Mpeve Santu Kepesaka Beto Ngolo Sambu na Kununga Mpukumuna mpi Kulemba Nitu

“Beno ta baka ngolo ntangu mpeve ya Nzambi ta kwisa kukulumuka na zulu ya ntu na beno.”​—BIS. 1:8.

1, 2. Inki lusadisu Yezu kusilaka balongoki na yandi, mpi sambu na nki bo zolaka kuvanda na mfunu na yo?

YEZU kuzabaka nde balongoki na yandi zolaka kukuka ve na ngolo na bo mosi na kuzitisa mambu yonso ya yandi songaka bo. Na kutadilaka kiteso ya kisalu ya bo vandaka na yo, ngolo ya bambeni na bo, mpi nitu na bo ya kukonda ngolo, yo vandaka pwelele nde bo vandaka na mfunu ya ngolo ya meluta ngolo ya bantu. Yo yina, kaka na ntwala nde yandi tombuka na zulu, Yezu kundimisaka balongoki na yandi nde: “Beno ta baka ngolo ntangu mpeve ya Nzambi ta kwisa kukulumuka na zulu ya ntu na beno. Ebuna beno ta zabisa nsangu na mono na bwala Yeruzalemi, na ntoto ya Yudea yonso, na ntoto ya Samaria yonso, tii na nsuka ya ntoto.”​—Bis. 1:8.

² Lusilu yina yantikaka kulungana na Pantekoti ya mvu 33 T.B. ntangu mpeve santu kupesaka balongoki ya Yezu Kristu ngolo ya kufulusa Yeruzalemi ti malongi na bo. Ata kimbeni mosi ve kukukaka na kukanga bo nzila. (Bis. 4:20) “Bilumbu yonso tii na nsuka ya ntoto,” balongoki ya kwikama ya Yezu, tanga mpi beto, kevandaka mpenza na mfunu ya ngolo yina Nzambi kepesaka.​—Mat. 28:20.

3. (a) Tendula luswaswanu ya kele na kati ya mpeve santu mpi ngolo. (b) Ngolo ya kekatukaka na Yehowa kesadisaka beto na kusala inki?

³ Yezu kusilaka balongoki na yandi nde ‘bo zolaka kubaka ngolo ntangu mpeve santu zolaka kukwisa kukulumuka na zulu ya ntu na bo.’ Bangogo “ngolo” mpi “mpeve” kele ti bantendula ya kuswaswana. Mpeve ya Nzambi, to ngolo na yandi ya kisalu, kele ngolo yina yandi ketindaka na bantu to na bima sambu na kupusa bo na kulungisa luzolo na yandi. Kansi, ngolo lenda tendula “makuki ya kusala mambu to ya kubasisa kima mosi.” Yo lenda vanda kukonda kusala na kati ya muntu to ya kima mosi tii kuna bo tavanda ti mfunu na yo sambu na kusala dyambu mosi buna. Yo yina, beto lenda fwanisa mpeve santu ti kura yina kepesaka ngolo na batterie yina bo lenda tula charge kana charge memana, kansi ngolo kele bonso kura to charge yina bo mebumba na kati ya batterie yango. Ngolo yina Yehowa kepesaka  bansadi na yandi na nzila ya mpeve santu kepesaka konso muntu na kati na beto makuki ya kulungisa kudipesa na beto ya Bukristu, mpi kana mpila kele, kunwana ti mambu ya mbi ya beto kekutanaka ti yo.​—Tanga Mishe 3:8; Kolosai 1:29.

4. Inki beto tatadila na disolo yai, mpi sambu na nki?

⁴ Inki mutindu ngolo yina Nzambi kepesaka beto na nzila ya mpeve santu kemonanaka? Mpeve santu lenda pusa beto na kusala mambu ya nki mutindu? Ntangu beto kesosaka kusadila Nzambi na kwikama yonso, beto kekutanaka ti mambu mingi ya mpasi​—yina kekatukaka na Satana, na ngidika na yandi ya bima, to na nitu na beto mosi ya kukonda kukuka. Yo kele mfunu nde beto nunga bampasi ya mutindu yai sambu na kukwamina bonso Bakristu, kusamuna mbala na mbala, mpi kutanina bangwisana ya mbote ti Yehowa. Bika beto tadila mutindu mpeve santu kesadisaka beto na kununga mpukumuna mpi kunwana ti kulemba mpi kulemba nitu.

