“Bantu ya Nki Mutindu Beno Fwete Vanda!”
“Bantu ya Nki Mutindu Beno Fwete Vanda!”
“Sambu mambu yonso kele na kusoba, bantu ya nki mutindu beno fwete vanda na bisalu ya bikalulu ya santu mpi na bisalu ya kukangama na Nzambi.”—2 PIE. 3:11, NW.
1. Sambu na inki mukanda ya zole ya Piere kele ndongisila ya kwisaka na ntangu ya mbote sambu na Bakristu ya bilumbu na yandi?
NTANGU ntumwa Piere kusonikaka mukanda na yandi ya zole ya kupemama, dibundu ya Bukristu kukangaka dezia ntima na bambangika mingi, kansi dyambu yai kukulumusaka ve kikesa na yo mpi kukangaka ve kuyela na yo. Yo yina, Dyabulu kusadilaka metode yankaka, metode yina kunungaka bambala mingi na ntwala. Mutindu Piere kumonisaka yo, Satana kumekaka na kubebisa bantu ya Nzambi na nzila ya balongi ya luvunu yina vandaka ti “meso ya kufuluka ti pite” (NW) mpi “ntima na bo me yikana na kuvanda na nzala ya kubaka mbongo mingi.” (2 Pie. 2:1-3, 14; Yude 4) Yo yina, mukanda ya zole ya Piere kele ndongisila ya ngolo ya yandi kepesa Bakristu na kubikala ya kwikama na Nzambi.
2. Inki mambu bo ketubila mingi na kapu ya 3 ya 2 Piere, mpi nki bangyufula beto fwete kudiyula?
2 Piere kusonikaka nde: “Ntangu mono ke kaka na moyo, mono ke mona mfunu ya kusonga beno na kuyibuka mambu yina sambu na kupesa beno atasio. Sambu mono zaba nde, kubika fioti, mono ta fwa . . . Ebuna mono ta tula kaka ngolo na mpila nde beno kuvila ata fioti ve mambu yina na nima ya lufwa na mono.” (2 Pie. 1:13-15) Ee, Piere kuzabaka nde lufwa na yandi kukumaka penepene, kansi yandi vandaka kuzola nde bantu kuyibuka bangibusa yina yandi pesaka na ntangu ya mbote. Dyaka, mambu yina mekumaka kitini ya Biblia mpi beto yonso lenda tanga yo bubu yai. Kapu ya 3 ya mukanda ya zole ya Piere kele mfunu mingi sambu na beto, sambu yo ketubila mingi ‘bilumbu ya nsuka’ ya ngidika ya bima ya ntangu yai mpi lufwa ya zulu mpi ntoto ya kifwani. (2 Pie. 3:3, 7, 10) Inki bandongisila Piere kepesa beto? Inki mutindu kusadila bandongisila na yandi tasadisa beto sambu Yehowa kundima beto?
3, 4. (a) Inki mambu Piere kutubaka, mpi nki lukebisu yandi pesaka? (b) Inki mambu tatu beto tatadila?
3 Na nima ya kutubila kufwa ya nsi-ntoto ya Satana, Piere kutubaka nde: “Bantu ya nki mutindu beno fwete vanda na bisalu ya bikalulu ya santu mpi na bisalu ya kukangama na Nzambi!” (2 Pie. 3:11, 12, NW) Yo ke pwelele nde, yandi vandaka ve kuyula ngyufula kansi yandi vandaka kutubila dyambu mosi ya beto fwete sala. Piere kuzabaka nde kaka bantu yina kesalaka luzolo ya Yehowa mpi kemonisaka bikalulu yina kesepedisaka yandi bantu taguluka na kilumbu yina yandi takwisa “kuvutula mbi.” (Yez. 61:2) Yo yina, ntumwa kuyikaka nde: “Kansi beno bampangi na mono, beno zaba ntete mambu yina. Yo yina beno keba, mbaimbai bantu ya mbi [balongi ya luvunu] ta kotisa beno na nzila ya mbi, ebuna beno ta tula ngolo diaka ve.”—2 Pie. 3:17.
