“Ntangu ya Mbote Yo Yai”

“Tala ntangu ya mbote yo yai; bubu yai kele kilumbu ya beto lunga guluka.”​—2 KOR. 6:2.

1. Sambu na nki beto fwete swasukisa nki beto fwete sala na konso ntangu yina?

“SAMBU na konso kima kele ti ntangu ya kutulama, nkutu ntangu mosi sambu na konso dyambu na nsi ya zulu.” (Lo. 3:1, NW) Salomo kusonikaka na yina metala mfunu ya kuswasukisa ntangu ya kuluta mbote sambu na kusala konso kisalu ya mfunu, yo vanda kusala bilanga to kusansa bambisi, kusala nzyetelo, kusala mumbongo, to kusolula ti bantu yankaka. Kansi, beto fwete swasukisa mpi nki kele kisalu ya kuluta mfunu yina beto fwete sala na konso ntangu yina. Na kutuba yankaka, beto fwete zaba mambu ya beto fwete tula na kisika ya ntete.

2. Inki mutindu beto mezaba nde ntangu Yezu vandaka kulonga, yandi zabaka mbote-mbote ntangu yina yandi vandaka kuzinga?

² Ntangu yandi vandaka na ntoto, Yezu kuzabaka mbote-mbote ntangu yina yandi vandaka kuzinga mpi mambu yina yo lombaka nde yandi sala. Sambu yandi vandaka kubakisa mbote-mbote mambu ya kutula na kisika ya ntete, yandi zabaka nde ntangu kufinamaka sambu bambikudulu mingi ya Mesia yina bantu vandaka kukinga banda ntama kulungana. (1 Pie. 1:11; Kus. 19:10) Yandi vandaka ti kisalu ya kusala sambu na kusadisa bantu na kubakisa pwelele nde yandi vandaka Mesia ya lusilu. Yo lombaka nde yandi ta kimbangi mbote-mbote na kyeleka ya Kimfumu mpi  kuvukisa bantu yina zolaka kuyala ti yandi na Kimfumu. Mpi yo lombaka nde yandi tula fondasio ya dibundu ya Bukristu yina zolaka kusala kisalu ya kusamuna mpi ya kukumisa bantu balongoki tii na nsuka ya ntoto.​—Mar. 1:15.

3. Sambu Yezu kuzabaka ntangu yina yandi vandaka kuzinga, yo vandaka ti nki bupusi na mambu ya yandi vandaka kusala?

³ Sambu yandi zabaka ntangu yina yandi vandaka kuzinga, yo vandaka ti bupusi ya mbote na luzingu na yandi mpi yo pusaka yandi na kuvanda kikesa sambu na kulungisa luzolo ya Tata na yandi. Yandi songaka balongoki na yandi nde: “Bambuma mingi kele na bilanga, kansi bantu ya kisalu kele mingi ve sambu na kukatula yo. Beno bondila mfumu ya bilanga na kutinda bantu ya nkaka ya kisalu sambu na kukatula bambuma na yandi.” (Luka 10:2; Mal. 3:23, 24) Yezu kuponaka ntete bantu 12 mpi na nima bantu 70 na kati ya balongoki na yandi, ebuna yandi pesaka bo bantuma ya sikisiki, mpi kutindaka bo na kukwenda kusamuna nsangu yai ya kepesa kikesa: “Kimfumu ya Nzambi me kuma penepene!” Sambu na Yezu yandi mosi, beto ketanga nde: “Ntangu [yandi] tubaka mambu yina na balonguki na yandi kumi na zole imene, yandi katukaka pana sambu na kwenda kulonga mambu ya Nzambi na babwala kele penepene.”​—Mat. 10:5-7; 11:1; Luka 10:1.

