Keti Muntu Lenda Sepela ti Bima ya Yandi Kele na Yo?

“Kusepela ti bima ya bo kele na yo kekumisaka bansukami bamvwama; kukonda kusepela ti bima ya bo kele na yo kekumisaka bamvwama bansukami.”​—Benjamin Franklin.

NA KUWAKANA ti kingana yai, bantu mingi melongukaka nde bo lenda sumba ve kikalulu ya kusepela ti bima ya bo kele na yo mutindu bo kesumbaka kima mosi na zandu. Mpila ya kuyituka kele ve na kumona nde kusepela ti bima ya beto kele na yo, disongidila mawi ya kyese ya nsi ya ntima, kele mpasi na nsi-ntoto yai ya kesyamisaka mpusa ya kuvanda ti bima mingi, ya kusala mambu ya kuluta nene, to ya kuyuma ntima sambu na luzingu ya bankaka! Na mambu yai ya melanda, keti kele ti dyambu mosi ya kevandaka ti bupusi na zulu na nge?

• Bantu ya kesalaka bapiblisite kepusa nge na kuyindula nde nge tasepela ti bima ya nge kele na yo kaka kana nge sumba bima mingi.

• Mpeve ya kutesana na kisalu to na nzo-nkanda kesyamisa nge na kutesa valere na nge na kutadila mambu yina bantu yankaka kekukaka kusala.

• Bantu kemonisa ve ntonda sambu na mambu yina nge kesadila bo.

• Banduku keyumisa nge ntima sambu na bima yina bo kele na yo.

• Nge kezwa ve bamvutu na bangyufula ya mfunu ya nge kekudiyulaka na yina metala luzingu.

Na ntwala ya mambu ya mpasi ya mutindu yai, keti muntu lenda sepela mpenza ti bima ya yandi kele na yo? Ntumwa Polo kutubilaka “kinsweki ya kusepela ti bima ya beto kele na yo.” (New International Version) Mbala mingi, yandi zingaka ti bima mingi, mpi bantangu yankaka yandi zingaka ti bima fyoti. Banduku na yandi vandaka kuzola yandi, kansi bantu yankaka vandaka kuseka yandi. Ata mpidina, yandi tubaka nde yandi longukaka “na kumona kiese na mambu yonso.”​—Filipi 4:11, 12.

Bantu yina mebakaka ntete ve ata fyoti bangidika sambu na kusepela ti bima ya bo kele na yo, mezaba ve kikalulu yai, kansi mutindu Polo kutubaka, bo lenda longuka yo. Ntangu yai, beto kelomba nge na kutadila binsweki tanu yina kele na Ndinga ya Nzambi, Biblia, yina kemonisa mutindu ya kusepela ti bima ya nge kele na yo.