4 Sambu yandi vandaka na kati ya bantu yina ‘kuzabaka’ mambu na ntwala, Piere kuzabaka nde na bilumbu ya nsuka, yo zolaka kulomba nde Bakristu kukeba mingi sambu na kutanina kwikama na bo. Na nima, ntumwa Yoane kutendulaka pwelele sambu na nki. Yandi monaka na ntwala mutindu bo kulaka Satana na zulu mpi mutindu yandi ‘dasukilaka’ bantu yina “ke landaka bansiku ya Nzambi ti ke ndimaka mambu ya kieleka yina ya Yesu songaka.” (Kus. 12:9, 12, 17) Bapakulami ya kwikama ya Nzambi ti “mameme ya nkaka” yina kele banduku na bo ya kwikama tanunga. (Yoa. 10:16) Kansi nki beto lenda tuba sambu na konso muntu na kati na beto? Keti beto tatanina kwikama na beto? Beto takuka na kusala yo kana beto kesala ngolo na (1) kuyedisa bikalulu ya kesepedisaka Nzambi, (2) kubikala kukonda kifu mpi ditono na bikalulu mpi na kimpeve, mpi (3) kuvanda ti dibanza ya mbote na yina metala mimekamu. Bika beto tadila mambu yai.
Yedisa Bikalulu ya Nzambi Kezolaka
5, 6. Inki bikalulu beto fwete sala ngolo na kuyedisa, mpi sambu na nki yo kelombaka kusala “ngolo kibeni”?
5 Na luyantiku ya mukanda na yandi ya zole, Piere kusonikaka nde: “Na kusalaka ngolo kibeni, beno yika na lukwikilu na beno bikalulu ya mbote, na bikalulu na beno ya mbote nzayilu, na nzayilu na beno kudiyala, na kudiyala na beno kukanga ntima, na kukanga ntima na beno kukangama na Nzambi, na kukangama na beno na Nzambi zola ya bumpangi, na zola na beno ya bumpangi zola. Sambu kana bima yai kele na kati na beno mpi yo kekuma mingi, yo tabuyisa beno na kukuma bumolo, to kukonda kubuta bambuma na yina metala nzayilu ya kyeleka ya Mfumu na beto Yezu Kristu.”—2 Pie. 1:5-8, NW.
6 Ya kyeleka, yo kelombaka kusala “ngolo kibeni” sambu na kuvukana na bisalu yina kesadisaka beto na kuyedisa bikalulu ya kesepedisaka Nzambi. Mu mbandu, yo kelombaka bikesa na kukwenda na balukutakanu ya dibundu, na kutanga Biblia konso kilumbu, mpi na kutanina manaka ya mbote ya kulonguka na beto mosi. Mpi yo lenda lomba kusala ngolo mpi kuvanda na manaka ya mbote sambu na kuvanda na nkokila ya Lusambu ya Dibuta ya kyese, ya mfunu, mpi ya kesalama mbala na mbala. Kansi ntangu beto kekumaka ti kikalulu ya kusala mambu yai mbala na mbala, bikalulu ya mbote kekumaka pete kibeni—mingi-mingi ntangu beto kebakaka mambote.
7, 8. (a) Inki mambu bantu yankaka kutubaka na yina metala nkokila ya Lusambu ya Dibuta? (b) Inki mutindu nge kebakaka mambote na nkokila ya lusambu ya dibuta?
