Beno Gungula ‘Mameme Yina Nzambi Mepesaka Beno na Kukeba’

‘Beno fweti tala mbote-mbote bantu yina ya Nzambi pesaka beno na kukeba na luzolo na beno mosi, kansi na kingolo-ngolo ve.’​—1 PIE. 5:2.

1. Inki bampasi Bakristu kukutana ti yo, ntangu Piere kusonikaka mukanda na yandi ya ntete?

NTUMWA Piere kusonikaka mukanda na yandi ya ntete, mwa bamvula na ntwala nde Nero kuyantika kunyokula Bakristu na Roma. Yandi zolaka kupesa kikesa na bampangi na yandi Bakristu. Satana vandaka “kuzieta” sambu na kusosa kudya Bakristu. Sambu na kutelamina yandi, yo lombaka nde bo “kudiyala” mpi “kudikulumusa na nsi ya diboko ya ngolo ya Nzambi.” (1 Pie. 5:6, 8) Yo lombaka dyaka nde bo bikala na bumosi. Mpi yo lombaka nde bo keba na ‘kusalana mbi, mpi kunwana bo na bo’ sambu yo lendaka ‘kufwa kimvuka na bo.’​—Gal. 5:15.

2, 3. Beto fwete nwanisa nani, mpi inki beto tatadila na disolo yai mpi yina kelanda?

² Bubu yai, beto mpi kekutanaka ti mambu ya kiteso mosi. Satana kesosa mabaku ya kudya beto. (Kus. 12:12) Mpi ntama mingi ve, ‘mpasi ya nene tavanda. Mpasi mosi ya ngolo yina mebwaka ntete ve tuka Nzambi salaka bima yonso.’ (Mat. 24:21) Kaka mutindu yo lombaka nde Bakristu ya mvu-nkama ya ntete kuditanina sambu bo swana ve bo na bo, beto mpi fwete kuditanina. Sambu na kununga, beto kevandaka bantangu yankaka ti mfunu ya lusadisu yina kekatukaka na bambuta-bantu ya kuyela.

³ Bika beto tadila mutindu bankuluntu lenda tomisa ntonda na bo, na mukumba yina bo mebakaka ya kugungula ‘mameme yina Nzambi mepesaka bo na kukeba.’ (1 Pie. 5:2) Na nima, beto tatadila mutindu ya mbote yina bo lenda sala kisalu ya kugungula. Na disolo yina talanda beto tadilaka mutindu dibundu lenda ‘zitisa bantu yina ke salaka ngolo, bayina ya Mfumu Nzambi mesolaka na kutwadisa’ kibuka. (1 Tes. 5:12) Kutadila mambu yai tasadisa beto na kutelamina mbeni na beto ya ngolo, sambu beto mezaba nde yandi kele muntu yina beto kenwanisa.​—Ef. 6:12.

Beno Gungula Mameme ya Nzambi

4, 5. Inki mutindu bankuluntu fwete tadila mameme ya Nzambi? Pesa mbandu.

⁴ Piere kusyamisaka bambuta-bantu yina kuvandaka na kati ya Bakristu ya mvu-nkama ya ntete na kukeba mameme yina Nzambi kupesaka bo, na mutindu yina Nzambi kezodilaka. (Tanga 1 Piere 5:1, 2.) Ata bo vandaka kutadila Piere bonso dikunzi ya dibundu, yandi tubilaka ve bankuluntu na mutindu ya mbi. Kansi, yandi longisilaka bo bonso bampangi na yandi bankuluntu. (Gal. 2:9) Ti mabanza ya mefwanana ti ya Piere, bubu yai Nto-Kimvuka kelongisilaka bankuluntu ya mabundu na kusala bikesa sambu na kulungisa mukumba ya nene yina bo kele ti yo ya kugungula mameme ya Nzambi.

