Keti Nge Kelanda Kristu Mbote-Mbote?

“Kaka mutindu beno ketambula mpenza, . . . beno landa kusala yo mbote-mbote.”​—1 TES. 4:1, NW.

1, 2. (a) Inki mambu ya nene bantu mingi ya ntangu ya Yezu kumonaka? (b) Sambu na nki ntangu na beto kele mpi ntangu ya mfunu mingi?

KETI nge meyindulaka dezia mutindu yo zolaka kuvanda kitoko kana nge vandaka na luzingu ntangu Yezu kuvandaka na ntoto? Nge lenda yindula kivuvu ya kubelulama na Yezu, ebuna kukutana ve ti bampasi ya bamaladi yankaka. To nge lenda yindula kyese ya kukuka kumona mpi kuwidikila Yezu​—kukuka kulonguka na yandi to kumona yandi kesala mwa bidimbu ya nkumbwa. (Mar. 4:1, 2; Luka 5:3-9; 9:11) Yo zolaka kuvanda dibaku ya nene mpenza na kuvanda pana ntangu Yezu kusalaka mambu yina yonso! (Luka 19:37) Banda na ntangu yina, ata bantu yankaka ve memonaka mambu ya mutindu yina, mpi mambu yina Yezu kusalaka na ntoto “na nzila ya kimenga na yandi mosi” tasalamaka dyaka ve.​—Baeb. 9:26, NW; Yoa. 14:19.

² Kansi, ntangu na beto kele mpi ntangu ya mfunu mingi. Sambu na inki? Sambu beto kezinga na ntangu yina Masonuku kubingaka na ntwala nde “ntangu ya nsuka” mpi “bilumbu ya nsuka.” (Dan. 12:1-4, 9; 2 Tim. 3:1) Na nsungi ya ntangu yai, bo kulaka Satana na zulu. Ntama mingi ve, bo takanga yandi mpi talosa yandi na “dibulu ya nda.” (Kus. 12:7-9, 12; 20:1-3) Kaka na nsungi yai ya ntangu, beto kele mpi na dibaku ya nene ya kuzabisa ‘nsangu ya mbote ya Kimfumu’ na nsi-ntoto ya mvimba, na kuzabisaka bantu mambu ya metala kivuvu ya Paladisu ya kekwisa​—kisalu yina tasalamaka dyaka ve.​—Mat. 24:14.

3. Ntangu fyoti na ntwala ya kutombuka na zulu, Yezu kusongaka balongoki na yandi na kusala inki, mpi yo zolaka kulomba inki?

 ³ Ntangu fyoti na ntwala ya kutombuka na zulu, Yezu kusongaka balongoki na yandi nde: “Beno ta zabisa nsangu na mono na bwala Yeruzalemi, na ntoto ya Yudea yonso, na ntoto ya Samaria yonso, tii na nsuka ya ntoto.” (Bis. 1:8) Kisalu yango zolaka kulomba kulonga na nsi-ntoto ya mvimba. Inki zolaka kuvanda lukanu ya kisalu yina? Kukumisa bantu balongoki​—balongoki yankaka ya Kristu—​na ntwala nde nsuka kukwisa. (Mat. 28:19, 20) Inki beto fwete sala kana beto kezola kununga na kulungisa kisalu yina Kristu kupesaka?

4. (a) Mambu ya Piere kutubaka na 2 Piere 3:11, 12 kemonisa nki mfunu? (b) Beto fwete keba na nki mambu?

