Kukanga Ntima mpi Kununga Bampasi Ntangu Nkwelani Meyekula Nge

MARGARITA mpi bakala na yandi, Raúl, mesadilaka Yehowa kumosi bonso baministre ya ntangu yonso na nsungi ya bamvula mingi. * Kansi ntangu fyoti na nima ya lufwa ya mwana na bo ya ntete, Raúl yantikaka kuyambula Yehowa. Nsukansuka, Raúl kukumaka na luzingu ya mansoni mpi bo basisaka yandi na dibundu ya Bukristu. Margarita ketuba nde: “Ntangu mambu yai yonso kusalamaka, mu vandaka kudiwa bonso nde mu tafwa. Ntima na mono kupasukaka, mpi mu vandaka kuzaba ve kima ya mu fwete sala.”

Ntangu fyoti na nima ya kukwela, bakala ya Jane kuyekulaka ntima ya yandi vandaka kutudila yandi mpi zola na yandi na mutindu yankaka. Yandi yantikaka kubula Jane. Jane ketuba nde: “Mbala ya ntete ya yandi bulaka mono dikofi, mu kumaka bonso kiyungu mpi mu waka mpenza nsoni. Yandi kumaka ti kikalulu ya kubula mono mpi na nima kubondila mono sambu mu lolula yandi. Mu yindulaka nde yo vandaka mukumba na mono ya Bukristu ya kulolula yandi ntangu yonso mpi ya kuvila mambu yango. Mu yindulaka mpi nde mu takonda kwikama kana mu songa dyambu na beto na konso muntu yina​—ata bankuluntu ya dibundu na beto. Kikalulu yai ya kubula mono mpi ya kulolula yandi kuzingaka bamvula mingi. Na ntangu yai yonso, mu yindulaka nde yo vandaka ti kima mosi ya mu lendaka kusala sambu na kupusa bakala na mono na kuzola mono. Nsuka-nsuka ntangu yandi yambulaka mono ti mwana na beto ya nkento, mu  monaka nde mu nungaka ve, nde mu zolaka kusala to kutuba mambu mingi sambu na kutanina makwela na beto.”

Bonso Margarita mpi Jane, nge lenda nyokwama na mawi, kuvanda na mpasi ya mbongo, mpi kunyokwama na kimpeve sambu bakala na nge meyekula nge. To nge lenda vanda bakala yina kenyokwama na mawi mpi kemona mpasi sambu nkento na nge kukondaka kwikama. Ya kyeleka, beto kezinga na ‘bantangu yina kele mpasi na kukangila ntima,’ (NW) mutindu Biblia kutubaka. Mbikudulu yai kemonisa nde na “bilumbu ya nsuka,” bangwisana ya mabuta takutana ti bampasi, mpi na bambandu mingi zola tavanda ve ata fyoti. Bankaka tasala mambu ya kewakana ve ti mutindu bo ketubaka nde bo kesadilaka Nzambi. (2 Tim. 3:1-5) Bakristu ya kyeleka kekutanaka mpi ti mambu ya mutindu yai; yo yina, inki lenda sadisa nge na kununga kana nkwelani na nge meyekula nge?

Kudimona Mutindu Yehowa Kemonaka Nge

Na luyantiku, nge lenda mona nde yo kele mpasi na kundima nde muntu mosi ya nge kezolaka mingi lendaka kulwadisa nge ngolo mutindu yai. Nge lenda yantika nkutu na kudipesa foti sambu na disumu na yandi.

Kansi, kuvila ve nde ata Yezu, muntu ya kukuka, muntu mosi ya yandi vandaka kutudila ntima mpi kuzola kuyekulaka yandi. Yezu kuponaka banduku na yandi ya ngolo, disongidila bantumwa, na nima ya kuyindula mpi kusamba na dikebi yonso. Na ntangu yina, bantumwa yonso 12 kuvandaka bansadi ya kwikama ya Yehowa. Yo yina, ntembe kele ve nde Yezu kuwaka mpenza mawa ntangu Yudasi ‘kuyekulaka’ yandi. (Luka 6:12-16, Kuwakana ya Mpa) Ata mpidina, Yehowa kupesaka ve Yezu foti sambu na mambu ya Yudasi kusalaka.

