Batangi na Beto Keyula . . .

Keti Nzambi Kuvandaka ti Luyantiku?

▪ Biblia kepesa mvutu nde Nzambi kuvandaka ve ti luyantiku. Nzambi kevandaka ntangu yonso. Ata yo kele mpasi na kubakisa dibanza ya kemonisa nde Nzambi kevandaka kimakulu, beto lenda buya ve dibanza yina kaka sambu beto lenda bakisa yo ve mbote-mbote.

Keti yo mefwana mpenza nde beto vingila nde beto bakisa banzila yonso ya Nzambi? Ntumwa Polo kutubaka nde: “Nzambi ke na kimvwama mingi mpenza! Mayele na yandi ti mambu yina ya yandi zaba yo ke kwendaka ntama mpenza! Nani lenda tendula mambu yina ya yandi ke zengaka? Nani lenda landa banzila na yandi?” (Roma 11:33) Mabanza na beto lenda bakisa ve mbote-mbote mudindu ya mayele mpi ya nzayilu ya Nzambi kaka mutindu mwana-fyoti lenda bakisa mpenza ve banzila yonso ya kibuti mosi. Ata bangogo yai ya kupemama ya Polo ketadila ntetentete mutindu mayele mpi mawa ya Nzambi kele mpenza ya kuswaswana, yo kemonisa nde kele ti mambu ya metala Yehowa Nzambi mpi bisalu na yandi yina kele mudindu mpenza sambu mabanza na beto kubakisa yo. Yo kemonana nde dibanza ya ketuba nde Nzambi kele ve ti luyantiku kele mosi na kati ya mambu yango. Ata mpidina, beto lenda tula ntima ya mvimba na mambu ya Biblia kelongaka na yina metala Nzambi. Yezu Kristu kutubaka mutindu yai na yina metala masonama ya santu: “Ndinga na nge kele kyeleka.”​—Yoane 17:17, NW.

Moize kutubaka mutindu yai na kisambu mosi ya yandi salaka na Yehowa: “Nge kele kaka Nzambi tii kuna; na nge, luyantiku to nsuka kele ve.” (Nkunga 90:2) Awa Moize kemonisa nde luzingu ya Nzambi kekwenda na bandambu zole. Ndambu mosi kele makwisa. Yehowa kele “muntu yina . . . ke zingaka mvula na mvula.” (Kusonga 4:10) Yo yina, luzingu ya Nzambi kekwenda tii na makwisa ya kimakulu. Ndambu yankaka kele bilumbu melutaka. Na bangogo yankaka, Nzambi kugangamaka ve mpi yandi kwisaka ve na luzingu. Kansi, yandi mevandaka na luzingu banda na bantangu ya kukonda nsuka.

Yo kevandaka mpasi sambu na bantu mingi na kati na beto na kubakisa mambu ya metala bima yina kemonanaka ve. Ata mpidina, bantangu yankaka beto kendimaka mambu yankaka ya mpasi, bonso kutanga bantalu ya kemata mpi ya kekulumuka (nombres positifs et négatifs). Kutanga bantalu lenda landana kukonda nsuka, na kumataka to na kukulumukaka. Keti beto lenda sadila ve mbandu yai na bamvula ya luzingu ya Ngangi?

Yo yina, yo mefwana nde Nzambi mpamba kuvanda ti titre ya kuswaswana ya “Ntotila ya kimakulu.” (1 Timoteo 1:17, NW) Yindula fyoti: Yezu Kristu, bawanzyo mingi na zulu, mpi bantu ya kele na ntoto, bo yonso kuvandaka ti luyantiku sambu Nzambi kugangaka bo. (Kolosai 1:15, 16) Yo kele ve mutindu yina sambu na Nzambi. Kudindamana nde yo fwete vanda nde Nzambi kugangamaka kekotisa dibanza ya kukonda mfunu mpi ya mekonda banzikisa ya metala muntu yina kugangaka Ngangi. Ve, Yehowa mpamba kele ve na “luyantiku to nsuka.” (Nkunga 90:2) Na bangogo yankaka, Yehowa mevandaka “katuka na bilumbu yonso me luta.”​—Yude 25.

Kansi, kuvila ve nde dibanza ya kemonisa nde Nzambi kevandaka kimakulu kele ve kaka dibanza mosi ya kele mpasi na kubakisa. Kutadila na dikebi yonso kisambu ya Moize kemonisa nde mutindu Nzambi kevandaka kimakulu kendimisa beto nde lusilu ya luzingu ya mvula na mvula kele mpenza kyeleka sambu na beto. Na kuswaswana ti luzingu na beto ya nkufi ya ntangu yai, Biblia ketuba nde “ntangu yonso katuka ntama tii bubu yai [Nzambi] kele nzo ya beto ke tininaka.” Sambu yandi kele Tata ya zola, Yehowa mevandaka, kele, mpi tavandaka ntangu yonso pana sambu na bantu na yandi. Bika nde kyeleka yai ya kitoko kupesa nge kikesa mpenza!​—Nkunga 90:1.