⁴ Simba mambu yai ya ntumwa Piere kutubaka: “Bantu ya nki mutindu beno fwete vanda na bisalu ya bikalulu ya santu mpi na bisalu ya kukangama na Nzambi, na kuvingilaka mpi na kuvilaka ve ata fyoti kilumbu ya kuvanda ya Yehowa!” (2 Pie. 3:11, 12, NW) Bangogo ya Piere kemonisa mfunu ya kukangula meso na bilumbu yai ya nsuka sambu na kuzikisa nde beto kelanda kusala mingi bisalu ya kukangama na Nzambi na luzingu na beto. Kisalu ya kusamuna nsangu ya mbote kele na kati ya bisalu yai. Yo yina, beto kele mpenza na kyese ya kumona kikesa yina bampangi na beto ya nsi-ntoto ya mvimba kesalaka sambu na kulungisa kisalu ya kusamuna yina Kristu kupesaka! Kaka na ntangu yina, beto kebakisaka nde beto fwete keba sambu bupusi ya beto kekutanaka ti yo konso kilumbu na nsi-ntoto ya Satana mpi bupusi ya kekatukaka na bampusa na beto mosi ya kinsuni ya beto kebutukaka na yo kufyotuna ve kikesa ya beto kevandaka na yo na kisalu ya Nzambi. Yo yina, bika beto tadila mutindu beto lenda zikisa nde beto kefula na kulanda Kristu.

Ndima Mikumba Yina Nzambi Mepesaka

5, 6. (a) Sambu na nki mambu Polo kusikisaka bampangi na yandi Bakristu ya Yeruzalemi, mpi na nki dyambu yandi kebisaka bo? (b) Sambu na nki beto fwete mona ve mpamba mikumba yina Nzambi mepesaka beto?

⁵ Na mukanda na yandi na Bakristu ya Yeruzalemi, ntumwa Polo kusikisaka bampangi na yandi Bakristu sambu na bamvula ya kwikama ya bo lutisaka na kukanga ntima ata na ntwala ya mbangika. Yandi tubaka nde: “Beno yindula nki mutindu beno vandaka kuzinga ntete na bilumbu yina lutaka. Na bilumbu yina, ntangu beno temukaka imene, beno monaka mpasi mingi, kansi beno tulaka kaka ngolo na kunwana na bampasi yina.” Ee, Yehowa vandaka kuyibuka luzingu na bo ya kwikama. (Baeb. 6:10; 10:32-34) Yo fwete vanda nde bangogo ya tiya ya kusikisa ya Polo kusyamisaka mpenza Bakristu yina ya Baebreo. Kansi, kaka na mukanda yina, Polo kukebisaka bo mpi na kikalulu mosi ya bantu kevandaka na yo yina lenda fyotuna kikesa na bo na kisalu ya Nzambi kana bo yala yo ve. Yandi tubaka nde Bakristu fwete keba na kupesa ve bikuma sambu na kubuya kulanda bansiku ya Nzambi.​—Baeb. 12:25.

⁶ Lukebisu yai ya ketadila kikalulu ya kupesa bikuma sambu na kubuya kundima mikumba yina Nzambi mepesaka ketadila mpi Bakristu bubu yai. Beto kebakisa nde beto fwete vanda ti lukanu ya kumona ve mpamba mikumba na beto ya Bukristu to kupesa nzila nde kikesa na beto sambu na kisalu ya Nzambi kukita. (Baeb. 10:39) Nkutu, kusala kisalu ya santu kele dyambu ya ketadila luzingu mpi lufwa.​—1 Tim. 4:16.

7, 8. (a) Inki tasadisa beto na kutanina kikesa na beto na kisalu ya Nzambi? (b) Kana beto mevidisaka mwa kikesa na beto ya ntete, inki beto fwete vila ve na yina metala Yehowa mpi Yezu?

⁷ Inki tasadisa beto na kupesa ve bikuma sambu na kubuya kulungisa mikumba ya beto kele na yo na ntwala ya Nzambi? Mutindu mosi ya mfunu ya kunwana ti kikalulu yina kele kuyindulula mbala na mbala ntendula ya lusilu ya beto salaka ntangu beto kudipesaka na Nzambi. Na kutuba ya mbote, beto silaka Yehowa nde kusala luzolo na yandi tavandaka na kisika ya ntete na luzingu na beto, mpi beto kezola kulungisa lusilu yina. (Tanga Matayo 16:24.) Yo yina, bantangu yankaka beto fwete pema mpi kudiyula nde: ‘Keti mu kevandaka kaka ti lukanu ya kuzinga na kuwakana ti kudipesa na mono na Nzambi mutindu mu salaka yo na ntangu ya mu bakaka mbotika? To keti mu mevidisaka  kikesa ya mu vandaka na yo ntete na bamvula yina kulandaka?’