7 Na yina metala lusambu ya dibuta, mpangi-nkento mosi kusonikaka nde: “Yo kesadisaka beto na kulonguka masolo mingi.” Mpangi yankaka ketuba nde: “Na kutuba ya masonga, mu vandaka kuzola ve nde kulonguka ya mukanda kusuka. Yo vandaka lukutakanu ya mu vandaka kuzola mingi. Kansi ntangu yai, mutindu beto kele na nkokila ya Lusambu ya Dibuta, mu mebakisaka nde Yehowa kezabaka mambu yina beto kele na yo mfunu mpi ntangu yina beto kele na mfunu na yo.” Mfumu ya dibuta mosi ketuba nde: “Lusambu ya dibuta kesadisaka beto mingi kibeni. Kuvanda ti lukutakanu yina bo mebongisa na kutadila bampusa na beto ya sikisiki bonso bankwelani kele mbote mpenza! Beto zole kemonaka nde beto ketomisaka mutindu na beto ya kumonisa mbuma ya mpeve santu, mpi beto kele na kubaka kyese mingi na kisalu ya kusamuna.” Mfumu yankaka ya dibuta ketuba nde: “Bana kesalaka bansosa na bo mosi mpi kelongukaka mambu mingi—mpi bo kesepelaka na yo. Ngidika yai kesadisaka beto na kutula ntima mingi nde Yehowa mezaba basusi na beto mpi kepesaka mvutu na bisambu na beto.” Keti mawi yai kemonisa mutindu nge ketadilaka ngidika yai ya kitoko ya kimpeve?
8 Beno pesa ve nzila na bima ya kukonda mfunu nde yo baka kisika ya Lusambu ya Dibuta. Mpangi-bakala mosi ti nkento na yandi kutubaka nde, “Konso Kiya na nkokila na bamposo iya ya mekatuka kuluta, dyambu mosi vandaka kubasika na dibuta na beto mpi yo vandaka kukanga beto nzila na kulonguka, kansi beto bikaka ve nde yo baka kisika ya kulonguka.” Ya kyeleka, bantangu yankaka yo lenda lomba nde beno soba manaka na beno. Kansi, beno vanda na lukanu ya kuyambula ve nkokila ya Lusambu ya Dibuta—ata sambu na mposo mosi!
9. Inki mutindu Yehowa kutaninaka Yeremia, mpi nki beto kelonguka na mbandu na yandi?
9 Profete Yeremia kele mbandu ya mbote sambu na beto. Yandi vandaka na mfunu ya madya ya kimpeve ya kekatukaka na Yehowa mpi yandi vandaka kusepela na yo mingi. Madya yina kusadisaka yandi na kusamuna ti kukanga-ntima na bantu yina vandaka kuzola ve kuwa nsangu na yandi. Yandi tubaka nde: “Mambu na nge [Yehowa] ke pela na ntima na mono bonso tiya, yo me kota mono tii na mikwa.” (Yer. 20:8, 9) Yo sadisaka yandi mpi na kukanga-ntima na bantangu ya mpasi yina kukumaka ngolo mingi ntangu bo fwaka Yeruzalemi. Bubu yai, beto kele na Ndinga ya Nzambi ya kusonama na mvimba na yo. Kana beto kelonguka yo na dikebi yonso mpi kekumisa mabanza ya Nzambi mabanza na beto, bonso Yeremia beto takuka kukanga-ntima na kyese yonso na kisalu ya kusamuna, kubikala ya kwikama na mimekamu, mpi kuvanda kaka bunkete na bikalulu mpi na kimpeve.—Yak. 5:10.
Bikala “Kukonda Kifu” mpi Kukonda Ditono
10, 11. Sambu na inki beto fwete sala ngolo sambu na kubikala “kukonda kifu” mpi kukonda ditono, mpi yo kelomba nde beto sala inki?
