Nwana ti Mpusa ya Kudifwanisa ti Bankaka
Kinsweki ya 2
Nwana ti Mpusa ya Kudifwanisa ti Bankaka
INKI BIBLIA KELONGAKA? “Sala kisalu na nge mosi mbote, ebuna nge tazwa dyambu ya kudikumisa sambu na yo. Kansi kudifwanisa ve ti bankaka.”—Galatia 6:4, Contemporary English Version.
SAMBU NA NKI YO LENDA VANDA MPASI? Ziku beto kezolaka kudifwanisa ti bankaka—bantangu yankaka ti bantu yina kele ti bima mingi ve kuluta beto, mbala mingi ti bantu yina kele ti ngolo, kimvwama, to makuki mingi kuluta beto. Ata beto kudifwanisa ti konso muntu yina, yo kevandaka ti bupusi ya mbi. Beto keyindulaka na kifu nde valere ya muntu kezabanaka na bima yina yandi kele na yo to na mambu yina yandi lenda sala. Beto lenda tedimisa mpi mpusa ya kuyuma ntima mpi kuyedisa kikalulu ya kutesana.—Longi 4:4.
INKI NGE LENDA SALA? Meka na kuditadila mutindu Nzambi ketadilaka nge. Bika nde mutindu na yandi ya kutadila mambu kuvanda ti bupusi na mutindu nge ketadilaka valere na nge. “Muntu ke talaka yina ke monika na meso, kansi Mfumu Nzambi ke talaka ntima.” (1 Samuele 16:7) Yehowa * ketadilaka valere na nge, na kutangaka ntima na nge, na kufimpaka mabanza na nge, mawi na nge, mpi bikuma ya kepusaka nge na kusala mambu, kansi ve na kufwanisaka nge ti bantu yankaka. (Baebreo 4:12, 13) Yehowa kebakisaka bandilu na nge mpi yandi kelongisila nge na kuzitisa yo mpi. Kana nge tesa valere na nge na kudifwanisaka ti bantu yankaka, nsukansuka nge takuma lulendo to nge tavandaka ve ntangu yonso na kyese. Yo yina, ndima na kudikulumusa yonso nde nge tavandaka ve ntangu yonso muntu ya ntete na mambu yonso.—Bingana 11:2, NW.
Inki mambu ya sikisiki nge fwete sala sambu na kuvanda na mfunu na meso ya Nzambi? Yandi pesaka profete Mishe mpeve sambu na kusonika nde: “Mfumu Nzambi mesonga beto mambu yina kele mbote na meso na yandi. Mambu ya yandi kezola nde beto sala yo yai: Sala mambu yina kele ya masonga, songa mambote na bantu yankaka, [mpi na kutambula na mutindu ya kukonda lulendo ti, NW] Nzambi.” (Mishe 6:8) Kana nge landa ndongisila yai, Nzambi tatala mambu na nge. (1 Piere 5:6, 7) Yai kele kikuma ya kuluta nene ya kusepela ti bima yina beto kele na yo.
[Noti na Nsi ya Lutiti]
^ par. 5 Zina ya Nzambi mutindu yo kele na kati ya Biblia.
[Kifwanisu ya kele na lutiti 5]
Yehowa ketesaka valere na beto na kutadila mambu yina kele na ntima na beto