Yo kele kyeleka nde, ata nkwelani mosi ve kele ya kukuka na ntangu yai. Bankwelani yonso zole tasalaka bifu. Muyimbi-bankunga mosi ya kupemama kusonikaka na pwelele yonso nde: “Kana nge landaka masumu na beto, nani zolaka kubaka ndola ve?” (Nk. 130:3) Na mbandu ya Yehowa, bankwelani yonso zole fwete vanda ti kikalulu ya kulolula bifu ya nkwelani yankaka.​—1 Pie. 4:8.

Kansi, “konso muntu na kati na beto ta samba na meso ya Nzambi sambu na mambu na yandi mosi.” (Roma 14:12) Kana nkwelani mosi mekuma ti kikalulu ya kusadila mafingu to ya kusala mambu ya mbi, yandi muntu fwete samba na ntwala ya Yehowa. Yehowa kebedisaka mubulu mpi mafingu, yo yina kele ve ata ti kikuma mosi ya mbote ya kusadila nkwelani mambu kukonda zola mpi luzitu mutindu yai. (Nk. 11:5; Ef. 5:33; Kol. 3:6-8) Ya kyeleka, kana Mukristu mosi kelutisa ndilu na kuwa makasi mbala na mbala mpi kukonda kubalula ntima, bo fwete basisa yandi na dibundu ya Bukristu. (Gal. 5:19-21; 2 Yoa. 9, 10) Nkwelani fwete mona ve nde yandi mesala mbi kana yandi mezabisa bankuluntu bikalulu ya mbi ya mutindu yai. Ya kyeleka, Yehowa kewaka mawa sambu na bantu yina bo kenyokulaka mutindu yai.

Kana nkwelani mosi kusala bizumba, yandi kesala disumu kaka ve na nkwelani ya mesala kima ve kansi mpi na Yehowa. (Mat. 19:4-9; Baeb. 13:4) Kana nkwelani yina mesala mbi ve kusalaka bikesa na kuzinga na kuwakana ti minsiku ya Biblia, yandi kele ve ti kikuma ya kuyindula nde yandi kele na foti mutindu nkwelani na yandi meyekula yandi na kusalaka bizumba.

Kuvila ve nde Yehowa kezabaka mutindu nge kekudiwa. Yandi kudimonisaka bonso bakala ya dikanda ya Izraele, mpi Ndinga na yandi kele ti baverse mingi ya kesimba ntima yina kemonisa mawa ya yandi waka sambu dikanda yina kusalaka bizumba na kimpeve. (Yez. 54:5, 6; Yer. 3:1, 6-10) Bwisa ntima nde Yehowa kezabaka mbote-mbote mansanga yina nge kebasisaka kana na mutindu mosi buna nkwelani na nge kuyekulaka nge. (Mal. 2:13, 14) Yandi kezabaka nde nge kele na mfunu ya kikesa mpi nsyamisa.

Mutindu Yehowa Kepesaka Kikesa

Mutindu mosi yina Yehowa kepesaka kikesa kele na nzila ya dibundu ya Bukristu. Jane kubakaka lusadisu ya mutindu yai. Jane keyibuka nde: “Viziti ya nkengi ya nzyunga kusalamaka na ntangu yina mu vandaka ya kulemba mpenza na mawi. Yandi zabaka nde mu vandaka kunyokwama na mabanza sambu bakala na mono kufwaka makwela. Yandi bakaka ntangu ya kusadisa mono na kuyindula na nsadisa ya baverse bonso 1 Korinto 7:15. Baverse ya Biblia mpi bangogo na yandi ya mawete kusadisaka na kulembika  mawi ya kumona nde mu mesala mbi mpi kupesaka mono mwa ngemba ya mabanza.” *

