Bambona-Meso ya Insi ya Bampeve

ATA nge tala na zulu na ntangu mosi ya nda mutindu nge mezola, nge tamona ve ata mpeve mosi. Widikila, kansi nge tawa ve ata ndinga ya mpeve mosi. Ata mpidina, nge lenda ndima nde bampeve kele. Bo kele mayele mpi ngolo mingi kibeni mpi bo kele ti bazina mpi kimuntu ya kuswaswana. Bankaka kesadilaka beto mambu ya mbote, kansi bankaka dyaka kezolaka kusala beto mbi. Bo yonso ketudilaka beto dikebi.

Nzambi ya kyeleka yandi mosi kele Mpeve. (Yoane 4:24) Yandi kele ti zina ya kuswaswana yina keswaswanisaka yandi ti banzambi mingi ya luvunu. Zina na yandi kele Yehowa. (Nkunga 83:18, NW) Muyimbi-bankunga kusonikaka nde: “[Yehowa] kele muntu ya nene, bantu fweti kumisa yandi ngolo mpenza; bo fweti tina yandi boma kuluta banzambi ya nkaka. Banzambi ya bantu ya nkaka bo yonso kele kaka bima ya mpamba, kansi [Yehowa] salaka zulu. Lukumu ti kimfumu me ziunga yandi, nene ti kitoko kele na nzo na yandi.”​—Nkunga 96:4-6.

Bambona-Meso ya Nzambi ya Kyeleka

Biblia kezabisa beto nde: “Ata muntu mosi ve me monaka Nzambi.” (Yoane 1:18) Kumonika na yandi mpi kitoko na yandi meluta mambu yonso ya beto lenda bakisa, kaka mutindu muntu yina mebutukaka meso ya kufwa kebakisaka ve mikubu. Kansi kaka mutindu longi ya mbote ketendudilaka bana ya nzo-nkanda mambu ya mpasi na bangogo yina bo lenda bakisa, mutindu mosi, na nzila ya Ndinga na yandi, Biblia, Nzambi ketendulaka bima ya beto lenda mona ve na nzila ya bima yina beto lenda mona. Na nzila ya bambona-meso ya kupemama yina yandi pesaka bantu ya kwikama ya ntangu ya ntama, Yehowa kesadisa beto na kumona na mabanza bibansala ya zulu mpi na kubakisa bangwisana na beto ti bantu yina kezingaka kuna.

Mu mbandu, mbona-meso yina yandi pesaka profete Ezekiele kewakanisa lukumu ya Yehowa ti tiya, kupela, ditadi ya safire, mpi nkongolo. Na mbona-meso yankaka, ntumwa Yoane kumonaka Yehowa mevanda na kiti na yandi ya kimfumu mpi ntumwa ketuba nde Nzambi “vandaka kumonika bonso matadi yai ya ntalu: yaspe ti sardwane,” mpi yandi yikaka nde nkongolo mosi “vandaka kupela bonso ditadi yai emerode, yo vandaka me ziunga kiti yina ndambu na ndambu.” Bantendula ya mutindu yai kesonga beto nde kuvanda ya Yehowa kele kitoko mosi ya keyitukisa mpenza, ya kepesa kyese mingi mpi ya ngemba kibeni, yina kemonanaka mingi ve.​—Kusonga 4:2, 3; Ezekiele 1:26-28.

Profete Daniele mpi kumonaka Yehowa na mbona-meso, ebuna yandi monaka bawanzyo “mingi-mingi mpenza me telama na ntwala [ya Yehowa].” (Daniele 7:10) Yo fwete vanda nde mambu yai kuyitukisaka yandi mingi kibeni! Kumona, ata na mbona-meso, wanzyo mosi lenda yitukisa mpenza, kansi meka na kuyindula  nde nge kemona bawanzyo ya kukuka mingi mpenza!