⁵ Ntumwa Piere kusonikaka nde, yo lombaka nde bambuta-bantu kugungula ‘mameme yina Nzambi mepesaka bo na kukeba.’ Yo vandaka mfunu mingi sambu na bo na kubakisa nde mameme kele ya Yehowa mpi ya Yezu Kristu. Bankuluntu tavutula munoko na Nzambi, na mutindu bo langidilaka mameme ya Nzambi. Yindula nde, nduku na nge mosi ya ngolo melomba nge na kukeba bana na yandi ntangu yandi kele ve. Keti nge tatanina bo ve mpi tadisa bo ve mbote? Kana mwana mosi kubela, keti nge tasala ve mambu sambu yandi baka lusansu ya mefwana? Kiteso mosi, bankuluntu na dibundu fwete gungula “dibundu yina ya Nzambi [sumbaka] na menga ya mwana na yandi mpenza.” (Bis. 20:28) Bo kevilaka ve nde, konso dimeme kusumbamaka na menga ya Yezu Kristu ya mbalu mingi. Sambu  bankuluntu tavutula munoko na Nzambi na mutindu yina bo gungulaka mameme, bo kedisaka, ketaninaka, mpi kekebaka mameme.

6. Inki kuvandaka mukumba ya bangungudi na ntangu ya ntama?

⁶ Yindula mikumba yina bangungudi ya mameme kuvandaka ti yo na ntangu ya ntama. Bo vandaka kunyokwama na mwini ya ngolo ya ntangu mpi na madidi ya mingi na mpimpa sambu na kutanina mameme. (Kuy. 31:40) Nkutu, bo vandaka kutula luzingu na bo na kigonsa sambu na mameme. Ntangu yandi vandaka ngungudi na kileke na yandi, Davidi kugulusaka mameme na yandi na maboko ya bambisi ya makasi, mu mbandu na maboko ya ntambu mpi nkoi. Na kutadila konso mbisi yina, Davidi kutubaka nde yandi ‘simbaka yo na mandefo, yandi bula-bulaka yo tii kuna yo fwaka.’ (1 Sam. 17:34, 35) Yandi vandaka kikesa mpenza! Yo fwete vanda nde yandi kumaka mpenza penepene ya kibeku ya mbisi yina! Ata mpidina, yandi vutukaka ve nima sambu na kugulusa dimeme na yandi.

7. Na mutindu ya kifwani, nki mutindu bankuluntu kekatulaka dimeme na kibeku ya Satana?

⁷ Bubu yai, bankuluntu fwete keba na Satana yina kenwanisaka bonso ntambu. Na kutuba ya kifwani, yo lenda lomba kusala dyambu mosi ya kikesa ya mefwanana ti kukatula dimeme na kibeku ya Satana. Na kutuba ya kifwani, kana bankuluntu mesimba mbisi ya makasi na mandefo, bo lenda gulusa dimeme. Bo lenda solula mpi kuyindula ti mpangi mosi yina kezola kubwa na mutambu ya Satana kukonda kuzaba. (Tanga Yude 22, 23.) Ya kyeleka, bankuluntu kesalaka ve mambu yai kukonda lusadisu ya Yehowa. Bo kesadisaka dimeme ya melwala na zola yonso, kekangaka bamputa na yandi mpi kepakulaka yandi mafuta ya Ndinga ya Nzambi yina kelembikaka mpasi.

8. Bankuluntu ketwadisaka mameme na wapi, mpi nki mutindu?

⁸ Ngungudi vandaka mpi kunata mameme na yandi na bisika ya mbote yina vandaka ti matiti mpi masa. Kiteso mosi bankuluntu kenataka mameme na dibundu, mpi kesyamisaka bo na kukwenda mbala na mbala na balukutakanu sambu bo dya mbote mpi bo baka ‘madia na bo na ntangu ya mbote.’ (Mat. 24:45) Yo lenda lomba mpi nde, bankuluntu kubaka bantangu ya ngika sambu na kusadisa bantu yina kebela na kimpeve na kundima madya yina kekatuka na Ndinga ya Nzambi. Ziku, dimeme yina kuvilaka kesala  bikesa sambu na kuvutuka na kibuka. Na kisika ya kupesa mpangi na bo boma, bankuluntu ketendudilaka yandi minsiku ya Biblia na mawete yonso mpi kesongaka yandi mutindu yandi lenda sadila yo na luzingu na yandi.

9, 10. Nki mutindu bankuluntu fwete sadisa bampangi yina kebela na kimpeve?