Mpeve Santu Kepesaka Ngolo Sambu na Kunwana ti Mpukumuna

5. Inki mutindu kisambu lenda pesa beto ngolo?

⁵ Yezu kulongaka balongoki na yandi na kusamba nde: “Kubikisa beto ve na [mpukumuna, Luwawanu Yampa], kansi katula beto na maboko ya Muntu ya Mbi.” (Mat. 6:13) Yehowa tayambula ve bansadi na yandi ya kwikama yina kesalaka kisambu yai. Na dibaku yankaka, Yezu kutubaka nde “Tata yina kele na zulu ta pesa mpenza mpeve na yandi na bantu yina ke lombaka yandi mpeve.” (Luka 11:13) Yo kepesa mpenza kivuvu nde Yehowa kesila na kupesa beto ngolo yai sambu yo sadisa beto na kulanda kusala mambu ya lunungu! Ya kyeleka, dyambu yai ketendula ve nde Yehowa takanga nzila nde beto kutana ve ti bampukumuna. (1 Kor. 10:13) Kansi ntangu beto mekutana ti bampukumuna, yo kele ntangu ya kusamba nkutu ata ngolo kibeni.​—Mat. 26:42.

6. Bamvutu yina Yezu kupesaka na mpukumuna ya Satana kusimbamaka na nki?

⁶ Sambu na kupesa mvutu na mpukumuna ya Dyabulu, Yezu kusadilaka masonuku. Ndinga ya Nzambi kuvandaka pwelele na mabanza ya Yezu ntangu yandi vutulaka nde: “Bo sonikaka na Mukanda ya Nzambi nde . . . Bo sonikaka mpi na Mukanda ya Nzambi nde . . . Katuka, Satana! Sambu bo sonikaka na Mukanda ya Nzambi nde: ‘Nge fweti samba Mfumu Nzambi, Nzambi na nge. Kaka yandi mpamba nge fweti samba!’” Zola sambu na Yehowa mpi Ndinga na yandi kupusaka Yezu na kubuya bampukumuna yina Mpukumuni kutulaka na ntwala na yandi. (Mat. 4:1-10) Na nima, ntangu Yezu kununga mpukumuna mbala na mbala, Satana kuyambulaka yandi.

7. Inki mutindu Biblia kesadisaka beto na kunwana ti mpukumuna?

⁷ Sambu Yezu kutulaka ntima na Masonuku sambu na kunwana ti bampukumuna ya Dyabulu, beto fwete sala yo na kiteso ya kuluta mpenza! Ya kyeleka, sambu na kununga Dyabulu mpi bantu na yandi, beto fwete baka ntete lukanu ya kuzaba mbote minsiku ya Nzambi mpi kuzitisa yo na mambu yonso. Sambu bo melongukaka Masonuku mpi mebakisaka mayele mpi lunungu ya Nzambi, yo mepusaka bantu mingi na kuzinga na kuwakana ti minsiku ya Biblia. Ya kyeleka, “Ndinga ya Nzambi” kele ti ngolo ya kuswasisa “mabanza ti bangindu ya ntima.” (Baeb. 4:12, NW) Kana muntu ketanga mpi keyindulula mingi Masonuku, yandi tazaba mbote “kwikama ya Yehowa.” (Dan. 9:13, NW) Sambu yo kele mutindu yina, yo kele mfunu nde beto yindulula baverse yina ketubila bifu ya sikisiki ya beto kele na yo.

8. Na nzila ya nki beto lenda baka mpeve santu?

⁸ Katula nzayilu na yandi ya Masonuku, Yezu kukaka kununga mpukumuna sambu yandi vandaka “ya kufuluka na mpeve” santu. (Luka 4:1) Sambu na kuvanda ti ngolo mpi makuki ya mutindu mosi, beto fwete pusana penepene ya Yehowa na kubakaka mpenza mambote na bangidika yonso ya yandi mebakaka sambu na kufulusa beto na mpeve na yandi. (Yak. 4:7, 8) Na kati ya bangidika yango, beto ketanga kulonguka Biblia, kisambu, mpi kuvukana ti bampangi-Bakristu. Bantu mingi mendimaka mpi mambote ya kuvanda na manaka yina mefuluka ti bisalu ya Bukristu, yina kesadisaka bo na kutula mabanza na bo na bangindu ya kimpeve ya ketungaka.

9, 10. (a) Na kisika ya beno kezingaka, inki bampukumuna bantu kekutanaka ti yo mingi? (b) Inki mutindu kuyindulula mpi kisambu lenda pesa nge ngolo ya kunwana ti mpukumuna ata ntangu nge keyindula nde nge kele ya kulemba?