⁸ Kana kuditadila na masonga kumonisa nde beto melembisaka maboko na kiteso mosi buna, yo tavanda mbote na kuyibuka bangogo ya kepesa kikesa yina profete Sofonia kutubaka. Yandi tubaka nde: “Maboko na nge kulemba ve! Mfumu Nzambi, Nzambi na beno, kele ti nge, ngolo na yandi ta nungisa nge. Mfumu Nzambi ta mona nge kiese.” (Sof. 3:16, 17) Bangogo yai ya kebwisa ntima vandaka kutadila ntetentete bantu ya Izraele ya ntama yina kukatukaka na kimpika na Babilone mpi kuvutukaka na Yeruzalemi. Kansi, mambu yai kele mpi kyeleka sambu na bantu ya Nzambi bubu yai. Sambu kisalu ya beto kesalaka kele kisalu ya Yehowa, beto fwete vila ve nde Yehowa ti Mwana na yandi kesadisaka mpi kepesaka beto ngolo ya kulungisa mbote-mbote mikumba yina Nzambi mepesaka beto. (Mat. 28:20; Filp. 4:13) Kana beto kesala ngolo na kulanda kusala kisalu ya Nzambi ti kikesa, yandi tasakumuna beto mpi tasadisa beto na kulanda kutoma na kimpeve.

‘Sosa Ntete Kimfumu’ na Kikesa Yonso

9, 10. Inki dibanza kebasika na kingana ya fete ya nene yina Yezu kupesaka, mpi inki dilongi beto lenda baka?

⁹ Ntangu yandi vandaka kudya na nzo ya mfumu mosi ya Bafarize, Yezu kupesaka kingana mosi ya ketubila fete mosi ya nene. Na kingana yina, yandi tubilaka dibaku yina bo pesaka bantu ya kuswaswana na kukuma bantu ya Kimfumu ya zulu. Yandi pesaka mpi ntendula ya “kupesa bikuma.” (Tanga Luka 14:16-21.) Na kingana ya Yezu, bantu yina bo bingaka kupesaka bikuma sambu na kukwenda ve na fete. Mosi kutubaka nde yandi fwete kwenda kutala kilanga ya yandi katukaka kusumba. Yankaka kutubaka nde yandi sumbaka mwa bangombe mpi yandi zolaka kumeka yo kana yo kele ngolo na kusala kisalu. Yankaka dyaka kutubaka nde: ‘Mono kemona mpila ya kwisa ve. Mono mekatuka kukwela.’ Yo vandaka bikuma ya mefwana ve. Mbala mingi, muntu yina mesumba kilanga to bitwisi ketalaka yo na ntwala ya kusumba, yo yina yo vandaka mfunu mpenza ve ya kusala nswalu-nswalu sambu na kutala yo na nima. Mpi sambu na nki muntu ya mekatuka kukwela fwete buya kundima emvitasio ya mfunu ya mutindu yai? Mpila ya kuyituka kele ve na kumona nde muntu yina kubingaka bantu na nzo na yandi kuwaka makasi mpenza!

