Longuka Na Ndinga Ya Nzambi

Disolo yai kebasisaka bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Yezu Kristu kele nani?

Na kuswaswana ti bantu yankaka, Yezu kuzingaka na zulu bonso muntu ya kimpeve na ntwala ya kubutaka na ntoto. (Yoane 8:23) Yandi vandaka kigangwa ya ntete yina Nzambi kusalaka, mpi yandi sadisaka Nzambi na kuganga bima yonso yankaka. Yandi kele kigangwa mosi kaka yina Yehowa kugangaka na maboko na yandi mosi, mpi yo yina Biblia kebingaka yandi Mwana ‘mosi kaka ya kubutuka’ ya Nzambi. Yezu kusalaka bonso Kinati-Ndinga ya Nzambi, yo yina Biblia kebingaka yandi mpi “Ndinga.”​—Yoane 1:1-3, 14; tanga Bingana 8:22, 23, 30; Kolosai 1:15, 16.

2. Sambu na nki Yezu kukwisaka na ntoto?

Nzambi kutindaka Mwana na yandi na ntoto na kutulaka luzingu na yandi na divumu ya mwense mosi ya Muyuda na zina ya Maria. Yo yina Yezu kuvandaka ve ti tata ya kinsuni. (Luka 1:30-35) Yezu kukwisaka na ntoto (1) sambu na kulonga kyeleka ya metala Nzambi, (2) sambu na kupesa mbandu na yina metala kusala luzolo ya Nzambi, mpi (3) sambu na kupesa luzingu na yandi ya kukuka bonso nkudulu.​—Tanga Matayo 20:28; Yoane 18:37.

3. Sambu na nki beto kele na mfunu ya nkudulu?

Nkudulu kele kima yina bo kefutaka sambu na kukatula muntu mosi na kimpika. Lufwa mpi kimununu kuvandaka ve na lukanu ya kisina ya Nzambi sambu na bantu. Inki mutindu beto mezaba yo? Nzambi kusongaka muntu ya ntete, Adami, nde kana yandi sala dyambu yina Biblia kebingaka disumu, yandi tafwa. Kana Adami kusalaka ve disumu, yandi zolaka kufwa ve. Ata luzingu ya Adami kusukaka ve bamvula-nkama na nima, yandi fwaka kilumbu yina yandi kolamaka na Nzambi. (Kuyantika 2:16, 17; 5:5) Adami kubikilaka bana na yandi yonso masumu mpi ndola na yo lufwa. Ebuna, lufwa “me kotaka” na ntoto ya mvimba na nzila ya Adami. Yo yina, beto kele na mfunu ya nkudulu.​—Tanga Roma 5:12; 6:23.

 4. Sambu na nki Yezu kufwaka?

Nani lendaka kufuta nkudulu sambu na kukatula beto na kimpika ya lufwa? Ntangu beto kefwaka, beto kefutaka kaka ndola ya masumu na beto mosi. Ata muntu mosi ve ya kukonda kukuka lenda futa sambu na masumu ya bantu yankaka.​—Tanga Nkunga 49:8-10.

Sambu Yezu kubutukaka ve ti kukonda kukuka ya yandi bakaka na tata ya kinsuni, yandi fwaka ve sambu na masumu na yandi mosi, kansi sambu na masumu ya bantu yankaka. Nzambi kutindaka Mwana na yandi na kufwa sambu na beto sambu na kumonisa zola na yandi ya kuluta nene na bantu. Yezu mpi kumonisaka zola sambu na beto, na kulemfukilaka Tata na yandi mpi na kupesaka luzingu na yandi sambu na masumu na beto.​—Tanga Yoane 3:16; Roma 5:18, 19.

5. Inki Yezu kesala ntangu yai?

Ntangu Yezu kubelulaka bambefo, kufutumunaka bafwa, mpi kugulusaka bantu yina vandaka na mpasi, yandi monisaka mambu yina yandi tasala nsukansuka sambu na bantu ya bulemfu. (Luka 18:35-42; Yoane 5:28, 29) Na nima ya lufwa ya Yezu, Nzambi kuvutulaka yandi na luzingu bonso kigangwa ya kimpeve. (1 Piere 3:18) Na nima, Yezu kuvingilaka na diboko ya kitata ya Nzambi tii ntangu Yehowa kupesaka yandi kiyeka ya kuyala bonso Ntotila na ntoto ya mvimba. (Baebreo 10:12, 13) Ntangu yai Yezu ke na kuyala bonso Ntotila na zulu, mpi balongoki na yandi ke na kulonga nsangu ya mbote na nsi-ntoto ya mvimba.​—Tanga Daniele 7:13, 14; Matayo 24:14.

Kubika fyoti, Yezu tasadila kiyeka na yandi bonso Ntotila sambu na kutula nsuka na bampasi yonso mpi na bantu yina kele na kisina na yo. Bamilio ya bantu yina kemonisa lukwikilu na Yezu mpi kelemfukila yandi tazinga na paladisu na ntoto.​—Tanga Nkunga 37:9-11.

Sambu na kuzaba mambu mingi, tala kapu 4 ya mukanda yai, yina Bambangi ya Yehowa mebasisaka. Inki Biblia Kelongaka Mpenza?

[Kifwanisu ya kele na lutiti 11]

Bamilio ya bantu yina kemonisa lukwikilu na Yezu mpi kelemfukila yandi tazinga na paladisu na ntoto