mvula, kansi kaka bayina kemonisa lukwikilu tabaka matabisi yina.

Lukwikilu fwete simbama na nzayilu ya sikisiki. (Yoane 17:3) Nge lenda monisa nde nge kele muntu ya mbote kana nge kelonguka mambu mingi na yina metala lukanu ya Yehowa sambu na muntu. Bika nde bisalu na nge kumonisa nde nge kekwikila na mambu ya nge kelonguka. Mpi zaba mbote nde nge mpi lenda baka dibaku ya luzingu ya kukonda nsuka.

 [Lupangu ya kele na lutiti 7]

Biblia Ketubaka Inki?

Ngyufula:

Inki kekuminaka bantu ya mbote kana bo fwa?

Mvutu:

“Bantu ya kufwa kuzaba kima ve.”​—LONGI 9:5.

Ngyufula:

Inki kele kivuvu ya bantu ya mbote sambu na bilumbu kekwisa?

Mvutu:

“Ntangu ke kwisa, bantu yonso yina me fwaka kele na maziamu, bo ta wa ndinga [ya Yezu]; ebuna bo ta basika na maziamu na bo.”​—YOANE 5:28, 29.

Ngyufula:

Na nki kisika bantu mingi ya mbote tazinga?

Mvutu:

“Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”​—NKUNGA 37:29.