¹⁰ Bantu yonso ya Nzambi lenda baka dilongi na kingana ya Yezu. Inki dilongi? Beto fwete pesa ve ata fyoti nzila nde mambu na beto mosi, bonso yai ya Yezu kutubilaka na kingana na yandi, kukuma mfunu mingi sambu na beto na mpila nde yo kuma na ntwala ya kisalu ya beto kesadilaka Nzambi. Kana Mukristu mosi ketula ve mambu na yandi na kisika yina yo fwete vanda, kikesa na yandi na kisalu ya kusamuna takita malembe-malembe. (Tanga Luka 8:14.) Sambu na kubuya nde mambu yai kusalama, beto kelandaka ndongisila yai ya Yezu: “Yo yina, beno landa na kusosa ntete Kimfumu ti lunungu na yandi.” (Mat. 6:33, NW) Yo kepesa kikesa mpenza na kumona nde bansadi ya Nzambi​—baleke ti bambuta—​kesadilaka ndongisila yai ya mfunu! Nkutu, mingi mesalaka bansoba sambu na kukumisa luzingu na bo pete na mpila nde bo lutisa ntangu mingi na kisalu ya kusamuna. Bo kemonaka na meso na bo mosi nde kusosa ntete Kimfumu na kikesa yonso kenataka mpenza kyese ya kyeleka.

11. Inki disolo ya Biblia kemonisa mfunu ya kuvanda kikesa mpi kusadila Nzambi na ntima ya mvimba?

¹¹ Sambu na kumonisa mfunu ya kuvanda kikesa na kisalu ya Nzambi, beto tala dyambu mosi ya kusalamaka na luzingu ya Ntotila Yoashi ya Izraele. Sambu yandi vandaka kudiyangisa na mutindu yo vandaka kumonana nde Siria tanunga Izraele, Yoashi kwendaka kudidila Elisa. Profete kuzabisaka yandi na kukangula fenetre mpi kulosa tolotolo na ndambu ya Siria, sambu na kumonisa nde diboko ya Yehowa tanunga dikanda yina. Yo fwete vanda nde dyambu yai kupesaka ntotila ngolo. Na nima, Elisa kusongaka Yoashi na kubaka batolotolo na yandi mpi na kubula yo na ntoto. Yoashi kubulaka yo na ntoto mbala tatu. Elisa kuwaka makasi sambu na dyambu yina, sambu kubula yo na ntoto bambala tanu to sambanu zolaka kumonisa “kubedisa basoda ya Siria kimakulu.” Ntangu yai, Yoashi zolaka kununga Siria kaka  mbala tatu. Sambu yandi salaka mambu kukonda kikesa, Yoashi kunungaka bambala fyoti mpamba. (2 Bant. 13:14-19) Inki dilongi beto lenda baka na disolo yai? Yehowa tasakumuna beto mingi kaka kana beto kesala kisalu na yandi na ntima ya mvimba mpi ti kikesa.

12. (a) Inki tasadisa beto na kutanina kikesa na beto na kisalu ya Nzambi na ntangu beto kenwana ti bampasi ya luzingu? (b) Tubila mambote ya nge kebaka sambu nge kesalaka mingi kisalu ya kusamuna.

¹² Bampasi ya luzingu kemekaka kikesa mpi kudipesa na beto na kisalu ya Nzambi. Bampangi mingi ya babakala ti ya bankento kenwana ti bampasi ya mbongo. Bankaka melembaka nitu sambu maladi mosi ya ngolo ketula bandilu na mambu yina bo lenda sala na kisalu ya Yehowa. Ata mpidina, konso muntu na kati na beto lenda sala bitambi sambu na kuzikisa nde yandi ketanina kikesa na yandi mpi kefula na kulanda Kristu mbote-mbote. Beto kelomba nge na kutala mwa bangindu ti baverse yina kele na lupangu “Inki Tasadisa Nge na Kufula Kulanda Kristu?” Tadila mutindu nge lenda sadila yo mpenza. Kana nge sala yo, nge tabaka mambote ya kyeleka. Kusala mingi kisalu ya kusamuna kesadisaka na kuzinga ti bukatikati, ketomisaka luzingu na beto, mpi kenatilaka beto ngemba mpi kyese mingi. (1 Kor. 15:58) Dyaka, kusala kisalu ya Nzambi na moyo na beto ya mvimba kesadisaka beto na ‘kuvingila mpi na kuvila ve ata fyoti kuvanda ya kilumbu ya Yehowa.’​—2 Pie. 3:12, NW.

