Beno Monisa Ve Mpeve Santu ya Yehowa Mawa
Beno Monisa Ve Mpeve Santu ya Yehowa Mawa
“Beno monisa mpeve-santu ya Nzambi mawa ve; sambu mpeve yango kele bonso kidimbu yina ke songa nde beno kele bantu ya Nzambi.”—EF. 4:30.
1. Yehowa mesalaka nki sambu na bamilio ya bantu, mpi nki mukumba bo kele na yo?
YEHOWA mesalaka kima mosi ya sipesiali sambu na bamilio ya bantu yina kezinga na nsi-ntoto yai ya mavwanga. Yandi mesalaka na mpila nde bo kuka kupusana penepene na yandi na nzila ya Mwana na yandi mosi kaka ya kubutuka, Yezu Kristu. (Yoa. 6:44) Kana nge mekudipesaka na Nzambi mpi ke na kuzinga na kuwakana ti kudipesa yina, nge kele mosi na kati ya bantu yai. Sambu nge mebakaka mbotika na zina ya mpeve santu, nge kele ti mukumba ya kuzinga na kuwakana ti mpeve yina.—Mat. 28:19.
2. Inki bangyufula beto tatadila?
2 Beto bantu yina ‘kekunaka sambu na mpeve,’ beto kelwataka kimuntu ya mpa. (Gal. 6:8, NW; Ef. 4:17-24) Kansi ntumwa Polo kelongisila beto mpi kekebisa beto na kumonisa ve mpeve santu ya Nzambi mawa. (Tanga Efezo 4:25-32.) Ntangu yai beto tatadila na dikebi yonso bandongisila yai ya ntumwa Polo. Inki yandi zolaka kutuba ntangu yandi tubilaka kumonisa mpeve ya Nzambi mawa? Inki mutindu muntu yina mekudipesaka na Yehowa lenda sala dyambu ya mutindu yina? Mpi nki mutindu beto lenda buya kumonisa mpeve ya Yehowa mawa?
Mambu Yina Polo Zolaka Kutuba
3. Inki mutindu nge lenda tendula bangogo yina kele na Efezo 4:30?
3 Ntetentete, tala bangogo ya Polo yina kele na Efezo 4:30. Yandi sonikaka nde: “Beno monisa mpeve-santu ya Nzambi mawa ve; sambu mpeve yango kele bonso kidimbu yina ke songa nde beno kele bantu ya Nzambi; yo ke songa mpi nde, ya kieleka, kilumbu kele Nzambi ta gulusa beno.” Polo kuzolaka ve nde bampangi na yandi Bakristu ya zola kutula kimpeve na bo na kigonsa. Na nsadisa ya mpeve ya Yehowa, bo bakaka ‘kidimbu yina kesonga nde kilumbu kele ya Nzambi tagulusa bo.’ Mpeve santu ya Nzambi kuvandaka mpi kele kaka kidimbu yina ‘kesonga mambu yonso ya yandi mebumbilaka’ bapakulami yina ketaninaka kwikama na bo. (2 Kor. 1:22) Kidimbu kemonisa nde bo kele bantu ya Nzambi mpi bo tabaka luzingu na zulu. Ntalu ya nsuka ya bantu yina bo tatula kidimbu kele 144 000.—Kus. 7:2-4.
4. Sambu na nki yo kele mfunu na kubuya kumonisa mpeve ya Nzambi mawa?
4 Kumonisa mpeve mawa lenda vanda kitambi ya ntete ya lenda sala nde ngolo ya kisalu ya Nzambi kusala dyaka ve ata fyoti na luzingu ya Mukristu. Mambu yina Davidi kutubaka na nima ya kusala masumu ti Batsheba kemonisa pwelele nde dyambu yai lenda salama. Davidi kubalulaka ntima mpi kubondilaka Yehowa nde: “Kukula mono ve na meso na nge, kukatula mono ve mpeve na nge.” (Nk. 51:13) Kaka bapakulami yina tasimba ‘lukwikilu na bo tii na lufwa’ bantu tabaka “mpu ya lukumu” ya luzingu ya kukonda kufwa na zulu. (Kus. 2:10; 1 Kor. 15:53) Bakristu yina kele ti kivuvu ya kuzinga na ntoto mpi kele na mfunu ya mpeve santu sambu na kutanina kwikama na bo na Nzambi mpi kubaka dikabu na yandi ya luzingu na nsadisa ya lukwikilu na kimenga ya nkudulu ya Kristu. (Yoa. 3:36; Roma 5:8; 6:23) Yo yina, beto yonso fwete keba na yina metala kumonisa mpeve santu ya Yehowa mawa.
