Kinsweki ya 5

Lungisa Mpusa na Nge ya Kimpeve

INKI BIBLIA KELONGAKA? “Kyese na bantu yina kezabaka kinsukami na bo ya kimpeve.”​—Matayo 5:3, NW.

SAMBU NA NKI YO LENDA VA NDA MPASI? Kele ti mabundu mingi ya kuswaswana, mpi mingi na kati na yo kelongaka mitindu ya kewakanaka ve ya kulungisa mpusa na nge ya kimpeve. Inki mutindu nge lenda zaba dibundu yina kelongaka kyeleka mpi kesepedisaka mpenza Nzambi? Bansoniki yankaka ya mezabanaka mingi ketubaka nde kukwikila na Nzambi mpi kukangama na yandi kele kukonda mayele, mpi nkutu yo kesalaka bantu mbi. Zulunalu mosi (Maclean’s) ketubila na bunkufi mabanza ya muntu mosi ya mezabanaka yina kendimaka ve nde Nzambi. Yo ketuba nde: “Dilongi ya Bukristu ya ketubaka nde kele ti kima mosi ya meluta siansi mpi biwilu na beto . . . kefyotunaka valere ya luzingu mosi mpamba ya beto kele na yo mpi yo kepusaka beto na kusala mambu ya nku.”

INKI NGE LENDA SALA? Tadila mbote-mbote banzikisa ya kemonisaka nde Nzambi kele. (Roma 1:20; Baebreo 3:4) Kupesa ve nzila ata na muntu mosi nde yandi lembisa nge na kusosa bamvutu na bangyufula ya mfunu bonso yai: Sambu na nki beto kele na ntoto? Keti kele ti luzingu na nima ya lufwa? Sambu na nki bampasi kele mingi mpenza? Inki Nzambi kelombaka mono? Kuzwa bamvutu ya mefwana na bangyufula yai kele mfunu sambu nge sepela kimakulu ti bima ya nge kele na yo.

Kansi, kundima ve kukonda kuyindula mambu yina bankaka ketela nge. Ndinga ya Nzambi kesyamisa nge na kusadila mayele na nge ya kuyindula sambu na kudindimisa mambu yina kepesaka yandi kyese. (Roma 12:1, 2) Nzambi tasakumuna nge sambu na bikesa na nge. Kana nge kebaka ntangu sambu na kulonguka Biblia mpi kesadila bandongisila na yo ya mefwana, nge tatina bampasi, nge tafyotuna basusi, mpi nge tasepela dyaka mingi na luzingu. Nge lenda tula ntima na lusilu yai. Bamilio ya bantu ya bisika yonso mebakaka mambote na kulongukaka kyeleka na yina metala Nzambi mpi balukanu na yandi.

Ntangu nge kebaka mambote ya kekatukaka na kusadila bandongisila ya mayele ya Biblia, nge takangama dyaka ngolo na Nzambi. Sambu na nki ve kundima emvitasio ya kulonguka Biblia ti Bambangi ya Yehowa? Kana nge sala mutindu yai, ntembe kele ve nde nge tandima mambu yai ya ntumwa Polo kusonikaka: “Kana muntu ke monaka kiese na bima yina ya yandi ke na yo, kikristo na yandi ta vanda kimvwama na yandi.”—1 Timoteo 6:6.

[Kifwanisu ya kele na lutiti 8]

Kudindimisa mambu yina kepesaka Nzambi kyese