Sambu na Nki Kupesa Minunu Lukumu?

PENEPENE ya lweka ya nzadi ya Californie, na États-Unis, kele ti nti mosi na kati ya banti ya kele na nsi-ntoto yina bo kebakaka bafoto mingi kuluta. Yo mezabanaka na zina ya Sipre (Lone Cypress). Bantu ketubaka nde nti yai kele ti bamvula kuluta 250. Nti yai ya kitoko mezabanaka sambu yo mezingaka mingi mpi bantu ketudilaka yo dikebi na mitindu mingi. Mu mbandu, bo mekangaka yo bansinga ya bibende ya kesimbaka yo mpi bo metulaka matadi ya nene na nsi na yo sambu na kukumisa yo ngolo.

Nti ya Sipre lenda yibusa beto Bakristu ya minunu yina kele na kati na beto, yina kemonisaka kukanga ntima ya kuyituka. Mutindu mosi ya nene yina bo kesalaka yo kele na kuzabisaka nsangu ya mbote. Profete Yoele kutubaka nde ‘bantu ya kununa’ tazabisaka nsangu ya Biblia. (Yoe. 3:1-5; Bis. 2:16-21) Yindula fyoti bangunga mingi kibeni yina bantu yai kelutisaka na kusadisa bankaka na masonga yonso na kulonguka mambu ya metala ‘nsangu ya mbote ya Kimfumu’! (Mat. 24:14) Bansamuni yankaka ya Kimfumu ya minunu mekangaka ntima na minyokudi to bampasi yankaka bamvula mingi. Kana mwa nti ya sipre mezabanaka sambu yo mezingaka mingi mpi bo mesadilaka matadi mpi bansinga ya bibende sambu na kukumisa yo ngolo, minunu yina kele na kati na beto mefwana mpenza nde beto monisila bo ntonda mpi kusadila bo mambu ti lukumu mpi luzitu!

Yehowa Nzambi kupesaka bantu na yandi ya ntama ntuma yai: “Zitisa mbuta-muntu yina me nunaka, mpidina beno ta zitisa mpi mono. Mono kele Mfumu Nzambi.” (Levi 19:32) Na kati ya bansadi ya Yehowa bubu yai, beto kele ti bambandu ya mbote ya Bakristu ya kwikama yina ‘metambulaka ti Nzambi’ banda bamvula mingi. (Mis. 6:8, NW) Na ntangu bo kelanda na kusadila minsiku ya Biblia, nsuki na bo ya mpembe kele mpenza ‘mpu ya kimfumu.’​—Bing. 16:31.

Ntumwa Polo kulongisilaka leke Timoteo nde: “Kunganina mbuta-muntu ve.” Kansi, yo lombaka nde Timoteo ‘kutubila yandi mutindu yandi ketubilaka tata na yandi’ mpi ‘kusala na bankento yina kele bambuta mutindu yandi kesalaka na mama na yandi.’ (1 Tim. 5:1, 2) Ya kyeleka, yo lombaka nde Timoteo ‘kuzitisa’ bantu ya nsuki-mpembe. Yo yina, yo kele pwelele nde Yehowa kevingilaka nde kutuba na  beto kumonisa lukumu ya mutindu yina.

Roma 12:10 ketuba nde: “Beno tula ngolo na kusonga luzitu na beno.” Ya kyeleka, bankengi kepesaka lukumu na Bakristu ya menunaka. Kansi beto yonso fwete tula ngolo na kusonga luzitu na beto.

Ya kyeleka, bantu ya dibuta kele ti mukumba ya sipesiali na ntwala ya bibuti mpi ba-nkaka na bo. Na yina metala Nti ya Sipre, bantu mesosaka bamwaye ya kusadisa sambu na kutanina yo, mpi bo kelanda na kusala mutindu yina. Yo yina, ntembe kele ve nde beto fwete sosa mitindu ya kusadisa sambu na kutanina lukumu ya bibuti mpi ba-nkaka na beto yina kele minunu. Mu mbandu, kuwidikila bo mbote-mbote takanga beto nzila ya kudindamana na kusala mambu na mutindu na beto mosi kukonda kutadila mawi na bo.​—Bing. 23:22; 1 Tim. 5:4.

Minunu yina kele na kati na beto kele na mfunu mingi sambu na Yehowa. Yandi keyambulaka bo ve. (Nk. 71:18) Nzambi ya kyeleka kepesaka bo mpenza ngolo ya kulanda na kusadila yandi na kwikama yonso. Bika nde beto mpi kulanda na kupesa minunu lusadisu mpi lukumu.

[Bifwanisu ya kele na lutiti 13]

Mutindu Nti ya Sipre kevandaka na mfunu ya lusadisu, yo kelombaka kusadila minunu mambu ti luzitu mpi lukumu

[Bangogo ya kemonisa kisina ya foto]

American Spirit Images/age fotostock