Kuditadila na Masonga Yonso

13. Inki mutindu beto lenda zaba kana kusadila Nzambi na moyo ya mvimba ketendula inki sambu na beto?

¹³ Kansi, yo kele mbote na kuyibuka nde kusala na moyo ya mvimba ketadila ve ntalu ya bangunga yina beto kelutisaka na kisalu ya kusamuna. Luzingu ya konso muntu kele yakuswaswana. Muntu yina kelutisa kaka ngunga mosi to bangunga zole na kisalu ya bilanga konso ngonda lenda sepedisa mpenza Yehowa kana yo kele mpenza bangunga yonso yina mavimpi na yandi kepesa yandi nzila ya kusala. (Fwanisa ti Marko 12:41-44.) Yo yina, sambu na kuzaba ntendula ya kusadila Nzambi na moyo ya mvimba, beto fwete tadila na masonga yonso makuki mpi luzingu na beto. Sambu beto kele balongoki ya Kristu, beto mpi kezola kuwakanisa mabanza na beto ti ya yandi. (Tanga Roma 15:5; 1 Kor. 2:16) Inki mambu Yezu kutulaka na kisika ya ntete na luzingu na yandi? Yandi songaka bibuka ya bantu ya katukaka na Kapernaumi nde: “Mono fweti zabisa nsangu ya mbote ya Kimfumu ya Nzambi . . . sambu yina  kele kisina ya mambu ya Nzambi tindilaka mono.” (Luka 4:43; Yoa. 18:37) Ti kikesa ya Yezu sambu na kisalu ya kusamuna na mabanza, tadila luzingu na nge sambu na kumona kana nge lenda sala dyaka mingi na kisalu ya kusamuna.​—1 Kor. 11:1.

14. Na nki mitindu yankaka beto lenda yedisa kisalu na beto ya kusamuna?

¹⁴ Kutadila luzingu na beto ti dikebi lenda nata beto na kusukisa nde beto lenda matisa bangunga yina beto kelutisaka na kisalu ya kusamuna. (Mat. 9:37, 38) Mu mbandu, baleke mingi ya mekatuka kumanisa nzo-nkanda meyedisaka kisalu na bo ya kusamuna mpi ntangu yai bo ke na kubaka kyese yina kekatukaka na kusala kisalu ya kimupasudi-nzila ti kikesa yonso. Keti nge tazola mpi kuvanda na kyese yina? Bampangi yankaka ya babakala mpi ya bankento metadilaka luzingu na bo mpi mebakaka lukanu nde bo lenda kwenda na kisika yankaka na insi na bo to nkutu na insi ya nzenza, kisika bo kele na mfunu mingi ya bansamuni ya Kimfumu. Bankaka dyaka melongukaka ndinga yankaka sambu na kusadisa bantu yina ketubaka ndinga ya nzenza. Ata kuyedisa kisalu na beto ya kusamuna lenda vanda mpasi, yo kenataka balusakumunu mingi, mpi beto lenda sadisa bantu mingi yankaka na “kuzaba mambu ya kieleka.”​—1 Tim. 2:3, 4; 2 Kor. 9:6.

Bambandu ya Biblia ya Beto Fwete Landa

15, 16. Bambandu ya banani beto lenda landa sambu na kuvanda balongoki ya kikesa ya Kristu?

¹⁵ Bantu yankaka yina kukumaka bantumwa kusalaka nki ntangu Kristu kubingaka bo na kuvanda balongoki na yandi? Disolo yango ketuba mutindu yai sambu na Matayo: “Yandi bikisaka bima na yandi yonso, ebuna yandi yantikaka kulanda Yesu.” (Luka 5:27, 28) Sambu na Piere ti Andre, yina vandaka kuloba, beto ketanga nde: “Bo bikisaka babukondi na bo nswalu, ebuna bo landaka yandi.” Na nima, Yezu kumonaka Yakobo ti Yoane, yina vandaka kuyidika babukondi na bo kumosi ti tata na bo. Inki bo salaka na nima ya kuwa emvitasio ya Yezu? “Bo bikisaka bwatu ti tata na bo nswalu, ebuna bo landaka Yesu.”​—Mat. 4:18-22.