10 Beto Bakristu, beto mezaba nde beto kezinga na bilumbu ya nsuka. Yo yina, beto keyitukaka ve na kumona nde nsi-ntoto kesepelaka mingi ti mambu yina Yehowa kemengaka, mu mbandu bwimi, masumu ya kuvukisa nitu, mpi nku. Beto lenda tubila metode ya Satana na bunkufi na bangogo yai: ‘Kana yandi lenda pesa ve bansadi ya Nzambi boma, ziku yandi lenda bebisa mabanza ti bikalulu na bo.’ (Kus. 2:13, 14) Yo yina, beto fwete landa ndongisila yai ya zola ya Piere: ‘Beno tula ngolo na kuvanda kukonda kifu mpi kukonda ditono na meso ya Nzambi, beno tula mpi ngolo sambu na kuzinga na ngemba ti yandi.’—2 Pie. 3:14.
11 Bangogo “beno tula ngolo” mefwanana ti nsyamisa yina Piere kupesaka ntete ya kusala “ngolo kibeni.” Yo ke pwelele nde Yehowa—muntu yina kupesaka Piere mpeve sambu na kumonisa mawi yai—mezaba nde beto fwete sala ngolo sambu na kubikala “kukonda kifu” mpi kukonda ditono, disongidila kukonda kubebisama na mansoni ya nsi-ntoto ya Satana. Kusala ngolo ketadila mpi kutanina ntima na beto sambu bampusa ya mbi kubebisa yo ve. (Tanga Bingana 4:23; Yakobo 1:14, 15.) Yo ketadila dyaka kuvanda ngolo na ntwala ya bantu yina keyitukaka na yina metala luzingu na beto ya Bukristu mpi yina “ke vwenzaka” beto.—1 Pie. 4:4.
12. Luka 11:13 kendimisa beto inki?
12 Sambu na kukonda kukuka na beto, yo kele mpasi na kusala mambu ya mbote. (Roma 7:21-25) Beto lenda tula ntima na kununga kaka kana beto kwenda na Yehowa, yina kepesaka mpeve santu na zola yonso na bantu yina kelombaka yandi yo na masonga. (Luka 11:13) Na nima, mpeve yina keyedisaka na kati na beto bikalulu yina kesalaka nde Nzambi kundima beto mpi yina kesadisaka na kununga kaka ve bampukumuna ya beto kekutanaka ti yo na luzingu kansi mpi mimekamu na yo, yina lenda kuma mingi mutindu kilumbu ya Yehowa kefinama.
Bika nde Mimekamu Kukumisa Nge Ngolo
13. Ntangu beto kekutanaka ti mimekamu, inki tasadisa beto na kukanga-ntima?
13 Na ntangu beto kezinga na ngidika yai ya ntama ya bima, beto takutanaka ntangu yonso ti mimekamu ya mutindu na mutindu. Kansi na kisika ya kulemba nitu, sambu na nki ve kumona mimekamu yina bonso dibaku ya kundimisa zola na nge sambu na Nzambi mpi kukumisa ngolo lukwikilu na nge na yandi mpi na Ndinga na yandi? Longoki Yakobo kusonikaka nde: “Bampangi na mono, kana bampasi ya mutindu na mutindu ke bwila beno, beno fweti baka yo bonso mambu mosi ya kiese; sambu beno zaba nde, kana lukwikilu na beno kele kaka ata na ntangu ya mpasi, mpidina ke songa nde beno zaba kukanga ntima.” (Yak. 1:2-4) Beto fwete yibuka mpi nde Yehowa “kuzaba nki mutindu yandi fweti katula bantu na yandi na mpasi.”—2 Pie. 2:9.
14. Inki mutindu mbandu ya Yozefi kepesa beto kikesa?
14 Beto tadila mbandu ya Yozefi, mwana ya Yakobo, yina bampangi na yandi kutekaka yandi na kimpika. (Kuy. 37:23-28; 42:21) Keti lukwikilu ya Yozefi kulembaka sambu na dyambu ya nku yina bo sadilaka yandi? Keti yandi wilaka Nzambi makasi sambu yandi pesaka nzila nde Yozefi kukutana ti mambu ya mbi? Ndinga ya Nzambi kepesa mvutu ya pwelele nde ve! Dyaka, mimekamu ya Yozefi kusukaka ve pana. Na nima, bo fundaka yandi na luvunu yonso nde yandi zolaka kuladisa nkento ya Potifare na kingolo-ngolo mpi bo tulaka yandi na boloko. Kansi na mbala yai mpi, yandi bikalaka ngolo na kukangama na yandi na Nzambi. (Kuy. 39:9-21) Yandi bikaka nde mimekamu kukumisa yandi ngolo, mpi Nzambi kusakumunaka yandi mingi sambu yandi salaka mutindu yina.
