Baleke, Beno Kumisa Ngolo Mpusa na Beno ya Kusadila Yehowa

“Yo yina beno yindula Muntu yina salaka beno ntangu beno kele kaka baleki.”​—LO. 12:1.

1. Inki emvitasio bo pesaka bana na Izraele?

BAMVULA kiteso ya 3 500 meluta, Moize, profete ya Yehowa, kupesaka ntuma na banganga-Nzambi mpi bambuta ya Izraele nde: ‘Beno fweti binga bantu yonso: babakala, bankento, bana; mpidina konso muntu lenda kuwa mpi kuzaba kuzitisa Mfumu Nzambi, Nzambi na beno, ti kulanda bansiku na yandi mbote-mbote.’ (Kul. 31:12) Tala banani bo lombaka na kuvukana sambu na lusambu: babakala, bankento, mpi bana. Ee, baleke mpi kuvandaka na kati ya bantu yina bo songaka na kuwidikila, kulonguka, mpi kulanda lutwadisu ya Yehowa.

2. Inki mutindu Yehowa kumonisaka nde yandi vandaka kudibanza sambu na baleke na dibundu ya Bukristu na mvu-nkama ya ntete?

² Na mvu-nkama ya ntete, Yehowa kulandaka na kumonisa nde yandi vandaka kudibanza sambu na baleke yina vandaka kuwa yandi boma. Mu mbandu, yandi pesaka ntumwa Polo mpeve na kukotisa bantuma ya sikisiki sambu na baleke na mikanda yankaka yina yandi tindaka na mabundu. (Tanga Efezo 6:1; Kolosai 3:20.) Baleke ya Bakristu yina kusadilaka bandongisila ya mutindu yai kuyedisaka ntonda na bo sambu na Tata na bo ya zola yina kevandaka na zulu mpi kubakaka balusakumunu na yandi.

3. Inki mutindu baleke kemonisaka mpusa na bo ya kusadila Nzambi bubu yai?

³ Keti bubu yai bo kebinga baleke na kuvukana sambu na kusambila Yehowa? Ee! Yo yina, yo kevandaka nto ya kyese sambu na bantu yonso ya Nzambi na kumona nde baleke mingi mpenza ya kele bansadi ya Nzambi na ntoto ya mvimba kezitisa ndongisila yai ya Polo: “Beto talanaka beto na beto sambu na kupusana na zola mpi na bisalu ya mbote, kukonda kuyambula lukutakanu na beto, bonso bantu yankaka kesalaka yo, kansi beto pesana kikesa bamosi ti bankaka, mpi kuluta mingi mutindu beno kemona kilumbu yango kefinama.” (Baeb. 10:24, 25, NW) Dyaka, bana mingi kelungisaka mambu ya bo kelombaka sambu na kuzabisa nsangu ya Kimfumu ya Nzambi ti bibuti na bo. (Mat. 24:14) Mpi sambu na kumonisa zola na bo ya masonga sambu na Yehowa, konso mvula baleke mingi kebakaka mbotika mpi balusakumunu yina kekatukaka na kuvanda longoki ya Kristu.​—Mat. 16:24; Mar. 10:29, 30.

Ndima Emvitasio Ntangu Yai

4. Inki ntangu baleke lenda ndima emvitasio ya Nzambi ya kusadila yandi?

⁴Longi 12:1 ketuba nde: “Yo yina beno yindula Muntu yina salaka beno ntangu beno kele kaka baleki.” Baleke, bamvula ikwa beno fwete vanda na yo sambu na kundima emvitasio yai ya kyese ya kusambila mpi kusadila Yehowa? Masonuku kepesa ve mvula mosi ya sikisiki. Yo yina, beno vutuka ve nima na kuyindulaka nde beno kele ntete baleke mpenza sambu na kuwidikila Yehowa mpi kusadila yandi. Ata beno kele ti bamvula ikwa, bo kesyamisa beno na kundima emvitasio yai kukonda kusukinina.