Na Biblia bo ketubilaka bawanzyo kiteso ya bambala 400, mpi na bandonga na bo beto ketanga baserafe mpi baserube. Ngogo ya Kigreki mpi ya Kiebreo ya bo kebalulaka nde “wanzyo” na Biblia ketendula “kinati-nsangu.” Yo yina, bawanzyo lenda solula bo na bo, mpi na ntangu ya ntama bo vandaka kusolula ti bantu. Bawanzyo kele ve bantu yina kuzingakaka na ntoto kansi yina mefwaka. Yehowa kugangaka bigangwa yai ya kimpeve bamvula mingi kibeni na ntwala ya kuganga muntu.​—Yobi 38:4-7.

Na mbona-meso ya Daniele, bawanzyo mingi kuvukanaka sambu na kumona dyambu mosi ya mfunu. Na nima Daniele kumonaka “muntu yina vandaka bonso mwana ya muntu” (NW) kepusana penepene ya kiti ya kimfumu ya Yehowa sambu bo pesa yandi “kiyeka, lukumu ti ngolo ya kimfumu na mpila nde bantu yonso ya nsi-ntoto ata bo kele nki dikanda to nki ndinga, bo sadila yandi.” (Daniele 7:13, 14) “Mwana ya muntu,” kigangwa yina kele ti mukumba ya nene na insi ya bampeve, disongidila Yezu Kristu yina kufutumukaka, kele muntu yina bo pesaka kiyeka ya kuyala ntoto ya mvimba. Ntama mingi ve luyalu na yandi tayinga baguvernema yonso ya bantu mpi yo tasukisa maladi, mawa, kunyokula bantu, kinsukami, mpi nkutu lufwa.​—Daniele 2:44.

Ntembe kele ve nde ntangu bo pesaka Yezu kiyeka, yo pesaka kyese mingi kibeni na bawanzyo mingi ya kwikama, bayina kezolaka mambote ya bantu. Kansi, yo kele mawa na kuzaba nde bigangwa yonso ve ya kimpeve kudiwaka mutindu yina.

Bambeni ya Nzambi mpi ya Muntu

Na luyantiku mpenza ya disolo ya luzingu ya bantu, wanzyo mosi, yina vandaka ti mpusa ya  ngolo nde bo sambila yandi, kubalukilaka Yehowa mpi kudikumisaka Satana, disongidila nde “mutelemini.” Satana kele muntu ya mbi kuluta mpi yandi ketelaminaka mpenza Yehowa, yina kele muntu ya zola kuluta. Bawanzyo yankaka kulandaka Satana na kukolama na yandi. Biblia kebingaka bo bademo. Bonso Satana, bademo mekudikumisaka bambeni ya nku ya bantu. Bampasi mingi ya kele na ntoto, kukonda lunungu, maladi, kinsukami, mpi bitumba kebasikaka sambu na bupusi na bo.

Ata bo ketubilaka Satana mingi dyaka ve na mabundu mingi ya Kikristu, mukanda ya Yobi kesadisa beto na kubakisa bikalulu mpi bikuma ya wanzyo yai ya nkolami. Yo ketuba nde: “Kilumbu mosi bawanzio ya Nzambi kwisaka kumonika na meso ya Mfumu Nzambi; Satana mpi vandaka na kati na bo.” Na disolo yina kulandaka, Satana kufundaka Yobi na kukonda luzitu yonso nde yandi vandaka kusadila Nzambi kaka sambu na bima yina Nzambi vandaka kupesa yandi. Sambu na kusosa kundimisa mambu ya yandi tubaka, Satana kupesaka Yobi mpasi ya ngolo, mpi kufwaka bitwisi ti bana na yandi yonso kumi. Na nima, yandi kumisaka nitu ya Yobi ya mvimba bivimbu na bivimbu. Mambu yonso ya Satana kusalaka kunungisaka ve mambu yina yandi tubaka.​—Yobi 1:6-19; 2:7.