⁹ Ntangu nge kebela, munganga ya nki mutindu nge tazola? Munganga yina kebakaka ntangu fyoti sambu na kuwidikila nge mpi na nima kusonikilaka nge nkisi nswalu-nswalu sambu nge basika mpi yandi yamba mbefo yankaka? To nge tazola kukwenda na munganga yina tawidikila nge na dikebi yonso, tatendudila nge mambu yina kekwendila ve na nitu na nge, mpi tapesa nge lusansu ya mefwana?

¹⁰ Mutindu mosi, bankuluntu lenda widikila mpangi yina kebela na kimpeve mpi kusadisa yandi sambu na kubelula bamputa na yandi, mpidina na mutindu ya kifwani “kutula yandi mafuta na ntu na zina ya [Yehowa].” (Tanga Yakobo 5:14, 15.) Bonso balsami yina kuvandaka na Gileadi, Ndinga ya Nzambi lenda lembika mpasi ya muntu yina kebela. (Yer. 8:22; Ezek. 34:16) Ntangu muntu yina kebela kesadila minsiku ya Biblia, yo lenda sadisa yandi na kubaka dyaka ngolo na kimpeve. Ya kyeleka, bankuluntu kesalaka mambu mingi ntangu bo kewidikilaka mambu yina keyangisa dimeme mpi kesambaka ti yandi.

Na Luzolo Yonso Kansi na Kingolo-Ngolo Ve

11. Inki kepusaka bankuluntu na kugungula mameme ya Nzambi na luzolo yonso?

¹¹ Na nima, Piere kuyibusaka bambuta-bantu mutindu yina kisalu ya kugungula fwete salama, mpi mutindu yina yo fwete salama ve. Bankuluntu fwete gungula mameme ya Nzambi na ‘luzolo yonso kansi na kingolo-ngolo ve.’ Inki kepusaka bankuluntu na kusadila bampangi na bo mambu na luzolo yonso? Inki kupusaka Piere na kugungula mpi na kudisa mameme ya Yezu? Ntete-ntete, zola na yandi sambu na Mfumu. (Yoa. 21:15-17) Sambu na zola, bankuluntu ‘kezingaka diaka ve sambu na bo mosi, kansi sambu na Kristo yina kufwaka sambu na bo.’ (2 Kor. 5:14, 15) Zola yai, vukisa mpi zola na bo sambu na Nzambi mpi sambu na bampangi na bo kepusaka bankuluntu na kusadila mameme, na kupesa bikesa na bo, mpi ntangu na bo sambu na kusala mpidina. (Mat. 22:37-39) Bo kekudipesaka bo mosi, na kingolo-ngolo ve kansi na luzolo yonso.

12. Polo kudipesaka tii na nki kiteso?

¹² Tii na nki kiteso bankuluntu fwete kudipesa? Ntangu bo kekebaka mameme, bankuluntu kelandaka mbandu ya Polo, kaka mutindu yandi landaka mbandu ya Yezu. (1 Kor. 11:1) Sambu bo vandaka kuzola mingi bampangi ya Tesalonika, Polo mpi banduku na yandi ya kisalu kusepelaka na kukabila bo ‘nsangu ya mbote ya Nzambi kaka ve, kansi mpi moyo na bo mosi.’ Ntangu bo vandaka kusala mpidina, bo kumaka bantu ya mawete “bonso mama yina [kenwisaka] ke kebaka bana na yandi.” (1 Tes. 2:7, 8) Polo kuzabaka mutindu mama yina kenwisaka kekudiwaka sambu na bana na yandi. Yandi lenda sala mambu yonso sambu na bo, tanga mpi kutelama na kati-kati ya mpimpa sambu na kudisa bo.