5. Inki mutindu bibuti lenda sadisa bana na bo na kuyela na kimpeve?

⁵ Mingi na kati na beno kele ti kibuti mosi to bibuti yonso zole ya kesadisaka beno na kuyela na kimpeve. Kana yo kele mutindu yina, beno kele bonso Timoteo ya ntangu ya ntama. Ntangu yandi vandaka kaka mwana, mama na yandi, Enisi, mpi nkaka na yandi ya nkento, Loisi,  kulongaka yandi masonama ya santu. (2 Tim. 3:14, 15) Ziku, bibuti na beno kelongaka beno mutindu mosi ntangu bo kelongukaka Biblia ti beno, kesambaka ti beno, kenataka beno na balukutakanu ya dibundu mpi ya nene ya bantu ya Nzambi, mpi kesalaka kisalu ya kusamuna ti beno. Ya kyeleka, kulonga beno banzila ya Nzambi kele mukumba ya mfunu mingi yina bibuti na beno mebakaka na Yehowa yandi mosi. Keti nge kemonisaka ntonda sambu bo kezolaka nge mpi kekudibanzaka sambu na nge?​—Bing. 23:22.

6. (a) Na kutadila Nkunga 110:3, lusambu ya nki mutindu kepesaka Yehowa kyese? (b) Inki beto tatadila ntangu yai?

⁶ Ata mpidina, ntangu beno baleke keyela, Yehowa kezola nde beno “kukuma mutindu ya nkaka mpenza. Ebuna beno ta zaba mambu yai ya Nzambi ke zolaka: mambu yina kele ya mbote, mambu yina ke pesaka yandi kiese, mambu yina ke na kifu ve,” kaka mutindu Timoteo kusalaka. (Roma 12:2) Kana beno sala mutindu yina, beno tasala bisalu ya dibundu sambu beno kezola kusala luzolo ya Nzambi, kansi ve sambu bibuti na beno kezola nde beno sala yo. Kana beno sadila Yehowa na luzolo yonso, yo tapesa yandi kyese. (Nk. 110:3) Ebuna, nki mutindu beno lenda monisa nde beno kezola kukumisa ngolo mpusa na beno ya kuwidikila Yehowa mpi ya kulanda lutwadisu na yandi? Beto tatadila mitindu tatu ya mfunu yina beno lenda sala yo. Yo kele kulonguka, kusamba, mpi bikalulu. Bika beto tadila mitindu yai mosi-mosi.

Zaba Yehowa Bonso Muntu

7. Inki mbandu Yezu kupesaka bonso longoki ya Masonuku, mpi nki kusadisaka yandi na kusala buna?

⁷ Mutindu ya ntete yina beno lenda monisa nde beno kezola kukumisa ngolo mpusa na beno ya kusadila Yehowa kele na kutangaka Biblia konso kilumbu. Beno lenda lungisa mpusa na beno ya kimpeve mpi kuzwa nzayilu ya mfunu mingi ya Biblia na kutangaka Ndinga ya Nzambi mbala na mbala. (Mat. 5:3) Yezu kupesaka mbandu. Kilumbu mosi, ntangu yandi vandaka ti bamvula 12, bibuti na yandi kumonaka yandi na tempelo, “yandi me vanda na kati ya balongi ya Bayuda. Yandi vandaka kuwa bo, yandi vandaka kupesa bo bangiufula.” (Luka 2:44-46) Na bumwana, Yezu kuyedisaka dezia mpusa ya ngolo sambu na Masonuku mpi vandaka kubakisa yo. Inki kusadisaka yandi na kusala buna? Ntembe kele ve nde mama na yandi, Maria, ti tata na yandi ya lundi, Yozefi, kusalaka kisalu mosi ya mfunu. Bo vandaka bansadi ya Nzambi yina kulongaka Yezu mambu ya metala Nzambi banda bumwana na yandi.​—Mat. 1:18-20; Luka 2:41, 51.

8. (a) Inki ntangu bibuti fwete yantika na kulonga bana na bo zola sambu na Ndinga ya Nzambi? (b) Ta eksperiansi mosi ya kemonisa mfunu ya kulonga bana banda bumwana?

⁸ Mutindu mosi, bibuti yina ketinaka Yehowa boma bubu yai kebakisaka mfunu ya kukotisa na ntima ya bana na bo mpusa ya ngolo sambu na kyeleka ya Biblia banda na bumwana. (Kul. 6:6-9) Yai kele mambu ya Rubi, mpangi-Mukristu mosi ya nkento, kusalaka ntangu fyoti na nima ya lubutuku ya mwana na yandi ya ntete ya bakala, Joseph. Konso kilumbu, yandi vandaka kutangila yandi Mukanda ya Bankenda ya Biblia. Ntangu yandi vandaka kuyela, Rubi kusadisaka yandi na kukanga na ntu baverse mingi. Keti Joseph kubakaka mambote na malongi yina? Ntangu fyoti na nima ya kuyantika kutuba, yandi lendaka kuta masolo mingi ya Biblia na bangogo na yandi mosi. Mpi ntangu yandi vandaka ti bamvula tanu, yandi salaka disolo na yandi ya ntete na Nzo-Nkanda ya Kisalu ya Teokrasi.

