Kinsweki ya 4

Pona Banduku na Nge na Mayele Yonso

INKI BIBLIA KELONGAKA? “Kana nge landa bantu ya mayele, nge ta kuma mpi mayele.”​—Bingana 13:20.

SAMBU NA NKI YO LENDA VANDA MPASI? Banduku na beto lenda kumisa ngolo to kulembisa kikalulu na beto ya kusepela ti bima ya beto kele na yo. Bikalulu mpi masolo na bo kevandaka ti bupusi na mutindu beto ketadilaka luzingu.​—1 Korinto 15:33.

Mu mbandu, beto tadila disolo ya Biblia ya ketubila babakala 12 yina kwendaka na Kanana sambu na kutala yo. Ntangu bo vutukaka, mingi na kati na bo “yantikaka kusaula na meso ya bantu ya Israele ntoto ya bo kwendaka kutala.” Ata mpidina, zole na kati na bo kutubaka mambu ya mbote sambu na Kanana mpi bo bingaka yo “ntoto ya kitoko mpenza.” Kansi, nkadilu ya mbi ya mineki kumi kupanzanaka na kati ya bantu ya Izraele. Disolo ketuba nde: ‘Bantu yonso ya Israele telamaka, bo yonso yantikaka kubokuta.’​—Kutanga 13:30–14:9.

Mutindu mosi bubu yai, bantu mingi “ke bokutaka, bo ke vandaka na kiese ve.” (Yude 16) Yo kele mpasi na kulanda kusepela ti bima ya beto kele na yo kana beto kele ti banduku yina kesepelaka ve ata fyoti ti bima ya bo kele na yo.

INKI NGE LENDA SALA? Tadila mbote-mbote masolo ya nge ketaka ti banduku na nge. Keti mbala mingi banduku na nge kebulaka ntulu sambu na bima ya bo kele na yo, to keti bo kebokutaka ntangu yonso sambu na bima yina bo kele na yo ve? Mpi nge kele nduku ya nki mutindu sambu na bo? Keti nge kesalaka ngolo sambu banduku na nge kulula nge, to keti nge kesyamisaka bo na kusepela ti bima ya bo kele na yo?

Beto tadila mbandu ya Davidi, yina zolaka kukuma ntotila, mpi Yonatani, mwana ya Ntotila Saule. Davidi vandaka kuyungana-yungana na ntoto ya zelo na zelo. Ntotila Saule vandaka kumona bonso nde Davidi vandaka kutula yandi na kigonsa, mpi yandi vandaka kuzola kufwa Davidi. Ata Yonatani muntu zolaka kuyinga ntotila Saule na kimfumu, yandi kumaka mosi na kati ya banduku ya ngolo ya Davidi. Yonatani kubakisaka nde Nzambi kuponaka Davidi na kuvanda ntotila yina tayinga Saule, mpi yandi vandaka ti kyese ya kupesa nduku na yandi maboko.​—1 Samuele 19:1, 2; 20:30-33; 23:14-18.

Nge kele ti mfunu ya banduku ya mutindu yina, bayina kesalaka ngolo sambu na kusepela ti bima ya bo kele na yo mpi bayina kezolaka mambu ya mbote sambu na nge. (Bingana 17:17) Ya kyeleka, sambu na kuvanda ti banduku ya mutindu yina, nge fwete monisa bikalulu yango nge mosi.​—Filipi 2:3, 4.

[Kifwanisu ya kele na lutiti 7]

Keti banduku na nge kekumisaka ngolo to kelembisaka kikalulu na nge ya kusepela ti bima ya nge kele na yo?