Yezu Kristu​—Nsangu na Yandi mpi Nge

“Mono kwisaka na mpila nde bantu kubaka moyo ya mvula na mvula, bo vanda mpi na yo ya kuluta mingi.”​—YOANE 10:10.

YEZU KRISTU kwisaka na ntoto ntetentete sambu na kupesa, kansi ve sambu na kubaka. Na nzila ya kisalu na yandi ya kusamuna, yandi pesaka bantu dikabu mosi ya ntalu mingi​—nsangu yina kumonisaka kyeleka ya metala Nzambi mpi luzolo na yandi. Bantu yina kendimaka nsangu yina lenda vanda ti luzingu ya kyese ntangu yai, mutindu bamilio ya Bakristu ya kyeleka lenda monisa yo. * Kansi kima ya kuluta mfunu ya nsangu yina Yezu kulongaka kele dikabu ya meluta makabu yonso na mfunu—​luzingu ya kukuka yina yandi pesaka sambu na mambote na beto. Mambote na beto ya mvula na mvula ketadila mutindu beto kendima to kebuya kitini yai ya mfunu ya nsangu na yandi.

Mambu yina Nzambi mpi Kristu kupesaka Yezu kuzabaka nde yandi tafwa lufwa mosi ya mpasi na maboko ya bambeni na yandi. (Matayo 20:17-19) Ata mpidina, na bangogo na yandi ya mezabanaka mbote ya kele na Yoane 3:16, yandi tubaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” Yezu kutubaka mpi nde yandi kwisaka sambu ‘na kupesa . . . moyo [to, luzingu] na yandi bonso mbongo ya kukatula bantu mingi na kimpika ya masumu.’ (Matayo 20:28) Sambu na inki yandi tubaka nde yandi zolaka kupesa luzingu na yandi na kisika ya kutuba nde bo zolaka kubaka yo?

Zola ya kuluta nene ya Nzambi kupusaka yandi na kubaka bangidika sambu na kugulusa bantu na masumu yina bo mebakaka na Adami mpi na malanda na yo​—kukonda kukuka mpi lufwa. Nzambi kusalaka yo na ntangu yandi tindaka Mwana na yandi mosi kaka ya kubutukaka na ntoto sambu na kufwa lufwa mosi ya kimenga. Yezu kundimaka na luzolo yonso, mpi kupesaka luzingu na yandi ya kimuntu ya kukuka sambu na mambote na beto. Ngidika yai, ya bo kebingaka nde nkudulu, kele dikabu ya kuluta nene ya Nzambi mepesaka bantu. * Yo kele dikabu yina lenda nata na luzingu ya mvula na mvula.

Mambu ya nge fwete sala Keti nkudulu kele dikabu ya bo mepesaka nge? Yo ketadila nge mosi. Beto baka mbandu: Yindula nde muntu mepesa nge dikabu mosi. Ya kyeleka, yo takuma dikabu na nge kaka kana nge ndima yo. Mutindu mosi, Yehowa kepesa nge nkudulu, kansi dikabu yai takuma ya nge kaka kana nge ndima yo. Inki mutindu?

Yezu kutubaka nde bantu yina “me ndima yandi” to kemonisa lukwikilu na yandi, bo bantu tabaka luzingu ya mvula na mvula. Lukwikilu ketadila mutindu nge ketwadisa luzingu na nge. (Yakobo 2:26) Kumonisa lukwikilu na Yezu ketendula kuwakanisa luzingu na nge ti mambu yina yandi tubaka mpi kusalaka. Sambu na kusala mutindu yina, nge fwete zaba mbote Yezu mpi Tata na yandi. Yezu kutubaka nde: “Kana bo zaba nge Nzambi mosi ya kieleka, ti Yesu Kristo yina ya nge tindaka, yo ke songa nde bo ke na moyo ya mvula na mvula.”​—Yoane 17:3.

Bamvula kiteso ya 2 000 meluta, Yezu Kristu kuzabisaka nsangu mosi yina mesobaka luzingu ya bamilio ya bantu na nsi-ntoto ya mvimba. Keti nge tazola kuzaba mambu mingi na yina metala nsangu yango mpi mutindu nge mpi bantu ya nge kezolaka lenda bakila yo mambote, bubu yai kaka ve, kansi kimakulu? Bambangi ya Yehowa tavanda na kyese ya kusadisa nge.

Masolo yina kelanda tasadisa nge na kuzaba mingi Yezu Kristu, muntu yina kulongaka nsangu mosi yina lenda soba luzingu na nge kimakulu.

[Banoti na Nsi ya Lutiti]