4. Na nki mutindu Polo kubakaka mbandu na Kristu?

⁴ Sambu na balongoki na yandi yonso, Yezu kuvandaka mbandu ya kukuka ya kikesa mpi kudipesa. Yai kele mambu ya ntumwa Polo vandaka kutubila ntangu yandi longisilaka bampangi na yandi Bakristu nde: “Beno baka mbandu na mono, mutindu mono mpi ke bakaka mbandu na Kristo.” (1 Kor. 11:1) Na nki mutindu Polo kubakaka mbandu na Kristu? Ntetentete, na kudipesaka ya mvimba na kusamuna nsangu ya mbote. Na mikanda yina Polo kusonikilaka mabundu, beto kekuta bangogo bonso “beno sala ngolo,” “beno sadila [Yehowa, NW] na ntima yonso,” “beno kudipesa ntangu yonso na kisalu ya Mfumu,” mpi “konso kisalu yina ya beno ke sala, beno fweti sala yo na ntima mosi ya mbote, bonso nde beno ke sadila [Yehowa, NW].” (Roma 12:11; 1 Kor. 15:58; Kol. 3:23) Polo kuvilaka ve ata fyoti kukutana na yandi ti Mfumu Yezu Kristu na nzila ya Damasi, mpi bangogo yai ya Yezu yina yo fwete vanda nde longoki Ananiasi kuzabisaka yandi: “Yandi kele muntu ya mono me solaka na kuzabisa zina na mono na bantu yina kele Bayuda ve, na bantotila na bo ti na bantu ya Israele.”​—Bis. 9:15; Roma 1:1, 5; Gal. 1:16.

“Ntangu ya Mbote Yo Yai”

5. Inki kupusaka Polo na kusala kisalu na yandi na kikesa yonso?

⁵ Ntangu beto ketangaka mukanda ya Bisalu, beto kemonaka pwelele kikesa yina Polo kumonisaka sambu na kusala kisalu na yandi ya kusamuna. (Bis. 13:9, 10; 17:16, 17; 18:5) Polo kubakisaka mfunu ya ntangu yina yandi vandaka kuzinga. Yandi tubaka nde: “Tala ntangu ya mbote yo yai; bubu yai kele kilumbu ya beto lunga guluka.” (2 Kor. 6:2) Sambu na Bayuda yina kuvandaka na kimpika na Babilone, mvu 537 N.T.B. kuvandaka ntangu mosi ya mbote sambu bo vutuka na ntoto na bo. (Yez. 49:8, 9) Kansi, nki Polo vandaka kutubila na verse yai? Baverse yina kele na ntwala ya verse yai kesadisa beto na kubakisa mambu yina yandi vandaka kuyindula.

6, 7. Inki lukumu ya nene bo mepesaka Bakristu ya kupakulama bubu yai, mpi banani ke na kusala kumosi ti bo?

⁶ Na luyantiku ya mukanda na yandi, Polo kutubilaka lukumu ya nene yina bo pesaka yandi ti bampangi-Bakristu yankaka ya kupakulama. (Tanga 2 Korinto 5:18-20.) Yandi tendulaka nde Nzambi kubingaka bo sambu na lukanu mosi ya sikisiki, disongidila kusala “kisalu” ya kuwakanisa bantu ti Nzambi, kubondila bantu na ‘kuwakana dyaka’ (NW) ti Nzambi. Yo vandaka kutendula kuvutula dyaka kinduku to kuwakana ti Nzambi.

⁷ Banda na kukolama ya Edeni, bantu yonso  mevilaka nzila mpi mekabwanaka ti Yehowa. (Roma 3:10, 23) Kukabwana yina mekotisaka bantu yonso na mpimpa ya kimpeve, mpi yo menataka bampasi mpi lufwa. Polo kusonikaka nde: “Beto zaba nde, tii ntangu yai bima yonso ya Nzambi salaka ke dila ngolo, yo ke mona mpasi bonso nkento yina ke zola kubuta.” (Roma 8:22) Kansi, Nzambi mebakaka bangidika sambu na ‘kubondila’ bantu na kuvutukila yandi to na kuwakana dyaka ti yandi. Yai kele kisalu ya bo pesaka Polo ti Bakristu yankaka ya kupakulama na ntangu yina. ‘Ntangu yina ya mbote’ lendaka kuvanda ‘kilumbu ya luguluku’ sambu na bantu yina kekwikilaka na Yezu. Bakristu yonso ya kupakulama ti banduku na bo, “mameme ya nkaka,” yina ke na kusala kumosi ti bo, kelanda na kubinga bantu na kubaka mambote ya “ntangu ya mbote.”​—Yoa. 10:16.

8. Inki kesala nde emvitasio ya kubinga bantu na kuwakana dyaka ti Nzambi kubenda mpenza dikebi?

⁸ Emvitasio ya kubinga bantu na kuwakana dyaka ti Nzambi kebenda mpenza dikebi sambu Nzambi yandi mosi muntu mesalaka kitambi ya ntete sambu na kusungika mambu, ata bantu bo mosi kubebisaka bangwisana na bo ti yandi ntangu bo kolamaka na Edeni. (1 Yoa. 4:10, 19) Inki yandi salaka? Polo kupesaka mvutu nde: “Sambu na Kristo, Nzambi me kumisaka bantu yonso banduku na yandi; yandi landaka ve mbi yina ya bo salaka. Ebuna yandi me pesaka beto kisalu ya kuzabisa bantu nki mutindu yandi ke kumisaka bantu banduku na yandi.”​—2 Kor. 5:19; Yez. 55:6.