⁹ Inki bampukumuna nge fwete nwana ti yo? Keti nge mekutanaka dezia ti mpukumuna ya kusala flirt ti muntu yina kele ve nkwelani na nge? Kana nge mekwelaka ntete ve, keti nge mewaka dezia mpusa ya kuvanda fianse ya muntu mosi yina kele ve Mukristu? Ntangu bo ketala televizio  to kesadila Internet, Bakristu lenda kutana na kintulumukina ti mpukumuna ya kutala kima mosi ya mvindu. Keti dyambu yai mekuminaka nge, kana ee, nki nge salaka? Yo tavanda mbote na kuyindulula mutindu kitambi mosi ya mbi lenda nata na kitambi yankaka ya mbi mpi na nima kunata nge na kusala disumu ya nene. (Yak. 1:14, 15) Yindula mpasi yina nge tapesa Yehowa, dibundu, mpi bantu ya dibuta na nge kana nge sala dyambu mosi ya mbi. Na ndambu yankaka, kansansa ya bunkete kekatukaka na kuvanda kaka ya kwikama na minsiku ya Nzambi. (Tanga Nkunga 119:37; Bingana 22:3.) Konso ntangu ya nge kekutana ti bampukumuna ya mutindu yai, vanda ti lukanu ya kusamba sambu na kubaka ngolo ya kunwana ti yo.

¹⁰ Kele dyaka ti kima yankaka ya kuyibuka na yina metala bampukumuna ya Diabulu. Satana kukwendaka penepene na Yezu ntangu yandi vandaka mesala bilumbu 40 na ntoto ya zelo na zelo kukonda kudya. Ntembe kele ve nde Dyabulu kuyindulaka nde yai kuvandaka “ntangu mosi ya mefwana” mpenza sambu na kumeka kwikama ya Yezu. (Luka 4:13, NW) Satana kesosaka bantangu ya mefwana sambu na kumeka kwikama na beto mpi. Yo yina, yo kele mfunu nde beto vanda kaka ngolo na kimpeve. Mbala mingi Satana kenwanisaka beto ntangu yandi kebakisaka nde beto kele ngolo ve. Yo yina, konso ntangu ya beto kekudiwa ya kulemba to ya kulemba nitu, beto fwete vanda ti lukanu ya ngolo ya kusamba Yehowa sambu yandi pesa beto lutaninu, lusadisu mpi mpeve santu.​—2 Kor. 12:8-10.

Mpeve Santu Kepesaka Beto Ngolo ya Kunwana ti Kulemba mpi Kulemba Nitu

11, 12. (a) Sambu na nki bubu yai bantu mingi kekudiwaka ya kulemba? (b) Inki lenda pesa beto ngolo ya kunwana ti kulemba nitu?

¹¹ Sambu beto kele bantu ya kukonda kukuka, mbala mingi beto kelembaka nitu. Yo lenda vanda kyeleka mingimingi bubu yai sambu beto kezinga na nsungi yina kele ti basusi mingi. Mbala yankaka beto kekutana ti bantangu ya mpasi kuluta yina bantu yonso na kimvuka mekutanaka ntete ve ti yo. (2 Tim. 3:1-5) Mutindu Armagedoni ke na kufinama, bampasi ya mbongo, ya mawi, mpi bampasi yankaka kekuma kaka mingi. Yo yina, yo fwete yitukisa beto ve kana bantu yankaka kemona nde yo kele mpasi mingi na kulungisa mikumba na bo ya kukeba mabuta na bo mpi ya kulungisa bampusa ya mabuta yango. Bo kekudiwaka ya kulemba mpenza, nde yo melutila bo, to nkutu nde bo mesuka. Kana yo kele mutindu yai sambu na nge, nki mutindu nge lenda nwana ti bampasi yai?

¹² Yibuka nde Yezu kundimisaka balongoki na yandi nde yandi zolaka kupesa bo nsadisi​—mpeve santu ya Nzambi. (Tanga Yoane 14:16, 17.) Yo kele ngolo ya kuluta bangolo yonso na luyalanganu. Na nsadisa na yo, Yehowa lenda pesa beto na mutindu ya ‘mingi mpenza’ kikesa yina beto kele na yo mfunu sambu na kunwana ti konso mpukumuna. (Ef. 3:20) Mutindu ntumwa Polo kutubaka, kana beto ketula ntima na mpeve yina, beto tabaka “ngolo ya kuluta nene,” ata beto ‘kekamunama  na mitindu yonso.’ (2 Kor. 4:7, 8, NW) Yehowa kesila ve na kukatula bampasi na beto, kansi yandi kendimisa beto nde yandi tapesa beto ngolo ya kunwana ti yo na nzila ya mpeve na yandi.​—Filp. 4:13.