Inki Mutindu Mukristu Lenda Monisa Mpeve Mawa?
5, 6. Inki mutindu Mukristu lenda monisa mpeve ya Yehowa mawa?
5 Sambu beto kele Bakristu ya mekudipesaka, beto lenda buya kumonisa mpeve mawa. Beto lenda sala yo kana beto ‘kelanda na kutambula mpi kuzinga na mpeve,’ (NW) sambu kana beto kesala mutindu yina bampusa ya mbi ya kinsuni tanunga beto ve mpi beto tamonisa ve bikalulu ya mbi. (Gal. 5:16, 25, 26) Kansi yo lenda soba. Beto lenda monisa mpeve ya Nzambi mawa na kiteso mosi buna, kana beto yantika malembe-malembe, ziku kukonda kuzaba, kusala mambu yina Ndinga na yandi ya kupemama na mpeve kebuyisaka.
6 Kana beto landa na kubuya lutwadisu ya mpeve santu, beto tamonisa mawa na mpeve mpi na Yehowa, yina kele Kisina ya mpeve yango. Kutadila Efezo 4:25-32 tasonga beto mutindu beto fwete kuditwadisa mpi yo lenda sadisa beto na kubuya kumonisa mpeve ya Nzambi mawa.
Mutindu ya Kubuya Kumonisa Mpeve Mawa
7, 8. Tendula sambu na nki beto fwete tubaka kyeleka.
7Beto fwete tubaka kyeleka. Na kutadila Efezo 4:25, Polo kusonikaka nde: “Beno bika luvunu! Konso muntu kutubila mpangi na yandi mambu ya kieleka, sambu beto yonso kele bandambu ya Nitu mosi.” Ya kyeleka, sambu beto kele na bumosi bonso “bandambu ya nitu mosi,” beto fwete vanda ve na mayele ya mbi to kusosa na luzolo yonso na kukusa bampangi na beto Bakristu. Nsuka-nsuka, konso muntu yina takwamina na kusala mambu ya mutindu yai tavanda dyaka ve ti bangwisana na Nzambi.—Tanga Bingana 3:32.
8 Bangogo mpi mambu ya luvunu lenda bebisa bumosi ya dibundu. Yo yina, beto fwete vanda bonso Profete Daniele, yina bo vandaka kutudila ntima mpi yina bankaka lendaka ve kumona ata dyambu mosi ya mbi na kisalu na yandi. (Dan. 6:5) Mpi beto fwete yibuka ndongisila yina Polo kupesaka Bakristu yina kele ti kivuvu ya kuzinga na zulu nde konso muntu ya ‘nitu ya Kristu’ kele na kimvuka ti bankaka mpi yandi fwete bikala na bumosi ti balongoki ya Yezu ya kupakulama ya kyeleka. (Ef. 4:11, 12) Kana beto kele ti kivuvu ya kuzinga kimakulu na Paladisu ya ntoto, beto mpi fwete tubaka kyeleka, na mutindu yina kusadisa sambu bumosi kuvanda na kimvuka na beto ya bampangi ya ntoto ya mvimba.