9. Inki Polo kusalaka sambu na kumonisa ntonda na yandi sambu na mawa ya Nzambi?

⁹ Na kupesaka kimenga ya nkudulu, Yehowa mesalaka na mpila nde bantu yina kemonisa lukwikilu kubaka ndolula ya masumu na bo mpi kuvutula dyaka kinduku to kuwakana ti yandi. Dyaka, yandi tindaka mimonisi na yandi sambu na kulongisila bantu ya bisika yonso na kusala ngemba ti yandi na ntangu bo kele ntete ti makuki ya kusala yo. (Tanga 1 Timoteo 2:3-6.) Sambu yandi bakisaka luzolo ya Nzambi mpi ntangu yina yandi vandaka kuzinga, Polo kudipesaka kukonda kulemba na “kisalu” ya kuwakanisa bantu ti Nzambi. Luzolo ya Yehowa mesobaka ve. Diboko na yandi kele kaka ya kutanduka na bilumbu na beto. Bangogo ya Polo “ntangu ya mbote yo yai” mpi ‘bubu yai kele kilumbu ya luguluku’ kele kaka na mfunu. Yehowa Nzambi kele mpenza Nzambi ya mawa mpi ya kekuditulaka na kisika ya bantu!​—Kub. 34:6, 7.

Beno ‘Konda Ve Kulungisa Lukanu na Yo’

10. ‘Kilumbu ya luguluku’ kutendulaka inki sambu na Bakristu ya kupakulama, ya ntangu ya ntama mpi ya bubu yai?

¹⁰ Bantu yina “kele na kimvuka ti Kristo” kuvandaka bantu ya ntete ya kuzwa dibaku ya kuwakana dyaka ti Nzambi. (2 Kor. 5:17, 18) Sambu na bo, ‘kilumbu ya luguluku’ kuyantikaka na Pantekoti ya mvu 33 T.B. Banda na ntangu yina, Nzambi mepesaka bo mukumba ya kulonga “nki mutindu yandi ke kumisaka bantu banduku na yandi.” Bubu yai, Bakristu ya kupakulama yina mebikalaka ke na kulungisa kaka “kisalu” ya kuwakanisa bantu ti Nzambi. Bo kebakisaka nde bawanzyo iya yina ntumwa Yoane kumonaka na mbona-meso “me simba mipepe yonso iya ya nsi-ntoto, na mpila nde yo lenda tambula ve na ntoto ya mvimba.” Yo yina, yo kele kaka ‘kilumbu ya luguluku’ mpi “ntangu ya mbote.” (Kus. 7:1-3) Sambu na kikuma yai, banda na luyantiku ya mvu-nkama ya 20, Bakristu ya kupakulama yina mebikalaka mekudipesaka na kikesa yonso na “kisalu” ya kuwakanisa bantu ti Nzambi tii na bisika ya ntama ya ntoto.

11, 12. Na luyantiku ya mvu-nkama ya 20, inki mutindu Bakristu ya kupakulama kumonisaka nde bo zabaka ntangu yina bo kezinga? (Tala kifwanisu yina kele na lutiti 23.)

¹¹ Mu mbandu, mutindu mukanda Les Témoins de Jéhovah : Prédicateurs du Royaume de Dieu kutubaka yo, na luyantiku ya mvu-nkama ya 20, “Mpangi Charles Taze Russell ti banduku na yandi vandaka kukwikila ngolo nde bo vandaka kuzinga na ntangu ya kukatula bambuma mpi nde bantu kuvandaka ti mfunu ya kuwa kyeleka yina kekatulaka bantu na kimpika.” Inki bo salaka sambu na dyambu yai? Sambu bo bakisaka nde bo vandaka kuzinga na ntangu ya kukatula bambuma, ‘ntangu mosi ya mbote,’ bampangi yai kusukaka kaka ve na kubinga bantu na kukwenda na lukutakanu mosi ya dibundu. Bamfumu ya mabundu ya Kikristu kesalaka mambu ya mutindu yai banda ntama. Kansi, Bakristu yina ya kupakulama yantikaka na kusadila mitindu yankaka ya mfunu ya kumwanga nsangu ya mbote. Na kati ya mambu yango, bo sadilaka  mbote teknolozi ya mpa sambu na kunata kisalu na bo na ntwala.