Kele ti bikuma ya mbote ya mepusaka Yehowa na kubikila Satana ntangu mingi, kansi yandi tasala ve mutindu yina kimakulu. Ntama mingi ve Nzambi tafwa Dyabulu. Nzambi mebakaka dezia bangidika mpi sambu na mambote na beto; na mukanda ya Kusonga bo ketendula na mutindu ya pwelele dyambu yankaka ya mfunu yina kesalama na insi ya bampeve. Beto ketanga nde: “Bitumba bwaka na kati ya zulu. Mishele [Yezu Kristu yina kufutumukaka] ti bawanzio na yandi bo nwanaka ti dragoni [Satana] ti bawanzio na yandi. Dragoni belaka; yo yina yandi ti bawanzio na yandi bo vandaka diaka na nswa ve ya kuvanda na kati ya zulu. Dragoni yina ya nene, bo losaka yandi na nganda. Yandi kele nioka yina ya ntama, ya bo ke bingaka Satana; yandi muntu ke kusaka bantu yonso. Bo losaka yandi ti bawanzio na yandi na ntoto.”​—Kusonga 12:7-9.

Simba nde Biblia ketuba nde Satana “ke kusaka bantu yonso.” Yandi kekusaka bantu na kusyamisaka malongi ya luvunu sambu na kupusa bo na kuyambula Yehowa mpi Ndinga na yandi. Luvunu mosi ya nene kele nde na nima ya lufwa, bantu yonso kekwendaka na insi ya bampeve. Kele ti bangindu mingi ya kuswaswana na dyambu yai. Mu mbandu, na Afrika mpi na Azia, bantu mingi kekwikilaka nde na nima ya lufwa bantu kekwendaka kuzinga na insi ya bampeve kisika ba-nkaka na bo kezingaka. Malongi ya kombelo mpi ya bilungi mesimbamaka mpi na dibanza ya kemonisaka nde muntu kelandaka kuzinga na nima ya lufwa.

Keti na Nima ya Lufwa Bantu Kekwendaka Kuzinga na Zulu?

Kansi, inki beto lenda tuba na yina metala dilongi yina bantu mingi na nsi-ntoto ya mvimba kendimaka, yina ketubaka nde bantu yonso ya mbote kekwendaka na zulu? Yo ke kyeleka nde bantu yankaka ya mbote kekwendaka kuna, kansi ntalu na bo kele fyoti kana beto fwanisa yo ti bamilio ya bantu yina mefwaka. Biblia kemonisa nde bantu 144 000 “tasumbama na ntoto” (NW) mpi bo tasala bonso “banganga-Nzambi” mpi “bo ta yalaka” nsi-ntoto. (Kusonga 5:9, 10; 14:1, 3) Kumosi ti Mwana ya muntu, Yezu Kristu, bo tasala guvernema ya zulu, disongidila Kimfumu ya Nzambi. Guvernema yina tafwa Satana ti bademo na yandi mpi takumisa ntoto paladisu. Mingi na kati ya bantu yina mefwaka tavutuka na luzingu na bilumbu kekwisa ti kivuvu ya kuzinga kimakulu na Paladisu yai na ntoto.​—Luka 23:43.

Na bunkufi, bampeve mingi kezingaka na insi ya bampeve. Mpeve ya meluta bo yonso kele Yehowa Nzambi, Ngangi ya luzingu yonso. Kele ti bawanzyo mingi yina kesadilaka yandi na kwikama yonso. Bawanzyo yankaka, yina Satana kupusaka, kubalukilaka Yehowa mpi kesalaka ngolo sambu na kukusa bantu. Dyaka, ntalu fyoti ya bantu ‘mesumbamaka,’ to meponamaka, na ntoto sambu na kubaka mikumba ya sipesiali na zulu. Ti bangindu yai na mabanza, bika beto tadila ntangu yai banani beto lenda solula ti bo na insi ya bampeve mpi mambu ya beto fwete sala sambu na kusolula ti bo.