Margarita yina beto tubilaka na luyantiku, kulongukaka mpi nde Yehowa kepesaka lusadisu ya mefwana na nzila ya dibundu ya Bukristu. Yandi ketuba nde: “Ntangu yo kumaka pwelele nde bakala na mono kubalulaka ve ntima, mu bakaka bana na mono mpi beto kwendaka na mbanza yankaka. Ntangu beto kumaka, mu zwaka nzo ya kufutila ya vandaka na basuku zole. Na kilumbu ya kulandaka, mu vandaka mpenza mawa-mawa, mu vandaka kukangula basaki na beto ntangu mu waka muntu mosi kekokula na kyelo. Mu yindulaka nde yo vandaka munkwa-nzo, yina vandaka kuzinga na kyelo ya melanda. Mu vandaka na kyese sambu yo vandaka mpangi-nkento yina kulongukaka Biblia ti mama na mono mpi kusadisaka dibuta na beto na kulonguka kyeleka. Yandi kanaka ve na kumona mono kansi yandi kwisaka na nzo yai sambu yandi vandaka kulonguka Biblia ti munkwa-nzo yina. Yo lembikaka mono mpenza​—mu lendaka ve kuyala mawi na mono. Mu tendudilaka yandi mambu na mono, mpi beto zole kudilaka. Mbala mosi yandi bakaka bangidika sambu beto kwenda na lukutakanu kaka na kilumbu yina. Bampangi ya dibundu kuyambaka beto mbote, mpi bankuluntu kubakaka bangidika ya mefwana sambu na kusadisa na kulungisa bampusa ya kimpeve ya dibuta na mono.”

Mutindu Bankaka Lenda Sadisa

Ya kyeleka, bantu ya dibundu ya Bukristu lenda pesa lusadisu ya mefwana na mitindu mingi. Mu mbandu, ntangu yai yo lombaka nde Margarita kuzwa kisalu. Dibuta mosi na dibundu kundimaka na kusadisa na kukeba bana na nima ya nzo-nkanda ntangu bo vandaka na mfunu ya lusadisu.

Margarita ketuba nde: “Kima ya mu kesepelaka na yo mingi kele ntangu bampangi ya babakala mpi ya bankento kendimaka na kubasika ti mono mpi bana na mono na kisalu ya bilanga.” Na kupesaka lusadisu ya mefwana ya mutindu yai, bantu ya dibundu kesadisaka na ‘kubakana bakilo’ mpi na kusalaka mutindu yina bo kelungisaka “nsiku ya Kristo.”​—Gal. 6:2.

Bantu yina kenyokwamaka sambu na masumu ya bankaka kesepelaka mpenza na lusadisu ya mefwana ya mutindu yai. Monique, yina bakala na yandi kuyambulaka yandi, kubikaka yandi ti mfuka ya badolare 15 000, mpi bana iya ya kusansa. Yandi ketuba nde: “Bampangi na mono ya kimpeve ya babakala mpi ya bankento kumonisilaka mono zola mingi. Mu lenda yindula ve mutindu mu lendaka kuzinga kukonda lusadisu na bo. Mu keyindula nde Yehowa kupesaka mono bampangi ya mbote kibeni, yina kudipesaka sambu na kusadisa bana na mono. Mu mebakaka kyese ya kumona mutindu lusadisu ya mutindu yina mesadisaka bana na mono na  kuyela na kimpeve. Ntangu mu vandaka ti mfunu ya bandongisila, bankuluntu vandaka kusadisa mono. Kana mu vandaka ti mfunu ya muntu ya kusolula ti yandi, bo vandaka kuwidikila mono.”​—Mar. 10:29, 30.

Ya kyeleka, nduku ya zola tabakisa ntangu yo mefwana mpenza na kutubila ve disolo ya metadila mambu ya mbi yina mpangi yankaka kukutakana na yo. (Lo. 3:7) Margarita ketuba nde: “Bantangu mingi, mu kesepelaka na kusolula ti bampangi-bankento ya dibundu na mono ya mpa mambu ya metala kisalu ya kusamuna, balongoki na beto ya Biblia, bana na beto​—beto ketubilaka mambu yonso katula makambu na mono. Mu sepelaka sambu bo bikaka nde mu vila mambu yonso yina kukuminaka mono mpi bo sadisaka mono na kuyantika luzingu ya mpa.”

Nwanisa Mpusa ya Kuvutula Mbela

Bantangu yankaka, na kisika ya kumona nde nge kele na foti sambu na masumu ya nkwelani na nge, nge lenda vanda na mpusa ya kuvutula mbela sambu nge kenyokwama ngolo sambu na bifu na yandi. Kana nge bika nde mawi yina kuyela, yo lenda bebisa lukanu na nge ya kubikala ya kwikama na Yehowa. Mu mbandu, nge lenda bwa na mpukumuna ya kusosa mitindu ya kuvutula mbela na nkwelani na nge ya kukonda kwikama.