¹² Sambu na kumwanga nsangu ya mbote ya Kimfumu, mwa kimvuka yina ya fyoti ya baministre ya kikesa kusadilaka batrakiti, bazulunalu, mpi babuku. Bo sonikaka mpi badiskure ti masolo, ebuna bo tindaka yo sambu bo nyema yo na bazulunalu mingi. Bo vandaka kulutisa ba emisio ya mesimbama na Masonuku na baradio yina vandaka kupanza bansangu na bansi mingi. Bo basisaka mpi kusadilaka bafoto yina vandaka kunikana mpi yina bo vandaka kulutisa nzila mosi ti kaseti yina bo mekotisaka bandinga, na ntwala nkutu nde bantu yantika kusala bafilme mutindu yo kesalamaka bubu yai ti bifwanisu ya kelutaka nzila mosi ti bandinga. Sambu bo kwaminaka na kikesa ya mutindu yai, yo butaka nki mbuma? Bubu yai, bantu kiteso ya bamilio nsambwadi ya mendimaka emvitasio yango mpi mevukanaka na kusamuna nsangu yai: “Beno wakana dyaka ti Nzambi.” (NW) Ya kyeleka, bansadi ya Yehowa yina ya ntete kuvandaka bambandu ya mbote ya kikesa ata bo zabaka ve kusala mambu yankaka.

13. Beto fwete tula dikebi na nki lukanu ya Nzambi?

¹³ Bangogo ya Polo “ntangu ya mbote yo yai” kele kaka kyeleka. Beto bantu ya mebakaka mambote ya Nzambi yina bantu mefwana ve na kubaka, beto kemonisaka ntonda sambu yandi mepesaka beto dibaku ya kuwa mpi ya kundima nsangu ya kuwakana dyaka ti yandi. Na kisika ya kukonda kudibanza sambu na mambu ya mfunu, beto ketulaka dikebi na bangogo yai ya Polo kutubaka na nima: “Beto kebondila beno mpi na kundima ve mambote ya Nzambi ya beto mefwana ve na kubaka mpi na nima kukonda kulungisa lukanu na yo.” (2 Kor. 6:1, NW) Lukanu ya mambote ya Nzambi yina bantu mefwana ve na kubaka kele nde bantu ya nsi-ntoto ‘kukuma banduku na yandi’ na nzila ya Kristu.​—2 Kor. 5:19.

14. Inki mabaku ke na kumonana na bansi mingi?

¹⁴ Bantu mingi yina Satana mefikaka meso, kele kaka ya kukabwana ti Nzambi mpi kezabaka ve lukanu ya mambote na yandi yina bantu mefwana ve na kubaka. (2 Kor. 4:3, 4; 1 Yoa. 5:19) Kansi, mambu ya nsi-ntoto ya kelanda kaka na kukuma mbi mepusaka bantu mingi na kundima nsangu ntangu bo kemonisaka bo nde kukabwana ti Nzambi kele kisina ya mambu ya mbi mpi ya bampasi yina bantu kekutana ti yo. Ata na bansi yina bantu mingi mpenza ketulaka ve dikebi na kisalu na beto ya kusamuna, bantu mingi ke na kundima nsangu ya mbote ntangu yai mpi kesala mambu sambu na kuwakana dyaka ti Nzambi. Yo yina, keti beto kebakisaka nde yai kele ntangu sambu beto kudipesa dyaka mingi na kikesa yonso sambu na kubondila bantu nde: “Beno wakana dyaka ti Nzambi”?

15. Na kisika ya kusamuna nsangu kaka sambu bantu kudiwa mbote, inki mambu beto kezola nde bantu ya bisika yonso kuzaba?

¹⁵ Kisalu na beto kele kaka ve ya kuzabisa bantu nde kana bo vutukila Nzambi, yandi tasadisa bo ti makambu na bo yonso mpi bo takudiwa mbote. Bantu mingi kesosaka kaka mambu yai ntangu bo kekwendaka na nzo-Nzambi, mpi mabundu kele ti luzolo ya kulungisa mpusa yai sambu na kubenda bantu na banzo-Nzambi na bo. (2 Tim. 4:3, 4) Yai kele ve lukanu ya kisalu na beto ya kusamuna. Nsangu ya mbote ya beto kesamunaka kele nde sambu Yehowa kezolaka bantu, yandi kele ti luzolo ya kulolula masumu ya bantu na nzila ya Kristu. Yo yina, bantu lenda katuka na kimpika ya mambu ya mekabulaka bo ti Nzambi mpi kuwakana dyaka ti yandi. (Roma 5:10; 8:32) Kansi, “ntangu ya mbote” ke na kukwenda ntinu na nsuka.

