Yezu Kikuma Yandi Fwaka

‘Mwana-muntu kwisaka sambu na kupesa moyo na yandi bonso [nkudulu sambu na, NW] kukatula bantu mingi na kimpika ya masumu.’​—MARKO 10:45.

YEZU kuzabaka mambu yina vandaka kuvingila yandi. Yandi bakisaka nde luzingu na yandi zolaka kuvanda ve ya ngemba. Kansi, yandi zabaka nde luzingu na yandi zolaka kuzengana na bunkufi ntangu yandi vandaka ntete ti bamvula kiteso ya 30, mpi yandi kudibongisaka mbote-mbote na lufwa yina vandaka kuvingila yandi.

Biblia kebendaka dikebi ya mingi na lufwa ya Yezu. Mukanda mosi ketuba nde, Masonuku ya Kigreki to Kuwakana ya mpa ya Bukristu ketubilaka lufwa ya Yezu bambala kiteso ya 175. Kansi, sambu na nki yo lombaka nde Yezu kunyokwama mpi kufwa? Beto kele na mfunu ya kuzaba yo, sambu lufwa ya Yezu lenda vanda na bupusi ya ngolo na luzingu na beto.

▪ Mambu yina Yezu vandaka kuvingila Na bilumbu ya nsuka ya luzingu na yandi, Yezu vandaka kukebisa balongoki na yandi mbala na mbala sambu na bampasi mpi lufwa yina vandaka kuvingila yandi. Na nzila, ntangu bo vandaka kukwenda na Yeruzalemi sambu na kuta nkinsi na yandi ya nsuka ya Paki, Yezu kuzabisaka bantumwa na yandi 12 nde: “Bo ta pesa Mwana-muntu na maboko ya bambuta ya banganga-Nzambi ti ya balongi ya Bansiku. Bo ta zengila yandi nde yandi fweti fwa. Bo ta pesa yandi na bamimpani. Bo ta seka yandi, bo ta losila yandi mate, bo ta bula yandi fimbu, bo ta fwa yandi.”  * (Marko 10:33, 34) Sambu na nki, yandi vandaka kundima mpenza nde mambu yina zolaka kukumina yandi?

Yezu kuzabaka mbote-mbote bambikudulu mingi ya Masonuku ya Kiebreo, yina kubikulaka mutindu luzingu na yandi zolaka kusuka. (Luka 18:31-33) Beto tadila mwa bambikudulu yango, kumosi ti baverse yina ketendula mutindu yina yo lunganaka.

Mesia

▪ Tatekama na mbongo ya bibende 30.​—ZAKARIA 11:12; MATAYO 26:14-16.

▪ Tabulama mpi bo talosila yandi mate.​—YEZAYA 50:6; MATAYO 26:67; 27:26, 30.

▪ Tafwa na zulu ya nti.​—NKUNGA 22:17; MARKO 15:24, 25.

▪ Tafingama, ntangu yandi tavanda na zulu ya nti.​—NKUNGA 22:8, 9; MATAYO 27:39-43.

▪ Tafwa mpi ata mukwa na yandi mosi ve tabukana.​—NKUNGA 34:21; YOANE 19:33, 36.

Yezu kulungisaka bambikudulu yai, mpi bambikudulu mingi yankaka. Yandi lendaka ve kusala mambu yai na luzolo na yandi mosi. Kulungana ya bambikudulu yai yonso na Yezu kemonisaka nde, yandi vandaka mpenza muntu yina Nzambi kutindaka. *

Kansi, Sambu na nki yo vandaka mfunu nde Yezu kunyokwama mpi kufwa?

▪ Yezu kufwaka sambu na kumanisa ntembe Yezu kuzabaka ntembe ya mfunu mingi yina kubasikaka na kilanga ya Edeni, ya ketadila bigangwa yonso. Sambu Adami ti Eva kulandaka bupusi ya kigangwa ya kimpeve yina kukolamaka, bo buyaka kulemfukila Nzambi. Bankwelani yai ya bankolami kutulaka ntembe na nswa ya Nzambi ya kuyala, to na mutindu na yandi ya kuyala. Disumu na bo kubasisaka mpi ntembe ya kuzaba kana bantu  lendaka kubikala ya kwikama na Nzambi to ve na ntwala ya bampasi.​—Kuyantika 3:1-6; Yobi 2:1-5.

Yezu kupesaka mvutu ya kuluta mbote na bantembe yai zole​—luyalu ya Yehowa mpi kwikama ya bantu. Sambu Yezu kumonisaka bulemfu na yandi ya kukuka ‘tii yandi fwaka na zulu ya nti,’ yandi nwaninaka luyalu ya Nzambi. (Filipi 2:8) Yezu kumonisaka mpi nde, muntu ya kukuka lenda bikala ya kwikama na Yehowa ata na ntwala ya bampasi ya ngolo.

▪ Yezu kufwaka sambu na kukatula bantu na kimpika Mbikudi Yezaya kubikulaka nde, bampasi mpi lufwa ya Mesia ya lusilu zolaka kunatila bantu ndolula ya masumu. (Yezaya 53:5, 10) Yezu kubakisaka dyambu yai mbote-mbote, mpi yandi pesaka na luzolo yonso “moyo na yandi bonso [nkudulu sambu na, NW] kukatula bantu mingi na kimpika ya masumu.” (Matayo 20:28) Lufwa na yandi ya kimenga kukangudilaka bantu ya kukonda kukuka nzila, ya kuvanda na bangwisana ya mbote ti Yehowa mpi kuguluka na masumu mpi lufwa. Lufwa ya Yezu kupesaka beto dibaku ya kubaka dyaka dyambu yina Adami mpi Eva kuvidisaka, disongidila, kivuvu ya kuzinga na ntoto kimakulu na mavimpi ya mbote mpenza. *​—Kusonga 21:3, 4.

▪ Mambu yina nge lenda sala Na masolo yina ya kulandana, beto mekatuka kutadila mambu yina Biblia ketubaka sambu na Yezu, disongidila kisika yandi katukaka, mutindu yandi zingaka, mpi kikuma yandi fwaka. Kuzaba bakyeleka yai ya metala Yezu lenda sadisa beto mingi, na kukatula bangindu ya mbi na yina metala yandi. Kusala mambu na kuwakana ti bakyeleka yina lenda nata balusakumunu​—luzingu ya mbote kibeni bubu yai mpi luzingu ya mvula na mvula na makwisa. Biblia kesongaka beto mambu yina beto fwete sala kana beto kezola kubaka balusakumunu yina.

▪ Longuka mambu mingi ya metala Yezu Kristu mpi mukumba na yandi na lukanu ya Yehowa.​—YOANE 17:3.

▪ Monisa lukwikilu na Yezu, monisa na luzingu na nge nde nge kendima yandi bonso Ngulunsi na nge.​—YOANE 3:36; BISALU 5:31.

Bambangi ya Yehowa tavanda na kyese ya kusadisa nge na kulonguka mambu mingi ya metala Yezu Kristu, “mwana mosi” ya kubutuka ya Nzambi, yina na nsadisa na yandi beto lenda baka dikabu ya “moyo ya mvula na mvula.”​—Yoane 3:16.

[Banoti na Nsi ya Lutiti]