Kana nge bakisa nde mawi ya mutindu yai keyela na ntima na nge, nge lenda yindulula mbandu ya Yozue ti Kalebi. Babakala yai ya kwikama kutulaka luzingu na bo na kigonsa sambu na kukwenda kutala Ntoto ya Lusilu. Mineki yankaka kukondaka lukwikilu mpi bo pusaka bantu na kubuya kulemfukila Yehowa. Nkutu bantu ya Izraele yankaka zolaka kuta Yozue ti Kalebi matadi ntangu bo sosaka kusyamisa dikanda na kubikala ya kwikama. (Kut. 13:25–14:10) Mambu yina bantu ya Izraele kusalaka, kusalaka nde Yozue ti Kalebi kuyungana na ntoto ya zelo na zelo bamvula 40, sambu na kifu na bo mosi ve, kansi sambu na kifu ya bantu yankaka.

Kansi, ata yo lenda vanda nde Yozue ti Kalebi kulembaka nitu, bo bikaka ve nde masumu ya bampangi na bo kupusa bo na kukangila bo kimbeni. Bo tulaka dikebi na kutanina bukatikati na bo ya kimpeve. Na nsuka ya bamvula 40 ya bo lutisaka na ntoto ya zelo na zelo, bo, kumosi ti bantu ya dikanda ya Levi, bo bakaka matabisi na kugulukaka na kati ya bantu yina mpi bo bakaka nswa ya kukota na Ntoto ya Lusilu.​—Kut. 14:28-30; Yoz. 14:6-12.

Mambu yina nkwelani na nge ya kukonda kwikama kusalaka lenda sala nde nge nyokwama sambu na mwa ntangu mosi buna. Makwela lenda fwa, kansi na nima nge lenda nyokwama na mawi mpi kukutana ti mpasi ya mbongo. Ata mpidina, na kisika ya kubika nde mabanza ya mbi kubebisa bangindu na nge, yibuka nde Yehowa mezaba mbote mutindu ya kusala mambu ti bantu yina kefwaka minsiku na luzolo yonso, mutindu mambu yina kukuminaka bantu ya Izraele ya kukonda kwikama na ntoto ya zelo na zelo kemonisa yo.​—Baeb. 10:30, 31; 13:4.

Nge Lenda Nunga

Na kisika ya kubika nde bangindu ya mbi kulembisa nge, fulusa mabanza na nge na bangindu ya Yehowa. Jane ketuba nde: “Mu monaka nde kuwidikila Nzozulu ya Nkengi mpi Réveillez-vous ! yina bo mekotisaka ndinga na kaseti to na CD kusadisaka mono na kununga. Balukutakanu mpi kuvandaka nto ya nene ya kikesa. Kuvukana na kikesa yonso na balukutakanu kusadisaka na kuyindula dyaka ve mambu na mono. Kisalu ya kusamuna kusadisaka mono na mutindu mosi. Na kusadisaka bankaka na kukwikila na Yehowa, mu kumisaka ngolo lukwikilu na mono mosi. Mpi kulungisa bampusa ya balongoki ya Biblia kusadisaka mono na kutula mabanza na mono kaka na mambu ya kuluta mfunu.”

Monique, yina beto katukaka kutubila, ketuba nde: “Na kukwendaka na balukutakanu mbala na mbala mpi na kuvukanaka na kisalu ya kusamuna mbala mingi na kutadila luzingu na mono, mu kukaka na kukanga ntima. Beto mekumaka na bangwisana ya ngolo na dibundu mpi mu mepusanaka penepene ya bampangi ya dibundu. Bampasi na mono mesadisaka mono na kubakisa bifu na mono. Mu memekamaka, kansi ti lusadisu ya Yehowa mu mekukaka na kununga.”

Nge mpi lenda nunga mimekamu ya mutindu mosi. Ata bampasi yina kuyekula lenda nata, sala ngolo na kulanda ndongisila yai ya kupemama ya Polo: “Beto lemba ve na kusala mambu ya mbote. Sambu, kana beto ke sala kaka, beto ta katula bambuma na ntangu ya mbote.”​—Gal. 6:9.

[Banoti na Nsi ya Lutiti]

[Kifwanisu ya kele na lutiti 31]

Bankwelani yina bo meyambulaka kesepelaka na bantu yina kesadisaka bo na kisalu ya bilanga