13. Bankuluntu fwete vanda ti nki dibanza ya bukati-kati?

¹³ Bankuluntu fwete vanda ti bukati-kati, na yina metala mukumba na bo ya kugungula mpi mikumba ya mabuta na bo. (1 Tim. 5:8) Ntangu yina bankuluntu kelutisaka ti dibundu, kele ntangu ya mfunu yina bo lendaka kulutisa ti mabuta na bo. Mutindu mosi ya kumonisa bukati-kati na mikumba yina zole, kele ya kubingisa bampangi yankaka na bankokila yankaka ya Lusambu ya Dibuta. Na nsungi ya bamvula mingi, Masanao nkuluntu mosi na Japon, vandaka kubingisa na kulonguka ya dibuta na yandi bampumpa mpi mabuta yina batata kuvandaka ve Bakristu. Na nima ya bamvula, bampangi yankaka yina Masanao kusadisaka kukumaka bankuluntu mpi bo landaka mbandu na yandi ya mbote.

Beno Gungula Mameme na Luzolo ti Kyese​—Kansi Ve Sambu na Kubaka Mbongo

14, 15. Sambu na nki bankuluntu fwete keba na zola ya “kubaka mbongo,” mpi nki mutindu bo lenda landa mbandu ya Polo na dyambu yai?

¹⁴ Piere kusyamisaka mpi bankuluntu na kugungula mameme ‘sambu na kubaka ve mbongo, kansi na luzolo ti kiese.’ Kisalu ya bankuluntu kebakaka ntangu mingi mpenza, ata mpidina bo kevingilaka ve nde bo futa bo mbongo sambu na kisalu na bo. Piere kubakisaka mfunu ya kukebisa bampangi na yandi bambuta-bantu, na kigonsa  ya kugungula mameme ti zola ya “kubaka mbongo.” Yo kemonana pwelele nde, bantwadisi ya mabundu ya ‘Babilone ya nene’ mebwaka mpenza na kigonsa yai sambu bo kevandaka na luzingu ya kuluta mbote, kansi bantu mingi kezingaka na luzingu mosi ya kinsukami. (Kus. 18:2, 3) Bubu yai, bankuluntu kele ti bikuma ya mbote ya kukeba na konso kikalulu yina lenda nata bo na dyambu yai.

¹⁵ Polo kubikilaka bankuluntu mbandu ya mbote. Ata yandi vandaka ntumwa mpi yandi lendaka kuvanda “kilo” sambu na Bakristu ya Tesalonika, yandi ‘ndimaka ve nde muntu kupesa yandi madia ya ofele.’ Kansi, yandi “vandaka kusala ngolo, mpimpa ti mwini.” (2 Tes. 3:8) Bubu yai, bankuluntu mingi tanga mpi bayina kele bankengi-ntambudi, kepesaka mbandu ya mbote na dyambu yai. Ata bo kesepelaka mutindu bampangi-Bakristu kesadisaka bo ntangu bo keyambaka bo, bo kevandaka ve “kilo” sambu na bo.​—1 Tes. 2:9.

16. Kugungula mameme na “luzolo ti kiese” ketendula nki?

¹⁶ Bankuluntu kegungulaka mameme na “luzolo ti kiese.” Luzolo mpi kyese na bo kemonanaka na nkadilu na bo ya kuditambika ntangu bo kesadisaka mameme. Kansi, yo ketendula ve nde bo kepusaka mameme na kingolo-ngolo na kusadila Yehowa; dyaka bankuluntu ya zola kesyamisaka ve bampangi na kusadila Nzambi ti mpeve ya kutesana. (Gal. 5:26) Bankuluntu kebakisaka nde, konso dimeme kele ya kuswaswana ti yankaka. Bo kesepelaka kusadisa bampangi na bo na kusadila Yehowa na kyese yonso.

Beno Yala Ve Mameme, Kansi Beno Songa Mbandu ya Mbote

17, 18. (a) Sambu na nki, bantangu yankaka bantumwa vandaka kubakisa ve dilongi ya Yezu ya metala kudikulumusa? (b) Inki kele dyambu ya kiteso mosi yina beto lenda kutanaka ti yo?

¹⁷ Mutindu beto mekatuka kutubila yo, bankuluntu fwete vila ve nde mameme yina bo kegungula kele ya Nzambi, kansi ya bo ve. Bo kesalaka keba sambu bo ‘yala ve bantu yina Nzambi mepesaka bo na kukeba.’ (Tanga 1 Piere 5:3.) Na ntangu yankaka, bantumwa ya Yezu vandaka kusosa mikumba ti bangindu ya mbi. Bonso bantu yina vandaka kuyala makanda, bo vandaka kuzola kuvanda ti biyeka ya lukumu.​—Tanga Marko 10:42-45.