9. Sambu na nki kutanga Biblia mpi kuyindulula mambu ya nge ketanga kele mfunu?

⁹ Beno baleke, sambu kuyela na beno ya kimpeve kulanda na kukwenda na ntwala, beno fwete yedisa kikalulu ya kutanga Biblia konso kilumbu mpi kulanda kusala yo tii kuna beno takuma batoko mpi ntangu beno takuma bambuta. (Nk. 71:17) Sambu na nki lutangu ya Biblia tasadisa beno na kuyela? Beno tala mambu ya Yezu kutubaka na kisambu mosi ya yandi salaka na Tata na yandi: “Kana bo zaba nge Nzambi mosi ya kieleka . . . yo ke songa nde bo ke na moyo ya mvula na mvula.” (Yoa. 17:3) Ya kyeleka, na ntangu beno kelonguka na kuzaba Yehowa mingi, beno tamona yandi mpenza bonso Muntu mosi ya kyeleka mpi beno takumisa ngolo zola na beno sambu na yandi. (Baeb. 11:27) Yo yina, konso ntangu ya nge ketanga kitini mosi ya Biblia, sadila dibaku yina sambu na  kulonguka mambu mingi ya metala Yehowa. Kudiyula nde: ‘Inki disolo yai kelonga mono na yina metala mutindu ya Muntu yina Yehowa kele? Inki mutindu verse yai ya Biblia kemonisa zola ya Nzambi mpi kudibanza na yandi sambu na mono?’ Kubaka ntangu ya kuyindulula bangyufula ya mutindu yai tasadisa nge na kulonguka mutindu Yehowa keyindulaka, kekudiwaka, mpi mambu yina yandi kelomba nge. (Tanga Bingana 2:1-5.) Bonso leke Timoteo, mambu ya nge kelonguka na Masonuku tandimisa nge na kukwikila, mpi yo tapusa nge na kusambila Yehowa na luzolo yonso.​—2 Tim. 3:14.

Mutindu Kisambu Kekumisaka Ngolo Zola na Nge Sambu na Yehowa

10, 11. Inki mutindu kisambu kesadisaka nge na kukumisa ngolo mpusa na nge ya kusadila Nzambi?

¹⁰ Mutindu ya zole yina nge lenda kumisa ngolo mpusa na nge ya kusadila Yehowa na ntima ya mvimba kele na nzila ya bisambu na nge. Na Nkunga 65:3, beto ketanga nde: “Sambu nge ke ndimaka bisambu ya bantu. Bantu yonso fweti kwisa na nge.” Ata na nsungi ya ntangu yina Izraele kuvandaka bantu ya kusalaka kuwakana ti Nzambi, banzenza yina vandaka kukwenda na tempelo ya Yehowa lendaka kupusana na Yandi na kisambu. (1 Bant. 8:41, 42) Nzambi kepona-ponaka ve. Bantu yina kezitisaka bantuma na yandi kendimaka nde yandi tawila bo. (Bing. 15:8) Ya kyeleka, beno baleke mpi kele na kati ya “bantu yonso.”

¹¹ Beto mezaba nde kima kesimbaka kinduku yonso ya kyeleka kele kusolula mbote. Ziku, nge kezolaka kutubila mabanza, basusi, mpi mawi na nge na nduku mosi ya ngolo. Mutindu mosi, na ntangu nge kesalaka bisambu ya masonga, nge kesolulaka ti Ngangi na nge ya Nene. (Filp. 4:6, 7) Tuba na Yehowa bonso nde nge kekangula ntima na kibuti mosi ya zola to na nduku mosi ya ngolo. Nkutu, kuwakana ya ngolo kele na mutindu nge kesambaka mpi mutindu nge kekudiwaka na yina metala Yehowa. Nge tamona nde kana kinduku na nge ti Yehowa kekuma ngolo, bisambu na nge mpi tavanda ya mudindu.

12. (a) Sambu na nki bisambu ya mudindu kesukaka kaka ve na bangogo? (b) Inki tasadisa nge na kubakisa nde Yehowa kele penepene na nge?