13. (a) Inki mutindu leke mosi mebakaka ngolo ya kunwana ti dyambu ya mpasi? (b) Keti nge kezaba bambandu ya mutindu mosi?

¹³ Beto tadila mbandu ya Stephanie, mupasudi-nzila ya ntangu yonso ya kele ti bamvula 19. Ntangu yandi vandaka ti bamvula 12, yandi salaka accident vasculaire cérébral (AVC), mpi bo kangaka yandi ti kansere ya butomfu. Banda na ntangu yina, bo mesalaka yandi operasio mbala zole, yandi mebakaka lusansu ya bo kebingaka radiothérapie, mpi mesalaka AVC mbala zole dyaka, ebuna yo mesalaka nde yandi kukuka ve kusala mambu yankaka na ndambu ya diboko ya kimama mpi yandi kemonaka ve mbote. Yo kelombaka nde Stephanie kubumba ngolo na yandi sambu na mambu yina yandi kemonaka nde yo kele mfunu mingi, bonso balukutakanu ya Bukristu mpi kisalu ya bilanga. Ata mpidina, yandi kemonaka mutindu mpeve ya Yehowa kesadisaka yandi na kukanga-ntima na mitindu mingi. Mikanda ya ketendulaka Biblia yina kevandaka ti baeksperiansi ya bampangi-Bakristu kepesaka yandi kikesa ntangu yandi kekudiwaka ya kulemba mpenza. Bampangi ya babakala mpi ya bankento kesadisaka yandi na kutindilaka yandi mikanda to na kusolulaka ti yandi na ntwala mpi na nima ya balukutakanu sambu na kupesa yandi kikesa. Bantu ya kusepelaka na kyeleka kumonisaka mpi ntonda na bo sambu na mambu yina Stephanie kelongaka bo, na kukwendaka na nzo na yandi sambu na kubaka malongi ya Biblia. Stephanie ketondaka Yehowa mingi mpenza sambu na mambu yai yonso. Verse ya yandi kezolaka mingi kele Nkunga 41:4, yina yandi kendimaka nde yo kelunganaka na luzingu na yandi.

14. Inki beto fwete buya kusala kana beto melemba nitu, mpi sambu na nki?

¹⁴ Ntangu beto kele ya kulemba to kenyokwama, beto fwete yindula ve ata fyoti nde sambu na kununga mpasi, beto fwete kulumusa ntangu yina beto kelutisaka na mambu ya kimpeve. Yai kele dyambu ya mbi kibeni ya beto lenda sala. Sambu na nki? Sambu bisalu ya kimpeve bonso kulonguka Biblia ya beto mosi mpi ya dibuta, kisalu ya bilanga, mpi kukwenda na balukutakanu kele banzila yina beto kebakaka mpeve santu yina kepesaka beto ngolo. Bisalu ya Bukristu kepesaka kikesa konso ntangu. (Tanga Matayo 11:28, 29.) Bambala mingi kibeni bampangi ya babakala mpi ya bankento kekumaka na balukutakanu ya kulemba, kansi lere ntangu ya kuvutuka na nzo kelungaka, yo kevandaka bonso nde bo mebaka dyaka ngolo!

15. (a) Keti Yehowa kesila nde yandi tasala na mpila nde luzingu ya Mukristu kuvanda ya kukonda mpasi? Tendula na nsadisa ya Biblia. (b) Nzambi kesila beto inki, mpi yo kebasisa nki ngyufula?

¹⁵ Ya kyeleka, yo ketendula ve nde mukumba ya kuvanda longoki ya Kristu kele kilo ve. Yo kelombaka bikesa sambu na kuvanda Mukristu ya kwikama. (Mat. 16:24-26; Luka 13:24) Ata mpidina, na nzila ya mpeve santu, Yehowa lenda pesa ngolo na muntu yina melemba. Mbikudi Yezaya kusonikaka nde: “Bayina ke tulaka ntima na Mfumu Nzambi, bo ke yikaka diaka ngolo na bo. Bo ke pumbukaka bonso bakumbi-kumbi. Bo ke bakaka ntinu, kikesa na bo ke manaka ve; bo ke tambulaka mingi, kulemba ve.” (Yez. 40:29-31) Sambu yo kele mutindu yina, beto fwete kudiyula nde, Inki kevandaka mpenza na kisina ya kulemba ya kimpeve?