“Beno Vanda Koikoi Ve”

16. Inki kusadisaka Polo na kumonisa kikesa?

¹⁶ Ebuna, nki mutindu beto lenda yedisa mpi kutanina kikesa sambu na lusambu ya kyeleka? Bantu yankaka lenda vanda nsoni-nsoni to bo ketubaka ve mingi mpi bo lenda mona mpasi na kumonisa mawi na bo to kuvanda ti bantu yankaka.  Kansi, yo kele mbote na kuyibuka nde kuvanda kikesa ketendula kaka ve kumonisa mawi to kuvanda na kyese; yo ketadila mpi ve kimuntu ya konso muntu. Polo kutubilaka mutindu ya kuyedisa mpi kutanina kikesa ntangu yandi longisilaka bampangi na yandi Bakristu nde: “Beno vanda koikoi ve.” (Roma 12:11) Mpeve ya Yehowa kusadisaka ntumwa Polo na kuvanda kikesa mpi na kukanga-ntima na kisalu ya kusamuna. Banda na ntangu yina Yezu kubingaka Polo tii na ntangu ya bo tulaka yandi na boloko na mbala ya nsuka mpi ya bo fwaka yandi bonso martire na Roma, disongidila na nsungi ya bamvula kuluta 30, kikesa ya Polo kumanaka ve. Yandi vandaka ntangu yonso kutadila Nzambi yina kupesaka yandi ngolo ya yandi vandaka na yo mfunu na nzila ya mpeve. Yandi tubaka nde: “Mono me lunga kusala mambu yonso na ngolo yina [yandi, NW] ke pesaka mono.” (Filp. 4:13) Beto lenda baka mpenza mambote kana beto longuka na mbandu na yandi!

17. Inki beto lenda sala sambu na ‘kuvanda koikoi ve’?

¹⁷ Na Roma 12:11, ntumwa Polo kusadilaka ngogo mosi ya Kigreki yina ketendula ntetentete “kutoka.” Sambu mbidika ya masa kulanda na kutoka, beto fwete landa na kupedisa tiya. Mutindu mosi, sambu na ‘kuvanda koikoi ve,’ yo kele mfunu nde Nzambi kupesa beto mpeve na yandi ntangu yonso. Sambu na kuzwa mpeve yango, beto fwete sadila bangidika yonso yina Yehowa kebakaka sambu na kupesa beto ngolo na kimpeve. Yo ketendula kubakisa mpenza mfunu ya lusambu ya dibuta mpi ya dibundu​—kulonguka mbala na mbala beto mosi mpi na dibuta, kusamba mpi kuvukana mbala na mbala ti bampangi na beto Bakristu. Bangidika yai tasadisa beto na kuvanda “koikoi ve,” mpi na kuvanda bonso tiya ya kesala nde mbidika ya masa kutoka.​—Tanga Bisalu 4:20; 18:25.

18. Sambu beto kele Bakristu ya mekudipesaka, na nki lukanu beto fwete tula dikebi?

¹⁸ Muntu ya mekudipesaka na Nzambi kele muntu yina ketulaka dikebi na yandi yonso na lukanu mosi, mpi yandi kelembaka ve nitu to kekatulaka ve dikebi mpamba-mpamba sambu na kulanda lukanu yango. Sambu beto kele Bakristu ya mekudipesaka, lukanu na beto kele ya kusala yonso yina Yehowa kezolaka nde beto sala, kaka mutindu Yezu kusalaka. (Baeb. 10:7) Bubu yai, luzolo ya Yehowa kele nde bantu mingi mpenza kuwakana dyaka ti yandi. Yo yina, bika nde beto kudipesa na kikesa yonso na kisalu yai ya kuluta mfunu ya fwete salama bubu yai kukonda kusukinina, na mbandu ya Yezu ti ya Polo.

Keti Nge Keyibuka?

• Inki kuvandaka “kisalu” ya kuwakanisa bantu ti Nzambi yina bo pesaka Polo ti Bakristu yankaka ya kupakulama?

• Inki mutindu Bakristu ya kupakulama yina mebikalaka mesadilaka mbote “ntangu ya mbote”?

• Inki Bakristu lenda sala sambu na ‘kuvanda koikoi ve’?

[Bangyufula ya Disolo ya Kulonguka]

[Kifwanisu ya kele na lutiti 20]

Polo kuvilaka ve ata fyoti kukutana na yandi ti Mfumu Yezu Kristu