¹² Kansi, kuvila ve nde kisambu ya mudindu kesukaka kaka ve na bangogo. Yo kelombaka mpi mawi ya nsi ya ntima na nge. Na bisambu na nge, monisa zola na nge sambu na Yehowa, luzitu ya ngolo, mpi ntima ya mvimba ya nge ketudilaka yandi. Ntangu nge keswasukisa mutindu Yehowa kepesaka mvutu na bisambu na nge, nge tabakisa mpenza nge mosi nde Yehowa “kele penepene na bantu yonso yina ke bingaka yandi.” (Nk. 145:18) Ee, Yehowa tapusana penepene ti nge mpi tapesa nge ngolo ya kunwana ti Satana mpi ya kusala bansola ya mbote na luzingu.​—Tanga Yakobo 4:7, 8.

13. (a) Inki mutindu kinduku ti Nzambi kusadisaka mpangi-nkento mosi? (b) Inki mutindu kinduku ti Nzambi kesadisaka nge na kunwana ti bupusi ya banduku?

¹³ Beto tadila mutindu Cherie kubakaka ngolo ya kekatukaka na kuvanda ti bangwisana ya ngolo ti Yehowa. Na sekondere, yandi bakaka bakado sambu yandi nungaka na nzo-nkanda mpi kusalaka bansaka mbote kuluta. Ntangu yandi manisaka nzo-nkanda, bo pesaka yandi bourse yina zolaka kusadisa yandi na kusala banzo-nkanda ya nda. Cherie ketuba nde: “Bourse yina vandaka kuleba munu, mpi ba entraîneur ti  banduku ya nzo-nkanda vandaka kupusa munu na kundima yo.” Kansi, yandi bakisaka nde kusala banzo-nkanda ya nda zolaka kulomba nde yandi lutisa ntangu mingi na kulonguka mpi kubongisa bansaka​—mpi yandi zolaka kubikala ti mwa ntangu fyoti sambu na kusadila Yehowa. Inki Cherie kusalaka? Yandi ketuba nde: “Na nima ya kusamba Yehowa, mu buyaka bourse yina mpi mu yantikaka kusala kisalu ya kimupasudi-nzila ya ntangu yonso.” Banda ntangu yina, yandi mesalaka bamvula tanu na kisalu ya kimupasudi-nzila. Yandi ketuba nde: “Mu kebokuta ve ata fyoti. Kuzaba nde mu bakaka desizio yina kesepedisa Yehowa kepesaka mono kyese. Ya kyeleka, kana nge tula Kimfumu ya Nzambi na kisika ya ntete, yandi tayika nge bima yonso yankaka.”​—Mat. 6:33.

Bikalulu ya Mbote Kemonisaka nde Nge Kele “Ntima-Mpembe”

14. Sambu na nki bikalulu na nge ya mbote kele mfunu na meso ya Yehowa?

¹⁴ Mutindu ya tatu yina nge lenda monisa nde nge kesadilaka Yehowa na luzolo yonso kele na bikalulu na nge. Yehowa kesakumunaka baleke yina kebikalaka bunkete na bikalulu. (Tanga Nkunga 24:3-5.) Leke Samuele kubuyaka na kulanda bikalulu ya nsoni ya bana ya Nganga-Nzambi ya Nene, Eli. Nzambi mpi bantu vandaka kumona bikalulu ya mbote ya Samuele. Disolo ya Biblia ketuba nde: “Leki Samuele vandaka kuyela kaka; Mfumu Nzambi vandaka kuzola yandi, bantu mpi vandaka kuzola yandi.”​—1 Sam. 2:26.

15. Inki kele mwa bikuma ya kepusaka nge na kutanina bikalulu ya mbote?

¹⁵ Beto kezinga na nsi-ntoto ya mefulukaka ti bantu ya kezolaka ve bantu yankaka, bantu ya lulendo, ya kukonda bulemfu na bibuti, ya kezabaka ve kupesa mersi, ya kukonda kwikama, bantu ya nku, ya kufuluka na lulendo, ya kezolaka byese ya nsi-ntoto kansi Nzambi ve​—kana beto tubila kaka mwa bifu yina Polo kutangaka. (2 Tim. 3:1-5) Yo yina, yo lenda vanda mpasi mpenza sambu na nge na kutanina bikalulu ya mbote na nsi-ntoto yai ya mbi. Kansi, konso ntangu ya nge kesalaka mambu ya mbote mpi kebuyaka bikalulu ya mbi, nge kemonisaka nde nge kele na lweka ya Yehowa na ntembe ya metala luyalu ya luyalanganu ya mvimba. (Yobi 2:3, 4) Nge kele mpi na kyese ya kuzaba nde nge kendima ndongisila yai ya Yehowa: “Vanda mayele mwana na mono, mpi sepedisa ntima na mono, na mpila nde mono lenda pesa mvutu na muntu yina kesosilaka mono.” (Bing. 27:11) Dyaka, kuzaba nde Yehowa kendimaka nge takumisa ngolo mpusa na nge ya kusadila yandi.