15. Inki beto lenda longuka na mbandu ya Noemi?
15 Ya kyeleka, mimekamu lenda pesa beto mawa to nkutu kulembisa beto na mabanza. Ziku Yozefi kudiwaka mutindu yina bantangu yankaka. Ntembe kele ve nde bansadi yankaka ya Nzambi mpi kudiwaka mutindu yina. Beto tadila mbandu ya Noemi, yina bakala na yandi ti bana na yandi zole ya babakala kufwaka. Yandi tubaka nde: “Beno kubinga mono Noemi (disongidila nde kimona-mbote) diaka ve, kansi beno binga mono Mara (disongidila nde kimona-mpasi) sambu [Nzambi Nkwa-Ngolo Yonso] me salaka mono mambu mosi ya mawa mpenza.” (Ruti 1:20, 21) Noemi kusalaka mambu kaka mutindu bantu mingi zolaka kusala mpi beto lenda bakisa sambu na nki yandi salaka mutindu yina. Kansi, bonso Yozefi yandi bebisaka ve kimpeve na yandi mpi kufwaka ve kwikama na yandi. Na nima, Yehowa kusakumunaka nkento yai ya mfunu mingi. (Ruti 4:13-17, 22) Kima ya kuluta mfunu kele nde, na Paladisu ya ntoto yina kekwisa, yandi takatula mambi yonso yina Satana ti nsi-ntoto na yandi ya mbi mesalaka. Biblia ketuba nde: “Makambu ya ntama bantu ta yindula yo diaka ve, yo ta kwisila bo mpi ve na mabanza.”—Yez. 65:17.
16. Inki fwete vanda nkadilu na beto na yina metala kisambu, mpi sambu na nki?
16 Ata beto kutana ti konso mumekamu yina, zola ya Nzambi tasadisa beto. (Tanga Roma 8:35-39.) Ata Satana tayambula ve na kumeka na kulembisa beto, yandi takuka ve kana beto kelanda ‘kuyindula mbote-mbote,’ ‘kekangula meso’ mpi kesamba mpenza. (1 Pie. 4:7) Yezu kutubaka nde: “Beno lala mpongi ve, beno samba [to “kudodokila,” NW] Nzambi ntangu yonso, mpidina beno ta baka ngolo ya kutina mambu yonso yina ta bwa. Beno ta baka mpi ngolo ya kutelama na meso ya Mwana-muntu.” (Luka 21:36) Beno simba nde Yezu kusadilaka ngogo “dodokila,” yina kele kisambu ya masonga mpenza. Na kulongisilaka beto na kudodokila, Yezu kumonisaka nde yai kele ve ntangu ya kumona mpamba lukumu na beto na ntwala na yandi mpi ya Tata na yandi. Kaka bantu yina Yehowa kendimaka bantu tavanda ti kivuvu ya kuguluka na kilumbu na yandi.
Vanda Kaka Kikesa na Kisalu ya Yehowa
17. Kana kisika ya nge kesamunaka kele mpasi, nki mutindu nge lenda baka mambote na mbandu ya mbote ya bambikudi ya ntama?
