Bangyufula ya Batangi

Sambu Yehowa kebuyisaka lusambu ya biteki, sambu na nki yandi pesaka ve Aroni ndola sambu yandi salaka kiteki ya ngombe ya wolo?

Ntangu Aroni kusalaka kiteki ya ngombe ya wolo, yandi kululaka nsiku ya Nzambi ya metala lusambu ya biteki, mutindu Kubasika kapu ya 32 ketuba. (Kub. 20:3-5) Yo yina, “Mfumu Nzambi wilaka mpi Aroni makasi, yandi zolaka kufwa yandi; ebuna na ntangu yo yina mpi [Moize] sambaka sambu na Aroni.” (Kul. 9:19, 20) Keti kisambu ya muntu ya lunungu Moize ‘kusadisaka mingi’ Aroni? (Yak. 5:16) Ee. Sambu na kisambu yai mpi sambu na bikuma zole yankaka, yo kemonana nde Yehowa kupesaka mvutu na kisambu ya Moize mpi kupesaka ve Aroni ndola.

Yo kemonana nde kikuma mosi ketadila luzingu ya kwikama ya Aroni. Ntangu Nzambi pesaka Moize mukumba ya kumonana na ntwala ya Farao mpi kubasisa bana ya Izraele na Ezipte, Yehowa kuponaka Aroni sambu yandi fidisa Moize mpi kutuba na zina ya Moize. (Kub. 4:10-16) Babakala zole yai kumonanaka na bulemfu yonso na ntwala ya ntotila ya Ezipte mbala mingi, mpi kunataka kilo ya ntima-ngolo ya Farao. Yo yina, ntangu bo vandaka kaka na Ezipte, Aroni vandaka kusadila Yehowa na kwikama yonso.​—Kub. 4:21.

Beto tadila mpi mambu yina kupusaka Aroni na kusala kiteki ya ngombe ya wolo. Moize kusalaka bilumbu 40 na Ngumba ya Sinai. Ntangu “bantu ya Israele monaka nde Moize me sukinina na kukulumuka na ngumba,” bo ndimisaka Aroni na kusadila bo kiteki. Aroni kundimaka mpi kusalaka kiteki ya ngombe ya wolo. (Kub. 32:1-6) Kansi, mambu yina Aroni kusalaka na nima kemonisa nde yandi ndimaka mpenza ve kusambila kiteki yina. Yo kemonana nde yandi bwaka na bupusi ya bantu. Mu mbandu, ntangu Moize kumonaka nde bo fwete fwa bantu yina kusambilaka biteki, bana ya Levi yonso​—yika mpi Aroni—​kubakaka lweka ya Yehowa na kikesa yonso. Bo fwaka bansambidi ya biteki mafunda tatu yina kuvandaka na mukumba ya nene na lusambu ya kiteki yina.​—Kub. 32:25-29.

Na nima, Moize kuzabisaka bantu nde: “Beno me sala masumu mpenza.” (Kub. 32:30) Yo yina, Aroni mpamba ve muntu kuvandaka na mukumba na mbi yina kusalamaka. Yandi mpi bantu yankaka kubakaka mambote na mawa ya nene ya Yehowa.

Na nima ya dyambu ya metala kiteki ya ngombe ya wolo, Yehowa kupesaka ntuma nde bo tula Aroni nganga-Nzambi ya nene. Nzambi kuzabisaka Moize nde: “Lwatisa Aroni bilele ya kinganga-Nzambi, tula yandi mafuta na zulu ya ntu; pesa yandi na mono, mpidina yandi ta sadilaka mono.” (Kub. 40:12, 13) Yo ke pwelele nde, Yehowa kulolulaka Aroni sambu na kifu na yandi. Na ntima, Aroni vandaka kukotila lusambu ya kyeleka na kwikama yonso, kansi yandi vandaka ve nkolami yina vandaka kusambila biteki.