¹⁶ Mbandu yankaka ya mbote kele ya Saule, yina kukumaka ntumwa Polo. Ata yandi vandaka kunyokula ngolo balongoki ya Kristu, yandi sobaka luzingu na yandi mpi kukumaka ‘muntu ya Nzambi solaka’ sambu na kunata zina ya Kristu. “Kaka na ntangu yo yina, [Polo] yantikaka kulonga na banzo ya bisambu ya Bayuda nde Yesu kele Mwana-Nzambi.” (Bis. 9:3-22) Mpi ata yo lombaka nde yandi kanga ntima na bampasi mpi minyoku mingi, Polo kuvidisaka ve ata fyoti kikesa na yandi.​—2 Kor. 11:23-29; 12:15.

17. (a) Inki kele mpusa na nge na yina metala kulanda Kristu? (b) Inki balusakumunu beto kebakaka sambu beto kesalaka luzolo ya Yehowa ti ntima mpi ngolo na beto yonso?

¹⁷ Ntembe kele ve nde beto kezola kulanda bambandu ya mbote ya balongoki yina mpi kundima emvitasio yina na kyese yonso mpi na ntima ya mvimba. (Baeb. 6:11, 12) Inki balusakumunu beto kebakaka na ntangu beto kefula kusala ngolo sambu na kulanda Kristu na kikesa yonso mpi mbote-mbote? Beto kebakaka kyese ya kyeleka na kusala luzolo ya Nzambi mpi ya kekatukaka na kundima mabaku yankaka ya kisalu mpi mikumba na dibundu. (Nk. 40:9; tanga 1 Tesalonika 4:1.) Ee, na ntangu beto ketulaka ngolo na kulanda Kristu, beto kebakaka balusakumunu mingi mpi yina tazinga kimakulu bonso ngemba ya mabanza, kyese, kundimama na Nzambi, mpi kivuvu ya luzingu ya mvula na mvula.​—1 Tim. 4:10.

Keti Nge Keyibuka?

• Inki kisalu ya mfunu bo mepesaka beto, mpi nki mutindu beto fwete tadila yo?

• Beto fwete keba na nki kikalulu yina bantu mingi kevandaka na yo, mpi sambu na nki?

• Inki mambu beto fwete tadila na masonga yonso?

• Inki tasadisa beto na kufula kulanda Kristu?

[Bangyufula ya Disolo ya Kulonguka]

[Lupangu/​Kifwanisu ya kele na lutiti 31]

Inki Tasadisa Nge na Kufula Kulanda Kristu?

▪ Tangaka Ndinga ya Nzambi konso kilumbu, mpi yindululaka mambu ya nge ketanga.​—Nk. 1:1-3; 1 Tim. 4:15.

▪ Sambaka mbala mingi sambu na kulomba lusadisu mpi lutwadisu ya mpeve ya Nzambi.​—Zak. 4:6; Luka 11:9, 13.

▪ Vukanaka ti bantu yina kemonisaka kikesa ya masonga sambu na kisalu ya kusamuna.​—Bing. 13:20; Baeb. 10:24, 25.

▪ Ndima nde ntangu yai ya beto kezinga kelomba kusala mambu kukonda kusukinina.​—Ef. 5:15, 16.

▪ Kuvila ve malanda ya mbi ya kekatukaka na kupesa bikuma.​—Luka 9:59-62.

▪ Yindululaka mbala na mbala lusilu ya kudipesa na nge mpi balusakumunu mingi yina kekatukaka na kusadila Yehowa mpi kulanda Kristu na ntima ya mvimba.​—Nk. 116:12-14; 133:3; Bing. 10:22.