16. Inki beto lenda sala sambu na kukatula bikuma yina kesalaka nde beto lemba to beto lemba nitu?

¹⁶ Ndinga ya Yehowa kesyamisaka beto na kusosa kubakisa ‘mambu ya kuluta mfunu.’ (Filp. 1:10) Ntangu Polo kufwanisaka luzingu ya Bakristu ti nsaka ya nda ya ntinu, na ngolo ya mpeve, yandi pesaka ndongisila yai: “Beto katula mambu yonso yina ke pesa beto kilo . . . , ebuna beto baka ntinu, beto kwenda na ntwala, beto landa kaka nzila yina ya beto fweti kwendila.” (Baeb. 12:1) Yandi vandaka kutuba nde beto fwete buya bisalu mpi bakilo ya kukonda mfunu yina  talembisa beto. Yo lenda vanda nde bankaka na kati na beto kemeka kaka na kusala mambu mingi na luzingu na bo yina kele dezia ti mambu mingi. Yo yina, kana mbala mingi nge kewaka kulemba mpi kenyokwamaka, nge lenda baka mambote na kutadila dyaka ngolo yina nge kebasisaka na kisalu na nge ya kinsuni, bambala ikwa nge kesalaka banzyetelo kaka sambu na kusepedisa nitu, mpi ngolo yina nge kebasisaka na bansaka ya kulutisila ntangu to na bisalu yankaka. Bukatikati mpi kudikulumusa fwete pusa beto yonso na kuzaba bandilu na beto mpi na kufyotuna mambu ya kukonda mfunu.

17. Sambu na nki bankaka kekudiwaka ya kulemba, kansi Yehowa kendimisa beto nki na dyambu yai?

¹⁷ Yo lenda vanda mpi nde bankaka na kati na beto melemba nitu mwa fyoti sambu nsuka ya ngidika yai ya bima kekwisa ve nswalu mutindu bo vandaka kuyindula. (Bing. 13:12) Kansi, konso muntu yina kekudiwa mutindu yina lenda baka kikesa na bangogo yai ya kele na Habakuki 2:3: “Sonika yo na kusonika sambu ntangu na yo me lunga ntete ve. Kansi ntangu ke kwisa nswalu, ebuna mambu yai ya mono ke songa nge yo ta bwa mpidina. Yo lenda kwisa malembe-malembe, kansi vingila yo; yo ta bwa kaka, yo ta konda ve.” Yehowa mesilaka beto nde nsuka ya ngidika yai ya bima takwisa na ntangu ya sikisiki yina yandi metulaka.

18. (a) Inki balusilu kepesa nge kikesa? (b) Inki mutindu disolo ya kelanda tanatila beto mambote?

¹⁸ Ya kyeleka, bansadi ya Yehowa yonso ya kwikama kevingilaka ti mpusa ya ngolo kilumbu yina kulemba mpi kulemba nitu tavanda dyaka ve, ntangu bantu yonso “ta baka diaka ngolo.” (Yobi 33:25) Nkutu ata ntangu yai beto lenda baka ngolo na nzila ya mpeve santu kana beto kesala bisalu ya kimpeve ya kepesaka ngolo. (2 Kor. 4:16; Ef. 3:16) Kubika ve nde kulemba nitu kunata nge na kukonda balusakumunu ya kimakulu. Bampasi yonso​—yo vanda ya kekatuka na mpukumuna, kulemba, to kulemba nitu​—taluta, kana bubu yai ve, na nsi-ntoto ya mpa ya Nzambi. Na disolo ya kelanda, beto tatadila mutindu mpeve santu kepesaka Bakristu ngolo sambu na kukanga-ntima na mbangika, kununga bupusi ya mbi ya banduku, mpi kukanga-ntima na bampasi yankaka ya mutindu na mutindu.

Inki Mvutu Nge Tapesa?

• Inki mutindu kutanga Biblia kepesaka beto ngolo?

• Inki mutindu kisambu mpi kuyindulula kepesaka beto ngolo?

• Inki mutindu beto lenda katula bikuma yina kesalaka nde beto lemba nitu?

[Bangyufula ya Disolo ya Kulonguka]

[Kifwanisu ya lutiti 26]

Balukutakanu ya Bukristu lenda pesa beto ngolo na kimpeve