9. Sambu na inki yo kele mfunu nde beto lemfuka na Efezo 4:26, 27?
9Beto fwete vanda bambeni ya Dyabulu, mpi kupesa yandi ve dibaku ya kusala beto mbi na kimpeve. (Yak. 4:7) Mpeve santu kesadisaka beto na kununga Satana. Mu mbandu, beto lenda sala mutindu yina kana beto kewa ve makasi kuluta ndilu. Polo kusonikaka nde: “Kana beno me wa makasi, beno keba, mbaimbai yo ta benda beno na kusala masumu. Beno vanda na makasi ve kilumbu ya mvimba. Beno pesa Satana nzila ve na kuyala beno.” (Ef. 4:26, 27) Kana beto kele ti bikuma ya mbote ya kuwa makasi, kusala kisambu na mbala mosi na ntima lenda sadisa beto na kuvanda “pima,” mpi na kudiyala na kisika ya kusala mambu na mutindu yina lenda monisa mpeve ya Nzambi mawa. (Bing. 17:27) Yo yina, bika nde beto bikala ve na makasi ntangu ya nda mpi kupesa Satana dibaku ya kupusa beto na kusala dyambu mosi ya mbi. (Nk. 37:8, 9) Mutindu mosi ya kununga yandi kele na kuyidikaka mavwanga kukonda kusukinina na kuwakana ti ndongisila ya Yezu.—Mat. 5:23, 24; 18:15-17.
10, 11. Sambu na nki beto fwete yiba ve to kusala mambu ya kukonda masonga?
10Beto fwete bwa ve na konso mpukumuna ya kuyiba to ya kuvanda kukonda masonga. Na yina metala kuyiba, Polo kusonikaka nde: “Muntu yina vandaka kuyiba, yandi kuyiba diaka ve, kansi yandi kusala kisalu ya mbote na maboko na yandi mosi; mpidina yandi ta baka bima yina ya yandi lenda kabila mpi bansukami.” (Ef. 4:28) Kana Mukristu mosi ya mekudipesaka kuyiba, yandi tapesa zina ya ‘Nzambi nsoni.’ (Bing. 30:7-9) Ata kinsukami kepesa ve muntu nswa ya kuyiba. Bantu yina kezolaka Nzambi mpi nkweno kebakisaka nde kele ve ti kikuma ya kepesa muntu nswa ya kuyiba.—Mar. 12:28-31.
11 Polo kutubilaka ve kaka mambu yina beto fwete sala ve, kansi yandi monisaka mpi mambu yina beto fwete sala. Kana beto kezinga mpi ketambula na mpeve santu, beto tasala ngolo sambu beto keba dibuta na beto mpi kuvanda ti “bima yina ya [beto] lenda kabila mpi bansukami.” (1 Tim. 5:8) Yezu ti bantumwa na yandi vandaka kubumba mbongo sambu na kusadisa bansukami, kansi Yudasi Iskariote, muyekudi, vandaka kubaka-baka ndambu ya mbongo. (Yoa. 12:4-6) Ntembe kele ve nde yandi vandaka kubika ve nde mpeve santu kutwadisa yandi. Beto bantu yina mpeve ya Nzambi ketwadisaka, beto kevandaka “na luzolo ya kusala mambu ya mbote konso ntangu,” mutindu Polo kusalaka. (Baeb. 13:18) Kana beto kesala mutindu yina, beto tabuya kumonisa mpeve santu ya Yehowa mawa.
Mitindu Yankaka ya Kubuya Kumonisa Mpeve Mawa
12, 13. (a) Mutindu Efezo 4:29 kemonisa yo, beto fwete buya kutuba ya nki mutindu? (b) Kutuba na beto fwete vanda nki mutindu?
12Beto fwete keba na mambu ya beto ketubaka. Polo kutubaka nde: “Beno tuba mambu ya mbi ve, kansi beno tuba kaka mambu ya mfunu yina lenda sadisa bantu yina ke wa beno.” (Ef. 4:29) Dyaka, Polo ketubila ve kaka mambu yina beto fwete sala ve, kansi yandi kesonga beto mpi mambu yina beto fwete sala. Na nsi ya bupusi ya mpeve ya Nzambi, beto tapusama na ‘kutuba kaka mambu ya mfunu yina lenda sadisa bantu yina kewa beto.’ Dyaka, beto fwete bika ve nde “mambu ya mbi” kubasika na munoko na beto. Bo mesadilaka ngogo ya Kigreki ya bo kebalulaka nde “ya mbi” sambu na kutubila dimbuma, mbisi ya masa, to mbisi ya kupola. Kaka mutindu beto kewaka madya ya mutindu yai nzanzi, beto kemengaka kutuba yina Yehowa kemonaka nde yo kele ya mbi.