¹⁸ Bubu yai, bampangi yina ‘kezola kuvanda bantwadisi na dibundu’ fwete kuditadila bo mosi sambu na bikuma yina kepusa bo na kubaka mukumba yina. (1 Tim. 3:1) Bampangi yina kele bankuluntu bubu yai, lenda kudiyula na masonga yonso kana bo kele ti mpusa ya kiyeka to lukumu mutindu bantumwa yankaka kuvandaka ti yo. Kana dyambu yai kukuminaka bantumwa, bankuluntu fwete sala ngolo sambu na kubuya konso kikalulu ya mbi ya nsi-ntoto ya kuzola kuvanda ti kiyeka na zulu ya bankaka.

19. Inki bankuluntu fwete yibuka, ntangu bo kesalaka mambu sambu na kutanina mameme?

¹⁹ Ya kyeleka, bantangu yankaka bankuluntu fwete baka balukanu ya ngolo, mu mbandu ntangu bo ketaninaka mameme na “bambisi ya makasi.” (Bis. 20:28-30) Polo kusongaka Tito na ‘kulonga na kiyeka yonso, ti kunganina bampangi.’ (Tito 2:15) Ata ntangu yo kelombaka kusala mpidina, bankuluntu kesosaka kupesa luzitu na bantu yina bo ketadila. Bo kebakisaka nde na kisika ya kutuba na mutindu ya mbi, kundimisa na mutindu ya mbote kesadisaka ntangu yonso sambu na kusimba ntima ya muntu mpi kupusa yandi na kulanda nzila ya mbote.

20. Inki mutindu bankuluntu lenda landa mbandu ya Yezu na yina metala kupesa mbandu ya mbote?

²⁰ Mbandu ya mbote ya Kristu kepusaka bankuluntu na kuzola mameme. (Yoa. 13:12-15) Beto kevandaka na kyese ya mingi, ntangu beto ketangaka mutindu Yezu vandaka kulonga balongoki na yandi na kisalu ya kusamuna mpi ya kukumisa  bantu balongoki. Mbandu na yandi ya kudikulumusa kusimbaka ntima ya balongoki na yandi, mpi yo pusaka bo na ‘kudikulumusa na meso ya bantu yankaka, mpi na kutadila bantu yankaka bonso bo me luta bo na mfunu.’ (Filp. 2:3) Bubu yai, bankuluntu kezolaka kulanda mbandu ya Yezu mpi yo kepusaka bo na kuzola kuvanda “mbandu ya mbote” sambu na mameme.

21. Bankuluntu lenda vingila na kubaka nki balusakumunu?

²¹ Piere kusukisaka ndongisila na yandi yina yandi pesaka bambuta-bantu, na kutubilaka lusilu mosi yina ketadila makwisa. (Tanga 1 Piere 5:4.) Bankengi-bapakulami “ta baka mpu ya lukumu yina ya kitoko na yo ke manaka ve,” kumosi ti Kristu na zulu. Bilandi ya ngungudi yina kele na kati ya “mameme ya nkaka,” tavanda ti dibaku ya kugungula mameme ya Nzambi awa na ntoto na nsi ya lutwadisu ya “Ngungudi ya nene.” (Yoa. 10:16) Disolo ya kelanda tatubila mitindu yina bampangi na dibundu lenda sadisa bantu yina Nzambi meponaka sambu na kutwadisa dibundu.

Mvutukila

• Sambu na nki yo fwanaka nde, Piere kulongisila bampangi na yandi bankuluntu na kugungula mameme yina Nzambi kupesaka bo na kukeba?

• Inki mutindu bankuluntu fwete gungula mameme yina kebela na kimpeve?

• Inki kepusaka bankuluntu na kugungula mameme yina Nzambi mepesaka bo na kukeba?

[Bangyufula ya disolo ya kulonguka]

[Kifwanisu ya kele na lutiti 25]

Bonso bangungudi ya ntangu ya ntama, bubu yai bankuluntu fwete tanina “mameme” yina Nzambi mepesaka bo na kukeba