16. Inki mutindu mpangi-nkento mosi kupesaka ntima ya Yehowa kyese?

¹⁶ Ntangu yandi vandaka toko, mpangi-nkento mosi na zina ya Carol kukangamaka ngolo na minsiku ya Biblia ntangu yandi vandaka kukwenda na nzo-nkanda, mpi bantu vandaka kumona bikalulu na yandi ya mbote. Inki kusalamaka? Banduku na yandi ya nzo-nkanda vandaka kuseka yandi sambu na kansansa na yandi ya melongamaka na Biblia yina vandaka kupesa yandi ve nzila ya kuvukana na bankinsi mpi mambu yina bantu kesalaka sambu na kukumisa insi. Na mabaku yina, yandi vandaka bantangu yankaka ti dibaku ya kutendula balukwikilu na yandi na bankaka. Bamvula mingi na nima, Carol kuzwaka mukanda ya kukatukaka na nduku na yandi mosi ya ntama, yina kusonikaka nde: “Mu vandaka ntangu yonso kuyindula na kusonikila nge mpi kupesa nge mersi. Mu vandaka kumona bikalulu mpi mbandu na nge ya mbote ya Mukristu, mpi lukanu ya ngolo ya nge vandaka kubaka na kikesa yonso na yina metala bankinsi. Nge vandaka Mbangi ya Yehowa ya ntete ya mu kutanaka ti yandi.” Mbandu  ya Carol kuvandaka na bupusi ya ngolo mpenza na mpila nde na nima, nduku na yandi yina ya nzo-nkanda yantikaka kulonguka Biblia. Yandi sonikaka na mukanda yina yandi tindilaka Carol nde yandi mekumaka Mbangi bamvula 40 meluta! Bonso Carol, beno baleke ya kekangamaka na kikesa yonso na minsiku ya Biblia bubu yai, beno lenda pusa bantu ya ntima ya masonga na kuzaba Yehowa.

Baleke ya Kekumisaka Yehowa

17, 18. (a) Inki mutindu nge kekudiwaka sambu na baleke yina kele na dibundu na beno? (b) Na bilumbu kekwisa, nki mambu kevingila baleke yina kewaka Nzambi boma?

¹⁷ Beto yonso ya kele na organizasio ya Yehowa ya ntoto ya mvimba kevandaka na kyese na kumona baleke mingi ya kikesa yina kevukanaka na lusambu ya kyeleka! Baleke yai kekumisaka ngolo mpusa na bo ya kusambila Yehowa na kutangaka Biblia konso kilumbu, na kusalaka bisambu, mpi na kuvandaka ti bikalulu ya kewakana ti luzolo ya Nzambi. Baleke ya mutindu yai ya kepesaka mbandu ya mbote kepesaka kyese na bibuti na bo mpi na bantu yonso ya Yehowa.​—Bing. 23:24, 25.

¹⁸ Na bilumbu kekwisa, baleke ya kwikama tavanda na kati ya bantu yina taguluka sambu na kukota na nsi-ntoto ya mpa ya Nzambi mesilaka. (Kus. 7:9, 14) Kuna, bo tabaka balusakumunu mingi mpenza na ntangu bo talanda na kuyedisa ntonda na bo sambu na Yehowa, mpi bo takuka kukumisa yandi kukonda nsuka.​—Nk. 148:12, 13.

Keti Nge Lenda Tendula?

• Inki mutindu baleke lenda vukana na lusambu ya kyeleka bubu yai?

• Sambu nge baka mambote na lutangu ya Biblia, sambu na nki kuyindulula kele mfunu?

• Inki mutindu kisambu kesadisaka nge na kukwenda penepene na Yehowa?

• Bikalulu ya mbote ya Mukristu kevandaka ti nki bupusi?

[Bangyufula ya Disolo ya Kulonguka]

[Kifwanisu ya kele na lutiti 17]

Keti nge kele ti kikalulu ya kutanga Biblia konso kilumbu?