13 Mambu ya beto ketuba fwete vanda ya mbote, ya mefwana, mpi “ya mfunu.” (Kol. 3:8-10; 4:6) Ntangu bantu kewa mambu ya beto ketuba, bo fwete kuka kubakisa nde beto kele ya kuswaswana. Yo yina, bika beto sadisa bankaka na kutubaka mambu yina lenda “sadisa” na kutunga bo. Mpi bika nde beto kudiwa bonso muyimbi-bankunga yina kuyimbaka nde: “Mfumu Nzambi, mbote nge ndima mambu ya mono ke tubaka ti ya mono ke yindulaka; nge kele dikunzi na mono, kisika ya mono ke tininaka, nge kele Ngulusi na mono.”—Nk. 19:15.
14. Na kutadila Efezo 4:30, 31, inki beto fwete buya?
14Beto fwete buya ntima ya bululu, makasi, mafingu, mpi mambi yonso. Na nima ya kukebisa na yina metala kumonisa mpeve ya Nzambi mawa, Polo kusonikaka nde: “Beno vanda na ntima ya bululu ve, beno dasuka ve, beno wa makasi mpi ve. Beno tula diaka makelele ve, beno fingana diaka ve. Beno katula konso mabanza ya mbi yina ya beno ke na yo.” (Ef. 4:30, 31) Sambu beto kele bantu ya kukonda kukuka, beto yonso fwete sala ngolo na kuyala mabanza mpi bisalu na beto. Kana beto pesa nzila na ‘ntima ya bululu, kudasuka, mpi makasi,’ pana beto tamonisa mpeve ya Nzambi mawa. Yo kele mpi mutindu mosi kana beto kebumba mambu yonso ya mbi ya bo kesadila beto, kebumba makasi, mpi kebuya kuwakana ti muntu ya mesala beto mbi. Kana beto yantika nkutu na kubuya kulanda bandongisila ya Biblia, beto lenda yedisa bikalulu yina lenda nata beto na kusumuka na mpeve mpi yo lenda natila beto malanda ya mbi.
15. Kana bo mesadila beto dyambu mosi ya mbi, inki beto fwete sala?
15Beto fwete vanda mbote, kuwila bankaka mawa, mpi kulolula. Polo kusonikaka nde: “Beno na beno, beno fweti vanda mbote; konso muntu fweti wila mpangi na yandi mawa, yandi fweti lolula yandi mutindu Nzambi me lolulaka beno sambu na Kristo.” (Ef. 4:32) Ata kana beto mewa mpenza mpasi sambu na dyambu mosi ya mbi ya bo mesala beto, bika beto lolula, mutindu Nzambi kesalaka. (Luka 11:4) Yindula nde mpangi-Mukristu mosi metuba kima mosi ya mbi sambu na beto. Sambu na kuyidika makambu, beto mekwenda kutala yandi. Yandi memonisa mawa ya kyeleka mpi melomba ndolula. Beto melolula yandi, kansi beto fwete sala dyaka mambu mingi kuluta. Levi 19:18 ketuba nde: “Kuvutula mbi ve sambu na mbi ya bantu me sala nge, kubumbila bo mpi kimbeni ve na ntima, kansi zola mpangi na nge bonso nge mosi. Mono kele Mfumu Nzambi.”
Beto Fwete Keba
16. Pesa mbandu ya kemonisa nde beto lenda vanda na mfunu ya kusala bansoba sambu na kumonisa ve mpeve ya Yehowa mawa.
16 Ata na kingenga, beto lenda bwa na mpukumuna ya kusala kima mosi ya kesepedisa ve Nzambi. Mu mbandu, yo lenda vanda nde mpangi mosi vandaka kuwidikila miziki ya mbi. Nsukansuka, kansansa na yandi mekuma kutungisama sambu yandi kesadila ve bandongisila ya Biblia yina kele na mikanda ya “mpika ya kwikama mpi ya mayele.” (Mat. 24:45, NW) Yandi lenda samba sambu na dyambu yai mpi kuyibuka bangogo ya Polo yina kele na Efezo 4:30. Sambu yandi mebaka lukanu ya ngolo ya kusala ve ata kima mosi yina lenda monisa mpeve ya Nzambi mawa, yandi kebaka lukanu ya kubuya miziki ya mbi banda ntangu yai tii kuna. Yehowa tasakumuna mpeve yina mpangi yai kemonisa. Yo yina, bika nde ntangu yonso beto monisa ve mpeve ya Nzambi mawa.
