Kwenda Penepene na Nzambi

YO KEPESAKA mpasi mingi na kumona muntu mosi ya beto kezolaka kenyokwama mpi mefwa. Beto kewaka mpasi mpenza kana muntu ya mutindu yina mefwa. Kansi yo kepesa kikesa na kuzaba nde, Ngangi na beto, Yehowa Nzambi, kebakisaka mpasi yina beto kewaka. Kuluta dyaka, yandi kele na mpusa ya kusadila ngolo na yandi sambu na kuvutula bafwa na luzingu. Beto tadila kivuvu ya kemonana na bangogo ya Yobi ya kele na Yobi 14:13-15.

Tadila kikuma yina kupusaka Yobi na kutuba mambu yai. Yobi, muntu mosi ya lukwikilu ya ngolo, kumonaka bampasi ya mingi​—kuvila ya bima na yandi ya kinsuni, lufwa ya bana na yandi yina yandi vandaka kuzola mingi, mpi maladi ya ngolo mpenza. Ntangu bampasi kulutanaka, yandi tubilaka Nzambi nde: “Nzambi, mbote kana nge bumba mono na nsi ya bafwa.” (Verse 13) Yobi kumonaka nsi ya bafwa bonso nsuka ya bampasi na yandi. Kuna, Nzambi zolaka kubumba yandi bonso kima mosi ya mbalu, yandi zolaka kuvanda ve na mpasi. a

Keti Yobi zolaka kubikala kimakulu na nsi ya bafwa? Yobi kundimaka nde yo zolaka kusalama ve. Yandi landaka na kusamba nde: “Ebuna ntangu yai nge ta yindula mono diaka.” Yobi vandaka na kivuvu nde, kubikala na yandi na nsi ya bafwa zolaka kuvanda sambu na mwa ntangu mpi nde Yehowa zolaka kuvila yandi ve. Yobi kufwanisaka ntangu yina yandi zolaka kulutisa na nsi ya bafwa ti “kisalu ya kingolongolo” (NW)​—nsungi ya mpasi yina yo lombaka nde yandi vingila. Sambu na bantangu ikwa? Yandi ketuba nde: “Tii kuna nge kwisa kukatula mono.” (Verse 14) Kukatula yandi na bampasi zolaka kutendula kubasika na nsi ya bafwa​—na bangogo yankaka, kufutumuka!

Sambu na nki Yobi kundimaka nde kukatuka na bampasi na yandi zolaka kukwisa? Sambu yandi zabaka mawi yina Ngangi na beto ya zola kevandaka na yo sambu na bansambidi na yandi ya kwikama yina mefwaka. Yobi ketuba nde: “Pana nge zolaka kubinga mono, ebuna mono zolaka kwisa; mpidina nge zolaka kuvanda [na mpusa ya ngolo ya, NW] kumona mono muntu ya nge salaka.” (Verse 15) Yobi kuzabaka nde yandi kele muntu yina Nzambi salaka. Muntu yina kepesaka luzingu mpi yina kusalaka Yobi na divumu, lendaka kuvutula yandi dyaka na luzingu na nima ya lufwa.​—Yobi 10:8, 9; 31:15.

Bangogo ya Yobi kepesa beto dilongi na yina metala zola ya Yehowa: Yandi ketulaka dikebi ya mingi na bantu yina, bonso Yobi, kekudibikaka na maboko na yandi, mpi kepesaka yandi nzila ya kuyidika bo mpi kukumisa bo bantu yina yandi kezolaka. (Yezaya 64:8) Yehowa kebakaka na mbalu mingi bansambidi na yandi ya kwikama. Sambu na bantu ya kwikama yina mefwaka, yandi kevandaka na “mpusa ya ngolo.” Muntu mosi ya mayele kutubaka nde Ngogo ya Kibreo ya bo mebalula kele “mosi ya bangogo ya mfunu mpenza sambu na kumonisa mpusa ya ngolo ya kulungisa lukanu.” Ee, Yehowa keyibukaka kaka ve bansambidi na yandi, kansi yandi kevandaka mpi na mpusa ya ngolo ya kuvutula bo na luzingu.

Dyambu ya kesepedisa kele nde, na mukanda ya Yobi​—mosi ya mikanda ya ntete ya Biblia ya kusonamaka—​Yehowa kumonaka nde yo mefwana na kumonisa lukanu na yandi sambu na lufutumuku ya bafwa. b Yandi kezolaka nde nge vanda dyaka kumosi ti bantu ya nge kezolaka yina mefwaka. Dibanza yina lenda sadisa nge sambu na kulembika mpasi ya kufwisa muntu. Sambu na nki ve kulonguka mambu mingi ya metala Nzambi yai ya zola mpi mutindu nge lenda bika yandi na kuyidika nge sambu nge kuma mutindu ya bantu yina tamona kulungana ya lukanu na yandi?

[Banoti na Nsi ya Lutiti]