17 Kusala bisalu ya kimpeve kepesaka beto kikesa. Yo keyibusa beto bangogo yai ya Piere: “Bantu ya nki mutindu beno fwete vanda na bisalu ya bikalulu ya santu mpi na bisalu ya kukangama na Nzambi!” (2 Pie. 3:11, NW) Kusamuna nsangu ya mbote kele kisalu ya kuluta mfunu na kati ya bisalu yina yonso. (Mat. 24:14) Ya kyeleka, na bateritware yankaka kisalu ya kusamuna lenda vanda mpasi, ziku sambu bantu ketulaka ve dikebi to sambu na kimbeni to kaka sambu bantu kekudiyangisaka mingi sambu na basusi ya luzingu ya konso kilumbu. Yo vandaka kulomba nde bansadi ya Yehowa ya ntangu ya ntama kunwana ti mambu ya mutindu mosi. Ata mpidina, bo yambulaka ve ata fyoti kansi bo landaka na kukwenda kulonga “mbala na mbala” nsangu yina Nzambi kupesaka bo. (Tanga 2 Bansangu 36:15, 16; Yer. 7:24-26) Inki kusadisaka bo na kukanga-ntima? Bo vandaka kutadila kisalu na bo mutindu Yehowa vandaka kutadila yo, kansi ve mutindu nsi-ntoto vandaka kutadila yo. Dyaka, bo vandaka kumona nde kunata zina ya Nzambi kele lukumu ya kuluta nene.—Yer. 15:16.
18. Inki bupusi kisalu ya kusamuna Kimfumu kele na yo na mutindu zina ya Nzambi takumisama na bilumbu kekwisa?
18 Beto mpi, beto kele ti dibaku ya mbote ya kuzabisa zina mpi lukanu ya Yehowa. Yindula dyambu yai: Ntangu Nzambi tasambisa bambeni na yandi na kilumbu na yandi ya nene, bo takuka ve kutuba nde bo mesongaka bo ntete ve mambu ya metala yandi mpi balukanu na yandi. Ya kyeleka, bonso Farao ya ntama, bo tazaba nde Yehowa muntu ke na kunwanisa bo. (Kub. 8:1, 20; 14:25) Kaka na ntangu yina, Yehowa tapesa bansadi na yandi ya kwikama lukumu na kumonisaka pwelele mpenza nde, bo vandaka mimonisi na yandi.—Tanga Ezekiele 2:5; 33:33.
19. Inki mutindu beto lenda monisa nde beto kezola kusadila mbote kukanga-ntima ya Yehowa?
19 Penepene ya nsuka ya mukanda na yandi ya zole, Piere kusonikilaka bampangi na yandi Bakristu nde: ‘Beno fweti baka kukanga ntima yina ya Mfumu na beto bonso nzila ya kuguluka.’ (2 Pie. 3:15) Ee, bika beto landa na kusadila mbote kukanga-ntima ya Yehowa. Inki mutindu? Na kuyedisaka bikalulu yina kesepedisaka yandi, na kubikalaka “kukonda kifu” mpi kukonda ditono, na kuvandaka ti nkadilu ya mbote na ntwala ya mimekamu, mpi na kusalaka mingi na kisalu ya Kimfumu. Kana beto sala mutindu yina, beto tavanda na kati ya bantu yina tabaka balusakumunu ya kukonda nsuka yina takwisa kumosi na “zulu ya mpa ti ntoto ya mpa.”—2 Pie. 3:13.
Keti Nge Keyibuka?
• Inki mutindu beto lenda yedisa bikalulu ya kesepedisaka Nzambi?
• Inki mutindu beto lenda bikala “kukonda kifu” mpi kukonda ditono?
• Inki beto lenda longuka na mbandu ya Yozefi mpi Noemi?
• Sambu na inki kuvukana na kisalu ya kusamuna kele dibaku mosi ya nene?
[Bangyufula ya Disolo ya Kulonguka]
[Kifwanisu ya kele na lutiti 21]
Inki tasadisa beno babakala na kuyedisa bikalulu ya kesepedisaka Nzambi na beno mosi mpi na mabuta na beno?
[Bifwanisu ya kele na lutiti 23]
Inki beto lenda longuka na mutindu Yozefi kutadilaka mimekamu?