17. Inki lenda salama kana beto kekeba ve mpi kesamba ve?
17 Kana beto keba ve mpi kesamba ve Nzambi, beto lenda bwa na kikalulu mosi ya mvindu to ya mbi yina lenda sala nde beto monisa mpeve mawa. Sambu mpeve santu kebutaka bikalulu yina kemonisaka kimuntu ya Tata na beto ya zulu, yo lenda mona mawa—kima yina beto lenda zola mpenza ve ata fyoti kusala. (Ef. 4:30) Balongi ya bansiku ya Bayuda na mvu-nkama ya ntete kusalaka masumu sambu bo tubaka nde Yezu vandaka kusala bidimbu ya nkumbwa na ngolo ya Satana. (Tanga Marko 3:22-30.) Bambeni yai ya Kristu ‘kuvwenzaka mpeve ya Nzambi,’ mpi na mutindu yina bo salaka masumu yina Nzambi lenda lolula ve. Bika nde beto sala ve mutindu yina ata fyoti!
18. Inki mutindu beto lenda zaba nde beto mesalaka ve masumu yina Nzambi lenda lolula ve?
18 Sambu beto kezola nkutu ve kukuma penepene ya kusala masumu yina Nzambi lenda lolula ve, beto fwete yibuka mambu yina Polo kutubaka na yina metala kumonisa ve mpeve mawa. Kansi, inki beto lenda sala kana beto mesalaka disumu mosi ya nene? Kana beto mebalulaka ntima mpi bankuluntu mesadisaka beto, beto lenda tuba nde Nzambi melolulaka beto mpi nde beto mesumukaka ve na mpeve santu. Ti lusadisu ya Nzambi, beto lenda buya mpi kumonisa dyaka mpeve mawa na konso mutindu yina.
19, 20. (a) Inki kele mwa mambu yina beto fwete buya? (b) Beto fwete vanda ti lukanu ya kusala inki?
19 Na nzila ya mpeve santu na yandi, Nzambi kekotisaka zola, kyese, mpi bumosi na kati ya bantu na yandi. (Nk. 133:1-3) Yo yina, sambu na kumonisa ve mpeve mawa, beto fwete buya kutonga to kutuba mambu yina lenda sala nde bo zitisa ve bangungudi yina bo meponaka na nzila ya mpeve. (Bis. 20:28; Yude 8) Kansi, beto fwete syamisa bumosi ti luzitu na kati ya dibundu. Ya kyeleka, beto fwete syamisa ve tubimvuka ya fyoti na kati ya bantu ya Nzambi. Polo kusonikaka nde: “Bampangi na mono, mono ke bondila beno na zina ya Mfumu na beto Yesu Kristo: Beno wakana, beno yonso, na mambu yina ya beno ke tubaka; mpidina kukabana ta vanda ve na kati na beno. Beno vukana mpenza na mabanza mosi ti na ngindu mosi mpi.”—1 Kor. 1:10.
20 Yehowa kele ti luzolo mpi makuki ya kusadisa beto na kubuya kumonisa mpeve na yandi mawa. Bika beto landa na kusamba sambu na kulomba mpeve santu mpi kuvanda ti lukanu ya kupesa yo ve mawa. Bika beto landa na ‘kukuna sambu na mpeve,’ mpi kusosa lutwadisu na yo na masonga yonso ntangu yai mpi kimakulu.
Inki Mvutu Nge Tapesa?
• Kumonisa mpeve ya Nzambi mawa ketendula inki?
• Inki mutindu muntu yina mekudipesaka na Yehowa lenda monisa mpeve na yandi mawa?
• Na nki mitindu beto lenda buya kumonisa mpeve santu mawa?
[Bangyufula ya Disolo ya Kulonguka]
[Kifwanisu ya kele na lutiti 30]
Yidika mavwanga kukonda kusukinina
[Kifwanisu ya kele na lutiti 31]
Inki dimbuma kemonisa mbote kutuba na nge?